20/05/2026
PSA NAGDUMARA HIN PRESSCON BAHIN HAN INFLATION REPORT HAN APRIL 2026
Nagdumara hin press conference an Philippine Statistics Authority โ Samar yana nga adlaw, Mayo 20, 2026, agud igplastar an inflation rate para han bulan han Abril 2026.
Ginbuhat ini ha Conference Room han PSA ngan gintambungan han magkalain-lain nga media personalities tikang ha One Radio, Star Radio, Eastern Visayas Journal, Samar Chronicle, K5 Catbalogan, Catbalogan Daily News, ngan Philippine Information Agency.
Presente gihapon ha nasabi nga press conference hi Engr. Joel Mancol tikang ha Samar Provincial Planning and Development Office, sugad man an mga representante han Department of Trade and Industry โ Samar ngan Office of the Samar Provincial Agriculturist.
Ha nasabi nga press conference, ginpasabot han PSA nga naghitaas an inflation rate han probinsya han Samar para han Abril 2026 kumparar han nakalabay nga bulan. Sumala ha ira datos, an Samar an may pinakahitaas nga inflation rate kontra han iba pa nga mga probinsya ha bug-os nga Eastern Visayas.
Ginpahayag han ahensya nga an paghitaas han inflation in tungod han pagsaka han presyo han pipira nga batakan nga produkto ngan serbisyo, labi na ha sektor han pagkaon, transportasyon, ngan iba pa nga adlaw-adlaw nga panginahanglan.
Samtang, ginpahayag naman ni Mancol nga nagbubuhat na yana hin mga pitad an Provincial Government of Samar ipinaagi ha liderato ni Gov. Sharee Ann Tan agud maibanan an epekto han inflation.
Sumala ha iya, gintututokan yana han probinsya an pagpauswag han mga irrigation projects agud makasupurta han mga lokal nga parag-uma nga makaproduce hin mas damo nga bugas. Pinaagi hini, ginlalaoman nga maiibanan an pagsarig ha pag-angkat tikang ha gawas nga nasud nga amo an nagigin hinungdan han pagmahal han panguna nga panginahanglan.
Dugang pa niya, ginpaplanuhan liwat an pag-establisar hin mga poultry farm ha probinsya agud masiguro an supisyente nga supply han mga produkto sugad han karne ngan iba pa nga pagkaon para ha mga konsumidor.
Gindugang han mga opisyal nga pinaagi han padayon nga koordinasyon han mga ahensya han gobyerno, ginlalaoman nga may mga konkretong solusyon nga makakabulig ha pagminus han epekto han inflation ha panginabuhi han mga Samarnon.(DJ Jack)
