26/09/2026
*कन्या महाविद्यालयाच्या एन.एस.एस. स्वयंसेविकांकडून मिरज शहरातील गणेश तलाव परिसरात स्वच्छता अभियान*
मिरज : कन्या महाविद्यालय, मिरजच्या राष्ट्रीय सेवा योजना (एन.एस.एस.) विभागाच्या वतीने गणेश तलाव, मिरज तसेच शिवाजी महाराज पुतळा ते गांधी पुतळा परिसरात स्वच्छता अभियान राबविण्यात आले. गणेश चतुर्थीनिमित्त परिसरात मोठ्या प्रमाणात जमा झालेला कचरा हटवून परिसर स्वच्छ करण्यात आला.
गणेशोत्सवानंतर सार्वजनिक ठिकाणी निर्माण झालेला कचरा लक्षात घेऊन एन.एस.एस.च्या स्वयंसेविका विद्यार्थिनींनी सामाजिक बांधिलकीची जाणीव ठेवत स्वच्छता मोहिमेत उत्स्फूर्त सहभाग घेतला. गणेश तलाव परिसरातील कचरा, निर्माल्य व इतर घाण साफ करून परिसर स्वच्छ करण्यात आला. तसेच शिवाजी महाराज पुतळा ते गांधी पुतळा या मार्गावरील परिसरातही विद्यार्थिनींनी झाडूच्या साहाय्याने स्वच्छता केली.
या अभियानामध्ये एन.एस.एस.च्या ३५ स्वयंसेविका विद्यार्थिनींनी सक्रिय सहभाग घेतला. विद्यार्थिनींनी स्वच्छता करताना नागरिकांना “स्वच्छता हीच खरी सेवा”, “निर्माल्य-कुंडात अर्पण करा”, “स्वच्छतेची शक्ती- बाप्पाची भक्ती ” अशा संदेशांच्या माध्यमातून सार्वजनिक ठिकाणी कचरा न टाकण्याचे आवाहन केले. या उपक्रमास महानगरपालिकेच्या कर्मचाऱ्यांनीही सहकार्य केले.
या स्वच्छता अभियानाच्या वेळी राष्ट्रीय सेवा योजना वरिष्ठ विभागाचे प्रमुख प्रा. विनायक वनमोरे, डॉ. जयकुमार चंदनशिवे, डॉ. सागर पाटील, डॉ. गंगाधर चव्हाण, डॉ. शबाना हळिंगळी, डॉ. मधुरा जाधव,एन.एस.विद्यार्थिनी प्रतिनिधी कु.प्रांजल पोळ आणि 35 स्वयंसेविका विद्यार्थिनी उपस्थित होत्या.
एन.एस.एस.च्या माध्यमातून विद्यार्थिनींमध्ये सामाजिक बांधिलकी, श्रमप्रतिष्ठा, पर्यावरण संवर्धन आणि सार्वजनिक स्वच्छतेची जाणीव निर्माण करण्याच्या उद्देशाने हा उपक्रम राबविण्यात आला. गणेशोत्सवानंतर स्वच्छता राखण्याचा संदेश देत विद्यार्थिनींनी केलेल्या या उपक्रमाचे उपस्थितांनी कौतुक केले.
“स्वच्छ परिसर ही केवळ प्रशासनाची जबाबदारी नसून प्रत्येक नागरिकाची सामाजिक जबाबदारी आहे,” हा संदेश या अभियानातून देण्यात आला.
