14/03/2023
အခြေခံဗုဒ္ဓဘာသာလေ့လာရေးသင်တန်း
ကိလေသာအပူခပ်သိမ်း ငြိမ်းတော်မူသော မြတ်ဗုဒ္ဓသည် မိမိရရှိတော်မူထားသော ငြိမ်းအေးခြင်း ငြိမ်းချမ်းခြင်းဓမ္မများကို ဝေနေယျသတ္တဝါတို့ အကျိုးများစေရန်အတွက် ၄၅-ဝါ ကာလကြာရှည်စွာ သာသနာပြု တော်မူခဲ့ပါသည်။ ထိုသို့သာသနာပြုရာတွင် တရားသူတို့က လာရောက်နာယူကြသလို အကျိုးတရားရရှိ မည့် ပုဂ္ဂိုလ်တို့အထံသို့လည်း မြတ်ဗုဒ္ဓကိုယ်တော်တိုင် ကြွရောက်ပြီး သာသနာပြုတော်မူပါသည်။လွယ်ကူစွာသာသနာပြုရသည်ကားမဟုတ်။ အတ္တကြီးသူ, ရာထူးကိုမှီကာ မာနကြီးသူ, အာဏာမက်မောသူ, အယူဝါဒအားကြီးသူ, အစရှိသဖြင့် ရှေးပါရမီများရှိပါသော်လည်း ယခုဘဝတွင် နှလုံးသွင်းမကောင်းမှုကြောင့် ဘဝအမှောင်ဖုံးနေသူများကို ပင်ပန်းကြီးစွာ လမ်းပြတော်မူခဲ့ပါသည်။ မြတ်ဗုဒ္ဓ၏ အဓိက ရည် ရွယ်ချက်ကား လောဘ ဒေါသ မောဟကြောင့် ဖြစ်ပေါ်နေသော ပူလောင်မှုများကင်းကာ ငြိမ်းချမ်းစေလို ရင်းပင်ဖြစ်သည်။ ကံကောင်းထောက်မသဖြင့် လူ့ဘဝကိုရသည်၏။ ထို့နောက် သာသနာနှင့်ကြုံဆုံရ သည်။ သာသနာကိုကြည်ညိုခွင့် အဆုံးအမကို လိုက်နာကျင့်သုံးခွင့်လည်းရသည်။ တစ်ဘဝစာသာမက တစ်သံသရာလုံးအတွက် ကောင်းကျိုးအနန္တ ပေးနိုင်သော သာသနာတွင်းကာလတွင် တစ်ဘဝစာလေးမျှကိုပင် ငြိမ်းချမ်းအောင် မနေနိုင် မလုပ်နိုင် လျှင် အရှုံးကြီးရှုံးနေမည်မှာ မလွဲပေ။ ပြဿနာတစ်ခုဖြစ်ပြီဆို လျှင် ပထမဦးစွာ မိမိကိုယ်တိုင် ပူလောင်ရ ၏။ ထို့နောက် အပူစကားများဖြင့် ပြောဆိုဆွေးနွေးသောကြောင့် ငြိမ်းချမ်းရေးကို မရောက်နိုင်ဖြစ်ရသည်။ ပို၍ဆိုးသည်ကား ပြဿနာဖြစ်သူ တစ်ဦးတစ်ယောက်သည် နောက်ပါလူပုဂ္ဂိုလ်များ အဖွဲ့အစည်းများကို ထိုပြဿနာအတွင်းသို့ ဆွဲခေါ်တတ်သောကြောင့် ငြိမ်းချမ်းမှုနှင့်ပို၍ အလှမ်းကွာသွားရသည်။ ကောသဗ္ဗီ ပြည် ရဟန်းနှစ်ပါး၏ အချင်းချင်း နှုတ်မစောင့်စည်းခြင်း မာနထောင်လွှားခြင်းများကြောင့် သူတို့၏ နောက်ပါတပည့်များ စတုပစ္စယဒါယကာများ အဆင်မပြေ နှုတ်လှံထိုးကြရင်း မေတ္တာတရား ဆိတ်သုဉ်း ခဲ့ဖူးသည်။ အစိန္တေယျ မြတ်ဗုဒ္ဓကိုလည်း မိမိတို့ အယူဝါဒ အချင်းများမှုကို ကြောင့်ကြစိုက်တော်မမူရန် ခွန်းတုံ့လှန်သောကြောင့် မေတ္တာရှင် မြတ်ဗုဒ္ဓသည် ထိုဒေသတွင် နေတော်မမူပဲ ဆိတ်ငြိမ်ရာသို့ ကြွသွား တော်မူသည်။ တစ်ခဏတာ သက်တမ်းအတွင်း၌ သံသရာမှပါလာသော ကံတို့ကြောင့် တိုတိုရှည်ရှည် အတူတကွပေါင်းဆုံရာတွင် ‘လောကတ္ထစရိယ’ ဟုခေါ်သော အများအတွက်တွေးပေးကာ ပြုလုပ်ဆောင် ရွက်ခြင်း အပြုသဘောဆောင်သော အကောင်းမြင်ဝါဒများသည်သာ ဒေါသမပါ စိတ်ဓာတ်မကျဘဲလျက် နူးညံ့သိမ်မွေ့စွာ စိတ်ရှည်လက်ရှည် စကားပြောနိုင်စေရန် အထောက်အကူပြုပါသည်။ ငြိမ်းချမ်းရေး ဆွေး နွေးပွဲအတွက် လိုအပ်သော အတွေးအခေါ်နှင့် စိတ်နေစိတ်ထားများလည်းဖြစ်သည်။ ငြိမ်းချမ်းရေးကို တည်ဆောက်လိုသော ပုဂ္ဂိုလ်သည် သူတစ်ပါးအပေါ်တွင် အလေးထားခြင်း မိမိကိုယ်တိုင်ရိုးသားဖြောင့် မတ်ခြင်းတို့နှင့်ပြည့်စုံရန်လိုအပ်သည်။ ထိုကဲ့သောကောင်းမြတ်သော ဓမ္မတရားများကို သိရှိနားလည်ပြီး ငြိမ်းချမ်းသာယာသော လူမှုပတ်ဝန်းကျင်တစ်ခု ဖြစ်ပေါ်လာစေရန် ရည်ရွယ်လျက် ဤအခြေခံဗုဒ္ဓဘာသာ လေ့လာရေး သင်တန်းကို ဖွင့်လှစ်လိုက်ရပါသည်။
ဆက်သွယ်ရန်။ ။ အောင်နိမိတ်ဗုဒ္ဓဓမ္မစင်တာ, ရပ်ကွက်(၁)၊ နယ်မြေ(၁)၊ ပါရမီလမ်း၊အောင်နိမိတ်ကျောင်းတိုက်၊ လားရှိုးမြို့၊ ရှမ်းပြည်နယ်မြောက်ပိုင်း။
ဖုန်း-09.256316265/09795774120/09776105985
