10/10/2025
Sabi nga sa isang awiting pambata, “Marahil, hindi lang ang munting gagamba ang bumagsak nang bumuhos ang ulan — kundi pati na rin ang pag-asa at mga pangarap ng taumbayan ay tinangay nito”
Bilang mga mag-aaral ng Pangangasiwang Pangmadla at mga responsableng mamamayan ng ating bansa, kami ay buong sigla at taas-noong tumitindig at tumutuligsa sa sistematikong korapsyon na laganap sa mga ahensyang dapat ay pinagkakatiwalaan ng taumbayan.
Mula sa iba’t ibang sulok ng klasrum sa pamantasan, hinihikayat namin ang bawat isa na sumama at makilahok sa gaganaping PUP System-Wide Walkout Against Corruption ngayong araw, Oktubre 10, sa ganap na 12:00NN.
Sa kasalukuyan, hindi na sapat ang manahimik at manatili sa ating mga lungga. Ito na ang nararapat na panahon upang magsama-sama at palakasin ang ating panawagan: wakasan ang labis na paninikil sa mga karaniwang mamamayan na araw-araw ay dugo’t pawis ang ibinubuwis upang mabuhay.
Singilin ang mga may sala. Pagkaisahin ang ating demokratikong boses. Gamitin ang nagngingitngit na galit upang umalingawngaw ang ating panawagang mapatalsik at mapanagot ang mga nagbabalat-kayo at tiwaling opisyal ng bayan.
Mula sayo, palagi’t para sa bayan!
