23/09/2026
◆ शहादा येथील औषधनिर्माणशास्त्र महाविद्यालयात ‘मिशन साहसी’ अभियान उत्साहात; उपनगराध्यक्षा सौ. माधवीताई पाटील यांचे विद्यार्थिनींना आरोग्य व स्वसंरक्षणाबाबत मार्गदर्शन; ‘निर्भय बना, सक्षम बना’चा संदेश ..◆
कवयित्री बहिणाबाई चौधरी उत्तर महाराष्ट्र विद्यापीठ, जळगावच्या विद्यार्थी विकास विभाग आणि पूज्य साने गुरुजी विद्या प्रसारक मंडळाचे औषधनिर्माणशास्त्र महाविद्यालय, शहादा यांच्या संयुक्त विद्यमाने आयोजित “युवती सभा” अंतर्गत महाविद्यालयातील विद्यार्थिनींसाठी “मिशन साहसी अभियान” उत्साहात संपन्न झाले. या उपक्रमाचे उद्घाटन शहादा नगरपालिकेच्या उपनगराध्यक्षा सौ. माधवीताई मकरंदभाई पाटील यांच्या हस्ते करण्यात आले. यावेळी शहादा येथील प्रसिद्ध स्त्रीरोगतज्ज्ञ व वक्त्या डॉ स्मिता जैन, स्त्रीरोगतज्ज्ञ व वक्त्या डॉ सोनाली पाटील, महाविद्यालयाचे प्राचार्य डॉ एस.पी.पवार उपस्थित होते. सर्वप्रथम उपस्थित मान्यवरांच्या हस्ते माँ सरस्वती, स्व.अण्णासाहेब पी.के.पाटील, कवयित्री बहिणाबाई चौधरी यांच्या प्रतिमेच पूजन व दीपप्रज्वलन करून अभियानाची सुरुवात करण्यात आली. विद्यापीठाच्या विद्यार्थी विकास विभागाच्या आत्मनिर्भर युवती अभियान अंतर्गत “मिशन साहसी अभियान” हा उपक्रम विद्यार्थिनींना स्वरक्षणार्थ कराटे किंवा योगा शिक्षण, स्त्री आरोग्य विषयक जागृती समस्या संदर्भात उपाययोजना, स्त्री स्वयंरोजगार विषयक माहिती या उपक्रमाच्या माध्यातून विद्यार्थिनींना व्हावी हा उद्देश आहे. युवतींमध्ये राष्ट्राभिमान, राष्ट्रसेवा व शिस्त हे मूल्य रुजविण्यासाठी व त्यांना या दृष्टिकोनातून कौशल्य युक्त बनविण्यासाठी ही योजना शैक्षणिक वर्ष २०२२-२३ पासून विद्यापीठ क्षेत्रातील संलग्नित महाविद्यालयातील विद्यार्थिनींसाठी हा उपक्रम राबविण्यात येत असतो. त्यानुषगाने चालू शैक्षणिक वर्ष २०२६ - २७ मध्ये कार्यक्रमाचा एक भाग म्हणून महाविद्यालयातील विद्यार्थिनींनी शिक्षणासोबतच स्वसंरक्षणाचे कौशल्य आत्मसात करून निर्भयपणे जीवन जगावे, या उद्देशाने ‘मिशन साहसी’ अभियानाचे आयोजन करण्यात आले. यावेळी पहिल्या दिवशी उद्घाटन प्रसंगी सौ.माधवीताई पाटील यांनी विद्यार्थिनींना आरोग्य, स्वच्छता, संतुलित आहार आणि निरोगी जीवनशैली याबाबत मार्गदर्शन केले. यावेळी त्यांनी विद्यार्थिनींनी कोणत्याही परिस्थितीला आत्मविश्वासाने सामोरे जावे, स्वतःच्या आरोग्याची काळजी घ्यावी आणि ‘निर्भय बना, सक्षम बना’ हा दृष्टिकोन अंगीकारावा, असे आवाहन केले. कर्करोगाविषयी भीती व गैरसमज दूर करण्यासाठी लसीकरण तसेच कर्करोगविषयक जनजागृती करणे अत्यंत महत्त्वाचे आहे. विद्यार्थिनींनी आपल्या ज्ञानाचा उपयोग करून समाजामध्ये कर्करोग प्रतिबंध, लसीकरण आणि आरोग्यविषयक जागृती निर्माण करण्यासाठी पुढाकार घ्यावा व कर्करोग संदर्भातील ज्ञान व जनजागृती केवळ स्वतःपुरती मर्यादित न ठेवता ती संपूर्ण समाजापर्यंत पोहोचविण्याचे आवाहन केले. दुसऱ्या दिवशी शहादा येथील प्रसिद्ध स्त्रीरोगतज्ज्ञ व वक्त्या डॉ स्मिता जैन यांनी स्त्रीरोगतज्ज्ञ व स्त्री आरोग्य विषयक जागृती समस्या संदर्भात उपाययोजन अंतर्गत कर्करोग विषय सविस्तर माहिती दिली. यामध्ये एचपीव्ही (ह्युमन पॅपिलोमाव्हायरस) लस ही एचपीव्हीच्या संसर्गापासून संरक्षण करणारी अत्यंत महत्त्वाची लस आहे. एचपीव्ही संसर्गामुळे गर्भाशयमुखाचा कर्करोग तसेच लिंग, गुदद्वार आणि घशाच्या काही कर्करोगांचा धोका वाढू शकतो. एचपीव्ही लसीकरणामुळे या संसर्गाचा आणि त्यातून होणाऱ्या संबंधित कर्करोगांचा धोका कमी करण्यास मदत होते. लस शरीराची रोगप्रतिकारक शक्ती सक्रिय करून एचपीव्हीविरुद्ध प्रतिपिंडे तयार करण्यास मदत करते. लसीकरणाबाबत असलेल्या गैरसमजुती दूर करून योग्य वेळी लसीकरण करणे महत्त्वाचे आहे. मात्र, लस घेतल्यानंतरही नियमित आरोग्य तपासणी व आवश्यक स्क्रीनिंग करणे तितकेच गरजेचे आहे. जागरूक व्हा, योग्य माहिती घ्या आणि एचपीव्ही लसीकरणाला प्राधान्य द्या. कर्करोग प्रतिबंधासाठी लसीकरण ही एक महत्त्वाची पायरी आहे. तिसऱ्या वक्त्या डॉ सोनाली पाटील यांनी स्त्री प्रजनन संस्थेविषयी सविस्तर माहिती देऊन त्यांच्या समस्येचे निवारण केले. यावेळी त्यांनी गर्भधारणा आणि स्त्री प्रजनन संस्थेची रचना समजून घेणे महिलांच्या आरोग्यासाठी अत्यंत महत्त्वाचे आहे. गर्भाशय, गर्भाशयमुख, अंडाशय, बीजवाहिन्या आणि योनी या अवयवांचे आरोग्य जपणे गरजेचे आहे. अनियमित मासिक पाळी, अतिरक्तस्राव, पोटदुखी, असामान्य योनीस्राव किंवा संसर्गाची लक्षणे दिसल्यास दुर्लक्ष न करता वेळीच वैद्यकीय सल्ला घ्यावा. नियमित आरोग्य तपासणी, संतुलित आहार, स्वच्छता आणि निरोगी जीवनशैली यामुळे अनेक आजारांचा धोका कमी करता येतो. लक्षणांकडे दुर्लक्ष करू नका, आरोग्याची काळजी घ्या आणि वेळीच तज्ज्ञांचा सल्ला घेणे महत्वाचे आहे. चौथ्या व पाचव्या दिवशी शहादा येथील योगा प्रशिक्षिका प्रा.सौ.मंगल रविंद्र पाटील, कु.अनुश्री रविंद्र पाटील यांनी योगा शिक्षण विषयी मार्गदर्शन करताना सांगितले की, योगासने हे खूप महत्त्वाचे असून योगासनांमध्ये शारीरिक आरोग्यासह मानसिक आरोग्याला ही भर देण्यात मदत होते. योगासनांमुळे तणावापासून मजबूतीपर्यंत आणि नकारात्मकपासून सकारात्मककडे जाण्याचा मार्ग दाखवतो. ध्यान केल्याने आपण तणावमुक्त होत असतो व अध्यात्मिक ज्ञान मिळते तसेच शारीरिक व मानसिक स्थिती चांगली राहते. योगासने केल्याने आपण विविध आजारांवर मात करू शकतो. यावेळी त्यांनी सर्वाना विविध योगासने, आसने, प्राणायाम त्यात सूक्ष्म व्यायाम ,प्राणायाम, सूर्यनमस्कार ,मांडूका आसन, नटराज आसन, वृक्षासन, ध्यान, अष्टचक्र, हास्यासन व त्यांचे प्रात्यक्षिके आणि महत्त्व पटवून दिले. शेवटच्या सहाव्या दिवशी समारोप प्रसंगी संवाद कार्यक्रम ठेवण्यात आला होता. यावेळी विद्यार्थिनींनी मनोगत व्यक्त केले. समारोप प्रसंगी अध्यक्षस्थानी प्राचार्य डॉ.एस.पी.पवार उपस्थित होते. महिला व विद्यार्थिनींनी कोणत्याही संकटाला घाबरून न जाता धैर्याने सामोरे जावे, त्यांच्यामध्ये आत्मविश्वास निर्माण व्हावा आणि सुरक्षित वातावरण निर्माण होण्यास हातभार लागावा, तसेच आरोग्य विषयी जागरूकता व्हावी हा या अभियानाचा प्रमुख उद्देश असल्याचे महाविद्यालयाचे प्राचार्य डॉ एस.पी.पवार यांनी समारोप प्रसंगी सांगितले. ‘मिशन साहसी’ अभियानामुळे विद्यार्थिनींमध्ये आत्मविश्वास, धैर्य आणि स्वसंरक्षणाची जाणीव अधिक दृढ झाली. या अभियानात ४० विद्यार्थीनींनी सहभाग नोंदवला होता. सदर कार्यक्रमासाठी पूज्य साने गुरुजी विद्या प्रसारक मंडळाचे अध्यक्ष श्री बापूसाहेब दीपकभाई पाटील, उपाध्यक्ष श्री जगदीशभाई पाटील, शैक्षणिक व सामान्य प्रशासन विभागाचे समन्वयक प्रा.मकरंदभाई पाटील, मंडळाचे संचालक तथा कृषी उत्पन्न बाजार समितीचे संचालक श्री मयूर भाई पाटील, प्राचार्य डॉ.एस.पी.पवार यांचे मार्गदर्शन लाभले. समारोप प्रसंगी सूत्रसंचालन अंतिम वर्षाची विद्यार्थीनी कु. चौधरी प्रियंका कैलास, कु.शर्मा श्वेताकुमारी चंद्रदेव यांनी केले तर आभार अंतिम वर्षाची विद्यार्थीनी कु.चौधरी किंजल उदय यांनी मानले. कार्यक्रमाच्या यशस्वीतेसाठी महाविद्यालयाच्या विद्यार्थी विकास अधिकारी व युवती सभा प्रमुख प्रा.मानसी ए.धनकानी, प्रा.नेहा पी. पाटील तसेच महाविद्यालयातील प्राध्यापक व कर्मचारी वृंद यांनी परिश्रम घेतले.
https://youtu.be/3NfpqqXc1_Q?si=_gg96O0f_xE_dsaX
"Mission Saahasi Abhiyan " Organized by P.S.G.V.P.Mandal’s College of Pharmacy,Shahada
