18/08/2022
Wikang Filipino at mga katutubong wika, kasangkapan sa ganap na kaunlaran!
Hulyo 15, 1997 nang lagdaan ng dating Pangulo Fidel V. Ramos kasama ng mga pinuno at kawani sa sektor ng pamahalaan, mga pinuno at g**o sa sektor ng edukasyon, mga kinatawan ng pakikipag-ugnayang pang-madla, mga pinuno at miyembro ng iba’t ibang organisasyong pangwika, pang-edukasyon, pangkultura at sibiko, at mga organisasyong di-pampamahalaan ang Proklamasyon Blg. 1041, s. 1997 na nagpapahayag ng taunang pagdiriwang tuwing Agosto 1-31 bilang Buwan ng Wikang Pambansa.
Ngayong taon, lubos na nakikiisa ang Language Society- Filipino ng Southern Luzon State University sa taunang selebrasyon ng Buwan ng Wikang Pambansa na may temang “Filipino at mga Katutubong Wika: Kasangkapan sa Pagtuklas at Paglikha.” Malaki ang paniniwala ng organisasyon na ang wikang Filipino at mga katutubong wika ay mahalagang kasangkapan sa komunikasyon, unawaan, kaisahan at kaunlaran ng bansa. Ito ay may natatanging kakanyahan at kakayahan na siyang aagapay sa ating mga Filipino sa patuloy na pagtuklas at paglikha ng iba’t ibang konsepto, ideya’t kasangkapan na magtatagpo ng siyensiya at karunungang-bayan para sa kapakinabangan ng ating komunidad at ng bansa.
Gayundin, nanawagan ang Language Society-Filipino na agarang isabatas na ngayon ang Panukalang Batas Blg. 584 na nagtatakda ng hindi bababa sa siyam (9) na yunit ng asignaturang Filipino at Tatlong (3) yunit ng asignaturang Panitikan sa kurikulum ng Kolehiyo. Sapagkat, hindi sapat ang mga asignaturang Filipino sa Junior at Senior High School sa kadahilanan na: Una, maraming aspeto ng lenggwahe, halaga, at paggamit nito ang hindi itinuturo at kayang ituro sa antas sekondarya; Ikalawa, dapat bigyang-diin na ang paggamit ng wikang Filipino sa intelektwal na diskurso, sa pagtalakay sa mga mahahalagang isyung lokal, pambansa, at panlipunan, sa mataas na antas ng komunikasyon, sa pananaliksik sa at pagtalakay ng iba’t ibang larangan; At panghuli, ang pagtanggal sa Filipino sa kolehiyo ay isang malaking hakbang paatras mula sa deka-dekadang pagsisikap ng pamahalaan na panatilihin ang pambansang wika hanggang sa pinakamataas na antas ng edukasyon at upang payabungin at pagyamanin ito alinsunod sa Saligang Batas.
Higit sa lahat, kami ay naninindigan na dapat at marapat lamang na gawing pangunahing wikang panturo ang wikang Filipino katulong ang mga katutubong wika sa mga paaralan. Sa paggamit ng wikang Filipino at mga katutubong wika ay mas matututuhan ng mga mag-aaral ang maging kritikal, mapanuri, at mulat sa katotohanan. Kung ang gagamitin sa pagtuturo ay ang wikang kanilang nauunawaan, matitiyak ang ganap na pagkatuto ng mga mag-aaral sa loob at labas ng paaralan. Naniniwala kaming nananatili na ang wikang Filipino ang daan sa paghubog ng mga mag-aaral at ating kababayan upang maging edukado na siyang magdadala sa atin sa magandang kinabukasan.
Tara na! Sama-sama tayong tumindig at manindigan sa patuloy na pagpapaunlad ng wikang Filipino at mga katutubong wika.
Sanggunian:
http://www.officialgazette.gov.ph/downloads/1997/07jul/19970715-PROC-1041-FVR.pdf
Filipino at mga Katutubong Wika: Kasangkapan sa Pagtuklas at Paglikhâ | kwf.gov.ph
HB00564.pdf (amazonaws.com)
-----------------------
✍️ G. Jimuel Peñero
🎨 Bb. Frances Matienzo
[ANG PAGPAPASKIL NA ITO AY MAY PAHINTULOT MULA SA OSAS]
