07/01/2026
"ए. सी. दिवेकर महाविद्यालयात रसायनशास्त्र विभागाच्या वतीने"उद्योजकता विकास कार्यशाळेचे" आयोजन =
ए. सी. दिवेकर महाविद्यालयात दिनांक 5-जानेवारी 2026 रोजी रसायनशास्त्र विभागाच्या वतीने "उद्योजकता विकास मार्गदर्शन कार्यशाळेचे" उद्घाटन उत्साहात पार पडले. विद्यार्थ्यांमध्ये उद्योजकीय विचारसरणी विकसित करणे व स्वयंरोजगाराच्या संधींबाबत मार्गदर्शन करणे हा या कार्यशाळेचा मुख्य उद्देश होता. कार्यक्रमाच्या अध्यक्षस्थानी संस्थेचे विश्वस्त मा.अंकुश भाऊ दिवेकर होते.
कार्यशाळेचे उद्घाटन महाविद्यालयाचे प्राचार्य डॉ. अनिल शितोळे आणि प्रमुख पाहुणे नितीन बेंद्रे(उद्योजकता विकास केंद्र पुणे)यांच्या शुभहस्ते करण्यात आले. यावेळी प्रमुख पाहुणे म्हणून उद्योजक श्री. मोहन शितोळे(सीईओ सह्याद्री इलेक्ट्रीकल इंडस्ट्री बारामती)उपस्थित होते. उद्घाटनप्रसंगी प्रमुख पाहुण्यांनी विद्यार्थ्यांना संबोधित करताना उद्योजकतेचे महत्त्व, नवकल्पना, जोखीम घेण्याची तयारी आणि मेहनतीचे मूल्य यावर सविस्तर मार्गदर्शन केले. “नोकरी शोधणारे नव्हे तर नोकरी देणारे बना,” असा संदेश त्यांनी विद्यार्थ्यांना दिला.यावेळी श्री नितीन बेंद्रे यांनी "उद्योग व वित्तपुरवठा",श्री मोहन शितोळे यांनी,"मी उद्योजक कसा घडलो " ,डॉ. श्वेता काटे यांनी "व्यक्तिमत्व विकास" या विषयावर मार्गदर्शन केले.
प्राचार्य डॉ.अनिल शितोळे यांनी आपल्या भाषणात महाविद्यालयामार्फत राबविण्यात येणाऱ्या विविध कौशल्यविकास व उद्योजकता उपक्रमांची माहिती दिली. अशा कार्यशाळांमुळे विद्यार्थ्यांचा आत्मविश्वास वाढून त्यांना भविष्यात यशस्वी उद्योजक होता येईल, असे त्यांनी नमूद केले.उपप्राचार्य डॉ. शरद गाडेकर,माजी विद्यार्थी संघाचे अध्यक्ष श्री सुजीत दिवेकर यांनी कार्यशाळेस शुभेच्छा व्यक्त केल्या. कार्यक्रमास IQAC समन्वयक प्रा डॉ सनिंधर गायकवाड, रसायनशास्त्र विभागातील प्राध्यापक उपस्थित होते.
कार्यक्रमाचे प्रास्ताविक रसायनशास्त्र विभाग प्रमुख व कार्यशाळे समन्वयक प्रा. डॉ कल्याण लांगोरे यांनी केले. सूत्रसंचालन प्रा राणी नांदखिले ,प्रा. दीपाली थोरात व प्रा. काळे यांनी केले तर उपस्थितांचे आभार प्रा. डॉ सुधीर पाटील यांनी मानले.
या उद्घाटन कार्यक्रमाला महाविद्यालयातील प्राध्यापक, शिक्षकेतर सेवक व विद्यार्थी मोठ्या संख्येने उपस्थित होते. उद्योजकता विकास कार्यशाळेच्या उद्घाटनाने विद्यार्थ्यांमध्ये नवचैतन्य निर्माण झाले.
