27/09/2026
🔴 ඒ රාජපක්ෂ ආණ්ඩුව ඊනියා යුධ ජයග්‍රහණයෙන් උන්මාදයට පත්වය සිටි සමයයි. මෙතෙක් සැඟවී කළ අපරාධ එළිපිට කිරීමට තරම් බලයක් ඔවුන් විසින් ගොඩනගාගෙන තිබුණි. සොරකම, වංචාව, දූෂණය, මෙන්ම පැහැරගැනීම්, අතුරුදන් කිරීම් සහ ඝාතනවලද අඩුවක් නොවීය. මේවාට එරෙහිව හඬ නගන්නන්ට ද මරණීය ඉරණම අත්වීම්ට නියමිතව තිබූ බැවින් බොහෝ දෙනා ඇස් කන් පියාගෙන ගොළු වූ බව අපි දනිමු.
2012 සැප්තැම්බර් 27 දින අළුයම 3.30 ට පමණ ගම්පහ ඉඹුල්ගොඩ හන්දියේදී ජානක බණ්ඩාර ඒකනායක සහ සිසිත ප්‍රියංකර සහෝදරවරුන් දෙදෙනා ඝාතනය වීමද එම කෲර පාලනයේම දිගුවකි. 2012 ආචාර්යවරුන්ගේ අරගලයට සහයෝගය පල කරමින් "නිදහස් අධ්‍යාපනයත්, අධ්‍යාපනයේ නිදහසත් දිනාගැනීමට පෙළගැසෙමු!" යන සටන් පාඨය යටතේ අ.වි.ශි.බ.ම නුවර සිට කොළඹට දින පහක පාගමනක් සංවිධානය කරන ලදී. සැප්.27 එහි තෙවැනි දිනයයි. පාගමනට අවශ්‍ය අත්පත්‍රිකා රැගෙන ඒම සඳහා ජානක, සිසිත සහෝදරවරු නිට්ටඹුවේ සිට කැලණිය විශ්වවිද්යාලය දක්වා පිටත් විය. නමුත් විමසිල්ලෙන් සිටි ඝාතකයන් ඉඹුල්ගොඩ හන්දියෙන් ඔබ්බට ඔවුන්ට යාමට ඉඩ දුන්නේ නැත. ඔවුන්ගේ හිස් පොඩිකර මරා දමන ලදී. එය ආණ්ඩුව විසින් සිදුකළ සැලසුම් සහගත ඝාතනයකි.
එවකට ආරක්ෂක ලේකම් ගෝඨාභය රාජපක්ෂ ඍජුව සම්බන්ධ වූ මෙම ඝාතනය රිය අනතුරක් ලෙස ඒත්තු ගන්වා අමතක කර දැමීම ආණ්ඩුවේ උත්සාහය විය. එහෙත් අන්තර් විශ්වවිද්‍යාලයීය ශිෂ්‍ය බලමණ්ඩලය සටන්කරන සියලු ජනතා බලවේග මෙම ඝාතනයට එරෙහිව යුක්තිය ඉල්ලා සටන් පෙරමුණු ශක්තිමත් කරන ලදී. ජානක සිසිත ඝාතනයට අදාළ නඩු තීන්දුවෙන් පවා ප්‍රාකාශයට පත් වූයේ මෙය පැහැදිලිව මනුෂ්‍ය ඝාතනයක් බවයි. එහෙත් එවකට පැවති පොලිසිය විසින් මෙම ඝාතනයට අදාළ සියලු සාක්ෂි විනාශ කර දමා තිබුණි.
ජානක සහ සිසිත සහෝදරවරුන් දිවිහිමියෙන් සටන් කළේ නිදහස් අධ්‍යාපනයත් අධ්‍යාපනයේ නිදහසත් ආරක්ෂා කරගැනීම වෙනුවෙනි. අධ්‍යාපනය පෞද්ගලිකරණය කිරීමට එරෙහිවත් අධ්‍යාපනය සඳහා දල ජාතික නිශ්පාදිතයෙන් 6%ක් වෙන් කිරීමටත් බලකරමින් ඔවුන් නොසැලී සටන් කරන ලදී. එවකට රාජපක්ෂ ආණ්ඩුවට එරෙහි වීම සමාජය සැලකුවේ කළු ගලේ ඔලුව හප්පාගැනීමක් ලෙසයි. ඒ තරමට රාජපක්ෂ ආණ්ඩුව මර්දනකාරී පාලනයක් ක්‍රියාත්මක කළේය. එහෙත් එවැනි මර්දනයක් හමුවේ පවා ඝාතනය වන බව දැන දැනම ජානකලා සිසිතලා සටන් කළේ දශක 4 ක් නොසැලී සටන් කරමින් අන්තර් විශ්වවිද්‍යාලයීය ශිෂ්‍ය බලමණ්ඩලය ලබා තිබූ පන්නරය නිසාවෙනි.
ජානක සිසිත ඝාතනය වී වසර 14 ක් ගත වූ නමුත් මිනීමරුවන්ට එරෙහිව තවමත් යුක්තිය ඉටු වී නැත. ඉන්පසුව පැවති සියලු ආණ්ඩු දේශපාලන වුවමනාවන් වෙනුවෙන් මෙම ඝාතනය යටපත් කර දැමූයේ දූෂිත රාජපක්ෂ කල්ලිය තවදුරටත් ආරක්ෂා කරමිනි. එහෙත් 2022 ජනතා අරගලයේ ප්‍රධාන ඉල්ලීමක් වූයේ රාජපක්ෂ කල්ලිය විසින් කළ සියලු පැහැරගැනීම්, අතුරුදන් කිරීම් සහ සියලු ඝාතනයන්ට යුක්තිය ඉටු කළ යුතු බවයි. තවමත් ජනතාව දෑස් දල්වා බලා සිටින්නේ එකී යුක්තිය ඉටුවනු ඇත කියාය. එබැවින් මෙම කෲර අපරාධයට එරෙහිව යුක්තිය ක්‍රියාත්මක කරන ලෙස වර්ථමාන ආණ්ඩුවට අපි බලකර සිටිමු !
ඝාතනය කර වසර 14 යි.
ජානක - සිසිත සිසු ඝාතනවලට යුක්තිය ඉටු කරනු !
භික්ෂු සංගමය
කැලණිය විශ්වවිද්යාලය
