03/10/2017
សម្តេចតេជោកោតសរសើរសាកលវិទ្យាល័យចេនឡាក្នុងការបញ្ជួននិស្សិតទៅជប៉ុន
សម្តេចតេជោ ហ៊ុន សែន នាយករដ្ឋមន្ត្រី បានថ្លែងកោតសរសើរសាកលវិទ្យាល័យចេនឡា ក្នុងការបញ្ជូននិស្សិតផ្នែកថែទាំសុខភាពទៅធ្វើការនៅប្រទេសជប៉ុន ក្នុងពិធីប្រគល់សញ្ញាបត្រជ័យលាភីជូននិស្សិតសាកលវិទ្យាល័យចេនឡាចំនួន ២៨៣៨នាក់ នៅសាលពិព័រណ៍កោះពេជ្រ នាថ្ងៃទី២៨ ខែកញ្ញា ឆ្នាំ២០១៧ កន្លងទៅ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងការកោតសរសើរខ្ពស់ចំពោះសាកលវិទ្យាល័យចេនឡា ដែលបានខិតខំប្រឹងប្រែងបង្កើត និងអភវិឌ្ឍគ្រឹះស្ថានសិក្សាមួយនេះ ជាមួយការធ្វើទំនើបកម្មប្រកបដោយគុណភាព ។
---------------------------------------------------------------
សម្តេចបាន បញ្ជាក់បន្តថា សម្តេចសប្បាយរីករាយខ្លាំងណាស់ ដែលបានការអញ្ជើញជាកិត្តិយសមកប្រគល់ សញ្ញាបត្រជូននិស្សិតសាកលវិទ្យាល័យចេនឡា ជាងពីរពាន់នាក់ក្នុងពេលនេះ។ សម្តេចនាយក រដ្ឋមន្ត្រីបានកោតសរសើរដល់និស្សិតជ័យលាភីទាំងអស់ គណៈគ្រប់គ្រងសាលា សាស្ត្រាចារ្យ និងអាណាព្យាបាលនិស្សិត ដែលបានខិតខំរហូតទទួលបានជោគជ័យនៅថ្ងៃនេះ។ ហើយការរីកចម្រើន របស់សាកលវិទ្យាល័យចេនឡា គឺជាការចូលរួមចំណែកយ៉ាងសំខាន់ក្នុងការកសាង និងអភិវឌ្ឍធនធានមនុស្សនៅកម្ពុជាដែលជាទិសដៅអាទិភាពមួយនៃចក្ខុវិស័យអភិវឌ្ឍរបស់រាជរដ្ឋាភិបាល។ លើសពីនេះទៅទៀត សម្តេចតេជោ នាយករដ្ឋមន្ត្រី បានសម្តែងការអបអរសាទរចំពោះសាកលវិទ្យាល័យចេនឡា ក្នុងការបញ្ជូននិស្សិតផ្នែកថែទាំសុខភាពឲ្យទៅធ្វើការនៅប្រទេសជប៉ុនចំនួនមួយពាន់នាក់ជារៀងរាល់ឆ្នាំ ដែលជាលទ្ធផលយ៉ាងល្អប្រសើរមួយ បានឆ្លើយតបទៅតាមសំណើរបស់សម្តេចស្នើទៅកាន់លោកនាយករដ្ឋមន្ត្រី ហ្ស៊ីនសូអាបេ ក្នុងជំនួបនៅឯប្រទេសជប៉ុនក្នុងពេលកន្លងទៅ ដែលពេលនោះប្រទសជប៉ុនកំពុងខ្វះពលកម្ម ផ្នែកថែទាំមនុស្សចាស់នៅតាមមន្ទីរពេទ្យក្នុងប្រទេសជប៉ុន។
-----------------------------------------------------------
ឆ្លើយតបនឹងការបញ្ជូននិស្សិតផ្នែកថែទាំសុខភាពទៅធ្វើការនៅប្រទេសជប៉ុននេះលោក ស៊ិន ខណ្ឌី សាកលវិទ្យាធិការសាកលវិទ្យាល័យចេនឡា បានបញ្ជាក់ថា សាកលវិទ្យាល័យចេនឡា បានបើកកិច្ចសហប្រតិបត្តិការជាមួយវិទ្យាស្ថាន ISI (អាយ អេស អាយ) នៃប្រទេសជប៉ុន ក្រោយជំនួបរវាងនាយករដ្ឋមន្ត្រីនៃប្រទេសទាំងពីរកម្ពុជា-ជប៉ុនកន្លងមក ហើយនិស្សិតផ្នែកថែទាំសុខភាព ដែលសាលាបានបញ្ជូនទៅធ្វើការនៅប្រទេសជប៉ុន ពួកគាត់នឹងទទួលបានអត្ថប្រយោជន៍ជាច្រើន ដូចជា ទី១-ទទួលបានទិដ្ឋការទៅធ្វើការនៅប្រទេសជប៉ុនរយៈពេលយូរ ០៣-០៥ឆ្នាំ, ទី២-ទទួលបានប្រាក់បៀរវត្សខ្ពស់ចាប់ពី១៧០០ដុល្លាឡើងទៅ, ទី៣-ទទួលបានចំណេះដឹងផ្នែកភាសាជប៉ុន ដែលជាភាសាមហាអំណាចសេដ្ឋកិច្ចនៃពិភពលោក, ទី៤-បានចាក់គ្រឹះចំណេះដឹងបន្ថែមនូវបច្ចេកទេស និងបច្ចេកវិទ្យា សម្រាប់បម្រើឲ្យប្រទេសជាតិយើងនាថ្ងៃអនាគត និងទី៥-ទទួលបានវិញ្ញាបនបត្រ បញ្ជាក់ពីបទពិសោធន៍ និងចំណេះដឹង ដែលនឹងចេញដោយមន្ទីរពេទ្យនៃប្រទេសជប៉ុន ៕
-----------------------------------------------------------
