University of Health Sciences

13/10/2026

ឱកាសការងារ/បង្រៀននៅសាកលវិទ្យាល័យវិទ្យាសាស្រ្តសុខាភិបាល
--
១. ដំណឹងជ្រើសរើសគ្រូបង្រៀន៖ សម្រាប់មុខវិជ្ជា Molecular, Biochemistry, Immunology-Serology សម្រាប់កម្មវិធីសិក្សាថ្នាក់បរិញ្ញាបត្រវិទ្យាសាស្រ្តបច្ចេកទេសមន្ទីរពិសោធន៍វេជ្ជសាស្រ្ត នៅមហាវិទ្យាល័យសម្ព័ន្ធសុខាភិបាល។
២. ដំណឹងជ្រើសរើសគ្រូបង្រៀន៖ សម្រាប់មុខវិជ្ជា Hematology សម្រាប់កម្មវិធីសិក្សាថ្នាក់បរិញ្ញាបត្រវិទ្យាសាស្រ្តបច្ចេកទេសមន្ទីរពិសោធន៍វេជ្ជសាស្រ្ត នៅមហាវិទ្យាល័យសម្ព័ន្ធសុខាភិបាល។
៣. ដំណឹងជ្រើសរើស៖អ្នកដើរតួជាអ្នកជំងឺ (Standardized Patients) ចំនួន ២៤ នាក់ ដើម្បីចូលរួមក្នុងការប្រឡងជំនាញគ្លីនិក Objective Structured Clinical Examination (OSCE) របស់និស្សិតវេជ្ជសាស្ត្រ ឱ្យចូលបំពេញការងារនៅមហាវិទ្យាល័យវេជ្ជសាស្រ្ត
៤. ដំណឹងជ្រើសរើស៖បុគ្គលិកជាប់កិច្ចសន្យា ចំនួន ០១រូប តួនាទីជាគ្រូបង្រៀនពេញម៉ោង សម្រាប់មុខវិជ្ជា Immunology-Serology និង Biochemistry សម្រាប់កម្មវិធីសិក្សាថ្នាក់បរិញ្ញាបត្របច្ចេកទេសមន្ទីរពិសោធន៍វេជ្ជសាស្រ្ត ឱ្យចូលបម្រើការងារនៅមហាវិទ្យាល័យសម្ព័ន្ធសុខាភិបាល។

11/10/2026

សូមអនុមោទនា បុណ្យភ្ជុំបិណ្ឌ ថ្ងៃអាទិត្យ ១៥រោច ខែភទ្របទ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១១ ខែតុលា ឆ្នាំ២០២៦

សូមជូនពរជ័យ សព្ទសារធុការ ដល់បងប្អូនប្រជាពលរដ្ឋកម្ពុជាទាំងអស់ ក្នុងឱកាសពិធីបុណ្យភ្ជុំបិណ្ឌ។

11/10/2026

10/10/2026

គណៈប្រតិភូ Taizhou Vocational & Technical College អញ្ជើញមកទស្សនកិច្ចសិក្សានៅមហាវិទ្យាល័យគិលានុបដ្ឋាក និងឆ្មប
—
ទីតាំងទី២ នៃស.វ.ស ៖ នៅថ្ងៃទី៨ ខែតុលា ឆ្នាំ២០២៦ លោកស្រី ព្រាប ដារី មន្រ្តីទទួលបន្ទុកដឹកនាំមហាវិទ្យាល័យគិលានុបដ្ឋាក និងឆ្មប នៃសាកលវិទ្យាល័យវិទ្យាសាស្ត្រសុខាភិបាល បានទទួលស្វាគមន៍គណៈប្រតិភូមកពី Taizhou Vocational & Technical College នៃសាធារណរដ្ឋប្រជាមានិតចិន ដែលបានអញ្ជើញមកទស្សនកិច្ចសិក្សានៅបន្ទប់ Simulation របស់មហាវិទ្យាល័យ។

ទស្សនកិច្ចនេះមានគោលបំណងជួយពង្រឹងការគ្រប់គ្រងបន្ទប់ Simulation ការបង្រៀន និងការរៀនឱ្យមានលក្ខណៈជាប្រព័ន្ធ ព្រមទាំងពង្រឹងសមត្ថភាពសាស្ត្រាចារ្យតាមរយៈការបន្តអភិវឌ្ឍសមត្ថភាពនៅប្រទេសចិន និងសហការបញ្ជូនសាស្ត្រាចារ្យមកបង្រៀនជាដៃគូជាមួយគ្រូរបស់ ស.វ.ស. ដល់និស្សិតថ្នាក់បរិញ្ញាបត្រគិលានុបដ្ឋាក នាពេលខាងមុខ។

សាកលវិទ្យាល័យវិទ្យាសាស្ត្រសុខាភិបាល សូមថ្លែងអំណរគុណចំពោះគណៈប្រតិភូ និងជឿជាក់ថា កិច្ចសហប្រតិបត្តិការនេះនឹងរួមចំណែកលើកកម្ពស់គុណភាពនៃការបណ្តុះបណ្តាលគិលានុបដ្ឋាក និងឆ្មប៕

10/10/2026

សូមអនុមោទនា ពិធីកាន់បិណ្ឌ ១៤ ថ្ងៃសៅរ៍ ១៤រោច ខែភទ្របទ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១០ ខែតុលា ឆ្នាំ២០២៦

09/10/2026

09/10/2026

ទីតាំងទី១ នៃស.វ.ស៖ ក្នុងឱកាសនៃសន្និសីទវិទ្យាសាស្ត្រ ដើម្បីអបអរសាទរខួបអនុស្សាវរីយ៍លើកទី៨០ នៃការបង្កើតសាកលវិទ្យាល័យវិទ្យាសាស្ត្រសុខាភិបាល, គណៈកម្មការរៀបចំកម្មវិធីបានប្រារព្ធពិធីប្រកាសលទ្ធផល និងប្រគល់រង្វាន់ដល់ម្ចាស់ជ័យលាភី លើកម្មវិធីប្រកួតប្រជែងជាច្រើនជំនាញផ្សេងៗគ្នា ដែលបានប្រព្រឹត្តទៅកន្លងមក។

កម្មវិធីប្រកួតប្រជែងទាំងនោះរួមមាន៖ ការប្រកួតប្រជែងការធ្វើផ្ទាំងបង្ហាញការងារស្រាវជ្រាវទាក់ទងនឹងជំងឺឆ្លង, ការប្រកួតប្រជែងការធ្វើផ្ទាំងបង្ហាញការងារស្រាវជ្រាវទាក់ទងនឹងជំងឺមិនឆ្លង, ការធ្វើបទបង្ហាញផ្ទាល់មាត់ការងារស្រាវជ្រាវទាក់ទងជំងឺឆ្លង, ការប្រកួតប្រជែងការធ្វើបទបង្ហាញផ្ទាល់មាត់ការងារស្រាវជ្រាវទាក់ទងជំងឺមិនឆ្លង, ការប្រកួតប្រជែងគ្លីនិករបស់និសិ្សតថ្នាក់បរិញ្ញាបត្រវេជ្ជសាស្ត្រឆ្នាំទី៣, ការប្រកួតប្រជែងជំនាញគ្លីនិករបស់និសិ្សតថ្នាក់បរិញ្ញាបត្រវេជ្ជសាស្ត្រឆ្នាំទី៤, ការប្រកួតប្រជែងរចនាគំនូរនិមិត្តសញ្ញាស.វ.ស, ការប្រកួតប្រជែងរៀបចំវិដេអូខ្លី, ការប្រកួតប្រជែងជំនាញបច្ចេកទេសក្នុងមន្ទីរពិសោធន៏របស់និសិ្សតថ្នាក់បរិញ្ញាបត្រឱសថសាស្ត្រឆ្នាំទី១-៥, ការប្រកួតប្រជែងការធ្វើបទបង្ហាញផ្ទាល់មាត់ការស្រាវជ្រាវទាក់ទងនឺងសុខភាពឌីជីថល។ មុននឹងឈានដល់ការប្រកាសលទ្ធផល អង្គពិធីទាំងមូលក៏បានទស្សនាការបង្ហាញសង្ខេបអំពីដំណើរការ និងលក្ខខណ្ឌនៃការវាយតម្លៃយ៉ាងសុក្រឹត លើវិញ្ញាសានៃការប្រកួតប្រជែងនីមួយៗផងដែរ។

ពិធីដ៏មានអត្ថន័យនេះ ត្រូវបានរៀបចំឡើងក្រោមអធិបតីភាព ឯកឧត្តមសាស្ត្រាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល និងជាសាកលវិទ្យាធិការនៃសាកលវិទ្យាល័យវិទ្យាសាស្ត្រសុខាភិបាល, លោកជំទាវសាស្ត្រាចារ្យ ទេព រង្ស៊ី អតីតព្រឹទ្ធបុរសមហាវិទ្យាល័យឱសថសាស្រ្ត និង លោកសាស្ត្រាចារ្យ Hsu Li Yang ព្រឹទ្ធបុរសរងនៃមហាវិទ្យាល័យសុខភាពសាធារណៈ Saw Swee Hock នៃសាកលវិទ្យាល័យជាតិសិង្ហបុរី។

នៅក្នុងឱកាសនោះ ថ្នាក់ដឹកនាំនៃសាកលវិទ្យាល័យវិទ្យាសាស្ត្រសុខាភិបាល បានអញ្ជើញផ្តល់កិត្តិយសប្រគល់ជូនដោយផ្ទាល់នូវ ពានរង្វាន់ ប័ណ្ណសរសើរ ព្រមទាំងថវិកា ជូនដល់បេក្ខជន និងក្រុមម្ចាស់ជ័យលាភី ដែលទទួលបានចំណាត់ថ្នាក់លេខ១ លេខ២ លេខ៣ ព្រមទាំងរង្វាន់លើកទឹកចិត្ត ដល់ក្រុម/អ្នកចូលរួមប្រកួតប្រជែងតាមវិញ្ញាសានីមួយៗ។

គួរបញ្ជាក់ផងដែរថា ការរៀបចំកម្មវិធីប្រកួតប្រជែងទាំងនេះឡើង មិនត្រឹមតែជាការអបអរសាទរខួបទី៨០ឆ្នាំប៉ុណ្ណោះទេ ប៉ុន្តែថែមទាំងជាឱកាសដ៏វិសេសវិសាលមួយ សម្រាប់ផ្តល់វេទិកាជូននិស្សិតក្នុងការបញ្ចេញនូវសមត្ថភាពពិត ភាពច្នៃប្រឌិត បណ្តុះស្មារតីសហការជាក្រុម និងពង្រឹងគុណភាពនៃការស្រាវជ្រាវ ដែលជាមូលដ្ឋានគ្រឹះដ៏សំខាន់ ក្នុងការក្លាយខ្លួនជាអ្នកជំនាញសុខាភិបាលប្រកបដោយក្រមសីលធម៌ និងសមត្ថភាពខ្ពស់នាពេលអនាគត៕

09/10/2026

ទីតាំងទី១ នៃស.វ.ស៖ សាកលវិទ្យាល័យវិទ្យាសាស្ត្រសុខាភិបាល បានរៀបចំ "ពិធីចុះហត្ថលេខាលើអនុស្សរណៈនៃការយោគយល់គ្នា ជាមួយមន្ទីរសុខាភិបាលនៃរដ្ឋបាលរាជធានី-ខេត្តទូទាំងប្រទេស" ក្នុងឱកាសអបអរសាទរខួប ៨០ ឆ្នាំ នៃការបង្កើតសាកលវិទ្យាល័យវិទ្យាសាស្រ្តសុខាភិបាល នាថ្ងៃទី០៧ ខែតុលា ឆ្នាំ២០២៦។

ពិធីធ្វើឡើងក្រោមអធិបតីភាពឯកឧត្តមសាស្រ្តាចារ្យ យីត ស៊ុនណារ៉ា រដ្ឋលេខាធិការក្រសួងសុខាភិបាល និងជាប្រធានក្រុមប្រឹក្សាភិបាលនៃសាកលវិទ្យាល័យវិទ្យាសាស្រ្តសុខាភិបាល។ ជាមួយគ្នា មាននូវត្តមានឯកឧត្តមសាស្ត្រាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល និងជាសាកលវិទ្យាធិការនៃសាកលវិទ្យាល័យវិទ្យាសាស្រ្តសុខាភិបាល និង ថ្នាក់ដឹកនាំ/តំណាងអញ្ជើញមកពីតាមមន្ទីរសុខាភិបាលនៃរដ្ឋបាលរាជធានី-ខេត្ត។

អនុស្សរណៈនៃការយោគយល់គ្នានេះ គឺដើម្បីពង្រឹង និងពង្រីកកិច្ចសហប្រតិបត្តិការទៅវិញទៅមកឱ្យកាន់តែស៊ីជម្រៅ ដោយផ្តោតជាសំខាន់លើការបើកទូលាយនូវឱកាសចុះកម្មសិក្សាអនុវត្តន៍ផ្ទាល់សម្រាប់និស្សិតនៅតាមមូលដ្ឋានសុខាភិបាលនានា ដែលជាការផ្សារភ្ជាប់ចំណេះដឹងទ្រឹស្តីពីសាលាទៅនឹងការអនុវត្តជំនាញជាក់ស្តែង។ លើសពីនេះ អនុស្សរណៈនេះក៏នឹងក្លាយជាស្ពានសម្រាប់ជំរុញការផ្លាស់ប្តូរបទពិសោធន៍ ការបណ្តុះបណ្តាលបង្កើនសមត្ថភាពមន្ត្រី បុគ្គលិក គ្រូបង្រៀន និងអ្នកស្រាវជ្រាវ ព្រមទាំងការត្រួសត្រាយផ្លូវសម្រាប់ការបង្កើតគម្រោងស្រាវជ្រាវរួមគ្នា ការរៀបចំសន្និសីទវិទ្យាសាស្ត្រ និងការចែករំលែកឯកសារព័ត៌មានសិក្សាដ៏សម្បូរបែប ដែលសកម្មភាពទាំងអស់នេះនឹងចូលរួមចំណែកយ៉ាងធំធេងក្នុងការលើកកម្ពស់គុណភាពធនធានមនុស្ស និងវិស័យសុខាភិបាលនៅកម្ពុជាឱ្យកាន់តែមានភាពរឹងមាំបន្ថែមទៀត៕