University Of Forestry And Environmental Science Council

15/06/2026

ပညာသင်စရိတ်အထောက်အပံ့ ရရှိသည့် သစ်တောနှင့် ပတ်ဝန်းကျင်ဆိုင်ရာ တက္ကသိုလ်မှ ကျောင်းသား/သူများထံသို့ လျှောက်ထားစဉ်က ဖြည့်သွင်းခဲ့သည့် အီးမေးလ်လိပ်စာများထံ ပြန်လည်အကြောင်းကြားထားပြီး ဖြစ်ပါသည် ... အကယ်၍ အကြောင်းကြားသည့် အီးမေးလ် လက်ခံရရှိခြင်း မရှိပါက page Messenger (သို့မဟုတ်) [email protected] သို့ ပြန်လည်ဆက်သွယ်မေးမြန်းနိုင်ပါသည်။

သစ်တောနှင့် ပတ်ဝန်းကျင်ဆိုင်ရာတက္ကသိုလ်
ကြားကာလ တက္ကသိုလ်ကောင်စီ

အမျိုးသားညီညွတ်ရေးအစိုးရ၊ သစ်တောနှင့် ပတ်ဝန်းကျင်ဆိုင်ရာတက္ကသိုလ်တွင် တက်ရောက်ပညာသင်ကြားလျှက်ရှိသော ကျောင်းသား၊ ကျောင်းသူများ (သို့မဟုတ်) ပထမနှစ် ဝင်ခွင့်စာမေးပွဲ ဖြေဆိုအောင်မြင်ပြီးသူများ ပညာသင်စရိတ်အခက်အခဲဖြစ်ပါက အထောက်အပံ့ လျှောက်ထားနိုင်ပါသည်။

ရည်ရွယ်ချက် - ဤကာလအတွင်း အခက်အခဲများစွာအနက် ငွေကြေးအခက်အခဲဖြင့် တက္ကသိုလ်ပညာရေး နှောင့်နှေးမှုမဖြစ်စေရန် ရည်ရွယ်ထောက်ပံ့ခြင်း ဖြစ်ပါသည်။

လျှောက်လွှာပုံစံ - https://forms.gle/FMXKegeYz3SBtPHF6

လျှောက်လွှာပိတ်ရက် - 9/Jun/2026

စိစစ်ရွေးချယ်ပြီး ပြန်လည်အကြောင်းကြားမည့်ရက် - 15/Jun/2026

သစ်တောနှင့် ပတ်ဝန်းကျင်ဆိုင်ရာ တက္ကသိုလ်
ကြားကာလ တက္ကသိုလ်ကောင်စီ

15/06/2026

၂၀၂၆ ခုနှစ်၊ ဇွန်လ (၅)ရက်နေ့တွင် ကျရောက်သော ကမ္ဘာ့ပတ်ဝန်းကျင်ထိန်းသိမ်းရေးနေ့ကို ဂုဏ်ပြုကြိုဆိုသောအားဖြင့် UFES-UC မှ ကျင်းပပြုလုပ်ခဲ့သည့် တက္ကသိုလ်အဆင့် ဆောင်းပါးပြိုင်ပွဲ ပထမဆုရ ဆောင်းပါးအား အများပြည်သူ ဖတ်ရှုနိုင်ရန် မျှဝေပေးလိုက်ပါတယ် ခင်ဗျာ

သစ်တောနှင့် ပတ်ဝန်းကျင်ဆိုင်ရာ တက္ကသိုလ်
ကြားကာလ တက္ကသိုလ်ကောင်စီ

-------- ဆောင်းပါး အပြည့်အစုံ -------------

ရာသီဥတုမျှတရေး နည်းလမ်းပေါင်းစုံ ဆောင်ရွက်ပေး (Climate Action)”
ယ‌နေ့ ၂၁ ရာစုကမ္ဘာကြီးသည် နည်းပညာဖွံ့ဖြိုးတိုးတက်မှုများနှင့်အတူ ပတ်ဝန်းကျင်ဆိုင်ရာ စိန်ခေါ်မှုများကိုလည်း ရင်ဆိုင်နေရသည်။ အထူးသဖြင့် ရာသီဥတုပြောင်းလဲမှု (Climate Change) သည် လူသားမျိုးနွယ်တစ်ရပ်လုံးအတွက် အကြီးမားဆုံး အန္တရာယ်များထဲမှ တစ်ခုဖြစ်လာသည်။ ကမ္ဘာ့အပူချိန် မြင့်တက်လာခြင်း၊ ရေခဲတောင်များ အရည်ပျော်လာခြင်း၊ ပင်လယ်ရေမျက်နှာပြင် မြင့်တက်လာခြင်း၊ ပြင်းထန်သော မုန်တိုင်းများ၊ ရေကြီးရေလျှံမှုများနှင့် မိုးခေါင်ရေရှားမှုများ ပိုမိုဖြစ်ပွားလာခြင်းတို့သည် ရာသီဥတုပြောင်းလဲမှု၏ ထင်ရှားသော သက်သေများဖြစ်သည်။
မြန်မာနိုင်ငံသည်လည်း ရာသီဥတုပြောင်းလဲမှုဒဏ်ကို အထူးခံစားနေရသော နိုင်ငံများအနက် တစ်နိုင်ငံဖြစ်သည်။ မုန်တိုင်းများ၊ ရေကြီးရေလျှံမှုများ၊ မိုးခေါင်ရေရှားမှုများနှင့် အပူလှိုင်းများကြောင့် ပြည်သူများ၏အသက်မွေး ဝမ်းကျောင်း လုပ်ငန်းများ၊ စိုက်ပျိုးရေးနှင့် ကျန်းမာရေးကဏ္ဍများအပေါ် ဆိုးရွားစွာ သက်ရောက်လျက်ရှိသည်။ ထို့ကြောင့် ရာသီဥတုမျှတရေးနှင့် ပတ်ဝန်းကျင် ထိန်းသိမ်းရေးသည် အစိုးရ၊ အဖွဲ့အစည်းများနှင့် ပြည်သူလူထုအားလုံး ပူးပေါင်းဆောင်ရွက်ရမည့် အရေးတကြီး လုပ်ငန်းစဉ်တစ်ရပ် ဖြစ်လာသည်။ ၂၀၂၆ ခုနှစ် ကမ္ဘာ့ပတ်ဝန်းကျင်ထိန်းသိမ်းရေးနေ့၏ “ရာသီဥတုမျှတရေး နည်းလမ်းပေါင်းစုံ ဆောင်ရွက်ပေး (Climate Action)” ဆောင်ပုဒ်သည် ကမ္ဘာကြီး၏ ရေရှည်တည်တံ့သော အနာဂတ်အတွက် အားလုံးပါဝင်ဆောင်ရွက်ကြရန် တိုက်တွန်းထားသော အရေးပါသည့် သတင်းစကားတစ်ရပ်ဖြစ်သည်။

ကမ္ဘာ့ပတ်ဝန်းကျင်ထိန်းသိမ်းရေးနေ့ (World Environment Day) ကို ၁၉၇၂ ခုနှစ်တွင် ဆွီဒင်နိုင်ငံ၊ စတော့ဟုမ်းမြို့၌ ကျင်းပခဲ့သော ကုလသမဂ္ဂ လူသားနှင့်ပတ်ဝန်းကျင်ဆိုင်ရာ ညီလာခံ (United Nations Conference on the Human Environment) မှ စတင်ပေါ်ပေါက်လာခဲ့ခြင်းဖြစ်သည်။ အဆိုပါ ညီလာခံသည် ပတ်ဝန်းကျင်ထိန်းသိမ်းရေးကို ကမ္ဘာ့နိုင်ငံများက အလေးထားဆောင်ရွက်လာစေရန် အခြေခံအုတ်မြစ်ချခဲ့သော သမိုင်းဝင် အစည်းအဝေးတစ်ရပ်ဖြစ်သည်။ ယင်းညီလာခံ၏ ဆုံးဖြတ်ချက်အရ ဇွန်လ (၅) ရက်နေ့ကို ကမ္ဘာ့ပတ်ဝန်းကျင်ထိန်းသိမ်းရေးနေ့အဖြစ် သတ်မှတ်ခဲ့ပြီး ၁၉၇၄ ခုနှစ်မှစတင်ကာ နှစ်စဉ် ကျင်းပလာခဲ့သည်။ ယနေ့အချိန်တွင် ကမ္ဘာ့နိုင်ငံပေါင်းများစွာက ပတ်ဝန်းကျင်ထိန်းသိမ်းရေးဆိုင်ရာ လှုပ်ရှားမှုများ၊ ပညာပေးအစီအစဉ်များနှင့် သစ်ပင်စိုက်ပျိုးခြင်း လုပ်ငန်းများကို ဆောင်ရွက်လျက်ရှိကြသည်။
ကမ္ဘာ့ပတ်ဝန်းကျင်ထိန်းသိမ်းရေးနေ့ကို ကျင်းပရခြင်း၏ အဓိကရည်ရွယ်ချက်မှာ ပတ်ဝန်းကျင်ထိန်းသိမ်းရေးဆိုင်ရာ အသိပညာများကို ပြည်သူလူထုအတွင်း ကျယ်ကျယ်ပြန့်ပြန့် ပျံ့နှံ့စေရန် ဖြစ်သည်။ ထို့အပြင် လူသားများ၏နေ့စဉ်ဘဝတွင် ပတ်ဝန်းကျင်နှင့် သဘာဝ သယံဇာတများ၏ အရေးပါမှုကို နားလည်သဘောပေါက်စေရန် ရည်ရွယ်ပြီး ကမ္ဘာကြီးတွင် ရင်ဆိုင်နေရသော ရာသီဥတုပြောင်းလဲမှု၊ သစ်တောပြုန်းတီးမှု၊ လေထုနှင့် ရေထုညစ်ညမ်းမှု၊ ဇီဝမျိုးစုံမျိုးကွဲ လျော့နည်းလာမှုစသည့် ပြဿနာများကို ဖြေရှင်းရာတွင် အစိုးရများ၊ အရပ်ဘက်အဖွဲ့အစည်းများ၊ ပုဂ္ဂလိကကဏ္ဍနှင့် ပြည်သူများ ပူးပေါင်းပါဝင်လာစေရန်လည်း ရည်ရွယ်သည်။ ကမ္ဘာ့ပတ်ဝန်းကျင်ထိန်းသိမ်းရေးနေ့သည် အခမ်းအနားတစ်ရပ်မျှသာ မဟုတ်ဘဲ လူသားများ၏ အနာဂတ်ရှင်သန်ရေးအတွက်ပါ လက်တွေ့အကောင်အထည်ဖော် ဆောင်ရွက်ရမည့် တာဝန်များကို သတိပေးသည့် နေ့ထူးနေ့မြတ်တစ်ရက်လည်း ဖြစ်သည်။
ကမ္ဘာ့အပူချိန် မြင့်တက်လာရခြင်း၏ အဓိကအကြောင်းရင်းမှာ ဖန်လုံအိမ်ဓာတ်ငွေ့များ (Greenhouse Gases) အလွန်အကျွံ ထုတ်လွှတ်ခြင်းဖြစ်သည်။ စက်မှုလုပ်ငန်းများ တိုးချဲ့လာခြင်း၊ ကျောက်မီးသွေး၊ ရေနံနှင့် သဘာဝဓာတ်ငွေ့များကို အလွန်အကျွံ အသုံးပြုခြင်း၊ မော်တော်ယာဉ်အသုံးပြုမှု တိုးလာခြင်းနှင့် လျှပ်စစ်ဓာတ်အား ထုတ်လုပ်မှုလုပ်ငန်းများသည် ကာဗွန်ထုတ်လွှတ်မှု မြင့်မားစေသော အကြောင်းရင်းများဖြစ်ကြသည်။ ထို့အပြင် သစ်တောများကို ခုတ်ထွင်ဖျက်ဆီးခြင်းသည်လည်း ကမ္ဘာ့အပူချိန် မြင့်တက်လာစေသော အရေးကြီးသည့် အချက်တစ်ရပ်ဖြစ်သည်။ သစ်ပင်များသည် ကာဗွန်ဒိုင်အောက်ဆိုက်ကို စုပ်ယူပေးနိုင်သော်လည်း သစ်တောပြုန်းတီးလာသည့်အခါ လေထုအတွင်း ကာဗွန်ပမာဏ ပိုမိုများပြားလာစေသည်။
ရာသီဥတုဖောက်ပြန်ပြောင်းလဲမှုသည် ကမ္ဘာတစ်ဝန်းရှိ လူမှုစီးပွားရေး၊ ကျန်းမာရေးနှင့် သဘာဝပတ်ဝန်းကျင်ဆိုင်ရာ ကဏ္ဍများအပေါ် ကျယ်ပြန့်စွာ သက်ရောက်လျက်ရှိသည်။ အပူချိန်မြင့်တက်လာခြင်းကြောင့် အပူလှိုင်းများ ပိုမိုပြင်းထန်လာပြီး အသက်အန္တရာယ်နှင့် ကျန်းမာရေးပြဿနာများ တိုးပွားလာသည်။ အထူးသဖြင့် သက်ကြီးရွယ်အိုများ၊ ကလေးငယ်များနှင့် ရောဂါအခံရှိသူများသည် ပိုမိုထိခိုက်လွယ်ကြသည်။

စိုက်ပျိုးရေးကဏ္ဍတွင်လည်း မိုးရွာသွန်းမှုပုံစံ မမှန်ကန်ခြင်း၊ မိုးခေါင်မှုများ ဖြစ်ပေါ်လာခြင်းနှင့် ရေကြီးရေလျှံမှုများကြောင့် သီးနှံအထွက်နှုန်းများ ကျဆင်းလာသည်။ ယင်းအခြေအနေသည် အစားအစာဖူလုံရေးကို ထိခိုက်စေပြီး အခြေခံစားသောက်ကုန်ဈေးနှုန်းများ မြင့်တက်လာစေသည်။ ထို့အပြင် ရာသီဥတုပြောင်းလဲမှုကြောင့် ကူးစက်ရောဂါများ ပျံ့နှံ့မှု ပိုမိုမြန်ဆန်လာနိုင်သကဲ့သို့ သန့်ရှင်းသော သောက်သုံးရေ ရရှိမှုအပေါ်လည်း သက်ရောက်မှုရှိလာသည်။ သဘာဝဂေဟစနစ်များ ပျက်စီးလာခြင်းကြောင့် ဇီဝမျိုးစုံမျိုးကွဲများ လျော့နည်းလာပြီး သဘာဝဟန်ချက်ညီမှုကို ခြိမ်းခြောက်လျက်ရှိသည်။ ရာသီဥတုပြောင်းလဲမှု၏ အကျိုးဆက်အဖြစ် သဘာဝဘေးအန္တရာယ်များ ပိုမိုမကြာခဏ ဖြစ်ပွားလာပြီး ပိုမိုပြင်းထန်လာသည်။ မုန်တိုင်းများ၊ ရေကြီးရေလျှံမှုများ၊ မိုးခေါင်ရေရှားမှုများ၊ မြေပြိုမှုများနှင့် တောမီးလောင်ကျွမ်းမှုများသည် ကမ္ဘာ့နိုင်ငံအသီးသီးတွင် ကြုံတွေ့နေရသော အဓိကသဘာဝဘေးအန္တရာယ်များ ဖြစ်ကြသည်။

မြန်မာနိုင်ငံတွင်လည်း ၂၀၀၈ ခုနှစ် နာဂစ်မုန်တိုင်း၊ ၂၀၂၃ ခုနှစ် မိုခါမုန်တိုင်း အပါအဝင် ပြင်းထန်သော သဘာဝဘေးအန္တရာယ်များကြောင့် လူအသက်ဆုံးရှုံးမှုများ၊ အဆောက်အအုံများ ပျက်စီးဆုံးရှုံးမှုများနှင့် စီးပွားရေးထိခိုက်မှုများ ဖြစ်ပေါ်ခဲ့သည်။ ရေကြီးရေလျှံမှုများကြောင့် စိုက်ပျိုးမြေများ ပျက်စီးပြီး ဒေသခံပြည်သူများ၏ အသက်မွေးဝမ်းကျောင်းလုပ်ငန်းများ အခက်အခဲများနှင့် ရင်ဆိုင်ခဲ့ရသည်။ သဘာဝဘေးအန္တရာယ်များသည် တိုက်ရိုက်ပျက်စီးဆုံးရှုံးမှုများသာမက ပညာရေး၊ ကျန်းမာရေးနှင့် လူမှုဘဝတိုးတက်မှုများကိုပါ ရေရှည်ထိခိုက်စေသော အကျိုးဆက်များ ဖြစ်ပေါ်စေသည်။

မြန်မာနိုင်ငံတွင် ပတ်ဝန်းကျင်ထိန်းသိမ်းရေးနှင့် သဘာဝသယံဇာတများ ရေရှည်တည်တံ့စွာ အသုံးချနိုင်ရေးအတွက် အစိုးရဌာနများ၊ အရပ်ဘက် အဖွဲ့အစည်းများနှင့် ဒေသခံလူထုများ ပူးပေါင်းဆောင်ရွက်လျက်ရှိသည်။ သစ်တောပြန်လည်စိုက်ပျိုးရေးလုပ်ငန်းများ၊ ထိန်းသိမ်းရေးနယ်မြေများ သတ်မှတ်ခြင်း၊ တောရိုင်းတိရစ္ဆာန်များ ကာကွယ်စောင့်ရှောက်ခြင်းနှင့် ပတ်ဝန်းကျင်ဆိုင်ရာ အသိပညာပေးအစီအစဉ်များကို အကောင်အထည်ဖော် ဆောင်ရွက်လျက်ရှိသည်။ ယင်းနောက် ပြန်လည်ပြည့်ဖြိုးမြဲစွမ်းအင် အသုံးပြုမှုကို မြှင့်တင်ခြင်း၊ ရာသီဥတုပြောင်းလဲမှုနှင့် သက်ဆိုင်သော မူဝါဒများ ချမှတ်ဆောင်ရွက်ခြင်းတို့ကိုလည်း တွေ့မြင်ရသည်။ သို့ရာတွင် ငွေကြေးအရင်းအမြစ် လုံလောက်မှုမရှိခြင်း၊ နည်းပညာနှင့် လူ့စွမ်းအားအရင်းအမြစ် အကန့်အသတ်များ ရှိနေခြင်းတို့ကြောင့် လုပ်ငန်းအချို့မှာ ရည်မှန်းထားသလောက် အောင်မြင်မှု မရရှိသေးပေ။ ထို့ကြောင့် ပတ်ဝန်းကျင်ထိန်းသိမ်းရေးလုပ်ငန်းများတွင် လူထုပါဝင်မှုကို ပိုမိုအားကောင်းစေရန်၊ ဥပဒေများကို ထိရောက်စွာ အကောင်အထည်ဖော်ရန်နှင့် သက်ဆိုင်ရာအဖွဲ့အစည်းများအကြား ပူးပေါင်းဆောင်ရွက်မှုကို မြှင့်တင်ရန် လိုအပ်ကြောင်း တွေ့ရှိရသည်။

မြန်မာနိုင်ငံသည် ရာသီဥတုပြောင်းလဲမှုကို ဖြစ်ပေါ်စေသော ဖန်လုံအိမ်ဓာတ်ငွေ့ ထုတ်လွှတ်မှုတွင် ကမ္ဘာ့နိုင်ငံကြီးများနှင့် နှိုင်းယှဉ်ပါက အချိုးအစား နည်းပါးသော်လည်း ရာသီဥတုပြောင်းလဲမှု၏ ဆိုးကျိုးများကို အလွန်ပြင်းထန်စွာ ခံစားနေရသော နိုင်ငံများအနက် တစ်နိုင်ငံဖြစ်သည်။ မြန်မာနိုင်ငံ၏ ပထဝီဝင်အနေအထား၊ စီးပွားရေးဖွဲ့စည်းပုံနှင့် ပြည်သူအများစု၏ စိုက်ပျိုးရေးအပေါ် မှီခိုအားထားနေရမှုတို့ကြောင့် ရာသီဥတုပြောင်းလဲမှုဒဏ်ကို ပိုမိုခံစားရခြင်းဖြစ်သည်။ မကြာသေးမီနှစ်များအတွင်း မြန်မာနိုင်ငံတွင် နွေရာသီအပူချိန်များ စံချိန်တင်မြင့်တက်လာခြင်း၊ မိုးရွာသွန်းမှုပုံစံများ ပြောင်းလဲလာခြင်းနှင့် ရေကြီးရေလျှံမှုများ မကြာခဏ ဖြစ်ပွားလာခြင်းတို့ကို တွေ့မြင်ရသည်။ အထူးသဖြင့် အယ်နီညို (El Niño) ဖြစ်စဉ်များကြောင့် မြန်မာနိုင်ငံအလယ်ပိုင်းဒေသများတွင် အပူချိန်မြင့်တက်လာပြီး ရေရှားပါးမှုပြဿနာများ ပိုမိုကြုံတွေ့လာရသည်။ ထို့အပြင် ကမ်းရိုးတန်းဒေသများတွင် မုန်တိုင်းနှင့် ဒီရေလှိုင်းအန္တရာယ်များ ပိုမိုမြင့်မားလာသဖြင့် ပြည်သူများ၏ အသက်အိုးအိမ်စည်းစိမ်များကို ခြိမ်းခြောက်လျက်ရှိသည်။

ရာသီဥတုပြောင်းလဲမှု၏ သက်ရောက်မှုများကို လုံးဝရှောင်လွှဲနိုင်ခြင်း မရှိသော်လည်း လူသားများသည် လိုက်လျောညီထွေဖြစ်အောင် နေထိုင်ခြင်းနှင့် အံတုရင်ဆိုင်နိုင်ရန် နည်းလမ်းအမျိုးမျိုးကို အသုံးပြုလျက်ရှိကြသည်။ မြန်မာနိုင်ငံရှိ ကျေးလက်ဒေသများတွင် တောင်သူလယ်သမားများသည် မိုးခေါင်မှုနှင့် ရေကြီးမှုဒဏ်ကို လျှော့ချနိုင်ရန် ရာသီဥတုဒဏ်ခံနိုင်သော သီးနှံမျိုးများ စိုက်ပျိုးလာကြသည်။ ထို့ပြင် ရေသိုလှောင်ကန်များ တည်ဆောက်ခြင်း၊ ရေကို ချွေတာသုံးစွဲခြင်းနှင့် စိုက်ပျိုးရေးနည်းပညာသစ်များ အသုံးပြုခြင်းတို့ကို ဆောင်ရွက်လာကြသည်။
စိုက်ပျိုးရေးကဏ္ဍသည် မြန်မာနိုင်ငံ၏ အဓိကစီးပွားရေးကဏ္ဍ တစ်ခုဖြစ်သောကြောင့် ရာသီဥတုပြောင်းလဲမှု၏ သက်ရောက်မှုကို တိုက်ရိုက်ခံစားရသည်။ မိုးခေါင်မှု၊ ရေကြီးမှုနှင့် ပိုးမွှားကျရောက်မှုများကြောင့် သီးနှံအထွက်နှုန်းများ လျော့နည်းလာပြီးတောင်သူလယ်သမားများ၏ ဝင်ငွေကို ထိခိုက်စေသည်။ ယင်းအခြေအနေသည် အစားအစာဖူလုံရေးနှင့် ကျေးလက်ဒေသဖွံ့ဖြိုးတိုးတက်ရေးအပေါ်ပါ အကျိုးသက်ရောက်မှုများ ဖြစ်ပေါ်စေသည်။ သို့ရာတွင် မြန်မာနိုင်ငံအတွက် စိန်ခေါ်မှုများနှင့်အတူ အခွင့်အလမ်းများလည်း ရှိနေသည်။ သဘာဝသယံဇာတများ ပေါကြွယ်ဝခြင်း၊ သစ်တောများ ကျယ်ပြန့်စွာ တည်ရှိခြင်းနှင့် နေရောင်ခြည်စွမ်းအင်ကဲ့သို့သော ပြန်လည်ပြည့်ဖြိုးမြဲစွမ်းအင်အရင်းအမြစ်များ ရှိနေခြင်းတို့သည် ရာသီဥတုပြောင်းလဲမှုကို တုံ့ပြန်ရာတွင် အားသာချက်များ ဖြစ်သည်။ ထို့ကြောင့် သဘာဝသယံဇာတများကို စနစ်တကျ စီမံခန့်ခွဲပြီး Climate Action များကို ထိရောက်စွာ အကောင်အထည်ဖော်နိုင်ပါက မြန်မာနိုင်ငံသည် ရာသီဥတုပြောင်းလဲမှုဒဏ်ကို လျှော့ချနိုင်ရုံသာမက ရေရှည်တည်တံ့သော ဖွံ့ဖြိုးတိုးတက်မှုလမ်းကြောင်းသို့လည်း ရောက်ရှိနိုင်မည်ဖြစ်သည်။

ကမ်းရိုးတန်းဒေသများတွင် ဒီရေတောများ ပြန်လည်စိုက်ပျိုးခြင်းနှင့် ကမ်းခြေထိန်းသိမ်းရေးလုပ်ငန်းများ ဆောင်ရွက်ခြင်းဖြင့် မုန်တိုင်းနှင့် ပင်လယ်ရေလှိုင်းဒဏ်များကို လျှော့ချနိုင်ရန် ကြိုးပမ်းလျက်ရှိသည်။ ထို့အပြင် သဘာဝဘေးအန္တရာယ် ကြိုတင်သတိပေးစနစ်များ၊ လူထုအခြေပြု ဘေးအန္တရာယ်စီမံခန့်ခွဲရေးအစီအစဉ်များနှင့် ကယ်ဆယ်ရေးလေ့ကျင့်မှုများကိုလည်း အကောင်အထည်ဖော် ဆောင်ရွက်လျက်ရှိသည်။ ရာသီဥတုပြောင်းလဲမှုဒဏ်ကို အံတုရင်ဆိုင်ရာတွင် ပြည်သူလူထု၏ အသိပညာနှင့် ပူးပေါင်းပါဝင်မှုသည် အရေးကြီးဆုံး အချက်ဖြစ်သည်။ ဒေသခံများကိုယ်တိုင် ပတ်ဝန်းကျင်ထိန်းသိမ်းရေးလုပ်ငန်းများတွင် ပါဝင်လာခြင်းသည် ရေရှည်တည်တံ့သော ဖွံ့ဖြိုးတိုးတက်မှုကို အထောက်အကူပြုမည်ဖြစ်သည်။
ထို့ကြောင့် ရာသီဥတုပြောင်းလဲမှုသည် သဘာဝပတ်ဝန်းကျင်ဆိုင်ရာ ပြဿနာတစ်ရပ်သာ မဟုတ်ဘဲ စီးပွားရေး၊ လူမှုရေးနှင့် အမျိုးသားဖွံ့ဖြိုးတိုးတက်ရေးနှင့် ဆက်စပ်နေသော ကိစ္စရပ်တစ်ခုဖြစ်ကြောင်း မြန်မာနိုင်ငံအနေဖြင့် နက်နက်ရှိုင်းရှိုင်း သဘောပေါက်ရန် လိုအပ်သည်။ Climate Action သည် ယနေ့မျိုးဆက်အတွက်သာမက နောင်လာမည့် မျိုးဆက်များ၏ အနာဂတ်အတွက်လည်း အရေးကြီးသော ရင်းနှီးမြှုပ်နှံမှုတစ်ခု ဖြစ်ကြောင်း အသိအမှတ်ပြု၍ ပူးပေါင်းဆောင်ရွက်သင့်ပါသည်။

ရာသီဥတုမျှတရေးနှင့် ပတ်ဝန်းကျင်ထိန်းသိမ်းရေးကို ထိရောက်စွာ ဆောင်ရွက်နိုင်ရန် အောက်ပါအကြံပြုချက်များကို တင်ပြလိုပါသည်။

—ပထမဦးစွာ သစ်တောများကို ထိရောက်စွာ ကာကွယ်ထိန်းသိမ်းပြီး သစ်ပင်စိုက်ပျိုးရေးလုပ်ငန်းများကို ပိုမိုတိုးချဲ့ဆောင်ရွက်သင့်သည်။ သစ်တောများသည် ကာဗွန်စုပ်ယူနိုင်သော သဘာဝအရင်းအမြစ်များဖြစ်သဖြင့် ရာသီဥတုပြောင်းလဲမှုကို လျှော့ချရာတွင် အရေးပါသော အခန်းကဏ္ဍမှ ပါဝင်သည်။

—ဒုတိယအနေဖြင့် နေရောင်ခြည်စွမ်းအင်၊ လေစွမ်းအင်နှင့် ရေအားလျှပ်စစ်ကဲ့သို့သော ပြန်လည်ပြည့်ဖြိုးမြဲစွမ်းအင်များ အသုံးပြုမှုကို မြှင့်တင်သင့်သည်။ ရုပ်ကြွင်းလောင်စာများအပေါ် မှီခိုမှုကို လျှော့ချခြင်းအားဖြင့် ဖန်လုံအိမ်ဓာတ်ငွေ့ ထုတ်လွှတ်မှုများကို လျှော့ချနိုင်မည်ဖြစ်သည်။

—တတိယအနေဖြင့် ပတ်ဝန်းကျင်ထိန်းသိမ်းရေးဆိုင်ရာ ပညာပေးအစီအစဉ်များကို ကျောင်းများ၊ တက္ကသိုလ်များနှင့် လူမှုအသိုင်းအဝိုင်းများတွင် ပိုမိုကျယ်ပြန့်စွာ ဆောင်ရွက်သင့်သည်။ လူငယ်များကို Climate Action လှုပ်ရှားမှုများတွင် တက်ကြွစွာ ပါဝင်လာစေရန် အားပေးသင့်သည်။
—စတုတ္ထအနေဖြင့် သဘာဝဘေးအန္တရာယ် ကြိုတင်ကာကွယ်ရေးနှင့် တုံ့ပြန်ဆောင်ရွက်ရေးစနစ်များကို အားကောင်းစေရန် လိုအပ်သည်။ နည်းပညာအသုံးပြုမှုနှင့် သတင်းအချက်အလက် ဖြန့်ဝေမှုများကို တိုးတက်စေခြင်းအားဖြင့် ပြည်သူများ၏ ထိခိုက်နစ်နာမှုများကို လျှော့ချနိုင်မည်ဖြစ်သည်။

—နောက်ဆုံးအနေဖြင့် အစိုးရ၊ ပုဂ္ဂလိကကဏ္ဍ၊ အရပ်ဘက်အဖွဲ့အစည်းများနှင့် ပြည်သူလူထုအားလုံး ပူးပေါင်းပါဝင်သော Climate Action များကို အရှိန်အဟုန်မြှင့် ဆောင်ရွက်သင့်သည်။

ရာသီဥတုပြောင်းလဲမှုသည် ယနေ့ကမ္ဘာကြီး ရင်ဆိုင်နေရသော အကြီးမားဆုံး စိန်ခေါ်မှုများအနက် တစ်ခုဖြစ်သည်။ ကမ္ဘာ့အပူချိန် မြင့်တက်လာမှု၊ သဘာဝဘေးအန္တရာယ်များ တိုးပွားလာမှုနှင့် ပတ်ဝန်းကျင်ပျက်စီး ယိုယွင်းလာမှုတို့သည် လူသားများ၏ အသက်ရှင်သန်မှုနှင့် ဖွံ့ဖြိုးတိုးတက်မှုကို ခြိမ်းခြောက်လျက်ရှိသည်။ မြန်မာနိုင်ငံသည်လည်း ရာသီဥတုပြောင်းလဲမှု၏ ဆိုးကျိုးများကို ကြုံတွေ့နေရသော နိုင်ငံတစ်နိုင်ငံဖြစ်သဖြင့် ပတ်ဝန်းကျင်ထိန်းသိမ်းရေးနှင့် Climate Action များကို အလေးထားဆောင်ရွက်ရန် လိုအပ်သည်။ သစ်တောထိန်းသိမ်းရေး၊ ပြန်လည်ပြည့်ဖြိုးမြဲစွမ်းအင် အသုံးပြုရေး၊ သဘာဝဘေးအန္တရာယ် ကြိုတင်ကာကွယ်ရေးနှင့် လူထုအသိပညာ မြှင့်တင်ရေးလုပ်ငန်းများကို အရှိန်အဟုန်မြှင့် ဆောင်ရွက်ရမည်ဖြစ်သည်။

“ရာသီဥတုမျှတရေး နည်းလမ်းပေါင်းစုံ ဆောင်ရွက်ပေး (Climate Action)” ဆိုသော ဆောင်ပုဒ်နှင့်အညီ အစိုးရ၊ အဖွဲ့အစည်းများနှင့် ပြည်သူလူထုအားလုံး လက်တွဲညီညီ ပူးပေါင်းဆောင်ရွက်မှသာ သာယာလှပပြီး ရေရှည်တည်တံ့သော ပတ်ဝန်းကျင်ကို နောင်လာနောက်သား မျိုးဆက်များအတွက် လက်ဆင့်ကမ်းပေးနိုင်မည် ဖြစ်ပါသည်။

ဘုဒလက်
တတိယနှစ်၊ ပတ်ဝန်းကျင်သိပ္ပံအထူးပြု
သစ်တောနှင့်ပတ်ဝန်းကျင်ဆိုင်ရာတက္ကသိုလ်၊ ရေဆင်း

12/06/2026

အမျိုးသားညီညွတ်ရေးအစိုးရ၊ သစ်တောနှင့် ပတ်ဝန်းကျင်ဆိုင်ရာတက္ကသိုလ်၏ ပထမနှစ်ဝင်ခွင့်ရရှိခဲ့ကြသည့် ကျောင်းသား/သူများအတွက် “မောင်မယ်သစ်လွင်ကြိုဆိုပွဲ အခမ်းအနား”အား ၁၄/၆/၂၀၂၆ တင်္နဂနွေနေ့ ညနေ Zoom platform မှတဆင့် ကျင်းပြ ပြုလုပ်သွားမည်ဖြစ်ကြောင်း အစီအစဉ်အသေးစိတ်အား သက်ဆိုင်ရာကျောင်းသားများ၏ မေးလ်လိပ်စာအသီးသီးသို့ ပေးပို့ထားပြီ ဖြစ်ပါကြောင်း၊ လုံခြုံရေးအလေးထားကာ မိမိတို့၏ အကောင့်များ၊ Zoom link များအား အခြားသူများထံ မျှဝေခြင်းမပြုရန်နှင့် Zoom ဝင်ရောက်သည့်အခါ ကျောင်းမှ သတ်မှတ်ပေးထားသည့် ကျောင်းသားအမည်များဖြင့်သာ ဝင်ရောက်ကြပါရန် ကြိုတင် အသိပေးအပ်ပါသည်။

UFES-UC

10/06/2026

[Kindly reminder]

ဒီနေ့ (၁၀-၆-၂၀၂၆) သည် UFES ပထမနှစ် ဝင်ခွင့်ရရှိသူများ ကျောင်းအပ်လက်ခံခြင်း နောက်ဆုံးရက်ဖြစ်ပါကြောင်း အသိပေးအပ်ပါသည်။

UFES-UC

04/06/2026

Kindly reminder

03/06/2026

အမျိုးသားညီညွတ်ရေးအစိုးရ၊ သစ်တောနှင့် ပတ်ဝန်းကျင်ဆိုင်ရာတက္ကသိုလ်တွင် တက်ရောက်ပညာသင်ကြားလျှက်ရှိသော ကျောင်းသား၊ ကျောင်းသူများ (သို့မဟုတ်) ပထမနှစ် ဝင်ခွင့်စာမေးပွဲ ဖြေဆိုအောင်မြင်ပြီးသူများ ပညာသင်စရိတ်အခက်အခဲဖြစ်ပါက အထောက်အပံ့ လျှောက်ထားနိုင်ပါသည်။

ရည်ရွယ်ချက် - ဤကာလအတွင်း အခက်အခဲများစွာအနက် ငွေကြေးအခက်အခဲဖြင့် တက္ကသိုလ်ပညာရေး နှောင့်နှေးမှုမဖြစ်စေရန် ရည်ရွယ်ထောက်ပံ့ခြင်း ဖြစ်ပါသည်။

လျှောက်လွှာပုံစံ - https://forms.gle/FMXKegeYz3SBtPHF6

လျှောက်လွှာပိတ်ရက် - 9/Jun/2026

စိစစ်ရွေးချယ်ပြီး ပြန်လည်အကြောင်းကြားမည့်ရက် - 15/Jun/2026

သစ်တောနှင့် ပတ်ဝန်းကျင်ဆိုင်ရာ တက္ကသိုလ်
ကြားကာလ တက္ကသိုလ်ကောင်စီ

01/06/2026

[Kindly reminder]

ဆောင်းပါးပြိုင်ပွဲ နောက်ဆုံးပေးပို့ရမည့်ရက် - ဇွန်လ (၅) ရက်နေ့ ဖြစ်ပါတယ်

24/05/2026

အမိန့်ကြော်ငြာစာအမှတ်- ၀၅/၂၀၂၆
၁၃၈၈ ခုနှစ်၊ နယုဆုန် လဆန်း (၁၀) ရက်
(၂၀၂၆ခုနှစ်၊ မေလ ၂၅ ရက်)

အမျိုးသားညီညွတ်ရေးအစိုးရ၊ သစ်တောနှင့်ပတ်ဝန်းကျင်ဆိုင်ရာတက္ကသိုလ်၏ ၂၀၂၆ခုနှစ် တက္ကသိုလ်ဝင်ခွင့်လျှောက်ထားလာသူများအနက် ၁၅-၅-၂၀၂၆ရက်နေ့တွင် အွန်လိုင်းစနစ်ဖြင့် ပြုလုပ် ခဲ့သော စတုတ္ထအကြိမ် အရည်အချင်းစစ်ဝင်ခွင့်စာမေးပွဲ၌ ဝင်ရောက်ဖြေဆိုခဲ့ကြသူများအနက် ၂၀၂၆ခုနှစ် အတွက် အောက်ဖော်ပြပါ ပထမနှစ် ဝင်ခွင့်အရည်အချင်းစစ်စာမေးပွဲ အောင်မြင်ခဲ့ကြသူ များအား စာဖြေအမှတ်စဉ် (Exam ID)နှင့်တကွ ထုတ်ပြန်ကြေညာလိုက်သည်။
ဝင်ခွင့်ရအောင်မြင်သူများအနေဖြင့် သစ်တောနှင့်ပတ်ဝန်းကျင်ဆိုင်ရာတက္ကသိုလ်၏ ဝက်ဆိုက် https://ufes.nugmyanmar.org/admission/ မှတဆင့် ပထမနှစ်ဘွဲ့ကြိုတန်း တက်ရောက်ရန် ကျောင်းအပ်နှံခြင်းကို ၂၅-၅-၂၀၂၆ ရက်နေ့မှ စတင်ပြီး ၁၀-၆-၂၀၂၆ ရက်နေ့ နောက်ဆုံးထား ဆောင်ရွက်ကြရန် အသိပေးအပ်ပါသည်။

ကြားကာလတက္ကသိုလ်ကောင်စီ
သစ်တောနှင့်ပတ်ဝန်းကျင်ဆိုင်ရာတက္ကသိုလ်၊ ရေဆင်း

24/05/2026

အမျိုးသားညီညွတ်ရေးအစိုးရ၊ သစ်တောနှင့် ပတ်ဝန်းကျင်ဆိုင်ရာတက္ကသိုလ်သို့ ဝင်ရောက်ခွင့် ရရှိသည့် ကျောင်းသား/ကျောင်းသူများနှင့် လက်ရှိတက်ရောက်နေဆဲ အတန်းသစ်တက်ရောက်ရမည့် ကျောင်းသား/ကျောင်းသူများအတွက် တက္ကသိုလ် Website မှတဆင့် ကျောင်းအပ်ရန်လမ်းညွှန်အား အဆင့်လိုက် ညွှန်ပြထားပါသည်။

သစ်တောနှင့် ပတ်ဝန်းကျင်ဆိုင်ရာတက္ကသိုလ်
ကြားကာလတက္ကသိုလ်ကောင်စီ

22/05/2026

တက္ကသိုလ်အဆင့် ဆောင်းပါးပြိုင်ပွဲတွင် ပါဝင်ယှဉ်ပြိုင်ရန် ဖိတ်ခေါ်ခြင်း

၁။ ၂၀၂၆ ခုနှစ်၊ ဇွန်လ (၅) ရက်နေ့သည် ကမ္ဘာ့ပတ်ဝန်းကျင်ထိန်းသိမ်းရေးနေ့ဖြစ်ပြီး၊ ယခုနှစ် ပတ်ဝန်းကျင်ထိန်းသိမ်းရေးနေ့ အထိမ်းအမှတ်ဆောင်ပုဒ်ဖြစ်မှာ “ရာသီဥတု မျှတရေး နည်းလမ်း ပေါင်းစုံ ဆောင်ရွက်ပေး (Climate Action)” ဖြစ်ပါသည်။ အမျိုးသားညီညွတ်ရေး အစိုးရ၊ သစ်တောနှင့်ပတ်ဝန်းကျင်ဆိုင်ရာတက္ကသိုလ်အနေဖြင့်လည်း ၂၀၂၆-ခုနှစ်၊ ကမ္ဘာ့ပတ်ဝန်းကျင် ထိန်းသိမ်းရေးနေ့ကို ဂုဏ်ပြုကြိုဆိုသောအားဖြင့် “ရာသီဥတုမျှတရေး နည်းလမ်းပေါင်းစုံ ဆောင်ရွက်ပေး (Climate Action)” ဆောင်ပုဒ်ကို အခြေပြု၍ တက္ကသိုလ်အဆင့် ဆောင်းပါး ပြိုင်ပွဲအား ကျင်းပပြုလုပ်သွားမည်ဖြစ်ပါသည်။
၂။ သို့ပါ၍ စိတ်ပါဝင်စားသူ သစ်တောနှင့် ပတ်ဝန်းကျင်ဆိုင်ရာ တက္ကသိုလ် ကျောင်းသူ ကျောင်းသားများအနေဖြင့် ယခုနှစ်အတွက် သတ်မှတ်ထားရှိသည့် ဆောင်ပုဒ်နှင့်အညီ အောက်ပါအကြောင်းအရာများ လွှမ်းခြုံပါဝင်သည့် ဆောင်းပါးများရေးသားပေးပို့၍ ပါဝင် ယှဉ်ပြိုင်နိုင်ကြောင်း ဖိတ်ခေါ်အပ်ပါသည်-
(က) ကမ္ဘာ့ပတ်ဝန်းကျင်ထိန်းသိမ်းရေးနေ့ ဖြစ်ပေါ်လာပုံ
(ခ) ကမ္ဘာ့ပတ်ဝန်းကျင်ထိန်းသိမ်းရေးနေ့ ကျင်းပရသည့် ရည်ရွယ်ချက်
(ဂ) ကမ္ဘာ့အပူချိန် မြင့်မားလာမှုကို ‌ဖြစ်ပေါ်စေသော အ‌ကြောင်းတရားများ
(ဃ) ကမ္ဘာ့အပူချိန် မြင့်မားလာမှုနှင့် နောက်ဆက်တွဲဖြစ်စဉ်များ
(င) ရာသီဥတု ဖောက်ပြန်ပြောင်းလဲလာမှုနှင့် နောက်ဆက်တွဲဆိုးကျိုးများ
(စ) သဘာဝဘေးအန္တရာယ်များနှင့် ထိခိုက်နစ်နာမှုများ
(ဆ) မြန်မာနိုင်ငံအတွင်း ပတ်ဝန်းကျင်ထိန်းသိမ်း‌ရေးဆောင်ရွက်ချက်များ နှင့် ၎င်းဆောင်ရွက်ချက်များအပေါ် သုံးသပ်ချက်များ
(ဇ) မြန်မာနိုင်ငံသူ/နိုင်ငံသားများ၏ သဘာဝဘေးဆိုးများနှင့် လူ့ပ‌‌‌‌‌ယောဂ ဘေးဆိုးများ ခံစားနေရမှုများ၊
(ဈ) ပတ်ဝန်းကျင်ပြောင်းလဲမှုဒဏ်ကို လိုက်လျောညီထွေစွာ သို့မဟုတ် အံတုရင်ဆိုင် ကြံ့ကြံ့ခိုင် တွန်းလှန်နေထိုင်နေရမှုများ
(ည) အကြံပြုချက်များ
၃။ ဤဆောင်းပါးပြိုင်ပွဲတွင် သစ်တောနှင့်ပတ်ဝန်းကျင်ဆိုင်ရာတက္ကသိုလ်တွင် လက်ရှိ တက်ရောက်နေသော ကျောင်းသူ ကျောင်းသားများသာ ယှဉ်ပြိုင်နိုင်ပါသည်။ အောက်ဖော်ပြပါ သတ်မှတ်ချက်များနှင့်ကိုက်ညီသော ဆောင်းပါးများကိုထည့်သွင်းစဉ်းစားသွားမည်ဖြစ်ပါသည်။
(က) ကွန်ပျူတာဖြင့် ရိုက်နှိပ်ယှဉ်ပြိုင်မည့်သူများ
(၁) ပြိုင်ပွဲဝင်ဆောင်းပါးများကို A4 စာမျက်နှာ အနည်းဆုံး ၁၀-မျက်နှာ အများဆုံး ၁၅-မျက်နှာအထိဖြစ်ရပါမည်။
(၂) ကွန်ပျူတာစာလုံး (Pyidaungsu) စာလုံးအရွယ်အစား ၁၄ (Font Size 14)၊ စာကြောင်းအကွာအဝေး ၁.၅ (Line Spacing 1.5)၊ စာရွက်ဘေးနားများမှ ၁လက်မ ပတ်လည် (Margin 1") ဖြင့် Microsoft Word တွင် ကွန်ပျူတာ စာစီ၍ ရေးသားပေးပို့ရမည်။
(၃) အခြားမှကူးယူထားခြင်းမဟုတ်ဘဲ မိမိကိုယ်တိုင် ဖန်တီးရေးသားထားသော စာမူရင်းဖြစ်ရမည်။ AI ဖြင့် ရေးသားထားခြင်းမဖြစ်စေရ။
(၄) အခြားပြိုင်ပွဲများတွင် ဆုရရှိပြီး‌သော၊ ပုံနှိပ်ဖော်ပြထားသော စာမူများမဖြစ်စေရ။ ပုံနှိပ်မီဒီယာ၊ လူမှုမီဒီယာအပါအဝင် အခြားမည်သို့သော ပလက်ဖောင်းများတွင် မဆို ဖော်ပြထားရှိမှုမရှိကြောင်းနှင့် မိမိကိုယ်တိုင်ပြုစုရေးသားထားမှု မှန်ကန် ကြောင်းတို့ကို ကာယကံရှင်၏ဝန်ခံကတိပြုချက် (လက်မှတ်)နှင့်အတူ သစ်‌‌တောနှင့် ပတ်ဝန်းကျင်ဆိုင်ရာ တက္ကသိုလ်မှ သတ်မှတ်ပေးထားသော ကျောင်းသားအမည် (Student Name)၊ Student ID၊ လက်ရှိ တက်ရောက် နေသော အတန်းတို့နှင့်တကွ ဖော်ပြလျက် ဆောင်းပါးတွင် ပူးတွဲပေးပို့ရမည်။
(ခ) လက်ရေးမူဖြင့် ယှဉ်ပြိုင်မည့်သူများ
(၁) ပြိုင်ပွဲဝင်ဆောင်းပါးများကို A4 စာမျက်နှာ အနည်းဆုံး ၁၂ မျက်နှာ အများဆုံး ၁၇ မျက်နှာအထိဖြစ်ရပါမည်။
(၂) စာလုံးအရွယ်အရွယ်အစား ခန့်မှန်း ၄မီလီမီတာ၊ စာကြောင်းအကွာအဝေးကို ပုံမှန် ကျောင်းသုံးဗလာစာအုပ်ပါ စာကြောင်းအကွာအ‌ဝး ၁ စင်တီမီတာ၊ စာရွက်ဘေးနားများမှ ၁လက်မ ပတ်လည် (Margin 1") ဖြင့် ရေးသားပေးပို့ရမည်။
(၃) ရေးထားသော လက်‌ရေးစာမူများကို တစ်မျက်နှာချင်း Scan ဖတ်၍ လည်းကောင်၊ ကြည်လင်ပြတ်သားစွာ အပေါ်တည့်တည့်မှ ဓာတ်ပုံရိုက်၍ JPEG, JPG, PDF ဖိုင်တို့ဖြင့် ပေးပို့ရမည်။
(၄) အခြားမှကူးယူထားခြင်းမဟုတ်ဘဲ မိမိကိုယ်တိုင် ဖန်တီးရေးသားထားသော စာမူရင်းဖြစ်ရမည်။
(၅) အခြားပြိုင်ပွဲများတွင် ဆုရရှိပြီး‌သော၊ ပုံနှိပ်ဖော်ပြထားသော စာမူများမဖြစ်စေရ။ ပုံနှိပ်မီဒီယာ၊ လူမှုမီဒီယာအပါအဝင် အခြားမည်သို့သော ပလက်ဖောင်းများတွင် မဆို ဖော်ပြထားရှိမှုမရှိကြောင်းနှင့် မိမိကိုယ်တိုင်ပြုစုရေးသားထားမှု မှန်ကန် ကြောင်းတို့ကို ကာယကံရှင်၏ဝန်ခံကတိပြုချက် (လက်မှတ်)နှင့်အတူ သစ်‌‌တောနှင့် ပတ်ဝန်းကျင်ဆိုင်ရာ တက္ကသိုလ်မှ သတ်မှတ်ပေးထားသော ကျောင်းသားအမည် (Student Name)၊ Student ID၊ လက်ရှိ တက်ရောက် နေသော အတန်းတို့နှင့်တကွ ဖော်ပြလျက် ဆောင်းပါးတွင် ပူးတွဲပေးပို့ရမည်။
၄။ ပါဝင်ယှဉ်ပြိုင်သူ ကျောင်းသူကျောင်းသားများသည် မိမိတို့ရေးသားယှဉ်ပြိုင်မည့် ဆောင်းပါးတို့ကို သစ်‌တောနှင့်ပတ်ဝန်းကျင်ဆိုင်ရာတက္ကသိုလ်၏ အီးမေးလ် [email protected] သို့ ၂၀၂၆-ခုနှစ်၊ ဇွန်လ (၅)ရက် တနင်္လာနေ့၊ ၂၄:၀၀ နာရီ နောက်ဆုံးထား၍ ပေးပို့ရမည်ဖြစ်ပါသည်။
၅။ ပေးပို့လာသည့် ဆောင်းပါးစာမူတို့ကို ဆောင်းပါး(စာမူ)စိစစ်ရွေးချယ်ရေးအဖွဲ့ဖြင့် ရွေးချယ်ပြီး ပထမဆု၊ ဒုတိယဆု၊ တတိယဆုများနှင့် နှစ်သိမ့်ဆုများအား ထိုက်ထိုက်တန်တန် ချီးမြှင့်ပေးသွားမည်ဖြစ်ကြောင်း အသိပေးကြေညာအပ်ပါသည်။

သစ်တောနှင့် ပတ်ဝန်းကျင်ဆိုင်ရာတက္ကသိုလ်
ကြားကာလတက္ကသိုလ်ကောင်စီ