20/01/2026
मालेगाव कॅम्प : येथील, महात्मा गांधी विद्यामंदिर संचलित, महिलारत्न पुष्पाताई हिरे कला, विज्ञान व वाणिज्य महिला महाविद्यालयाच्या संगीत विभागाद्वारे,दि.१७ जानेवारी २०२६ रोजी, एकदिवसीय "महिलारत्न पुष्पाताई हिरे राज्यस्तरीय आंतरमहाविद्यालयीन गायन स्पर्धेचे" सकाळी ८ ते सायंकाळी ५ वाजेपर्यंत महिलारत्न पुष्पाताई हिरे कला, विज्ञान व वाणिज्य महिला महाविद्यालय, मालेगाव कॅम्प येथे आयोजन करण्यात आले असून सदर स्पर्धेचा पारितोषिक वितरण समारंभ सायंकाळी पाच वाजता आयोजित करण्यात आलेला आहे.
शास्त्रीय संगीताबरोबरच उपशास्त्रीय संगीत, सुगम संगीत इत्यादी संगीत प्रकारांचे जतन-संवर्धन व्हावे व या स्पर्धेच्या माध्यमातून संगीत शिक्षणाची व संगीताच्या प्रचार-प्रसाराची चळवळ अधिक जोमाने गतिमान व्हावी या उदात्त हेतुने ह्या स्पर्धेचे दरवर्षी आयोजन केले जाते.
या स्पर्धेत वैयक्तिक उत्तर हिंदुस्तानी शास्त्रीय संगीत गायन, वैयक्तिक उपशास्त्रीय संगीत गायन, वैयक्तिक भारतीय सुगम संगीत गायन, वैयक्तिक पाश्चात्य सुगम संगीत गायन, भारतीय समूहगीत गायन व पाश्चात्य समूहगीत गायन अशा सहा स्पर्धा प्रकारांचा समावेश करण्यात आलेला आहे. प्रत्येक स्पर्धा प्रकारांमध्ये ७००१,५००१ व २१०१ रुपये रोख याप्रमाणे अनुक्रमे प्रथम, द्वितीय व तृतीय क्रमांकांची पारितोषिके ठेवण्यात आलेली आहेत. या स्पर्धेत सहभागी होणाऱ्या सर्व स्पर्धकांना प्रमाणपत्रे देण्यात येतील तसेच सदर स्पर्धेत सर्वोत्कृष्ट ठरणाऱ्या स्पर्धकसंघाला फिरता चषक प्रदान केला जाईल.
सदर स्पर्धेतील पारितोषिके संगीत क्षेत्रातील ख्यातनाम दिग्गजांच्या हस्ते वितरीत करण्याची परंपरा आहे.या स्पर्धेचे हे सातवे वर्ष असून अल्पावधीतच महाराष्ट्रातील महाविद्यालयीन संगीतप्रेमी स्पर्धक विद्यार्थ्यांमध्ये ही स्पर्धा अत्यंत प्रिय व प्रतिष्ठेची ठरलेली आहे.
याहीवर्षी महाराष्ट्रातील विविध विद्यापीठे व महाविद्यालयांतील संगीतप्रेमी विद्यार्थ्यांनी मोठ्या संख्येने सदर स्पर्धेत सहभाग घ्यावा व स्पर्धेनुषंगाने अधिक माहितीसाठी महाविद्यालयाच्या प्राचार्य डॉ. रजनी पाटील, उपप्राचार्य डॉ. दीपांजली बोरसे, संगीत विभागप्रमुख प्रा. अशोक एस. जाधव (मो.९३७१९२०६६६) , डॉ. संतोष द. परचुरे(मो.९२७२७२७९९९) ,प्रा.अनुज बोंगाणे (८२०८८१२०७९) व प्रा.नेहा चव्हाण (९५२९३४३७२८) यांच्याशी संपर्क साधावा असे आवाहन महात्मा गांधी विद्यामंदिर संस्थेच्या समन्वयक तथा महाविद्यालय विकास समितीच्या अध्यक्ष डॉ. संपदा प्रशांत हिरे यांनी सदर प्रसिद्धी पत्रकाद्वारे केले आहे.
#महिलारत्न_पुष्पाताई_हिरे #राज्यस्तरीय_गायन_स्पर्धा
