03/10/2026
KAUGMAON SA KAGAHAPON
RAFI gipadayag ang GSK 2027 theme sa Kickoff event
Pinaagi sa usa ka panagtapok, giselebrar sa Ramon Aboitiz Foundation Incorporated (RAFI) ang umaabot nga ika-20 nga anibersaryo sa Gabii sa Kabilin (GSK) gahapon, Oktubre 2, sa The Kabilin Center.
Pormal nga gisugdan ni Estee Marie Plunket, executive sponsor ug event chairperson sa GSK 2026, ang kalihokan diin iyahang gipaambit ang mga panghitabo bahin sa GSK karong tuiga ug ang labaw nga rason nganong miabot og 20 ka tuig ang programa.
“You don’t have to be an expert to appreciate heritage; you just have to be curious…RAFI may have started the idea, but GSK has always belonged to many people,” mensahe niya.
Sunod, mipakita sa entablado ang mga kandidata sa Miss Asia Pacific International 2026 nga sa Oktubre 10 na ang koronasyon didto sa Mactan Expo, Lapu-Lapu City.
Paghuman, igong mihatag og bidyo nga mensahe ang presidente ug Chief Executive Officer (CEO) sa RAFI nga si Amaya Cristina Fansler, diin iyang gipatugbaw nga “heritage is not simply something we preserve from the past, it is something we continue to live, to share, and to pass on.”
Mipuli pagsunod si Mayor Nestor Archival sa mikropono ug nagpasalamat sa tanang misuporta sa GSK sulod sa duha ka dekada.
“[Our culture] is a vital driver of Cebu’s tourism, local development, and creative communities…[Through this] we strengthen our identity and make Cebu a meaningful destination for the world,” ingon niya.
Nahuman ang unang bahin sa gabii dala ang bag-ong tema sa GSK sa sunod nga tuig—Bituon—ug usa ka sayaw pasundayag sa Salamisim Dance Troupe gikan sa Cebu Institute of Techonology - University (CIT-U).
Mamugnaong Pakighinabi
Wala nagdugay, gisunod ang “Conversations” diin nag-istoryahanay ang mga tawong mihulma ug mipaluyo sa programa nga kanunay nagapreserbar sa Cebuanong kultura.
Gitambongan kini nilang Dr. Jocelyn “Joy” Gerra, ang utok sa konsepto sa GSK; Jaime “Jimmy” Sy, presidente sa Central Visayas Association of Museums (CVAM); Saint Theresa’s College (STC) Museum Curator Caridad Balisacan; ug Marie Sol Gonzalvo, ang Executive Director for Central and North Portfolio sa RAFI.
Mibutyag si Dr. Gerra nga nahulma niya ang GSK base sa iyahang kaagi isip tinun-an sa Berlin ug ang “Lange Nacht der Museen” kun Taas nga Kagabhion sa Mga Museo nga programa sa syudad.
“Culture should not be exclusive…You will only know your culture if you are familiar with it, [so] bring the unfamiliar to the familiar,” awhag niya.
Sa istorya bahin sa pag-usab sa Jesuit House nga mahimong museyo, mitug-an ang tag-iya nga si Sy nga di gyod to mahitabo kung wala ang tabang sa lain-laing mga tawo, ilabi na ang mga Jesuit.
“After two weeks, with the help of some of the local architects…we renovated the house and then turned it into a museum…and with the help [of] Joy, we became part of the Gabii sa Kabilin,” sulti niya.
Sa laing pikas, miambit si Balisacan nga dako gyod ang nabuhat sa GSK sa pag-amuma sa kailhanan ug kaamgohan sa mga batan-on sa ilahang kaugalingong lugar ug kultura.
“You can really tell [that they enjoyed] because in the [years that followed], they would still be volunteering,” iyang ingon.
Sa katapusang panaghisgot, gidasig ni Gonzalvo ang tanan nga dapat molahutay pa ang GSK sa dugang pang 20 ka tuig.
“Each one in this room has to be a champion for culture and heritage; that is how we sustain Gabii sa Kabilin,” asoy niya.
Milawom ang gabii uban sa panihapon sa mga bisita ug pag-organisa sa mga dungan nga kalihokan palibot sa lugar diin mosiga balik ang mga bituon puhon inig Mayo 2027. §
Sinuwat ni Allan Ray Pulgo
Mga hulagway ni Mark Niño Quino
