All UP Academic Employees Union - Diliman Chapter

29/09/2026

UNION DIARIES l VAT at Excise Tax Tanggalin, Korap Panagutin! Oil Deregulation Law, Ibasura! Pagsuporta sa Transport Strike, Setyembre 29, 2026

Nakiisa ang ating unyon sa laban ng mga tsuper sa kanilang kilos-protesta para tutulan ang labis-labis na pagtaas ng presyo ng langis. Tulad nila, tayo’y gumigising nang maaga, bumibiyahe, nagtitiis ng trapik, kumakayod para sa pamilya. Ngunit sa kabila ng ating mga pagsisikap, bakit lalo tayong naghihirap?

Ang Petron ay kumita ng ₱3.8 bilyon sa unang anim na buwan ng 2026 na katumbas ng nasa ₱20 milyon kada araw. Samantala, ang gobyerno ay kumikita ng ₱544 milyon bawat araw mula sa buwis sa diesel pa lamang. Habang sila’y paldong-paldo, ang karaniwang tsuper ay abonado: boundary, diesel, pagkain, at maintenance ng sasakyan ay umaabot ng halos ₱5,000 kada araw (₱3,000 dito ay napupunta sa langis sa halagang nasa ₱100 kada litro), samantalang ang kita mula sa pamasahe ng 200 pasahero ay nasa ₱2,800 lamang. Luging-lugi ang drayber, samantalang malaki ang tubo ng oil companies at gobyerno.

Hindi dapat ipasa sa mamamayan ang pasanin ng taas‑presyo at taas‑pasahe. Dapat tanggalin ang VAT at excise tax, ibasura ang oil deregulation law, at kontrolin ng gobyerno ang presyo ng langis at bilihin. Ang dapat ding buwisan ay ang mayayaman gamit ang progresibong tax system sapagkat sa datos noong 2022, 10% ng populasyon ang may hawak ng ₱40 trilyong yaman, samantalang ang 90% ay ₱15 trilyon lamang. Malinaw na iilan ang nagkakamal ng sobra‑sobrang kayamanan, habang ang nakararami ay laging lubog sa baha at sa utang.

Kaya ng ibang bansang panatilihing mababa ang presyo sa pamamagitan ng subsidy, pambansang industriya ng langis, at kontrol ng pamahalaan, ngunit hindi ito ginagawa ng administrasyon ni BBM. Ito ay dahil hindi ang taong-bayan ang kanilang priyoridad kundi ang interes ng sarili at mga lokal at dayuhang kapitalista. Napakataas ng kanilang kinikita sa langis at sa buwis, at dagdag dagok pa ang iba’t ibang porma ng korapsyon tulad ng maanomalyang flood control projects at budget insertions.

Hindi tayo dapat pumayag sa harap‑harapang pagsasamantala at pagnanakaw. Tayo’y kumilos, magkaisa, at bawiin ang yaman at kapangyarihang galing sa ating dugo’t pawis.

Sa laban ng tsuper, kasama ang komyuter!
Sahod, itaas! Presyo, ibaba!
Oil deregulation law, ibasura!
Itigil na ang gerang agresyon ng US-Israel sa Kanlurang Asya!

28/09/2026

27/09/2026

UNION DIARIES l Ikot Unyon sa Diliman, Setyembre 24, 2026

Isinagawa ng All UP Academic Employees Union (AUPAEU) Diliman Chapter ang Ikot Unyon sa National Engineering Center, UP Diliman nitong Setyembre 24, 2026 na layong magbigay ng updates at makuha ang mga karanasan at konsern sa hanay ng faculty at REPS upang maitampok ng unyon sa mga programa at gawain nito at maipaabot sa pamunuan ng unibersidad.

Sinuri ni AUPAEU National Director at Large Perlita C. Raña ang budget cuts sa State Universities and Colleges (SUCs) at mga epekto nito sa UP. Masusing tinalakay naman ni AUPAEU Baguio Chapter President Wilfredo V. Alangui ang kalagayan ng kaguruan, habang ang mga isyu ng mga Research, Extension, and Professional Staff (REPS) ay hinimay-himay ni AUPAEU National Vice President for REPS Rolando C. delos Reyes II.

Inilahad sa diskusyon na lahat ng sektor at CUs ay dumaranas ng hindi maayos na kalagayan sa paggawa dahil sa pagiging overworked ngunit underpaid at kakulangan ng espasyo, kagamitan, at plantilla items na magpapatuloy dahil sa nagbabantang tapyas sa badyet. Dagdag na dagok pa ang mabagal na mga proseso at kakulangan ng malawak na konsultasyon at demokratikong pamamahala sa pamantasan.

Maaaring balikan sa https://www.facebook.com/allupacaduniondiliman/videos/1753904332596809 (simulan sa 39:00) ang naging talakayan.

Patuloy na sumama sa mga programa at pagkilos ng ating unyon para sa pagtataguyod ng ating sahod, trabaho, at karapatan.

27/09/2026

UNION DIARIES l BOR, Tutulan ang Budget Cut at Unahin ang Komunidad! Mobilisasyon sa BOR Meeting, Setyembre 23, 2026

Muling nagtipon ang mga iskolar, g**o, REPS, kawani, at mga miyembro ng komunidad sa ginanap na Board of Regents meeting noong Setyembre 23, 2026 sa UPD Asian Institute of Tourism upang igiit ang makatarungan, makamasa, at makataong pamamahala sa pamantasan.

Kasama natin ang mga kinatawan mula sa ibang constituent universities na nanawagan sa pagpili ng mga karapat-dapat na Chancellor sa Manila, Los Baños, at Visayas na maninindigan sa kapakanan ng mga mag-aaral, manggagawa, at komunidad at hindi sa komersiyalisasyon. Kasabay nito ay kinalampag natin ang BOR sa paglaban para sa mas mataas na badyet, maayos na kondisyon sa pag-aaral at paggawa, demokratiko’t makataong pamamalakad sa unibersidad at mga komunidad, at pagkondena sa korapsyon at pasismo ng estado.

Patuloy ang ating pagbabantay sa pondo ng UP sa nangyayari ngayong budget deliberations, gayundin sa mga patakaran at pagkilos ng administrasyon na dapat ay naglilingkod sa pamantasan at sambayanan at hindi sa interes ng sarili at negosyo.

Board of Regents, heed our calls!
Serbisyo sa tao, huwag gawing negosyo!
Sahod, trabaho, edukasyon, at karapatan, ipaglaban!
Pondo sa edukasyon, hindi sa korapsyon!

24/09/2026

Ikot Unyon: Faculty & REPS

22/09/2026

UNION DIARIES l Pakikiisa sa Paggunita ng Martial Law @54, Setyembre 21, 2026

Sa paggunita sa ika-54 anibersaryo ng deklarasyon ng Batas Militar, muling pinatotohanan ng ating hanay ang paninindigan: hindi tayo titigil sa paglaban sa korapsyon, kawalang pananagutan, at pamamasista ng estado.

Sinimulan natin ang pagkilos sa loob ng pamantasan sa University Council meeting at pagkatapos ay programa sa Quezon Hall. Tumulak tayo sa pagtitipon sa Liwasang Bonifacio kasama ang iba’t ibang sektor ng lipunan at nagmartsa patungong Mendiola. Overkill ang dami ng pulis at napakalayo ng barikada sa Malacañang, pero hindi tayo nagpatinag. Habang handang-handa silang supilin tayo, hindi naman nila mahuli sina Zaldy Co at Bato Dela Rosa at espesyal ang trato kina Sara Duterte at Martin Romualdez. Isang taon matapos pumutok ang flood control scandal, wala pa ring tunay na napapanagot; sa halip ay higit 200 mamamayan ang hindi makatarungang inaresto noong nakaraang taon, at kamakailan ay limang paralegal sa pagkilos kontra Pax Silica sa Bonifacio Global City. Patuloy pa ring malaya at nasa puwesto ang mga tunay na maysala sa bayan kasama na ang mismong pangulong pumirma sa maanomalyang badyet at ngayon ay pumipirma rin sa mga kasunduan sa mga kapitalista at dayuhang maglulubog lalo sa atin sa baha at kahirapan.

Wala na ang Batas Militar, ngunit walang hinto at lumalala pa ang paglabag sa mga karapatang pantao. Sino ba talaga ang pinoprotektahan ng pulis at militar—ang taumbayan o ang interes ng negosyo at imperyalismo? Hinding-hindi tayo makalilimot sa mga kasalanan ng mga namumuno sa atin, at hinding-hindi tayo titigil sa pagpapanagot sa kanila. Hinding-hindi tayo makalilimot sa mga pakikibaka at sakripisyo ng mga bayaning nauna sa atin.

Never again, never forget! Never again to Martial Law!
Lahat ng sangkot, mula sa ibaba hanggang sa tuktok, dapat managot!

20/09/2026

UNION DIARIES l Takbo Laban sa Korapsyon, Setyembre 20, 2026

Nakitakbo tayo kasama ang iba pang mga galit sa mga magnanakaw sa Takbo Laban sa Korapsyon 3.0 sa pangunguna ng University Student Council (UPD USC) at UP Act Against Corruption Network (UP ACTION) noong umaga ng Setyembre 20, 2026 sa Academic Oval ng UP Diliman. Kasabay ng pagpapalakas ng katawan ang pagpapalakas ng ating panawagan laban sa lahat ng anyo ng pandarambong mula ibaba hanggang sa tuktok! Patuloy ang ating mariing pagtutol at pakikibaka sa matinding korapsyon na naglulubog sa ating bayan sa baha at kahirapan.

Kaya sumama na bukas, Setyembre 21, sa malawakang pagkilos ng taumbayan kontra korapsyon at kawalang pananagutan kasabay ng paggunita sa ika-54 taong anibersaryo ng deklarasyon ng Martial Law. Magkaisa tayo sa pagpapahayag ng ating p**t at protesta sapagkat mula noon hanggang ngayon ay malala ang kalagayan ng ating bansa at paglabag sa mga karapatang pantao.

Ikulong na ‘yan, mga kurakot!
Marcos, singilin! Duterte, panagutin!
Walang makalilimot! Never again, never forget!

20/09/2026

UNION DIARIES l Pakikiisa sa Walkout ng mga Iskolar ng Bayan, Setyembre 18, 2026

Nag-walkout tayo kasama ang nasa 3,000 mag-aaral ng UP Diliman noong Setyembre 18, 2026 bilang protesta kontra korapsyon. Umaraw man at umulan, tuloy-tuloy ang ating naging programa kung saan tinalakay ng mga kabataan at empleyado ng ating pamantasan ang suri at galit sa bulok na sistemang umiiral sa ating bansa.

Bunga ng sistematikong pagnanakaw sa kaban ng bayan, lubog sa baha at kahirapan ang mga mamamayan. Hindi pa nakontento, patuloy pa nilang tinatapyasan ang badyet sa edukasyon, kalusugan, at iba pang batayang serbisyo. Isang taon ang lumipas nang pumutok ang flood control scandal, wala pa ring tunay na napapanagot at sa halip ay mga ordinaryong mamamayang nagpapahayag lamang ng tunay na kalagayan ng bayan ang palaging inaaresto. Kasabay pa nito, ipinagbibili ni Marcos Jr. ang ating likas-yaman at pambansang soberanya sa imperyalistang Estados Unidos sa kasunduan para sa Pax Silica.

Magsama-sama tayo sa Setyembre 21 sa pagbaha ng malawak na hanay ng taong-bayan sa mga lansangan upang magprotesta laban sa mga magnanakaw at pasista sa ating pamahalaan. Hindi tayo makalilimot at hindi tayo matatakot!

Never again, never forget!
Lahat ng sangkot, dapat managot!
Makibaka, huwag matakot!

20/09/2026

UNION DIARIES I Ikot Opisina para sa 40k PDG at Sept. 21 ML@54 Mob (Setyembre 16-18, 2026)

Muli tayong umikot sa iba’t ibang yunit upang ipaliwanag at papirmahan ang ating petisyon para sa 40k Professional Development Grant (PDG) at taas-sahod na Php 50k entry level para sa lahat ng g**o sa lahat ng antas, Php 36k para sa salary grade 1, at Php 1,200 nationwide living wage.

Nakausap natin ang masisipag nating mga kasama sa Office of Anti-Sexual Harassment (OASH), Ugnayan ng Pahinungod, Office for Athletics and Sports Development (OASD), University Food Service (UFS), Office of Student Projects and Activities (OSPA), Office of Admissions, Office of the University Registrar, at Virata School of Business. Nakikiisa sila sa ating patuloy na kampanya para sa ating mga sahod at benepisyo, maayos na kondisyon sa paggawa, at regularisasyon ng mga kontraktwal.

Hinikayat din natin silang sumama sa Sept. 18 walkout program at sa Sept. 21 Martial Law Commemoration mobilization.

40k PDG, ibigay na!
Sahod, itaas! Presyo, ibaba!
Manggagawang kontraktwal, gawing regular!
Lahat ng sangkot, dapat managot!

20/09/2026

UNION DIARIES l Pakikiisa sa UPIFA 1st General Assembly, Setyembre 14, 2026

Nakiisa tayo sa unang general assembly ng UP International Faculty Alliance (UPIFA) na ginanap noong Setyembre 14, 2026 sa UP School of Archaeology. Ito ang kanilang unang pagtitipon mula nang maitatag noong nakaraang taon bunsod ng mga isyu sa kanilang empleyo, sahod, at benepisyo.

Iniulat ng kanilang tagapangulong si Prop. Juan Rofes ang mga naging aktibidad at tagumpay ng samahan. Nagkaroon din ng halalan para sa kanilang Board of Trustees at naglatag ng mga plano para sa hinaharap.

Matapos ito ay nagtalakayan tungkol sa kanilang mga isyu at konsern na ang pinakamatingkad ay ang kahirapan sa pagpoproseso ng kanilang mga papeles at usapin ng sahod at deductions. Ipinarating nila ito sa ating unyon at sa UP Office of International Linkages (UP OIL) na kasama rin sa pagtitipon. Mula rito, magsasagawa ng tayo ng diyalogo kasama ang UPIFA at UP OIL sa Diliman Accounting Office upang magawan ng aksiyon ang mga hinaing na ipinaabot. Bibitbitin na rin natin sa planong diyalogong ito ang ulat ng iba’t ibang sektor sa ating pamantasan na nakararanas ng mga delay sa kanilang mga sahod at benepisyo.

Pagbati sa UPIFA sa kanilang unang general assembly at pagpapatuloy ng kanilang samahan. Mabuhay ang militante, progresibo, at makabayang unyonismo!