07/09/2026
ध्येयवादी बना, संकटांना सामोरे जात यशाचे शिखर गाठा – सिद्धाराम पाटील
सोलापूर, दि. ३ सप्टेंबर २०२६ : सहकार तपस्वी कै. मा. आ. ब्रह्मदेवदादा माने यांच्या २४ व्या स्मृतिदिनानी शि प्र मंडळ, कुमठे यांच्या वतीने आयोजित ‘अभिवादन सभा’ संपन्न झाली.
कार्यक्रमाच्या अध्यक्षस्थानी महापौर मा. श्री. विनायक कोंड्याल होते, तर प्रमुख पाहुणे ज्येष्ठ विचारवंत ‘सकाळ’चे कार्यकारी संपादक मा. श्री. सिद्धाराम पाटील उपस्थित होते. संस्थेचे मुख्य विश्वस्त तथा नगरसेवक मा. श्री. जयकुमार माने, विश्वस्त मा. स्वाती माने, मा. श्री. अजित भैय्या माने, प्रा रोहिणी चव्हाण, प्रा जयसिंह गायकवाड यांच्यासह संस्थेचे पदाधिकारी, शिक्षक, विद्यार्थी व मान्यवर उपस्थित होते.
प्रारंभी मान्यवरांच्या हस्ते कै. मा आ ब्रह्मदेवदादा यांच्या प्रतिमेचे पूजन व पुष्पहार अर्पण करून अभिवादन करण्यात आले. मा. श्री. जयकुमार माने यांनी प्रास्ताविकातून कै. ब्रह्मदेवदादा यांच्या स्मृतींना उजाळा दिला. दादांनी शिक्षण, सहकार आणि समाजसेवेच्या माध्यमातून उभे केलेले कार्य, त्यांची दूरदृष्टी, सर्वसामान्यांविषयीची तळमळ आणि शिक्षण क्षेत्राच्या विकासासाठी त्यांनी केलेले योगदान यांचा त्यांनी उल्लेख केला. दादांनी रुजविलेल्या शैक्षणिक व सामाजिक मूल्यांची जपणूक करून त्यांच्या विचारांचा व कार्याचा वारसा पुढे नेणे हीच त्यांना खरी आदरांजली ठरेल, असे त्यांनी नमूद केले.
यावेळी प्रमुख मा सिद्धाराम पाटील यांनी विद्यार्थ्यांशी संवाद साधत त्यांना प्रेरणादायी मार्गदर्शन केले. “विद्यार्थ्यांनी ध्येयवादी बनले पाहिजे. आयुष्यात अनेक संकटे आणि अडचणी येतील; मात्र त्यावर मात करण्यासाठी सातत्यपूर्ण प्रयत्न, सकारात्मक विचार आणि आत्मविश्वास आवश्यक आहे,” असे त्यांनी सांगितले. मार्गदर्शन करताना त्यांनी स्वामी विवेकानंद यांच्या जीवनातील अनेक प्रेरणादायी प्रसंग व उदाहरणे विद्यार्थ्यांसमोर मांडली.
शिक्षणासोबतच वाचनाची आवड जोपासणे, सतत प्रयत्नशील राहणे आणि बदलत्या काळानुसार स्वतःला घडविणे आवश्यक असल्याचे त्यांनी अधोरेखित केले. विद्यार्थ्यांनी आपल्या ध्येयाबाबत स्पष्टता ठेवून ज्ञानाच्या कक्षा रुंदावाव्यात तसेच समाजाप्रती असलेली आपली जबाबदारी ओळखून वाटचाल करावी, असे आवाहन त्यांनी केले.
यावेळी कै. ब्रह्मदेवदादा यांच्या जीवनकार्यावरही श्री पाटील यांनी प्रकाश टाकला. शिक्षण, सहकार आणि समाजसेवेच्या माध्यमातून दादांनी उभे केलेले कार्य हे पुढील पिढीसाठी प्रेरणादायी असून, त्यांच्या विचारांतून विद्यार्थ्यांनी ध्येय, जिद्द, सामाजिक बांधिलकी आणि सेवाभावाची प्रेरणा घ्यावी, असे त्यांनी नमूद केले.
कार्यक्रमाचे अध्यक्ष महापौर विनायक कोंड्याल यांनी विद्यार्थ्यांना मार्गदर्शन करताना, “ध्येयाचा पाठलाग करा आणि आपल्या निश्चित ठिकाणी पोहोचा,” असे आवाहन केले. जीवनात ध्येय निश्चित करून त्यासाठी सातत्याने प्रयत्न केल्यास यश निश्चित मिळते, असा विश्वास त्यांनी व्यक्त केला. विद्यार्थ्यांनी आपल्या क्षमता ओळखून शिक्षण, कौशल्य आणि कर्तृत्वाच्या जोरावर समाजात आपले स्थान निर्माण करावे, असेही त्यांनी सांगितले.
यावेळी शिक्षण संकुलाचे विद्यार्थी, शिक्षक, प्राध्यापक त्याबरोबरच कुमठे परिसरातील नागरिकांची मोठया संख्येने उपस्थिती होती.
कार्यक्रमाचे सूत्रसंचालन प्रा. गिरिजा दीक्षित व प्रा. ज्ञानेश्वर जाधव यांनी केले, तर प्रा. संजय जाधव यांनी आभार प्रदर्शन केले.
