07/11/2025
भद्रकाली स्कूलका विद्यार्थीको भक्तपुर भ्रमण
हात्तीगौडास्थित भद्रकाली स्कूलका विद्यार्थीहरूले भक्तपुर सहरको ऐतिहासिक तथा सांस्कृतिक अध्ययन भ्रमण गरेका छन्। भ्रमणका क्रममा उनीहरूले सहरका आठ क्षेत्रका महत्वपूर्ण सम्पदाहरूको अवलोकन गरे।
पहिले ५ अंकसँग सम्बन्धित मन्दिर र दरबारको मात्र जानकारी रहेका विद्यार्थीहरूलाई भक्तपुरका प्रतिनिधिले ५ ढोका, ३३ पोखरी र ९९ हिटी सम्बन्धी जानकारी गराए।
उनीहरूले संग्रहालय प्रमुखसँग प्रत्यक्ष रूपमा कुरा गर्दै त्यहाँ रहेका प्रस्तरकला, चित्रकला, धातुकला र काष्ठकलाको अवलोकन गरे। संग्रहालय भ्रमणका क्रममा केही विद्यार्थीहरूले “सुनढोका साँच्चिकै सुनको बनेको हो कि होइन?” भन्ने जिज्ञासा पनि प्रकट गरे।
भ्रमण टोलीले ५५ झ्याले दरबार पनि हेरे, जहाँ दुईवटा झ्यालमा बुट्टा नभएको कथा सुनेका विद्यार्थीहरूले ती झ्याल खोजे तर भेटाउन सकेनन्।
कुम्हाले समुदाय सकिमा पुन्हि पर्व मनाइरहेकाले विद्यार्थीहरूले माटो पेल्ने मेसिन र भाँडा पाकाउने भट्टी अवलोकन गर्दै सन्तुष्टि व्यक्त गरे।
तमारीस्थित न्यातापोल मन्दिरमा तान्त्रिक पुजारी मात्र प्रवेश गर्न पाउने चलनबारे उनीहरूले सुने र मन्दिरको कलात्मक बनावट अवलोकन गरे। सम्झनाकाे लागि त्यहाँ फाेटाे खिचे ।
त्यसपछि विद्यार्थीहरू भैरवनाथ मन्दिर पुगे। कथन अनुसार भैरवको श्रीमती भद्रकाली हुन् भन्ने सुनेपछि उनीहरूले मन्दिरमा आत्मीयता प्रकट गरे, तर दर्शन गर्ने इच्छा पुरा गर्न भने पाएनन्, किनभने मन्दिर बिहान मात्र खुल्ने गर्छ।
इनाचो टोलमा बनामाला समुदायको धिमे बाजा सुनेर रमाए, र भक्तपुरको सांस्कृतिक धुनसँगै आफ्नो अध्ययन भ्रमणको सम्झना मनमा बोकेर फर्किए।
