https://www.facebook.com/101503175680532/

Dhamma Nadi, Myaungmya (2026)

02/11/2021

⚜⚜⚜၀ိနည်းနှင့်စပ်~သိနားလည်ထားသင့်ရာ
အမြတ်ဆုံး ကထိန်သင်္ကန်းအလှူ⚜⚜⚜

“ကထိန်စစ်စစ် ဖြစ်ရဲ့လား”
🌺🌺🌺🌺🌺🌺🌺🌺🌺

အရှင်ဘုရား ....
ရဟန်းတော်ကိုယ်တိုင် လှူတဲ့ သင်္ကန်း နဲ့
ကထိန် ခင်းကောင်းပါသလား ?
ကထိန်ခင်းခဲ့ရင်ရော ကထိန် အထမြောက်ပါသလား။ ?
(မသင်းမဒီ၊ ပြည်မြို့။)

ဒကာမလေး မသင်းမဒီ ...
“ကထိန်ခင်းတယ်”လို့ ပြောလိုက်ရင်
ကထိန်ခင်းတဲ့အလုပ်ကို လူ၀တ်ကြောင်
ဒကာ၊ဒကာမတွေက လုပ်ကြတယ်လို့
လူအများက ထင်နေကြပါတယ်။

♦️တကယ်တော့-
#ကထိန်ခင်းတဲ့အလုပ်ဟာ-လူ၀တ်ကြောင် ဒကာဒကာမတွေရဲ့ အလုပ်မဟုတ်ပါဘူး။
ရဟန်းတော်တွေရဲ့ အလုပ်ပါ။
ရဟန်းတော်တွေကပဲ ကထိန်ခင်းကြတာပါ။

♦️ဒါပေမဲ့-
ရဟန်းတော်တွေ ကထိန်ခင်းမယ့် သင်္ကန်းကို
အများအားဖြင့် လူ၀တ်ကြောင် ဒကာ၊ဒကာမ
တွေကပဲ လှူဒါန်းကြပါတယ်။ ကထိန်ခင်းမယ့် သင်္ကန်းလှူဒါန်းတာကိုပဲ ကထိန်ခင်းတယ်လို့ တင်စားပြီးပြောကြရင်းက ကထိန်သင်္ကန်း
လှူတဲ့သူတွေကို ကထိန်ခင်းတဲ့သူတွေလို့
ခေါ်ဝေါ်နေကြတာပါ။

♦️အမှန်က-
လူ၀တ်ကြောင် ဒကာ၊ဒကာမတွေဟာ
ကထိန်ခင်းတဲ့သူတွေ... မဟုတ်ပါဘူး။
#ကထိန်သင်္ကန်း_လှူတဲ့သူတွေပါ။

♦️ကထိန်သင်္ကန်းကို-
လူ၀တ်ကြောင် ဒကာ၊ဒကာမတွေပဲ
လှူခွင့်ရှိတာ မဟုတ်ပါဘူး။

●ရဟန်းသာမဏေတွေလည်း~ လှူခွင့်ရှိပါတယ်။
●သီလရှင်တွေလည်း~ လှူခွင့်ရှိပါတယ်။
●လူသားတွေတင် ~လှူခွင့်ရှိတာ မဟုတ်ပါဘူး။
●နတ်တွေလည်း~ လှူခွင့်ရှိပါတယ်။
●ဗြဟ္မာတွေလည်း~ လှူခွင့်ရှိပါတယ်။
●နဂါးဂဠုန်တွေလည်း~ လှူခွင့်ရှိပါတယ်။

♦️ကျမ်းဂန်မှာ-
#ကထိန်သင်္ကန်း_လှူခွင့်ရှိသူ ကို
“လူရယ်၊ နတ်ရယ်၊ သီတင်းသုံးဖေါ်(၅)ဦးရယ်”
လို့ ပုဂ္ဂိုလ်(၇)မျိုး တိုက်ရိုက်ပြထားပါတယ်။

🔸️ သီတင်းသုံးဖေါ်(၅)ဦးဆိုတာ-
“ရဟန်း၊ ရဟန်းမ၊ သာမဏေ၊ သာမဏီ နဲ့ သိက္ခမာန်”တို့ပါပဲ။

🔸️ သိက္ခမာန်-ဆိုတာ...
ဘိက္ခုနီ(ရဟန်းမ) မ၀တ်မီ
သိက္ခာပုဒ်(၆)ပါးကို (၂)နှစ်တိတိ ကျင့်ရတဲ့
“သာမဏေ တစ်မျိုး” ကို ခေါ်တာပါ။

🔸️ ပဓာနနည်းအားဖြင့် တိုက်ရိုက်ပြထားတဲ့ ပုဂ္ဂိုလ်(၇)မျိုးထဲမှာ-
နဂါး၊ ဂဠုန်စတဲ့ တိုက်ရိုက်ပြမထားတဲ့ တခြားပုဂ္ဂိုလ်တွေလည်း အကျုံး၀င်ပါတယ်။
အသိဉာဏ်ရှိသူ မည်သူမဆို ကထိန်သင်္ကန်း
လှူခွင့်ရှိပါတယ်။

🔸️ ရဟန်းတော်တွေကို ကထိန်သင်္ကန်း
လှူခွင့်ရှိသူများစာရင်းမှာ တိုက်ရိုက်ပြထားတဲ့အတွက်...
ရဟန်းတော် ကိုယ်တိုင် လှူတဲ့သင်္ကန်း
နဲ့ ကထိန်ခင်းကောင်းပါတယ်။ ကထိန်ခင်းခဲ့ရင်လည်း ကထိန်အထမြောက်ပါတယ်။

⚜⚜⚜⚜⚜⚜⚜⚜⚜⚜⚜⚜⚜

ဒါပေမဲ့-
❎ရဟန်းတော်ကိုယ်တိုင် “အလှူခံတဲ့ သင်္ကန်း”
နဲ့တော့ ကထိန် မခင်းကောင်းပါဘူး။
ကထိန်ခင်းခဲ့ရင်လည်း -ကထိန်အထ မမြောက်
ပါဘူး။

♦️ကထိန်တစ်ခု အထမြောက်ဖို့အတွက်- ကထိန်သင်္ကန်း လှူတဲ့သူ ဘယ်သူလဲဆိုတဲ့
အချက်က အဓိက မကျပါဘူး။

လှူတဲ့ ကထိန်သင်္ကန်း “ဘယ်လိုသင်္ကန်းလဲ ?”
ဆိုတဲ့ အချက်က အဓိကကျပါတယ်။

♦️ကထိန်တစ်ခု အထမြောက်ဖို့အတွက်-
#လှူတဲ့_ကထိန်သင်္ကန်း ဟာ….
●(၁) မိုးကျသင်္ကန်းလည်း ဖြစ်ရပါမယ်။
●(၂) မသိုးသင်္ကန်းလည်း ဖြစ်ရပါမယ်။
●(၃) သံဃိကသင်္ကန်းလည်း ဖြစ်ရပါမယ်။
သင်္ကန်းသုံးထည် ဖြစ်ရမယ်လို့ဆိုလိုတာ
မဟုတ်ပါဘူး။

♦️သင်္ကန်းတစ်ထည်တည်းကပဲ-
(၁) “မိုးကျ”ဖြစ်ခြင်း၊
(၂) “မသိုး”ဖြစ်ခြင်း၊
(၃) “သံဃိက”ဖြစ်ခြင်း...ဆိုတဲ့ အရည်အသွေး(၃)မျိုးနဲ့ ပြည့်စုံရမယ်လို့
ဆိုလိုတာပါ။

⚜⚜⚜⚜⚜⚜⚜⚜⚜⚜⚜⚜⚜

(၁) ကထိန်သင်္ကန်းဟာ -
♦️“ #မိုးကျသင်္ကန်း” ဖြစ်ရပါမယ်။

မိုးရေမိုးပေါက်တွေဟာ... ဘယ်သူ့ရဲ့ တိုက်တွန်းလှုံ့ဆော်မှုမှ မပါဘဲ မိုးကောင်းကင်အပေါ်ကနေ အလိုအလျောက်ကျလာသလို၊
ကထိန်သင်္ကန်းဟာလည်း... ကထိန်ခင်းကျောင်းတိုက်က ရဟန်းတော်တွေထဲက
ဘယ်ရဟန်းတော်ရဲ့ တိုက်တွန်းလှုံ့ဆော်မှုမှ
မပါဘဲ အလှူရှင်က သူ့သဒ္ဓါတရားနဲ့သူ
အလိုအလျောက် လာလှူတဲ့ သင်္ကန်း ဖြစ်ရပါမယ်။

ကိုယ် လုံး၀မတိုက်တွန်းဘဲ... သူ့အလိုအလျောက်
ရတဲ့သင်္ကန်း၊
ကိုယ်လုံး၀ အလှူမခံဘဲ... သူ့အလိုအလျောက်
လာလှူတဲ့ သင်္ကန်းကို မိုးပေါ်က ရုတ်တရက်ကျ
လာတဲ့ အရာ၀တ္ထုနဲ့တူလို့~
#မိုးကျသင်္ကန်း ( #မိုးပေါ်ကျသင်္ကန်း)လို့ ခေါ်ပါတယ်။

❎ရဟန်းတော်တွေဟာ~
“မိခင်ရင်း၊ ဖခင်ရင်း” ဆီကတောင်မှ
ကထိန်သင်္ကန်း အလှူမခံ ကောင်းပါဘူး။
ရဟန်းတော်ကိုယ်တိုင်~ မိခင်ရင်း၊ဖခင်ရင်းဆီက
အလှူခံလို့ ရလာတဲ့ သင်္ကန်းနဲ့ ကထိန်ခင်းရင်လည်း
ကထိန် အထ မမြောက်ပါဘူး။

ရဟန်းတော်က မိဘကျေးဇူး အထူးဆပ်ချင်လို့
ဆိုပြီး ထူးခြားတဲ့ ကထိန်အလှူကုသိုလ်ကြီး
မိဘနှစ်ပါး ရစေချင်တဲ့ စိတ်နဲ့ မိဘကို ကထိန် အကြောင်းတွေ ပြောပြပြီး တိုက်ရိုက်နည်းနဲ့ဖြစ်ဖြစ်၊ သွယ်ဝိုက်တဲ့နည်းနဲ့ဖြစ်ဖြစ်
ကထိန်သင်္ကန်း အလှူခိုင်းတယ်ဆိုရင်
အဲဒီသင်္ကန်းနဲ့ ကထိန်ခင်းပေမယ့်...
ကထိန်အထ မမြောက်တော့တဲ့အတွက်~
🔹️ မိဘကျေးဇူးလည်း အထူးဆပ်ရာ.
မရောက်တော့ပါဘူး။
🔹️ မိဘနှစ်ပါးလည်း ထူးခြားတဲ့ ကထိန်အလှူ
ကုသိုလ်ကြီး မရတော့ပါဘူး။

❎ကိုယ်ဝါဆိုတဲ့ ကျောင်းတိုက်ရဲ့ ကထိန်အတွက်
အလှူ မခံကောင်းဘူးလို့ ပြောတာပါ။

✅တခြားကျောင်းတိုက်ရဲ့ ကထိန်အတွက်တော့-
- လှူဖို့ တိုက်တွန်းကောင်းပါတယ်။
တိုက်တွန်းလို့ရပါတယ်။ လိုအပ်ရင်
တိုက်တွန်းရမှာပါပဲ။

✅ကထိန်သင်္ကန်း လှူခွင့်ရှိသူတွေထဲမှာ-
ရဟန်းတော်တွေလည်း ပါတဲ့အတွက်...
ရဟန်းတစ်ပါးပါးက ဦးစီး ဦးဆောင်ပြုပြီး ၊
တပည့်ဒကာ ဒကာမတွေနဲ့ တခြားကျောင်းတိုက်
တစ်ခုခုမှာ ကထိန်သွားခင်းတာကတော့
ရပါတယ်။

ဒါပေမဲ့ -
❎ကထိန်ခင်းမယ့်ကျောင်းတိုက်က ရဟန်းတော်
တွေ ကိုယ်တိုင်ကတော့ ကိုယ့်ကျောင်းကထိန်အတွက် ဘယ်သူ့ကိုမှ ကထိန်သင်္ကန်းလှူဖို့
မတိုက်တွန်းကောင်းပါဘူး။

“ဒီနှစ် ကထိန် ဘယ်ရက်လဲ”၊
“ဒီနှစ်လည်း ဘုံကထိန်ပဲလား”
“ဒီနှစ် ဉတ်သင်္ကန်း လှူဖို့ ပြောထားတဲ့သူ
မရှိသေးဘူး”
“ကထိန်ရာသီတော့ ရောက်လာပြန်ပြီနော် ”
စသည် စသည်အားဖြင့် …
ဘယ်လို အရိပ်နိမိတ်မျိုး ပြပြီးတော့ပဲဖြစ်ဖြစ်၊ ဘယ်လိုပရိယာယ်စကားမျိုး ပြောပြီးတော့ပဲဖြစ်ဖြစ်၊ ကထိန်ခံ ရဟန်းတော်တွေ ကိုယ်တိုင် ကထိန် သင်္ကန်း အလှူမခံကောင်းပါဘူး။

♦️ကထိန်ခင်းမယ့် ဒကာ, ဒကာမတွေဘက်က
ကထိန်နဲ့ပတ်သက်လို့ ဘာစကားမှ မစ,ရသေး
ဘဲနဲ့ ကျောင်းတိုက်ရဟန်းတော်ထဲက တစ်ပါးပါးက ကထိန်အကြောင်းမစမိအောင် အထူးသတိပြု
ရပါမယ်။

❎ ဒကာ ,ဒကာမတွေက ဘာမှ မလျှောက်ရ
သေးဘဲနဲ့-
“ဒီနှစ်ကထိန်ဘယ်ရက်လဲ” လို့...
ကိုယ့်ဘက်က စ မမေးသင့်သလို၊
“ဒီနှစ်တော့ ဒီရက်မှာ ကထိန်ခင်းရင်
အဆင်ပြေမယ် ထင်တယ်" လို့လည်း....
ကိုယ်က စပြီး ကထိန်ရက် သတ်မှတ်ပေးမျိုးလည်း လုံး၀ မပြုလုပ်သင့်ပါဘူး။

♦️ကထိန်သင်္ကန်းဟာ-
“ အတိဥက္ကဋ္ဌ = အလွန်မြင့်မြတ်တဲ့သင်္ကန်း”
ဖြစ်ရမယ်တဲ့...။

“အလွန်မြင့်မြတ်တဲ့ သင်္ကန်း”ဆိုတာ-
တောင်းရမ်းမှု၊ တိုက်တွန်းမှု မပါဘဲ အလိုအလျောက်ရတဲ့သင်္ကန်းကို ပြောတာပါ။

တောင်းရမ်းခြင်း၊ တိုက်တွန်းခြင်း ဆိုတဲ့
အပြစ် လုံး၀ကင်းပြီး၊
အလွန့်အလွန် သန့်ရှင်းစင်ကြယ်တဲ့ သင်္ကန်းကို
“မိုးကျသင်္ကန်း”လို့ ခေါ်ပါတယ်။

ကိုယ့်ကျောင်းကို ဘယ်နေ့၊ဘယ်ရက်မှာ
ဘယ်သူ ကထိန်လာခင်းမယ်ဆိုတာ လုံးဝကို
မသိဘဲ ကြိုတင် အသိပေးမထားဘဲ
လာလှူတဲ့သင်္ကန်း၊ မမျှော်လင့်ဘဲ ရုတ်တရက် ရောက်လာတဲ့ သင်္ကန်းဟာ ~
“မိုးကျသင်္ကန်း” အစစ်ဆုံးပါပဲ။

♦️“မတောင်းဘဲ ရမှ~
အတိဥက္ကဋ္ဌ (အလွန်မြင့်မြတ်တယ်)”
ဆိုတာကို ကြည့်ပြီး ...
ဘယ်ပစ္စည်း လာဘ်လာဘ မဆို ၊
ဘယ်ရာထူး ဋ္ဌာနန္တရ မဆို~
ကိုယ်က မတောင်းရဘဲ အလိုအလျောက်ရမှ
ပို တန်ဖိုး ရှိတယ်။ ပို သန့်ရှင်းစင်ကြယ်တယ်-လို့ ကောက်ချက် ချနိုင်ပါတယ်။

♦️“မရှာဘဲ တွေ့မှ~ အချစ်၊
မရှာဘဲ ရမှ ~ ဘုန်းကံ”ဆိုတဲ့ သဘောပါပဲ။

⚜⚜⚜⚜⚜⚜⚜⚜⚜⚜⚜⚜⚜

(၂) ကထိန်သင်္ကန်းဟာ-
♦️“ #မသိုးသင်္ကန်း” ဖြစ်ရပါမယ်။

🔸️ သန့်ရှင်းလတ်ဆတ်တဲ့ ထမင်းကောင်း၊
ဟင်းကောင်း (မသိုးထမင်း၊ မသိုးဟင်း)ဆိုတာ-
ချက်ပြီး တစ်ရက်မှ မကူးသေးတဲ့
ဒီနေ့မှ ချက်ထားတဲ့ ထမင်းဟင်းဖြစ်ရသလို ~

ကထိန်သင်္ကန်းဟာလည်း-
လှူပြီး တစ်ရက်မှ မကူးသေးတဲ့~
ဒီနေ့ လှူထားတဲ့ သင်္ကန်းဖြစ်ရပါမယ်။

🔸️ ချက်ပြီး တစ်ရက်ကျော်သွားတဲ့ ထမင်းဟင်း၊
နေ့ကူးသွားတဲ့ ထမင်းဟင်းကို...
တကယ်သိုးသိုး ,မသိုးသိုး ထမင်းသိုး၊ ဟင်းသိုးလို့ပဲ ခေါ်ပါတယ်။
အအေးခန်းထဲ၊ ရေခဲ သေတ္တာထဲ ထည့်ထားလို့
ချက်ချင်း သိုးမသွားသေးလည်း...
နာမည်ကတော့ “ထမင်းသိုး၊ ဟင်းသိုး” ပါပဲ။

🔸️️ လှူပြီး တစ်ရက်ကျော်သွားတဲ့ သင်္ကန်း၊
နေ့ကူးသွားတဲ့ သင်္ကန်းကိုလည်း...
“သင်္ကန်းသိုး”လို့ ခေါ်ပါတယ်။

❎အဲဒီလို-
သင်္ကန်းသိုးနဲ့ လုံး၀ ကထိန်ခင်းလို့ မရပါဘူး။
ကထိန်ခင်းလည်း ကထိန် အထ မမြောက်ပါဘူး။
(တစ်ရက်မက ကျော်သွားရင်တော့ အထူး
ပြောစရာတောင် မလိုတော့ပါဘူး။)

🔸️ လှူပြီး တစ်ရက်မှ မကျော်သေးတဲ့ သင်္ကန်း၊
နေ့ မကူးသေးတဲ့ သင်္ကန်း၊ ဒီနေ့မှ လာလှူတဲ့
သင်္ကန်းကို “မသိုးသင်္ကန်း”လို့ ခေါ်ပါတယ်။
✅မသိုးသင်္ကန်းနဲ့ ခင်းမှ...
ကထိန် အထမြောက်ပါတယ်။

♦️ရဟန်းတော်တွေဟာ -
ကထိန်သင်္ကန်း ဒီနေ့ရရင် ဒီနေ့ပဲ ကထိန်ခင်းရ
ပါတယ်။ အလုပ်မအားလို့၊ အဆင်မပြေသေးလို့
ဆိုပြီး နောက်နေ့မှ ကထိန်ခင်းလို့ မရပါဘူး။
ကထိန်သင်္ကန်း အလှူခံပြီးတဲ့ နေ့ရဲ့ နောက်တစ်နေ့
အရုဏ် မတက်ခင်မှာပဲ ကထိန်ခင်းခြင်းကိစ္စ
ပြီးစီးအောင် ဆောင်ရွက်ရပါတယ်။

🔸️ ကထိန်သင်္ကန်း အလှူခံပြီးတာနဲ့ ချက်ချင်း
ကထိန်ခင်းရမယ်လို့ ဆိုလိုတာ မဟုတ်ပါဘူး။
နောက်တစ်နေ့ #အရုဏ်မတက်မချင်း
ဘယ်အချိန်မှာမဆို ကထိန်ခင်းလို့ ရပါတယ်။

♦️“ကထိန်သင်္ကန်းဟာ-
နေ့မကူးတဲ့ မသိုးသင်္ကန်းဖြစ်ရမယ်” ...
ဆိုတာကို ကြည့်ပြီး တချို့က- ကထိန်ရက်
မတိုင်ခင် ကထိန်သင်္ကန်းကို ကျောင်းမှာ သွား
မထားကောင်းဘူးလို့ ယူဆနေကြပါတယ်။

❎လမ်းခရီး ကြုံနေရင်တောင်မှ ...
ကထိန်သင်္ကန်းကိုင်လျက် တန်းလန်းကြီးနဲ့
ကျောင်းတိုက်ထဲကနေ ဖြတ်မသွားကောင်းဘူး
လို့တောင် ထင်နေကြပါတယ်။ မဟုတ်ပါဘူး။

✅ကထိန် သင်္ကန်းကိုရော၊ ကထိန်ရံ သင်္ကန်းတွေကိုရော ...
ကထိန်ရက် မတိုင်ခင် ကျောင်းမှာ သွားထားလို့
ရပါတယ်။

♦️ဒါပေမဲ့- ကထိန်သင်္ကန်းအဖြစ်နဲ့တော့
အပြီး လှူမပစ်ခဲ့ရပါဘူး။ ခေတ္တခဏ အပ်ရုံပဲ
အပ်နှံထားခဲ့ရမှာပါ။ ကျောင်းမှာ သွားထားရုံပဲ
ထားပြီး မလှူသေးရင် ...သင်္ကန်းတွေကို သံဃာက
မပိုင်သေးပါဘူး။အလှူရှင်တွေကပဲ ပိုင်ပါတယ်။

♦️ကထိန်သင်္ကန်းအဖြစ်နဲ့ အပြီးအပိုင် နှုတ်မြွက်ပြီး လှူပစ်ခဲ့ရင် ...
တကယ် ကထိန်ခင်းမယ့်ရက်အထိ စောင့်နေလို့
မရတော့ပါဘူး။ အဲဒီနေ့မှာပဲ ချက်ချင်း ကထိန်
ခင်းလိုက်ရပါမယ်။

♦️နေ့ကူးသွားရင် “သင်္ကန်သိုး”ဖြစ်သွားတဲ့အတွက်... ကထိန်ခင်းလို့ မရတော့ပါဘူး။
အဲဒီကျောင်းတိုက် အဲဒီနှစ်အတွက် ပြီးပါပြီ။
ကထိန်ခင်းလို့ လုံး၀ မရတော့ပါဘူး။

♦️တနှစ်မှာ~တစ်လ၊
တစ်လမှာ ~ တစ်ရက်၊
တစ်ရက်မှာ ~ တစ်ကြိမ်ပဲ
ကထိန်သင်္ကန်း လှူခွင့်ရှိတာဆိုတော့ ...
နောက်ထပ်လည်း ကထိန်သင်္ကန်း အလှူခံလို့
မရတော့ပါဘူး။

❎တချို့က-
ကထိန်ရက်မှာ မအားလို့၊ မလာနိုင်လို့ဆိုပြီး
ကထိန်မတိုင်ခင် ရက်ခပ်စောစောကတည်းက
ကထိန်သင်္ကန်းကို ကြိုလှူထားချင်ကြပါတယ်။
အဲဒီလို ကြိုလှူထားလို့ မရပါဘူး။
သက်ဆိုင်ရာ ကျောင်းတိုက် သံဃာကလည်း
ကြိုအလှူခံထားလို့ လုံး၀မရပါဘူး။
ကြိုလှူထားတဲ့ သင်္ကန်းနဲ့ ကထိန်ခင်းရင်-
အဲဒီကထိန်ဟာ “ကထိန်အတု၊ ကထိန်အင်” ပဲ
ဖြစ်ပါလိမ့်မယ်။

❎တချို့က-
အရုဏ်မတက်ခင် (ကျီးမနိုးခင်) ကထိန်သင်္ကန်း
လှူတဲ့ “ကျီးမနိုး ကထိန်”က ပိုမြတ်တယ်လို့
ယူဆပြီး ၊အရုဏ်မတက်ခင် (ကျီးမနိုးခင်)
ကထိန်သင်္ကန်း လှူဒါန်းတတ်ကြပါတယ်။

အရုဏ်မတက်ခင် ကထိန်သင်္ကန်းလှူလိုက်ရင်-
အရုဏ် မတက်ခင်ဘဲ ကထိန်ခင်းရပါတယ်။
အရုဏ်တက်ပြီးသွားမှ ကထိန်ခင်းရင်...
သင်္ကန်းသိုးသွားလို့ ကထိန်အထ မမြောက်ပါဘူး။

❎အရုဏ်တက်တာနဲ့ တစ်ပြိုင်နက်~
နောက်တစ်ရက် ကူးသွားပါပြီ၊ အရုဏ်အမီ ကထိန်ခင်းဖို့ အချိန် မလုံလောက်တဲ့အတွက်
အဲဒီလို လှူတာမျိုး လုံး၀ရှောင်ကြဉ်သင့်ပါတယ်။

⚜⚜⚜⚜⚜⚜⚜⚜⚜⚜⚜⚜⚜

(၃) ကထိန်သင်္ကန်းဟာ -
♦️ “ #သံဃိကသင်္ကန်း” ဖြစ်ရပါမယ်။

❎ရဟန်းတစ်ပါးပါးကို လှူဒါန်းထားလို့...
အဲဒီရဟန်းတစ်ပါးတည်းကပဲ ပိုင်ဆိုင်တဲ့ ပုဂ္ဂလိကသင်္ကန်းနဲ့ ကထိန်ခင်းလို့ မရပါဘူး။

✅သံဃာအားလုံးကို လှူဒါန်းထားလို့...
သံဃာအားလုံး ပိုင်ဆိုင်တဲ့ သံဃိကသင်္ကန်းနဲ့ပဲ ကထိန်ခင်းလို့ ရပါတယ်။
သံဃာအများပိုင်ဆိုင်တဲ့ “သံဃိကသင်္ကန်း” နဲ့ပဲ
ကထိန်ခင်းခွင့် ရှိပါတယ်။

❎မိမိကြည်ညိုတဲ့ ဘုန်းကြီးတစ်ပါးပါး၊
ဆရာတော် တစ်ပါးပါးကို...
" ဒီဆရာတော်ကြီး ငါကြည်ညိုလို့
ကထိန်သင်္ကန်း လှူလိုက်ဦးမယ်" ဆိုပြီးတော့
“ဆရာတော်ကို တပည့်တော် ကထိန်သင်္ကန်း
လှူပါတယ်ဘုရား”၊
“ဘုန်းကြီးကို ကထိန်သင်္ကန်းလှူပါတယ်ဘုရား”...လို့
မိမိကြည်ညိုတဲ့ ရဟန်းတော် တစ်ပါးပါးကို ပုဂ္ဂလိကအနေနဲ့ ကထိန်သင်္ကန်းအဖြစ် လှူဒါန်း
ခွင့် မရှိပါဘူး။

❎တချို့ကလည်း-
ကထိန်ရာသီမှာ လှူတဲ့ သင်္ကန်းမှန်သမျှ
ကထိန်သင်္ကန်းပဲ ထင်ပြီး...
“အရှင်ဘုရားအတွက် ကထိန်သင်္ကန်းပါဘုရား”
ဆိုပြီး လာလာ လှူလေ့ရှိပါတယ်။
အဲဒီလို လှူလို့ လုံး၀မရပါဘူး။ ရဟန်းတစ်ပါးချင်းကို “ကထိန်သင်္ကန်း”ဆိုပြီး လုံး၀ လှူလို့ မရပါဘူး။

♦️အဲဒီလို ရဟန်းတစ်ပါးပါးကို လှူတဲ့ သင်္ကန်းကိုလည်း ကထိန်ရာသီမှာ လှူပေမယ့်... “ကထိန်သင်္ကန်း” လို့ မခေါ်ပါဘူး။

❎ပုဂ္ဂိုလ်တစ်ပါးပါးကို လှူဒါန်းလိုက်တဲ့
အဲဒီ သင်္ကန်းနဲ့လည်း ကထိန်ခင်းလို့ မရပါဘူး။
ခင်းလည်းပဲ ကထိန်မအောင်မြင်ပါဘူး။
သံဃာကို လှူဒါန်းတဲ့ သင်္ကန်းနဲ့သာလျှင်...
ကထိန်ခင်းခွင့် ရှိပါတယ်။ကထိန် အောင်မြင်ထမြောက်နိုင်ပါတယ်။

⚜⚜⚜⚜⚜⚜⚜⚜⚜⚜⚜⚜⚜⚜

❇❇❇“ #လှူဒါန်းနည်းက_နှစ်မျိုး”❇❇❇

ကထိန်သင်္ကန်း “လှူဒါန်းနည်းက နှစ်မျိုး”
ရှိပါတယ်။

(၁)ကထိန်ခင်းမယ့်ကျောင်းမှာ...
သွားလှူတဲ့နည်း နဲ့
(၂)ကိုယ့်အိမ်၊ ကိုယ်ဌာန၊ တစ်နေရာရာမှာ...
ပင့်လှူတဲ့နည်းတို့ပါပဲ။

(၁) #ကထိန်ခင်းမယ့်ကျောင်းမှာ-
သွားလှူရင်တော့ ...

“ဤကထိန်သင်္ကန်းကို သံဃာအား လှူပါ၏”လို့
ဆိုပြီး လှူလိုက်ရုံနဲ့ လုံလောက်ပါတယ်။
သံဃာအား လှူတယ်ဆိုပေမယ့်...
ကထိန်ခင်းမယ့် ကျောင်းမှာရှိတဲ့ သံဃာနဲ့ပဲ သက်ဆိုင်ပါတယ်။

(၂) #ကိုယ့်နေရာ_ကိုယ့်ဌာနကို...
ပင့်ပြီး လှူမယ်ဆိုရင်တော့-

✅“ဘယ်ကျောင်းတိုက်မှာ ကထိန်ခင်းဖို့အတွက်
သံဃာအား လှူပါ၏” လို့ ကထိန်ခင်းမယ့်
“ကျောင်းတိုက်နာမည်”ကို တရား၀င် ထည့်ဆို
ပြီး လှူရပါတယ်။
ဒါမှ- ကိုယ်ရည်စူးတဲ့ ကျောင်းတိုက်သံဃာက ကထိန်ခင်းခွင့် ရမှာပါ။

❎ကျောင်းတိုက်နာမည်ထည့် မဆိုဘဲ ...
“သံဃာအား လှူပါ၏”လို့ ရိုးရိုးလေးဆိုပြီး
လှူလိုက်ရင် အခမ်းအနားကို ကြွလာတဲ့
“ဆယ့်နှစ်တောင်ပတ်လည်အတွင်း”က
ပင့်သံဃာအားလုံးနဲ့ သက်ဆိုင်သွားတဲ့
အတွက်-
ရည်စူးရာကျောင်းတိုက်မှာ ကထိန်ခင်းခွင့်
မရှိတော့ပါဘူး။

❎ရဟန်းတစ်ပါးတည်းကို ပင့်ပြီး-
“သံဃာအား လှူပါ၏”လို့ ဆိုလှူလိုက်ရင်လည်း...
အဲဒီရဟန်းက အဲဒီသင်္ကန်းကိုယူပြီး
တခြားကျောင်းတိုက်တစ်ခုကို ၀င်လိုက်မိတာနဲ့
တစ်ပြိုင်နက်တည်း ၀င်မိတဲ့ ကျောင်းတိုက်သံဃာက အဲဒီသင်္ကန်းကို ပိုင်ဆိုင်သွားပြန်လို့ -
ရည်စူးရာ ကျောင်းတိုက်မှာ ကထိန်ခင်း မရ
တော့ပါဘူး။

♦️ဒါကြောင့်-
ကိုယ့်နေရာ၊ ကိုယ်ဌာန ပင့်လှူသူတိုင်း
ကထိန်ခင်းလိုတဲ့ “ကျောင်းတိုက်နာမည်”ကို တရား၀င် ထည့်ဆိုပြီးမှ လှူသင့်ပါတယ်။

❎ကထိန်ခင်းမယ့်ကျောင်းတိုက်မှာ သွားလှူတဲ့အခါမှာလည်း-
“သံဃာအား”လို့ ထည့် မဆိုဘဲ
“ဤကထိန်သင်္ကန်းကို လှူပါ၏”လို့ ရိုးရိုးပဲ ဆိုလိုက်မိရင်လည်း...

အဲဒီကထိန်သင်္ကန်းဟာ-
ကျောင်းတိုက်မှာရှိတဲ့ သံဃာအားလုံး ပိုင်ဆိုင်တဲ့သင်္ကန်း (သံဃိကသင်္ကန်း) ဖြစ်သွားပါတယ်။

✅ဒါကြောင့်- “ #သံဃာအား”လို့
ထည့်ဆိုလိုက်တာဟာ ၀ိနည်းအပြစ်ကင်းပြီး
ကထိန်အလှူ အထမြောက်နိုင်ပါတယ်။

♦️ရဟန်းတစ်ပါးတည်း ဝါဆိုတဲ့ကျောင်းတိုက်မှာ
“သံဃာအား လှူပါ၏”လို့ ရွတ်ဆိုလျှောက်ထားပြီး
လှူတဲ့ ကထိန်သင်္ကန်းဟာ_
“သံဃာအား”လို့ ပါတဲ့အတွက် အရပ်လေးမျက်နှာမှာ ရှိရှိသမျှ သံဃာအားလုံးနဲ့ သက်ဆိုင်ပေမယ့်
ကျောင်းတိုက်မှာ ဝါဆိုတဲ့ ရဟန်းတစ်ပါးကပဲ ပိုင်ဆိုင်ပါတယ်။

♦️တစ်ပါးထက်ပိုများတဲ့ ရဟန်းတော်တွေ
ဝါဆိုတဲ့ ကျောင်းတိုက်တွေမှာလည်း နည်းတူပါပဲ။
“သံဃာအား လှူပါ၏”ဆိုတဲ့ သင်္ကန်းမှန်သမျှ
အရပ်လေးမျက်နှာ သံဃာ(စာတုဒ္ဒိသံဃာ)နဲ့
သက်ဆိုင်ရုံပဲ သက်ဆိုင်ပါတယ်။
ပိုင်တဲ့အခါမှာတော့ ကျောင်းတိုက်သံဃာ
(အာရာမသံဃာ)ကပဲ ပိုင်ပါတယ်။
ကျောင်းတိုက်ပြင်ပက သံဃာဟာ ...
ဆိုင်သာဆိုင် ၊ မပိုင်တဲ့သံဃာ ဖြစ်ပါတယ်။

♦️ကိုယ်လှူတဲ့သင်္ကန်းကို သံဃာတော်တွေ
ဘယ်လိုပဲ ဆိုင်ဆိုင်၊ဘယ်လိုပဲ ပိုင်ပိုင်
ကိုယ်ကတော့ သံဃာအားလုံးကို ရည်မှန်းပြီး
လှူဒါန်းရမှာပါပဲ။

🙏“အရပ်လေးမျက်နှာမှာ~ ရှိရှိသမျှ
သံဃာအားလုံး ၊
သာသနာတော်မှာ~ ရှိခဲ့ပြီး၊ ရှိနေဆဲ၊ရှိလတ္တံ့
သံဃာအားလုံးကို လှူဒါန်းပါတယ်”...လို့
အာရုံပြုပြီး-

♦️“သံဃဿ ဒေမ = သံဃာအား လှူပါ၏”လို့
ရွတ်ဆိုလှူဒါန်းလိုက်ရင်...

ကိုယ်လှူလိုက်တဲ့သင်္ကန်းဟာ~
“တစ်သာသနာလုံး၊ တစ်လောကလုံးမှာရှိတဲ့ ပုထုဇဉ်သံဃာ၊ အရိယာသံဃာ သံဃာအားလုံးနဲ့ သက်ဆိုင်တဲ့ သံဃိကသင်္ကန်း” ဖြစ်သွားပါတယ်။

✅အများပိုင်သံဃိကသင်္ကန်းနဲ့ပဲ ကထိန်ခင်းလို့
ရပါတယ်။
❎တစ်ပါးပိုင် ပုဂ္ဂလိကသင်္ကန်းနဲ့ ကထိန်ခင်းလို့
မရပါဘူး။

ဒါပေမဲ့-
♦️ #တကယ်ကထိန်ခင်းတဲ့_အချိန် မှာတော့...
“အများပိုင် သံဃိကသင်္ကန်း”ကို>>>
“တစ်ပါးပိုင် ပုဂ္ဂလိကသင်္ကန်း” ဖြစ်အောင်
ပြန်လုပ်လိုက်ရပါတယ်။

သံဃာက..... ကထိန်ခင်းလို့ မရပါဘူး။
ပုဂ္ဂိုလ်ကပဲ... ကထိန်ခင်းလို့ ရပါတယ်။

♦️သံဃာက-ကထိန်သင်္ကန်း ပေးရုံပဲ
ပေးနိုင်ပါတယ်။
သိမ်ထဲမှာ... သံဃာတော်တွေစုဝေးပြီး
ကထိန်ခင်းထိုက်တဲ့ ရဟန်းတစ်ပါးကို
ဉတ်ကမ္မဝါနဲ့ ကထိန်သင်္ကန်း ပေးလိုက်ရပါတယ်။
ကထိန်သင်္ကန်းကို ပုဂ္ဂလိကအဖြစ် ပိုင်ဆိုင်သွားတဲ့
အဲဒီ ရဟန်းကမှ ကထိန်ခင်းရတာပါ။

♦️ကထိန်သင်္ကန်းကို သိမ်ထဲမှာပဲ ပေးရပေမယ့် ကထိန်ကိုတော့- သိမ်ထဲမှာပဲဖြစ်ဖြစ်၊
သိမ်အပြင်မှာပဲဖြစ်ဖြစ် ခင်းလို့ရပါတယ်။

♦️ရဟန်းတစ်ပါးခင်းတဲ့ ကထိန်ကို -
သံဃာက ၀မ်းမြောက်၀မ်းသာ အနုမောဒနာ ပြုလိုက်ရင်...
သံဃာကလည်း ကထိန်ခင်းပြီးသား ဖြစ်သွား
တာပါပဲ။

♦️ကထိန်ခင်းခြင်းဆိုတဲ့ ဝိနည်းကံဟာ -
သံဃာ့ကံ မဟုတ်၊ ပုဂ္ဂလကံဆိုပေမယ့်...

🔸️ သံဃာကပဲ ...ကထိန်သင်္ကန်း ပေးရ၊
🔸️ ကထိန်ခင်းပြီးရင်လည်း-
သံဃာအားလုံးက အနုမောဒနာပြုတဲ့
သံဃာမှာလည်း...
ကထိန်အာနိသင်ရတဲ့အတွက် ~
သံဃာ့ကိစ္စ၊ သံဃာ့အလုပ်လို့ ဆိုနိုင်ပါတယ်။

♦️“သံဃိကသင်္ကန်း”ကို “ပုဂ္ဂလိသင်္ကန်း”အဖြစ်
ကထိန်ခင်းမယ့် ရဟန်းကို ပေးတာက~
🔸️ သံဃာတော်တွေရဲ့ အပိုင်းဖြစ်ပါတယ်။

🔸️ ကထိန်အလှူရှင်တွေရဲ့အပိုင်းကတော့~
“သံဃိက သင်္ကန်း”အဖြစ်ပဲ လှူဒါန်းရမှာပါ။

❎ကထိန်ခင်းတဲ့အချိန်- ပုဂ္ဂလိကသင်္ကန်း
လုပ်မယ့် အတူတူဆိုပြီး... နဂိုကတည်းက ပုဂ္ဂလိကသင်္ကန်းအဖြစ် မလှူဒါန်းရပါဘူး။

❎လှူဒါန်းခဲ့ရင် -
ပုဂ္ဂလိကသင်္ကန်းကို သံဃာက ကထိန်ခင်းမယ့် ရဟန်းကို ပေးလို့ မရတော့တဲ့အတွက် ကထိန်ခင်းလို့ မရတော့ပါဘူး။

✅သံဃိကသင်္ကန်းကိုပဲ သံဃာက ကထိန်ခင်းမယ့်
ရဟန်းကို ပေးလို့ရပါတယ်။

♦️ဒါကြောင့်-
ကထိန်အလှူရှင်တွေအနေနဲ့ မိမိတို့ ကြည်ညိုတဲ့ ဆရာတော်တစ်ပါးပါး၊ ရဟန်းတစ်ပါးပါးကို
ကထိန် သင်္ကန်း ရစေချင်တဲ့စိတ် လုံး၀ မထားဘဲ
“ဒီကထိန်သင်္ကန်းဟာ သံဃာ အားလုံးအတွက်”လို့ပဲ ရည်မှန်းပြီး သံဃာပိုင် သံဃိကစစ်စစ်ဖြစ်အောင် လှူဒါန်းကြရပါမယ်။

⚜⚜⚜⚜⚜⚜⚜⚜⚜⚜⚜⚜⚜

☸အနှစ်ချုပ်ပြီး ပြန်ပြောရရင် ...
ကထိန်တစ်ခု အထမြောက်ဖို့အတွက် (သို့မဟုတ်) ကထိန်စစ်စစ်ဖြစ်ဖို့အတွက်-

ကထိန်သင်္ကန်းဟာ ...
♦️(၁) “မိုးကျသင်္ကန်း” ဖြစ်ရပါမယ်။

✅ ရဟန်းတော်တွေ ကိုယ်တိုင်-
ဘယ်သူ့ဆီကမှအလှူခံ မထားတဲ့ သင်္ကန်း၊
ရဟန်းတော်တွေဘက်က- ဘာအရိပ်နိမိတ်မှ
မပြရ၊ဘာပရိယာယ်စကားမှ မပြောရဘဲနဲ့
အလှူရှင်တွေဘက်က -
အလိုအလျောက် လာလှူထားတဲ့သင်္ကန်းနဲ့
ကထိန်ခင်းမှ ကထိန်စစ်စစ်ဖြစ်ပါတယ်။
❎ရဟန်းတော်တွေဘက်က စ, ပြောလို့
လှူတဲ့သင်္ကန်းနဲ့ ကထိန်ခင်းရင်-
ကထိန်စစ်စစ် မဖြစ်ပါဘူး။

🔹️🔹️🔹️🔹️🔹️🔹️🔹️🔹️🔹️🔹️🔹️🔹️🔹️

♦️(၂) “မသိုးသင်္ကန်း” ဖြစ်ရပါမယ်။

✅ဒီနေ့လှူတဲ့ သင်္ကန်းနဲ့ ဒီနေ့ ကထိန်ခင်းမှ ~
ကထိန်စစ်ဖြစ်ပါတယ်။
❎ မနေ့က လှူတဲ့သင်္ကန်းနဲ့ ဒီနေ့ ကထိန်ခင်းရင်~
ဒီနေ့လှူတဲ့သင်္ကန်းနဲ့မနက်ဖြန်မှကထိန်ခင်းရင်~
ကထိန်စစ်စစ် မဖြစ်ပါဘူး။

🔹️🔹️🔹️🔹️🔹️🔹️🔹️🔹️🔹️🔹️🔹️🔹️🔹️🔹️

♦️(၃) “သံဃိကသင်္ကန်း” ဖြစ်ရပါမယ်။

✅သံဃာအားလုံးကို ရည်မှန်းပြီး~
သံဃာပိုင်အဖြစ်နဲ့ လှူဒါန်းတဲ့ သံဃိကသင်္ကန်းနဲ့
ကထိန်ခင်းမှ ကထိန်စစ်စစ်ဖြစ်ပါတယ်။

❎ကိုယ်ကြည်ညိုတဲ့ ဆရာတော်ကို ရည်မှန်းပြီး
ကိုယ်ကြည်ညိုတဲ့ဆရာတော်ပဲ ရစေချင်တဲ့စိတ်နဲ့
လှူတဲ့သင်္ကန်းနဲ့ ကထိန်ခင်းရင်....
ကထိန်စစ်စစ် မဖြစ်ပါဘူး။
🔹️🔹️🔹️🔹️🔹️🔹️🔹️🔹️🔹️🔹️🔹️🔹️🔹️

■နောက်တစ်ချက် ဖြည့်စွက်ရမယ်ဆိုရင်တော့ -

ကထိန်သင်္ကန်းဟာ-
♦️ “ကိုယ်ပိုင်သင်္ကန်း” ဖြစ်ရပါမယ်။

❎ခေတ္တခဏ ငှားယူလာတဲ့ သင်္ကန်း
(“အငှား”သင်္ကန်း)နဲ့ ကထိန်ခင်းရင်-
ကထိန်စစ်စစ် မဖြစ်ပါဘူး။

♦️ အမှန်တကယ် ပိုင်ဆိုင်တဲ့ သင်္ကန်း
(ကိုယ်ပိုင်သင်္ကန်း)နဲ့ ကထိန်သင်္ကန်း
လှူတဲ့အခါမျိုးမှာလည်း-
ကထိန်ခင်းတဲ့အခိုက်ကလေး ခေတ္တခဏငှားတဲ့
သဘောမျိုးမဖြစ်အောင်...
အထူးသတိပြုရပါမယ်။

🔹️🔹️🔹️🔹️🔹️🔹️🔹️🔹️🔹️🔹️🔹️🔹️🔹️🔹️

♦️ #ကထိန်ခင်းခွင့်ရှိတဲ့ကာလ-ကတော့

“သီတင်းကျွတ်လပြည့်ကျော်(၁)ရက်ကနေ~
တန်ဆောင်မုန်းလပြည့်နေ့အထိ....
တစ်လ(၂၉-ရက်)” ဖြစ်ပါတယ်။

✅ဒီတစ်လအတွင်းမှာပဲ-
ကထိန်သင်္ကန်း လှူခွင့် ရှိပါတယ်။
ဒီတစ်လအတွင်းမှာ ခင်းမှလည်း-
“ကထိန်စစ်စစ်” ဖြစ်ပါတယ်။

🔹️🔹️🔹️🔹️🔹️🔹️🔹️🔹️🔹️🔹️🔹️🔹️🔹️

♦️ကထိန်ခင်းဖို့အတွက်-
သံဃာက သိမ်ထဲမှာ သင်္ကန်းပေးတဲ့ ကံပြုရတဲ့အတွက်.... ကထိန်ကံ အောင်မြင်ဖို့
#အနည်းဆုံးသံဃာ၅ပါး ရှိရပါတယ်။

✅️ ကထိန်သင်္ကန်းပေးတဲ့ ကံပြုတဲ့
သံဃာက (၄)ပါး၊
ကထိန်သင်္ကန်းခံယူသူက (၁)ပါး၊
စုစုပေါင်း(၅)ပါး အနည်းဆုံးရှိမှ....
ကထိန်ကံ အောင်မြင်ပါတယ်။

သင်္ကန်းပေးဖို့အတွက်သာ~ သံဃာလိုတာပါ။
သင်္ကန်းပေးပြီးလို့ ကထိန်ခင်းတဲ့အခါမှာတော့~ သံဃာ မလိုပါဘူး။

🔹️🔹️🔹️🔹️🔹️🔹️🔹️🔹️🔹️🔹️🔹️🔹️🔹️

♦️တစ်ပါးတည်း ဝါဆိုတဲ့ကျောင်းမှာ-
တစ်ပါးတည်း ကထိန်ခင်းလည်း ရပါတယ်။ အနုမောဒနာပြုရမယ့် ရဟန်းတစ်ပါး
ခေါ်ထားပြီး-နှစ်ပါး ကထိန်ခင်းလည်း ရပါတယ်။
သင်္ကန်းပေးတဲ့ သံဃာတွေစုံနေတုန်းမို့-
သံဃာနဲ့ကထိန်ခင်းလိုက်လည်း ရတာပါပဲ။

♦️ရဟန်းတစ်ပါးခင်းတဲ့ကထိန်ကို ...
ဝါဆိုတူ ကျောင်းတိုက်အတွင်းက
✅ရဟန်းတော်တွေပဲ~ အနုမောဒနာ ပြုစရာ
လိုပါတယ်။
❎ကိုရင်သာမဏေတွေကတော့~ အနုမောဒနာ
ပြုစရာ မလိုပါဘူး။

♦️ဒါပေမဲ့- တစ်ကျောင်းတိုက်တည်း အတူ ဝါဆိုကြတဲ့ သီတင်းသုံးဖေါ် ဘ၀တူအချင်းချင်းဖြစ်တဲ့အတွက် ...
ကထိန်အာနိသင်သင်္ကန်း (ကထိန်ရံသင်္ကန်း)တွေကို ကိုရင်တွေကိုလည်း အညီအမျှ ခွဲဝေပေးရပါမယ်။

ကိုရင်တွေလည်း...
အာနိသင်သင်္ကန်း(ကထိန်ရံသင်္ကန်း) ရပိုင်ခွင့်ရှိပါတယ်။

🔹️🔹️🔹️🔹️🔹️🔹️🔹️🔹️🔹️🔹️🔹️🔹️

♦️တချို့က ကျောင်းဥပစာပရိဝုဏ်
အရံအတားတူတဲ့ ကျောင်းတိုက်
တစ်တိုက်တည်းမှာ -
နှစ်ကျောင်း၊ သုံးကျောင်း စသည်ခွဲပြီး သီခြားစီ ဝါဆိုတတ်ကြပါတယ်။

ကျောင်းတိုက်ကြီးတစ်ခုတည်းမှာ-
ဘယ်နှစ်ကျောင်းပဲ ခွဲဝါဆိုဆို
✅ကထိန်ခင်းရင်တော့...
တစ်ကျောင်းတိုက်လုံးပေါင်းပြီး၊
ကထိန်တစ်ခုတည်းပဲ ခင်းရပါမယ်။
ဒါမှ ကထိန်စစ်စစ်ဖြစ်ပါတယ်။

🔹️🔹️🔹️🔹️🔹️🔹️🔹️🔹️🔹️🔹️🔹️🔹️🔹️

♦️ကထိန်ခင်းပြီးတဲ့ ကျောင်းတိုက်မှာ-
နောက်ထပ် လာလှူတဲ့ သံဃိကသင်္ကန်းတွေကို ကထိန်အာနိသင် မရတဲ့ တခြားရဟန်းတော်လည်း ဝေစု ရစေချင်တယ်ဆိုရင် ...
ခင်းပြီးသား ကထိန်ကို နုတ်လိုက်ရပါတယ်။

♦️“ #ကထိန်နုတ်တယ်”ဆိုတာ-
ကထိန်ခင်းခြင်းအမှု၊ ကထိန်ကံကို ရုပ်သိမ်း
လိုက်တာပါပဲ။

ကထိန်နုတ်ပြီးရင်- နောက်ထပ် ကထိန်တစ်ခု
ထပ်ခင်းလို့ မရတော့ပါဘူး။ ထပ်ခင်းရင်လည်း
ကထိန်စစ်စစ် မဖြစ်တော့ပါဘူး။

ကထိန်နုတ်လိုက်တဲ့အတွက်-
ကထိန်အာနိသင်တွေလည်း ပျက်ပြယ်သွားပါတယ်။ ကထိန်အာနိသင်ရပြီးသား ရဟန်းတော်တွေလည်း... ကထိန်အာနိသင် လုံး၀မရတော့ပါဘူး။

✅သံဃိကလာဘ်လာဘဖြစ်တဲ့ သင်္ကန်းတွေကို သံဃာအားလုံး ရစေချင်တဲ့ ရည်ရွယ်ချက်နဲ့သာ ကထိန်နုတ်ရတာပါ။

♦️ကထိန်သာ မနုတ်ရင်-
သံဃိကသင်္ကန်းတွေကို ၀ါကျိုးဝါပြတ်သူ၊ ဒုတိယဝါဆိုသူ၊ တခြားကျောင်းတိုက်ကနေ
နောက်ထပ်ရောက်လာသူတွေ မရနိုင်ပါဘူး။
ရခွင့် မရှိပါဘူး။
ကထိန်နုတ်လိုက်တဲ့အတွက်- သံဃာအားလုံး
ရခွင့်ရှိသွားပါတယ်။

-【စာရိုက်ပူဇော်သူ - Admin Team of
Young Buddhist's Association】

-[ ✍ ဆရာတော်အရှင်ဆန္ဒာဓိက
(ရွှေပါရမီတောရ)၏...
“ဂုဏ်ရှိန်ပေါင်းစုတဲ့ ဘုံကထိန်ကောင်းမှု”
နှာ ၅၅- ၈၀မှ- ကောက်နှုတ် ပူဇော်မျှဝေ
ပါသည်။】

⚜⚜⚜⚜⚜⚜⚜⚜⚜⚜⚜⚜⚜

Credit:
Young Buddhist Association

Dhamma Nadi

03/11/2021

02/11/2021

Address

Website

Alerts

Shortcuts

Share

Category