16/07/2026
သူတို့တွေမှာလည်း ချစ်ရတဲ့ မိသားစုတွေ ရှိခဲ့ကြပါတယ်။
သူတို့တွေမှာလည်း အနာဂတ် ရည်မှန်းချက်တွေ၊ အိပ်မက်တွေ ရှိခဲ့ကြပါတယ်။
သူတို့တွေမှာလည်း တစ်ခါပဲရတဲ့ ဒီဘဝကို ပျော်ပျော်ရွှင်ရွှင် ဖြတ်သန်းချင်တဲ့ စိတ်တွေ ရှိခဲ့ကြပါတယ်။
ဒါပေမဲ့... ကျွန်တော်တို့အားလုံးရဲ့ အနာဂတ် ပိုမိုလှပဖို့အတွက် သူတို့ရဲ့ "ဒီနေ့" တွေကို စွန့်လွှတ်ပြီး ကျွန်တော်တို့ရဲ့ "မနက်ဖြန်" တွေအတွက် အသက်ကို ပေးဆပ်သွားခဲ့ကြပါတယ်။
တိုင်းပြည်လွတ်လပ်ရေးအတွက် အသက်ပေးသွားခဲ့တဲ့ ဗိုလ်ချုပ်အောင်ဆန်းနဲ့ အာဇာနည်ခေါင်းဆောင်ကြီးကိုးဦး ရဲ့ သွေးမြေကျခဲ့တဲ့ ဇူလိုင်လ (၁၉) ရက်နေ့ဟာ ပြန်လည်နီးကပ်လို့ လာနေပါပြီ။
ဒါပေမဲ့ ဒီနေ့ခေတ်မှာတော့ အာဇာနည်ဆိုတာ သမိုင်းစာအုပ်ထဲမှာတင် မကတော့ပါဘူး။ စစ်အာဏာရှင်စနစ် အမြစ်ပြတ်ဖို့အတွက် လမ်းမပေါ်မှာ၊ တောတောင်တွေထဲမှာနဲ့ စစ်မြေပြင်တွေထဲမှာ မိမိတို့ရဲ့ လူငယ်ဘဝတွေကို စတေးပြီး သက်စွန့်ဆံဖျား တိုက်ပွဲဝင်ရင်း ကြွေလွင့်သွားခဲ့ရတဲ့ နွေဦးတော်လှန်ရေးရဲ့ ရဲဘော်ရဲဘက်တွေအားလုံးဟာ ကျွန်တော်တို့ရင်ထဲက ထာဝရ "အာဇာနည်တွေ" ဖြစ်ပါတယ်။
ဒါကြောင့် လာမယ့် ဇူလိုင် (၁၉) ရက်နေ့မှာ -
(၁၉) ရက်၊ မနက် (၁၀) နာရီ (၃၇) မိနစ်မှာ ရောက်ရာနေရာမှ ငြိမ်သက်ခြင်း၊ ဥဩဆွဲခြင်း၊ ဟွန်းတီးခြင်းတို့ဖြင့် အလေးပြုပေးကြပါ။
အနက်ရောင် အဝတ်အစား၊ ဖဲကြိုး သို့မဟုတ် ဦးထုတ်များ ဝတ်ဆင်၍ ကျွန်ုပ်တို့ရဲ့ ဝမ်းနည်းခြင်းနဲ့ မမှိန်မသုန် ဆက်လက် တော်လှန်လိုသော စိတ်ဓာတ်ကို "အနက်ရောင်လှုပ်ရှားမှု (Black Movement)" ဖြင့် ဖော်ပြပေးကြပါ။
ဗိုလ်ချုပ်ရုပ်တု၊ လွတ်လပ်ရေးကျောက်တိုင်၊ ကျဆုံးအာဇာနည်များရဲ့ ဂူဗိမာန်များဆီသို့ စုဝေးချီတက်ခြင်းဖြင့် အာဇာနည်တို့ရဲ့ သမိုင်းကို ကျွန်ုပ်တို့က အစဉ်အမှတ်ရနေကြောင်း သက်သေပြကြပါ။
“မမေ့ခြင်းက သမိုင်းကို အသက်ဝင်စေတယ်။
အောက်မေ့ခြင်းက အနစ်နာခံမှုတွေကို အဓိပ္ပာယ်ရှိစေပါတယ်။”
#အာဇာနည်နေ့ #အာဇာနည်တိုင်းသမိုင်းမသေ #ဇူလိုင်၁၉
