https://www.facebook.com/1556119231308712/

University of Medicine Mandalay Students' Union, University of Medicine, Mandalay (2026)

10/02/2026

Medical Family Mandalay တည်ထောင်ခြင်း (၅) နှစ်ပြည့်သို့ ဆေးတက္ကသိုလ်-မန္တလေး ကျောင်းသားများသမဂ္ဂ တော်လှန်ရေးတပ်ဦး (UMMSURF) မှ ပေးပို့သော သဝဏ်လွှာ

01/02/2026

"နွေဦးတော်လှန်ရေး ၅ နှစ်ပြည့် ပြည်သူသို့ အစီရင်ခံစာ"

ယနေ့သည် ပြည်သူ့ “နွေဦးတော်လှန်ရေး” (၅) နှစ်တိုင်ခဲ့ပြီ ဖြစ်ပါသည်။ ပြည်သူလူထုတရပ်လုံးအနေဖြင့် (၅) နှစ်တာ ကာလအတွင်းမှာ မမျှော်လင့်ထားသည့် အကျပ်အတည်းများကို ရင်ဆိုင်ခဲ့ရသည့်အပြင် ကြံ့ကြံ့ခံဖြတ်ကျော်နိုင်ခဲ့သည်။ ကိုယ်ပိုင်ပြဋ္ဌာန်းခွင့်နှင့် လူတစ်ယောက်ချင်းစီ၏ အခွင့်အရေးနှင့် ရပိုင်ခွင့်များကို ကာကွယ်ရန်အလို့ငှာ ပြည်သူလူထုတစ်ခုရပ်လုံးက အဓမ္မဖိနှိပ် အနိုင်ကျင့်နေသည့် အကြမ်းဖက်စစ်အုပ်စုနှင့် အာဏာရှင်စနစ်အဆုံးသတ်ရေးကို ရရာနည်းလမ်းဖြင့် မဆုတ်မနစ် တော်လှန်ခဲ့သည့်အပေါ် လေးစားဦးညွှတ်အပ်ပါသည်။

ပြည်သူလူထုတရပ်လုံးအနေဖြင့် ဖိနှိပ်မှုမျိုးစုံကို အံတုရာတွင် အဓိက မဏ္ဍိုင်ကြီး (၄) ရပ်ဖြစ်သည့် “နိုင်ငံရေး”၊ “အာဏာဖီဆန်ရေး လူထုလှုပ်ရှားမှု”၊ “စစ်ရေး” နှင့် “သံတမန်ရေး” တို့ကို ဟန်ချက်ညီချိတ်ဆက် တော်လှန်ခဲ့ကြရာ အချိုးအကွေ့မှတ်တမ်းများစွာရှိခဲ့ပါသည်။ မြန်မာပြည်သူလူထု တရပ်လုံးသည် အာဏာဖီဆန်ရေး လူထုလှုပ်ရှားမှုများကို နည်းမျိုးစုံဖြင့် တော်လှန်ခဲ့သည့်အတွက် စစ်အာဏာရှင်၏ အုပ်ချုပ်လိုစိတ်နှင့် အုပ်ချုပ်နိုင်စွမ်းကို ရိုက်ချိုးနိုင်ခဲ့ပြီး စစ်အာဏာရှင်ယန္တရားတခုလုံးကို ချိနဲ့စေခဲ့သည်။

ထို့အပြင် လက်နက်ကိုင်တော်လှန်ရေးနှင့် တော်လှန်ထောက်ပို့မှုလှုပ်ရှားမှုများသည် တော်လှန်ရေး၏ အရေးပါသည့် ဆန့်ကျင်ခုခံမှုတခုဖြစ်ပြီး လူထုအသီးသီးထောက်ခံမှု၊ နည်းလမ်းစုံပါဝင်မှုများသည် အာဏာရှင်စနစ်အဆုံးသတ်တော်လှန်ရေး၏ အသက်သွေး ကြောဖြစ်သည်။
ပြည်သူလူထုတရပ်လုံးက အကြမ်းဖက်စစ်အုပ်စု၏ အတုအယောင် ရွေးကောက်ပွဲကို အသိအမှတ်မပြုခြင်းသည် စစ်အုပ်စုထံတွင် ပြည်သူပေးအပ်ထားသည့် အာဏာမရှိကြောင်းကို ထင်ထင်ရှားရှားပြသနိုင်ခဲ့ပြီး ဒီမိုကရေစီနည်းကျ ရွေးကောက်ပွဲအပေါ် တန်ဖိုးထားမှုကိုပါ ပြသနိုင်ခဲ့သည်။ အတုအယောင်ရွေးကောက်ပွဲပြုလုပ်ပြီး နိုင်ငံရေးထွက်ပေါက်ရရန် ဆောင်ရွက် သော်လည်း အရေးပေါ်အခြေအနေကြေညာချက်များထုတ်ပြန်နေခြင်းသည် စစ်အုပ်စု၏ အုပ်ချုပ်ခွင့်မ ရနေကြောင်းမှာ ထင်ရှားနေသည်။

အကြမ်းဖက် စစ်အုပ်စုသည် ၂၀၂၁ ဖေဖော်ဝါရီ (၁) ရက်နေ့မှစတင်၍ (၅) နှစ်တာ ကာလအတွင်း ပြည်သူ့အာဏာကို အတင်းအဓမ္မသိမ်းယူရန် ကြိုးစားပြီး အများပြည်သူအပေါ်တွင် များစွာသောလူ့အခွင့်အရေးချိုးဖောက်မှုများနှင့် “လူသားမျိုးနွယ်ပေါ် ကျူးလွန်သည့် ရာဇဝတ်မှုများ”၊ “စစ်ရာဇဝတ်မှုများ”၊ “လူမျိုးသုဉ်းသတ်ဖြတ်မှု” များကို ကျူးလွန်လျက်ရှိသည်။ ထိုသို့ကျူး လွန်ခံရမှုများရှိ နေသော်လည်း ပြည်သူ လူထုတရပ်လုံးသည် နည်းလမ်းမျိုးစုံဖြင့် တော်လှန်ရေးကို ဆင်နွှဲနေကြသည်။

နွေဦးတော်လှန် ရေးသည် အကြမ်းဖက် စစ်အုပ်စုနှင့် အာဏာရှင်စနစ်တိုက်ဖျက်ရေး၊ ဖက်ဒရယ်ဒီမိုကရေစီစနစ် ဖော်ဆောင်နိုင်ရေးအတွက်သာမက ပိုမိုကောင်းမွန်သည့် နိုင်ငံရေးနှင့် လူ့အဖွဲ့အစည်းစနစ်တို့ ထွန်းကားလာရေးကို မျှော်ရည်တိုက်ပွဲဝင်ရမည်ဟု ခိုင်မာစွာယုံကြည်ပါသည်။ တော်လှန်ရေး အင်အားစုများသည် စည်းရုံးလှုံ့ဆော်မှု မဟာဗျူဟာတွင် လိုအပ်ချက်များ ရှိခဲ့ပြီး လူမျိုးစုအင်အားစုများအကြား နားလည်ညှိနှိုင်းနိုင်ရန်၊ အတူယှဥ်တွဲ နေထိုင်နိုင်ရန်၊ အတူလက်တွဲ ပုံဖော်ကြသည့် အလေ့အထကောင်းများဖြင့် တည်ဆောက်ကြရန်မှာ တော်လှန်ရေးအင်အား စုများအကြား၌ပင် ဆက်လက်ဆွေးနွေးလုပ်ဆောင်ကြမည်ဟု ပြည်သူလူထုတရပ်လုံးထံ အသိပေး အပ်ပါသည်။

ကျွန်ုပ်တို့ တော်လှန်ရေးအင်အားစုများသည် တော်လှန်ရေး (၅) နှစ်ပြည့်မှသည် ဖယ်ဒရယ်ဒီမို ကရေစီပြည်ထောင်စု တည်ထောင်နိုင်သည်အထိ သွေးစည်းညီညွတ်စွာဖြင့် အကြမ်းဖက်စစ်အုပ်စုနှင့် အာဏာရှင်စနစ် အဆုံးသတ်ရေး ကို ဆက်လက်တိုက်ပွဲဝင် သွားမည်ဖြစ်ကြောင်း သံန္နိဋ္ဌာန် ပြုလိုက်ပါသည်။

#အရေးတော်ပုံအောင်ရမည်

30/01/2026

တော်လှန်ဒီရေမြင့်သစ် သို့ …

( ၅ နှစ်ပြည့် သတင်းစကား )

ကုန်လွန်ခဲ့တဲ့ ၂၀၂၅ ဟာ နွေဦးတော်လှန်ရေးအတွက် ထိခိုက်ကျဆင်းခဲ့ရတဲ့ အခြေအနေကို ဖြတ်သန်းကြုံတွေ့ခဲ့ရပါတယ်။ ၂၀၂၅ ကိုပြန်ကြည့်ရင် နွေဦးတော်လှန်ရေးရဲ့ ခေါင်းဆောင်မှုစွမ်းရည်၊ စုစည်းညီညွတ်မှုအင်အားစတာတွေ လျော့ရဲကျဆင်းခဲ့တာမို့ ပြည်သူလူထုရဲ့တော်လှန်ရေးအပေါ် မျှော်လင့် ယုံကြည်မှုကလည်း အနည်းနဲ့အများ ထိခိုက်ကျဆင်းခဲ့ရပါတယ်။

၂၀၂၁ ကနေ ၂၀၂၄ နှစ်လယ်အထိ
လူထုတော်လှန်ရေး၊ လက်နက်ကိုင်တော်လှန်ရေးလှိုင်းတွေဟာ အင်အားကြီးကြီးမားမား အရှိန်ဟုန်ပြင်းပြင်းနဲ့ရိုက်ခတ်စီးဆင်းခဲ့ပြီး ရန်သူစစ်အုပ်စုဆိုတဲ့ အခက်အခဲကျောက်ဆောင်ဟာ ပြိုပျက်လုမတတ် အခြေအနေထိ ခရီးရောက်ခဲ့တာ အားလုံးအသိပါပဲ။

အဲ့နောက်ပိုင်းကာလတွေမှာတော့ ...
- စစ်ရေးအောင်မြင်မှုများကို နိုင်ငံရေးအရ ပေါင်းစပ်နိုင်မှုမရှိခြင်း၊
- လူထုအပေါ် မျှော်လင့်ချက်အမှားနဲ့ စည်းရုံးရေးလမ်းစဉ် အားနည်းခြင်း၊
- တော်လှန်ရေးကို တာတိုခရီး၊ ရေတိုခရီး လို့ ယူဆပြီး ရေရှည်မျှော်မြင်မှုဖြင့် စုဖွဲ့တည်ဆောက်မှု အားနည်းခြင်းတို့ကြောင့် ၂၀၂၅ ခုနှစ်မှာတော့ (လှိုင်း)အကျ ဒီရေနိမ့် ကာလဖြစ်ခဲ့ပါတယ်။ ဒီလိုနိမ့်ပါးကျဆင်းမှူတွေဟာ ရန်သူစစ်အုပ်စုရဲ့ သက်ရောက်မှုထက် တော်လှန်ရေးတွင်း အခြေအနေတွေက ပိုပြီးသက်ရောက်စေခဲ့တာပါ။

တော်လှန်ရေး ဒီရေနိမ့်ဆင်းခဲ့ပေမဲ့ လူထုရဲ့ နိုင်ငံရေး ရေချိန်ကတော့ မနိမ့်ပါဘူး။ ၂၀၂၅ အတွင်းမှာပဲ ဆိုးရွားပြင်းထန်လှတဲ့ ငလျင်ဒဏ်၊ စားဝတ်နေရေးအပါအဝင် အထွေထွေကြပ်တည်းမှု၊ ရန်သူစစ်အုပ်စုရဲ့ နည်းမျိုးစုံ ဖိနှိပ်အကြမ်းဖက်မှုတွေကို ပြည်သူလူထုဟာ ဇွဲရှိရှိနဲ့ ကြံ့ကြံ့ခံရင်ဆိုင်ခဲ့ပါတယ်။
ဒါတင်မကပါဘူး ပြည်သူလူထုရဲ့ နိုင်ငံရေးအသိက နိုးကြားနေဆဲဆိုတာကိုလည်း ဒီဇင်ဘာ ၁၀ ရက် ပြည်လုံးကျွတ်သပိတ်မှာ ပါဝင်ခဲ့တာ၊ ရွေးကောက်ပွဲ သုံးပိုင်းစလုံးမှာ သတ္တိရှိရှိ မဲထွက်မပေးခဲ့ကြတာတွေက အပြောမဟုတ် အလုပ်နဲ့ပြတဲ့ သက်သေတွေပါ။

တချိန်ထဲမှာပဲ တာဝန်မကျေ၊ ဝတ္တရားပျက်နေတဲ့ တော်လှန်ရေးသမားဆိုသူများကိုလည်း စိတ်ပျက်နေကြပြီး တော်လှန်ရေးအင်အားစုအားလုံးကိုလည်း ပြင်ဆင်သင့်တာတွေပြင်ဖို့၊ အလုပ်ပိုလုပ်ကြဖို့၊ စုစည်းညီညွတ်ကြဖို့ ကိုလည်း “နိုင်ငံရေးသတိ” ကြီးကြီးနဲ့ အချက်ပြ တိုက်တွန်းနေပြီဖြစ်ပါတယ်။ ဒါ့ကြောင့် ၂၀၂၆ ခုနှစ်အတွက် တော်လှန်ရေးအင်အားစုတွေအနေနဲ့ “စုစည်းညီညွတ်မှု၊ စုဖွဲ့တည်ဆောက်မှု” တွေကို ခြေခြေမြစ်မြစ် ကျကျနန ဆောင်ရွက်ပြီး တော်လှန်ရေးဒီရေကို မြှင့်ဖို့လိုအပ်နေပါပြီ။

အရေးကြီးဆုံးက တော်လှန်ရေးဟာ ရေတိုခရီး၊တာတိုခရီးဆိုတဲ့ အမြင်ခံယူချက်ကို ကိုယ်တိုင်လည်း စွန့်ပယ်ပြီး လူထုကို စည်းရုံးရာမှာလည်း မျှော်လင့်ချက်အမှားတွေမဖြစ်ဖို့ သတိထားရမှာ ဖြစ်ပါတယ်။ တော်လှန်ရေး ကြာခြင်း၊မကြာခြင်းဟာ တော်လှန်ရေးသမားတွေ "စုစည်းညီညွတ်စွာအလုပ်လုပ်နိုင်မှု"နဲ့ပဲ အဆုံးအဖြတ်ပေးသွားပါလိမ့်မယ်။ နှစ် ၇၀ အတွင်း အကောင်းဆုံးအခွင့်အရေးလည်း ရှိနေပါရဲ့..၊ လူထုရဲ့ ထောက်ခံအားပေးမှုနဲ့ တောင့်ခံတွန်းလှန်မှုတွေလည်းရှိနေပါရက်နဲ့ နွေဦးမှာ လုပ်ကိုင်ပါဝင်နေသူကြတွေ အသုံးမကျလို့ တိုင်းပြည်က စစ်ကျွန်သံသရာမှာ တဝဲလည်လည် ဖြစ်ကြရမှာပါလား၊
တို့ခေတ်ရောက်မှ ညံ့ကြတော့မှာလား

တော်လှန်ဒီရေမြင့်သစ် လှိုင်းတွေတဝုန်းဝုန်းနဲ့ အခက်အခဲကျောက်ဆောင်တွေကို ဖြိုချပစ်ကြစို့။

#အရေးတော်ပုံအောင်ရမည်

27/01/2026

ကဗျာတစ်ပုဒ် ပန်းတစ်ဆုပ်နှင့်

သူငယ်ချင်း
မင်း၏ရှေ့မှာ၊ စုံရပ်ကာနှင့်
ရင်မှာပီတိ၊ လေးစားမိ၏
ဘယ်ထိအဆုံး၊ လျှောက်ရဦးတော့
အပြုံးမပျက်၊ ရှေ့သို့ဆက်ပြီး
အသက်နှင့်သွေး၊ တော်လှန်ရေးကို
မနှေးအပ်လှူ၊ ပေးဆပ်သူမို့
ဂုဏ်ယူကြတယ် သူငယ်ချင်း။

သူငယ်ချင်း
မင်း၏ရှေ့မှာ၊ စုံရပ်ကာနှင့်
သေချာကတိ၊ ငါထားရှိ၏
အမိမြေမှာ၊ စစ်အာဏာဟု
နောင်ခါလုံးဝ၊ မကြားရဘူး
မြင်ရကြားရ၊ အသံမျှသော်
ခဏချင်းတွင်း၊ အပြတ်ရှင်း၍
နှိမ်နင်းပါ့မယ် သူငယ်ချင်း။

သူငယ်ချင်း
မင်း၏ရှေ့မှာ၊ စုံရပ်ကာနှင့်
ငါ့မှာတွေးကြည့်၊ ရင်နာမိ၏
အသိတွေပြောင်း၊ နိုင်ငံကောင်းဖို့
ဆုတောင်းမရ၊ တိုက်ခဲ့ကြပြီး
ဒုက္ခရက်များ၊ မုန်တိုင်းကြားမှာ
သူများမသိ၊ ငါတို့သိ၍
သတိရတယ် သူငယ်ချင်း။

သူငယ်ချင်း
နှင်းသက်ကြွေဆဲ၊ နှင်းမှုန်ထဲ၌
ဝေ့ဝဲကျလာ၊ ပါးပေါ်မှာသို့
သေချာမသိ၊ စိုပါဘိနှင့်
ငါကြည့်လေမှ၊ နှင်းစက်ကျ၍
ခဏတာမျှ၊ မျက်ရည်စဟု
စိတ်ကထင်မိ၊ ဝေခွဲကြည့်သည်
မသိတော့ဘူး သူငယ်ချင်း။

သူငယ်ချင်း
မင်း၏နေရာ၊ သည်နေရာက
သာယာပါဘိ၊ အလွမ်း မိ၏
အတိအုပ်ဆိုင်း၊ ပင်ခြေဝိုင်းနှင့်
မှိုင်းမှိုင်းညို့ညို့၊ မြေမို့မို့ဝယ်
ငါတို့ တင်ထား၊ တောပန်းများက
မှာသွားသမျှ၊ ဖွင့်ဆိုကြမည်
သွားရတော့မယ် သူငယ်ချင်း။ ။

#မအလကျဆုံးခန်း #မင်းအောင်လှိုင်ကိုငရဲပို့မည် #အရေးတော်ပုံအောင်ရမည်

22/01/2026

မိစ္ဆာရှင်းပွဲ

CDM တော်လှန် ကျောင်းသူ/သားများ၏ စုပေါင်းတင်ဆက်မှု

၂၀၂၆ခုနှစ် ဇန်နဝါရီလ ၂၃ရက်နေ့(သောကြာနေ့) ည ၈နာရီခွဲအချိန်၌ Raung Ni YouTube channel တွင် full video ဝင်ရောက်ကြည့်ရှုအားပေးနိုင်ပါသည်။

Link
https://youtu.be/QINp1qzR400?si=cF8DNJaAS5xITolT

#အတုအယောင်မတရားရွေးကောက်ပွဲအလိုမရှိ
#မိစ္ဆာရှင်းပွဲ
#မအလကျဆုံးခန်း
#မင်းအောင်လှိုင်ကိုငရဲပို့မည်

22/01/2026

ရွေးကောက်ပွဲဟာ အိပ်မက်တွေရဲ့ အဖြေတစ်ခုလား?

လူဟူ၍ဖြစ်လာလျှင် အိပ်မက်ရှိကြစမြဲ ဖြစ်သည်။ "အိပ်မက်"ဟူသော မြန်မာစကားလုံးကို "အိမ်မက်" ဟု အသံထွက်ကြသည်။ အိပ်မက်ကို အိမ်မက်ဟု အသံထွက်ရခြင်းမှာ အိမ်တစ်လုံးကဲ့သို့ လုံခြုံမှု၊ နွေးထွေးမှုကို ပေးစွမ်းနိုင်သောကြောင့်ဟု ထင်မြင်မိပါသည်။ ထို့ကြောင့် အိပ်ရင်းမြင်မက်သော၊ အိပ်ရာနိုးလျှင် ပျောက်ကွယ်သွားသော အိပ်မက်အစား အိမ်တစ်လုံးကဲ့သို့ ကြံခိုင်သော အနက်ကို ဆောင်သော အိမ်မက် ဟူ၍သာ ပြောဆိုကြခြင်း ဖြစ်ပါသည်။
မျှော်လင့်ချက် အိပ်မက်ဟူသည် အိမ်နှင့်တူသော အရာဖြစ်သည်။ ထို့ကြောင့် အိပ်မက်တစ်ခုကို အိမ်တစ်လုံးကဲ့သို့ပင် တည်ဆောက်ယူရသည်။ အိမ်တစ်လုံးတည်ဆောက်တော့မည် ဆိုလျှင် အင်ဂျင်နီယာ၊ ပန်းရံဆရာ၊ လက်သမား စသည်ဖြင့် အိမ်အကြောင်း သိရှိနားလည်သူတို့နှင့် တိုင်ပင်ဆွေးနွေးကာ ဆောက်လုပ်ရပါသည်။ ထို့အတူ အိပ်မက်တစ်ခုကို စတင်ရာတွင်လည်း မည်သည့်အိပ်မက်မျိုးကို အကောင်အထည်ဖော်လိုကြောင်း စတင် မျိုးစေ့ချသူမှာ မိဘများ၊ ဆရာသမားများနှင့် မိမိနေထိုင်သော ပတ်ဝန်းကျင်အပေါ်တွင် များစွာ မူတည်နေပါသည်။ လူအားလုံးသည် မိမိတို့ လက်လှမ်းမိနိုင်သမျှ အကောင်းဆုံးသော အရာများကို ဆွတ်ခူးလိုကြသည်။ တချို့ အင်မတန်ထူးချွန်ထက်မြတ်သော သူများမှာလည်း လက်လှမ်းမီနိုင်သော သတ်မှတ်ချက်များထက် ကျော်လွန်ကာ လူတိုင်းမလုပ်နိုင်သော အရာများ၊ လူသားထုကို အကျိုးပြုနိုင်ခဲ့သော သာဓကများလည်း ရှိပါသည်။
အိပ်မက်ကို ပြည့်ဝစွာ အကောင်အထည်‌ ဖော်နိုင်သူများမှာ လူဖြစ်ရကျိုးနပ်သည်ဟု ဆိုရလျှင် လူသားထုကို အကျိုးပြုနိုင်သောသူများမှာ လူ့ဂုဏ်သိက္ခာမြင့်မားသောသူများဟု ဆိုရမည် ဖြစ်သည်။ ဆန့်ကျင်ဘက်တွင်လည်း လူ့ဂုဏ်သိက္ခာဟူ၍ တစိုးတစိမျှ မရှိသော၊ လူ့ဘောင်လောကကို ဖျက်ဆီး ရန်ရှာရန် မွေးဖွားလာသူ လူအန္ဓများများလည်း များစွာ ရှိပါသည်။ ထိုလူများသည် နေထိုင်ရာ ပတ်ဝန်းကျင်ကို ဒုက္ခပေးသော အဆိပ်သင့်စေသော သူများဖြစ်ပါသည်။ သူတို့၏ အိပ်မက်များမှာလည်း တစ်ကိုယ်ကောင်းဆန်မှုနှင့် မိုက်မဲသော အတ္တတို့ ဖုံးအုပ်ကာ သစ်ရွက်အဆွေးလို ပုပ်သိုးနေမည်မှာ အမှန်ပင်။
လူတိုင်းတွင် မျှော်လင့်ချက် အိပ်မက်များရှိကြသကဲ့သို့ နိုင်ငံတစ်နိုင်တွင်လည်း အိပ်မက်တစ်ခုရှိနိုင်ပါသည်။ နိုင်ငံအတွင်း နေထိုင်သူ နိုင်ငံသားများ နေရေးထိုင်ရေး၊ စီးပွားရေး၊ ကျန်းမာရေး စသဖြင့် ဘက်စုံအဆင်ပြေသော နေရာတစ်ခုဖြစ်ရန်မှာ နိုင်ငံတစ်ခု၏ အိပ်မက်ပင် ဖြစ်ပေမည်။ နေထိုင်သူများအားလုံး၏ ပေါင်းစုထားသော အိပ်မက် အစုအဝေးမှာ ထိုနိုင်ငံ၏ အိပ်မက် မျှော်လင့်ချက် ဖြစ်ရပါမည်။ မြန်မာနိုင်ငံတွင်လည်း ထိုသို့အိမ်မက်မျိုး ဆယ်စုနှစ်များစွာ ကြာအောင် ရှိခဲ့ပါသည်။ ထိုအိပ်မက်ကို အကောင်အထည်ဖော်နိုင်မည်ဟု နိုင်ငံသားများအားလုံး ယုံကြည်ကာ အတူလက်တွဲပုံဖော်ရင်း ၂၀၁၅ မှ ၂၀၂၀ အထိ အားကြိုးမာန်တက် ချီတက်ခဲ့ကြသည်။ သို့သော် ၂၀၂၁ တွင် စစ်တပ်၏အာဏာသိမ်းမှုဖြင့် နိုင်ငံသားအားလုံး၏ အိပ်မက်များ ကျိုးပျက်ခဲ့ကြရသည်။ နိုင်ငံ၏ အိပ်မက်သည်လည်း ကြေမွသွားရခဲ့သည်။

ယခုအချိန်တွင် မြန်မာနိုင်ငံသည် အစိတ်စိတ်အမွှာမွှာ ကွဲကြေလျက်ရှိသည်။ နိုင်ငံကို စွန့်ခွာသွားရသူများ၊ တောထဲဝင်ကာ အာဏာရှင်ကို တွန်းလှန်ကြသူများ၊ စစ်အာဏာရှင်ကို မကြိုက်သော်လည်း မြို့ပေါ်တွင်နေရင်း နှိပ်စက်ကလူပြုသမျှကို ခါးစီးခဲ့နေကြရသူများ၊ အသက်ဆုံးရှုံးရသူများ၊ အိုးအိမ်စွန့်ခွာ ထွက်ပြေးကြသူများ စသည်ဖြင့် နိုင်ငံသားများသည် ဒုက္ခမျိုးစုံကို ခံစားနေကြသည်။ ထို့ကြောင့် ယခုအချိန်တွင် နိုင်ငံသားအားလုံး၏ တူညီသော အိပ်မက်မှာ နိုင်ငံကို ပြန်လည်အေးချမ်းသာယာသော နေရာတစ်ခု ဖြစ်စေလိုခြင်းပင် ဖြစ်ပါလိမ့်မည်။ တစ်ဘက်တွင် စစ်ကောင်စီမှာ ထိုအိပ်မက်ကို အကောင်အထည်မဖော်နိုင်‌စေရန် အတုအယောင်ရွေးကောက်ပွဲဖြင့် တားဆီးရန် ပြုလုပ်နေပါသည်။ ထို့ကြောင့် အားလုံးအနေနှင့် စဉ်းစားစရာရှိသည်မှာ "စစ်တပ်ကျင်းပသောရွေးကောက်ပွဲမှာ ပြည်သူအားလုံး၏ အိပ်မက်များအတွက် အဖြေတစ်ခု ဖြစ်လာနိုင်သလား" ဟူသော မေးခွန်းပင်ဖြစ်ပါသည်။
အတုအယောင် ရွေးကောက်ပွဲမှာ တတိယပိုင်းကိုပင် ရောက်ရှိကာ မကြာမီပင် ပြည်သူသဘောမတူဘဲ အစိုးရဖွဲ့ကြတော့မည်ဖြစ်သည်။ အစိုးရဖွဲ့ပြီးသည်နှင့် နိုင်ငံသား အားလုံး၏ အိပ်မက်မှာ အသူတရာချောက်ထဲသို့ ကျသွားသကဲ့သို့ နိဂုံးချုပ်သွားပါလိမ့်မည်။ ထို့ကြောင့် ရွေးကောက်ပွဲ ပထမပိုင်းနှင့် ဒုတိယပိုင်းများ ကဲ့သို့ပင် ရွေးကောက်ပွဲကို မဲမထည့်ခြင်းဖြင့် နိုင်ငံ့အိပ်မက်ကို အသက်ဆက်နိုင်စေရန် အားနာစွာပင် တောင်းဆိုလိုက်ရပါတော့သည်။

#ထွက်ပေါက်မပေးမိဖို့ #အတုအယောင်ဆန့်ကျင်ရေး #ပြည်သူသာအဓိက #အရေးတော်ပုံအောင်ရမည်

19/01/2026

သွေးသည်သစ္စာ မမေ့ပါတည်း

တွေးမိ တွေးစရာ
ရေးစရာ ပေါ်မိ
ပေးစရာ အဖြေရှိမှ
တွေးကြည့်ပါဘိ။

ရေမြေမှာ သဘာဝနဲ့
ကြွယ်ဝတဲ့ ဥစ္စာ
ပျော်စရာ ဘယ်ရှားလို့
စိတ်ထားက ဖြူစွာ။
ကမ္ဘာမှာ ''မြန်မာဟေ့''
ဘယ်မေ့ကြ နိုင်စရာ
လွမ်းစရာ အလွန်ကောင်းပါလိမ့်
ခေတ်ဟောင်းက ချိန်ခါ။
ရောင်နီမှာ.........
နေခြည်ဖြာ ကွန့်မြူး
စိတ်ကူး ရည်ရွယ်မှန်းကာဖြင့်
ကိုယ်စီမှာ အနာဂတ်ကို
တွေးလျက် ကြည်နူး။

ခုတော့ဖြင့် နေစရာ
ပြေးစရာ မြေမရှိ
သွေးတွေသာ အတိနဲ့
ငိုမိစရာချည့်။

ကိုယ့်နေရာ ဒီဌာန
ဒုက္ခတို့ ဝေဆာ
အာဏာရှင် ဗိုလ်ကျ
ခံရလည်း မသက်သာ။
ပြည်သူမှာ ကြွေသမျှ
သူတို့က မညှာတာ
ရွံစရာ အလွန်ကောင်းပါလိမ့်
စုပေါင်းမှ တို့ နိုင်မှာ။
မိုးလေမှာ.........
နေသာဖို့ မျှော်ဘူး
ဖြစ်ဘူး ဒီလူတွေမှာဖြင့်
ကိုယ့်အနာ လာမထိရင်
သိတတ်ကြဘူး။

မေးချင်မိ မေးစရာ
တွေးလို့သာ ဖြေကြည့်
သွေးစည်းပါ ညီစွာဖြင့်
တော်လှန်ရာ ဒီခရီးမှာ
ပြီးလုပါ၏။

မဲရုံမှာ အာဏာပြ
လာရတဲ့ ပြည်သူမှာ
မနေသာ ဖိအားကြောင့်
တပြားမှ မသဒ္ဓါ။
ခွင်ဆင်ကာ ပါတီတို့
ယုံကြည်ဖို့ ဆိုသဗျာ
ယုံစရာ အလွန်ကောင်းပါလိမ့်
ဆုတောင်းကြ ရီ(ရယ်)စရာ။
မပေးပါ..........
ဘယ်ခါမှ မယုံနဲ့
အလှည့် ကြုံရင်သာဖြင့်
အာဏာရှင် စစ်ဘီလူးကို
နှစ်ဦးမှာ အကြိုရက်
ခေါင်းဖြတ်ချေလှည့်။

#ထွက်ပေါက်မပေးမိဖို့ #အတုအယောင်ဆန့်ကျင်ရေး #ပြည်သူသာအဓိက #အရေးတော်ပုံအောင်ရမည်

11/01/2026

#အတုအယောင်ဆန့်ကျင်ရေး #ထွက်ပေါက်မပေးမိဖို့ #ပြည်သူသာအဓိက #အရေးတော်ပုံအောင်ရမည် #ကာတွန်း

09/01/2026

တော်လှန်ရေးကို ပြန်လည်ဆန်းစစ်ဖို့ အချိန်ရောက်နေပြီလား။

ယခုဆိုလျှင် တော်လှန်ရေးဟာ လေးနှစ်ကာလကို ကျော်လွန်ပြီး ငါးနှစ်ပင် ပြည့်တော့မှာပဲ ဖြစ်ပါတယ်။ တော်လှန်ရေးတပ်ဖွဲ့များ အနေဖြင့်လည်း စိုးမိုးနယ်မြေများ တိုက်ခိုက်ရရှိခဲ့သော်လည်း စစ်အာဏာရှင်ကို ရပ်တန့် အသက်မဲ့စေဖို့ထိ အရာမရောက်သေးတာကို ဝန်ခံရမည်ဖြစ်ပါတယ်။ ထို့အပြင် ပြည်သူများနှင့် ဆက်ဆံရေးပျက်ပြားကာ ပြည်သူ့ထောက်ခံမှု လျော့နည်းလာရတဲ့ အဖြစ်အပျက်တွေလည်း ဒီငါးနှစ်ပြည့်လုကာနီး ကာလအတွင်းမှာ ဖြစ်ပွားခဲ့ပါတယ်။

ပြည်သူများဘက်က ကြည့်မည်ဆိုလျှင်လည်း အာဏာရှင်လက်အောက်၌ အသက်ရှင်‌နေထိုင်ရသည်
ကို မနှစ်မြို့၍ တော်လှန်ရေး စတင်ကတည်းက မိမိတို့တတ်နိုင်သည့်ဘက်က ကြိုးစားခဲ့ကြရတာဖြစ်ပါသည်။ မြို့နေပြည်သူတွေကိုပဲ ကြည့်ရမည်ဆိုလျှင် စီးပွားရေး လုပ်၍ရနေသည်ဆိုသော်လည်း အဆင်ပြေနေသည့်အနေအထားတွင်မရှိပေ။ ထို့ထက်သာမက အကြမ်းဖက်စစ်အုပ်စုဘက်မှ မိမိတို့ ညီအကိုမောင်နှမ သားသမီးများကို ပေါ်တာလိုက်ဆွဲလျှင်လည်း လိုက်ရွေးရအုံးမည်ဖြစ်သည်။ မရွေးနိုင်လျှင် မိမိသားသမီး အသက်မှာ အာမခံချက်မရှိပါ။ မတရားသဖြင့် ချမှတ်ထားသည့် လက်တစ်လုံးခြား ဥပဒေများအောက်၌ မြို့နေပြည်သူများအတွက်မှာ "ဆူးကြားက ဘူးခါးဘဝ"သဖွယ် ဖြစ်နေပါသည်။

ထိုကဲ့သို့ပြောလျှင်လည်း တော်လှန်ရေး အင်အားစုများ၏ စိုးမိုးထိန်းချုပ်နယ်မြေအတွင်းမှ ပြည်သူအများ အဆင်ပြေနေကြသည်ဟူ၍လည်း မဆိုလိုပေ။ စစ်တပ်၏ အဘက်ဘက်မှ ပိတ်ဆို့မှုများကြောင့် ကုန်ဈေးနှုန်းများသည် မကြားဖူးလောက်သည့် အခြေအနေထိ ထိုးတက်နေပြီး၊ ဝယ်ယူစားသုံရန် ပိုက်ဆံရှိနေသော်လည်း ဝယ်စရာ ပစ္စည်းက မရှိနေသည့် အနေအထား ကြုံ‌တွေ့နေကြရသည်။
သွားရမည့် ဆေးရုံ ဆေးခန်း လွယ်လွယ်ကူကူမရှိသည့် အနေအထားမျိုးလည်း ကြုံတွေ့နေကြရသည်။ အကြမ်းဖက်စစ်အုပ်စု၏ လေယာဉ်နှင့် ဗုံးကြဲတိုက်ခိုက်မှုကြောင့် ပြည်သူလူထု၏ အသက်ဆုံးရှုံးမှုများ၊ စစ်ကြောင်းထိုး မီးရှို့ခံရ၍ ဆုံးရှုံးလိုက်ရသည့် အိုးအိမ်စည်းစိမ်များကို စစ်အုပ်စုမှ ပြန်လည်အလျော်အစား ပေးနိုင်မည်မဟုတ်ပါ။
ထိတွေ့စစ်ပွဲများ ဖြစ်ပွားသည့် ဒေသများ၌ လူတဦး၏ အသက်တစ်ချောင်းသည် ဖယောင်းတိုင်မီးသဖွယ်ဖြစ်နေပါသည်။ မီးစာမကုန်ခင် လေတစ်ချက်အဝေ့မှာ မီးငြိမ်းသွားသည့်သဖွယ် သက်တမ်းမစေ့ခင် ပျောက်ဆုံးသွားသည့် အသက်များသည်လည်း မရေမတွက်နိုင်အောင်ဖြစ်သည်။ "နေ့မြင် ညပျောက်" ဆိုသည့် စကားစုသည် ပြည်သူများအတွက် လက်သုံးစကားပင် ဖြစ်နေပြီဖြစ်သည်။ တချို့ပြည်သူများအတွက်ဆိုလျှင် စစ်တပ်၏ ဖိနှိပ်မှုမှ လွတ်မြောက်ခါစကာလ၌ပင် အာဏာရှင်လက်သစ်ဖြစ်လာသည့် တော်လှန်ရေးအစုအဖွဲ့အချို့၏ မတရားမှုများကိုလည်း ခါးသီးစွာ လက်ပိုက် ကြည့်နေရပြန်ပါသည်။

တော်လှန်ရေးတပ်များ အနေဖြင့်လည်း "တဦးတယောက်မကောင်းတာ၊ တဖွဲ့မကောင်းတာ" အတွက်ကြောင့် ဝါးလုံးသိမ်းလက်ညှိုးထိုး ခံနေကြရပါသည်။ ပြည်သူ့အတွက်၊ ပြည်သူ့ဘက်တော်သားဟု ကြွေးကြော်ခဲ့ကြသူများက ဒီငါးနှစ်တာ အချိန်အတွင်း၌ အရေခြုံလား၊ အစစ်အမှန်လားဆိုသည်မှာ ပေါ်သင့်သလောက် ပေါ်လာပြီ ဖြစ်သည်။ "ပြည်သူနှင့် တသားတည်းဖြစ်ရမည်၊ ပြည်သူ့အသက်အိုးအိမ်စည်းစိမ်များကို ကာကွယ်ရမည်၊ ပြည်သူ့ဘဝကို စောင့်ရှောက်ရမည်" ဆိုသည့် အသိ ပြည်သူ့တော်လှန်ရေးတပ်တွေကြားထဲ စိမ့်ဝင်သင့်တဲ့ အချိန်ရောက်နေပါပြီ။

ပြည်သူက ပြည်သူ့တာဝန်ကျေသည့်အတိုင်း တော်လှန်ရေးတပ်များဘက်ကလည်း တာဝန်ကျေရပါမည်။ တော်လှန်ရေးတပ်များက ပြည်သူများအတွက်တိုက်ပွဲဝင်နေသည့်အတိုင်း ပြည်သူများကလည်း တော်လှန်ရေးတပ်များ လမ်းမမှားအောင်၊ အာဏာရှင်အသွင် မပြောင်းလာအောင် ဘေးကနေ ထိန်းကျောင်းမှု ပြုလုပ်နေရပါမည်။ မမှန်ကန်သည့် လုပ်ရပ်တစ်ခုကို စတင်လိုက်သည်နှင့် အဆိုပါလုပ်ရပ်က မမှန်ဘူး မဖြစ်သင့်ဘူးဆိုသည့် ပြည်သူ့အသံကို ထုတ်ပြကြရပါမည်။ အချင်းချင်းလက်တွဲကူညီပြီး မျှော်မှန်းတဲ့ အနာဂတ်ဆီကို အားကြိုးမာန်တက် ချီတက်ကြရပါမည်။ ဒီမိုကရေစီပန်းတိုင်ကို သွားနေသည့်လမ်းပေါ်၌ ကိုယ့်တာဝန်ကိုယ်ကျေပြီး ဒီမိုကရေစီစနစ်ကို ကျင့်သုံးသွားကြရပါမည်။ သို့မှသာ အနာဂတ်နိုင်ငံတော်သစ်၌ ပြည်သူတရပ်လုံး ဒီမိုကရေစီကို ပြည့်ပြည့်ဝဝ နားလည်ကျင့်သုံးနိုင်သည့် စမတ်ကျသည့် နိုင်ငံသားများ ဖြစ်လာကြမှာ ဖြစ်ပါသည်။

ထို့ကြောင့်
"ဒီငါးနှစ်အတွင်းမှာ ငါလိုချင်တဲ့ ဒီမိုကရေစီရအောင် ငါ ဘာတွေလုပ်ခဲ့ပြီးပြီလဲ"
"ငါ ဘယ်နေရာတွေမှာ လွဲချော်ခဲ့တာလဲ"
"ငါ ဘယ်နေရာတွေကို ပြုပြင်ဖို့ လိုအပ်တာလဲ"
စတဲ့ မေးခွန်းတွေကို ကိုယ်တိုင်ကစပြီး မေးကြည့်လို့ တယောက်ချင်းစီ ပြောင်းလဲလိုက်ကြဖို့ တိုက်တွန်းလိုပါသည်။

အတုအယောင် ရွေးကောက်ပွဲ ပထမပိုင်း၌ တာဝန်ကျေခဲ့သော ပြည်သူများကို ဒုတိယပိုင်းနဲ့ တတိယပိုင်းမှာလည်း ဆက်လက်ကူညီဆောင်ရွက်ကြရန်၊ တာဝန်ကျေကြရန် တိုက်တွန်းလိုက်ရပါသည်ခင်ဗျာ။

#ထွက်ပေါက်မပေးမိဖို့ #အတုအယောင်ဆန့်ကျင်ရေး #ပြည်သူသာအဓိက #အရေးတော်ပုံအောင်ရမည်

04/01/2026

ယနေ့သည် နယ်ချဲ့အင်္ဂလိပ်တို့၏ လက်အောက်မှ မြန်မာနိုင်ငံလွတ်မြောက်ကာ လွတ်လပ်ရေးရရှိပြီး (၇၈) နှစ်တင်းတင်းပြည့်သော နေ့ဖြစ်ပါသည်။

မြန်မာနိုင်ငံ၏ သမိုင်းကို ပြန်လှန်ကြည့်လျှင် မင်းအဆက်ဆက်၏ ပဒေသရာဇ်စနစ်ဖြင့် အုပ်စိုးမှုကို ခံခဲ့ရသည်။ ထိုအချိန်တွင် ရှင်ဘုရင်တို့၏ နှုတ်ထွက်စကားသည် ဥပဒေဖြစ်သည်။ ရှင်ဘုရင်က အမျက်တော်ရှသဖြင့် သတ်လျှင်သေ၊ ရှင်ဘုရင်ကျေနပ်အောင် နေနိုင်လျှင် စံစားရသည်။ လွတ်လပ်မှုနှင့် အလှမ်းဝေးလှပါသည်။

ထို့နောက် တိုင်းတစ်ပါးသား နယ်ချဲ့အင်္ဂလိပ်တို့၏ သိမ်းပိုက်မှုကြောင့် နယ်ချဲ့လက်အောက် ကျရောက်ကာ ဘုရင်စနစ်မှာ ဆုံးခန်းတိုင်ခဲ့ရသည်။ အင်္ဂလိပ်လက်ထက်တွင် မြန်မာနိုင်ငံသားတို့သည် တိုင်းတစ်ပါးသားတို့၏ နှိပ်စက်ကလူပြုမှုများကို ခံခဲ့ရသည်။ ကျွန်ပညာရေးစနစ်ဖြင့် ပြည်သူများကြားတွင် အဆင့်အတန်းခွဲခြားမှုများရှိခဲ့သလို မြို့အုပ်၊ မြို့ဝန် စသဖြင့် အင်္ဂလိပ်တို့၏ အမှုတော် ထမ်းရွက်သူများက တဖက်၊ သာမန် ပြည်သူတို့က တဖက်ပုံစံဖြင့် သွေးကွဲခဲ့ရသည်။ ထို့ကြောင့် သခင်အောင်ဆန်းအပါအဝင် ကျောင်းသားခေါင်းဆောင်များစုဖွဲ့ကာ အနယ်နယ် အရပ်ရပ်မှ ပြည်သူများကို သိမ်းသွင်းစည်းရုံးပြီး လွတ်လပ်ရေးတိုက်ပွဲဝင်ခဲ့ကြသည်။ ၁၉၂၀ အရေးတော်ပုံ၊ ရေနံမြေသပိတ်စသဖြင့် နိုင်ငံလုံးဆိုင်ရာ အုံကြွမှုများတွင် အသက်ကို စတေးခဲ့ရသူများလည်း ရှိခဲ့သည်။ ထို့အပြင် လွတ်လပ်ရေး ကြိုးပမ်းမှုကာလတွင် မြန်မာနိုင်ငံသားတို့သည် ဖက်ဆစ်ဂျပန်တို့၏ လမ်းကြုံညှင်းပန်းနှိပ်စက်မှုကိုလည်း ခါးစည်းခံခဲ့ရပါသေးသည်။ ၁၉၄၈ ဇန်နဝါရီလ (၄) ရက်နေ့ရောက်မှသာ ထိုတိုက်ပွဲတို့ အဆုံးသတ်ကာ လွတ်လပ်ရေးပန်းတိုင်သို့ရောက်ခဲ့ရသည်။

သို့သော်လည်း မြန်မာနိုင်ငံသည် လွတ်လပ်ရေးမရခဲ့ပါ။ တမြေတည်းနေ တရေတည်းသောက်သူချင်း အတူတူ ထမင်းတနပ်ပိုစားလိုသူများ ရှိလာခဲ့သည်။ ထိုသူတို့ ထမင်းတနပ်ပိုစားရရုံမျှနှင့်တော့ တိုင်းပြည်မပျက်နိုင်ပါ။ ထမင်းတနပ်ထက်ပိုသော ရာထူးစည်းစိမ်များကို လောဘတက်ခဲ့၍သာ မြန်မာနိုင်ငံကြီး ထပ်ဆင့်လွတ်လပ်ရေး ဆုံးရှုံးရခြင်းဖြစ်သည်။ ၁၉၄၈ တွင် လွတ်လပ်ရေးရခဲ့သော မြန်မာနိုင်ငံမှာ ၁၉၅၈ တွင် အာဏာသိမ်းခံခဲ့ရသည်။ လွတ်လပ်မှုကို အကျဉ်းချခဲ့ခံရသည်မှာ ၆၈ နှစ်ကြာ ယနေ့ထိတိုင်ဖြစ်သည်။ လွတ်လပ်ရေးနေ့ စာမျက်နှာကို အသစ်ပြန်လည် ရေးထိုးရန် လိုအပ်သည်။ ယခုကျင်းပနေသော လွတ်လပ်ရေးနေ့ အခမ်းအနားများတွင် လွတ်လပ်မှု မပါဝင်ပါ။ လွတ်လပ်မှုသည် သံတိုင်များ၏အနောက်ဘက် တစ်နေရာတွင်ဖြစ်သည်။ ထို့ကြောင့် ယခုအချိနိတွင် တော်လှန်ရေးရဲဘော်များနှင့် ပြည်သူတစ်ရပ်လုံး၊ လူမျိုးစုများအားလုံး လက်တွဲကာ လွတ်လပ်မှုကို ထွေးပွေ့နိုင်ရန် ကြိုးပမ်းလျက်ရှိပါသည်။ စစ်မှန်သော လွတ်လပ်ရေးမရမခြင်း လွတ်လပ်ရေးနေ့အခမ်းအနားများ ကျင်းပခြင်းမှာ အဓိပ္ပာယ်မရှိ။ လွတ်လပ်ရေးရခဲ့သည်မှာ (၇၈)နှစ်ရှိပြီဆိုသော အချိန်သည်လည်း အနှစ်သာရ မပြည့်ဝလှပါ။ ထို့ကြောင့် စစ်အာဏာရှင်ကို အောင်နိုင်ပြီး ဖက်ဒရယ်ဒီမိုကရေစီစနစ်အောက်တွင် နိုင်ငံသားအားလုံး သာတူညီမျှရှိသော အချိန်မှသာ လွတ်လပ်ရေးနေ့ဟု ခေါ်တွင်ပါမည်။ နိုင်ငံသားအခွင့်အရေးကို ဘယ်သူဘယ်ဝါ၏ သားသမီးဖြစ်မှုနှင့် မတိုင်းတာဘဲ လူသားဖြစ်မှု နိုင်ငံသားဖြစ်မှုနှင့်သာ တိုင်းတာသော အချိန်ရောက်လျှင် လွတ်လပ်ရေးနေ့ကို ပျော်ရွှင်စွာ ကျင်းပကြပါမည်။

ပြည်သူများ အပူအပင်မရှိ အိပ်စက်နိုင်သောညများ...
ပြည်သူများ မိမိနိုင်ငံအတွင်း အစစ်အဆေးမရှိ လွတ်လပ်စွာ သွားလာနိုင်သောနေ့များ....
‌ဘယ်အချိန် ပေါ်တာဆွဲမလဲ မပူပန်ရသော အချိန်များ.....
လေကြောင်းတိုက်ခိုက်မှု ပြုလုပ်ခံရမှာ မကြောက်ရသော ကာလများ....
အမျိုးသမီးများ နေ့ညမရွေး လုံခြုံစွာ သွားလာနိုင်သော ၂၄နာရီများ...
နိုင်ငံသားကောင်းများ၏ အိမ်ပြန်ချိန်များ...
ထိုအချိန်များရောက်မှသာ လွတ်လပ်ရေး၏ မွေးနေ့ကို တစ်ဖန်ပြန်လည် ရေတွက်‌‌ေနချင်ပါ‌ေတာ့သည်။

ပြည်သူအားလုံး ဘေးကင်းကျန်းမာစေကြောင်း ဆုတောင်းလျက်။

#အတုအယောင်ဆန့်ကျင်ရေး #ထွက်ပေါက်မပေးမိဖို့ #ပြည်သူသာအဓိက #အရေးတော်ပုံအောင်ရမည် #လွတ်လပ်ရေး

31/12/2025

နှစ်သစ်မှာ အားလုံးသော ပြည်သူများ စိတ်ချမ်းသာ ကိုယ်ကျန်းမာ ရှိပြီး ဘေးဘယာအပေါင်းမှ ဝေးကွာပါစေ" လို့ ကျွန်တော်တို့ UMMSURF မှ တောင်းဆုပြုအပ်ပါတယ် ခင်ဗျာ🙏
ဒီနေ့ဟာ ကျွန်တော်တို့ တော်လှန်ရေးရဲ့ စာမျက်နှာ အသစ်ကို ဖွင့်လှစ်တဲ့ နေ့ဖြစ်သလို တော်လှန်သမိုင်းမှာ သမိုင်းသစ် ရေးထိုးကြရမဲ့ အချိန်အခါလည်း ဖြစ်ပါတယ်။
"ကျွန်တော်တို့ SURF အနေနဲ့လည်း တော်လှန်ရေးစာအုပ် နိဂုံးချုပ်ကာ မပြီးဆုံးသေးသရွေ့ တော်လှန်စာမျက်နှာတိုင်းမှာ အားလုံးသော ပြည်သူများနဲ့လက်တွဲပြီး ကျရာနေရာမှ တာဝန်ထမ်းဆောင်သွားမယ်" လို့ ကတိပြုအပ်ပါတယ်။

University of Medicine Mandalay Students' Union

10/02/2026

01/02/2026

30/01/2026

27/01/2026

22/01/2026

22/01/2026

19/01/2026

11/01/2026

09/01/2026

04/01/2026

31/12/2025

Address

Telephone

Website

Alerts

Contact The University

Shortcuts

Share

Category