20/10/2021
“သီတင်းကျွတ်လပြည့် အဘိဓမ္မာအခါတော်နေ့”
သီတင်းကျွတ်လပြည့်နေ့သည် ဗုဒ္ဓဘာသာဝင်များအတွက် အလွန်ထူးခြားသော နေ့ရက်ပင်ဖြစ်ပါသည်။ ထိုနေ့တွင် မြတ်စွာဘုရားရှင်သည် တာဝတိံသာနတ်ပြည်မှ သင်္ကဿနဂိုရ်ပြည်သို့ ကြွမြန်းဆင်းသက်တော်မူခဲ့ပါသည်။ မြတ်စွာဘုရားရှင် လူ့ပြည်သို့ ဆင်းသက်ကြွမြန်းလာသည်ကို ရည်ရွယ်ပြီး ဘုရားရှင်အားပူဇော်သည့်အနေဖြင့် ထိုနေ့တွင် ဆီမီးများထွန်းကာ မြင့်မိုရ်ပွဲဟုခေါ်သည့် မီးထွန်းပွဲများ ဆင်ယင်ကျင်းပခဲ့ကြပါသည်။
မြတ်စွာဘုရားရှင်သည် လူ့ဘဝကမယ်တော်ဖြစ်ခဲ့ဘူးသော သန္တုဿီတနတ်သားကို အကြောင်းပြုပြီး တာဝတိံသာနတ်ပြည်တွင် အဘိဓမ္မာတရားတော်ကို ဟောတော်မူခဲ့ပါသည်။ ထိုသို့ဟောကြားပြီးနောက် သီတင်းကျွတ်လပြည့်နေ့တွင် လူပြည်သို့ ပြန်လည်ဆင်းသက်လာခဲ့ခြင်းဖြစ်ပါသည်။ ထို့ကြောင့် သီတင်းကျွတ်လပြည့်နေ့ကို အဘိဓမ္မာနေ့ ဟုလည်း ခေါ်ဆိုကြပါသည်။
ထို့ပြင်သီတင်းကျွတ်လပြည့်နေ့ကို ဘုရားဆုပန်နေ့ဟုလည်း ခေါ်ဆိုကြပါသည်။ မြတ်စွာဘုရားသည် တာဝတိံသာမှ မဆင်းသက်မီ ရေမီးအစုံ တန်ခိုးပြဋိဟာတို့ကို ပြတော်မူပြီးမှ ရွှေစောင်းတန်းတွင် နတ်များ၊ ငွေစောင်းတန်းတွင် ဗြဟ္မာများ ခြံရံပြီး ပတ္တမြားစောင်းတန်းမှ မြတ်စွာဘုရားကိုယ်တော်တိုင် တင့်တယ်စွာဆင်းသက်လာခဲ့ပါသည်။ ထိုသို့ဆင်းသက်လာသော မြတ်စွာဘုရား၏ ကျက်သရေတော်ကို ဖူးမြော်ရသော ပရိသတ်အားလုံးတွင် ဘုရားဆုကို မပန်ဆင်မိသူဟူ၍ မရှိခဲ့ပါ။ ထိုကြောင့် ထိုနေ့အား ဘုရားဆုပန်နေ့ဟု ခေါ်ဆိုကြခြင်းဖြစ်ပါသည်။
သီတင်းကျွတ်လပြည့်နေ့သည် ဝါတွင်းသုံးလ၏ နောက်ဆုံးနေ့ဖြစ်သဖြင့် ဝါဆိုတော်မူကြသော သံဃာတော်များ လွတ်လပ်စွာ သွားလာသီတင်းသုံးနိုင်သည့် အခွင့်အရေးကို ရရှိကြပါသည်။ ထို့အပြင် အလွန်မြတ်သော ကထိန်အလှူကိုလည်း ခံယူနိုင်ကြမည်ဖြစ်ပါသည်။ လောကီလူတို့သည်လည်း သီတင်းကျွတ်ပြီးနောက် အိမ်ယာထူထောင်ခြင်းများ ပြုနိုင်ကြမည်ဖြစ်သဖြင့် အချုပ်အချယ်တို့မှကျွတ်စေတဲ့နေ့ဟုလည်း ခေါ်ဆိုနိုင်မည်ဖြစ်ပါသည်။
ထို့ကြောင့် သီတင်းကျွတ်လပြည့် အဘိဓမ္မာအခါတော်နေ့သည် လူ၊ နတ်၊ ဗြဟ္မာ အားလုံး အတူတကွ မြတ်စွာဘုရားအား ကြည်ဖြူ ကော်ရော် ပူဇော်ကြပြီး ကျွတ်တမ်းဝင်သည့်နေ့၊ တရားဆီမီး အလင်းရောင်ဖြင့် မကောင်းမူအကုသိုလ် အဝိဇ္ဇာအမှောင်တောမှ လွတ်ကင်းကြသည့်နေ့ပင်ဖြစ်ပါတော့သည်။
🙏🙏🙏🙏🙏
