22/09/2026
काठमाडौँ विश्वविद्यालयबाट सह-प्राध्यापक एक्कु माया पुन ३२ वर्षे निष्ठापूर्ण सेवापछि सेवानिवृत्त
काठमाडौँ विश्वविद्यालय मा ३२ वर्षभन्दा लामो समय निष्ठापूर्वक सेवा प्रदान गरी सह-प्राध्यापक एक्कु माया पुन आज औपचारिक रूपमा सेवा निवृत्त हुनुभएको छ । आफ्नो जीवनको आधाभन्दा बढी समय विश्वविद्यालयको शैक्षिक उन्नयनमा समर्पण गर्नुभएकी पुनले हजारौँ विद्यार्थीहरूलाई मार्गदर्शन गर्नुका साथै विश्वविद्यालयका विभिन्न स्कूलहरूमा अध्यापन गराउनुभएको थियो । उहाँको सम्मानमा आज स्कूल अफ आर्ट्स र भाषा तथा आमसञ्चार विभागमा विशेष बिदाई कार्यक्रमको आयोजना गरियो । स्कूल अफ आर्ट्सको कार्यक्रममा डिन, विभिन्न विभागका प्रमुखहरू तथा प्राध्यापकहरूको उपस्थिति रहेको थियो भने विभागको कार्यक्रममा डिन, विभाग प्रमुख तथा प्राध्यापकहरू उपस्थित थिए ।
सो अवसरमा बोल्दै डिन तथा विभिन्न विभागका प्राध्यापकहरूले सह-प्राध्यापक पुनको अमूल्य योगदानको उच्च प्रशंसा गर्नुभयो । कार्यक्रममा अवकाशपछिको जीवनलाई एक चुनौतीको रूपमा मात्र नहेरी अवसरका रूपमा लिनुपर्ने र विश्वविद्यालयसँग निरन्तर जोडिनका लागि विभिन्न ढोकाहरू सदैव खुला रहने कुरामा जोड दिइएको थियो । विश्वविद्यालयमा अध्यापकका रूपमा मात्र नभइ, स्कूल अफ आर्टस्को डीन,कार्यकारी परिषद (इसी) को सदस्य र विभिन्न कार्यकारी पदमा रही वहाँले निष्ठापूर्वक विश्वविद्यालयलाई सेवा गर्नुभयो । वहाँको लामो र समर्पित सेवाका लागि सबैले उहाँप्रति कृतज्ञता व्यक्त गर्दै सुखद, सक्रिय र स्वस्थ जीवनको शुभकामना व्यक्त गर्नुभएको थियो ।
स्कूल अफ् आर्टस्, भाषा तथा आमसञ्चार विभाग र सम्पूर्ण विश्वविद्यालय वहाँको स्वस्थ र समुन्नत जीवनको शुभकामना अर्पण गर्दछ ।
#सेवा #अर्पण #विश्वविद्यालय #प्राध्यापन
