10/02/2026
SEA-Teacher Inbound Recap.
Bulahan!
Isa ka daku kag talagsaon nga kahigayunan ang naeksperyensyahan sang siyam (9) ka mga exchange student participants sa ginhiwat nga Pagli-ali ka mga Dumarapon: An Immersion of CAPSU SEA Teachers sa Minoro ka Pupoydon, San Julian, Tapaz, Capiz sang Enero 24, 2026.
Nagsugod ang programa sa pag-abot kag pagparehistro sang mga bisita nga gin-updan sang mainamayong pagbaton pinaagi sa Welcome Dance kag pag-awit sang Harimuyngan nga Padapunan kag HTAI Hymn. Sunod sini, ginpahayag ang identidad kag kultura sang komunidad pinaagi sa kanta nga Panay Bukidnon Kung Kami Tawgon, nga naghatag dungog sa ila kaliwat kag tradisyon.
Ginpaathag man sang pamuno sang organisasyon sa iya Welcome Remarks ang importansya sang sini nga aktibidad bilang tulay sang pagkilalaay kag pagbinuligay sa tunga sang mga bisita kag sang komunidad. Ginpahamtangan ini sang pormal nga Presentation of SEA Teachers and Guests, nga nagpalig-on sang espiritu sang pakig-updanay kag pagrespeto.
Nagsunod ang espiritwal kag kultural nga bahin sang programa sa Pagpasundayag kag Ambahan, nga ginpanguluhan sang mga cultural masters kag babaylan elders, bilang pagpasalamat kag pagpangamuyo para sa matahum nga dalagan sang aktibidad. Ginpasundayag man ang Binanog Tigbabaye, nga naglaragway sang kusog, kaanyag, kag dignidad sang kababayen-an sa tradisyon sang Panay Bukidnon.
Sa ikaduha nga bahin sang programa, ginpabatyag gid sang komunidad ang ila manggaranon nga kultura pinaagi sa TADA (War Dance) nga nagapakita sang kaisog kag pagkabugtaw sang ila mga katigulangan. Ginpakita man ang UTOS ukon tradisyunal nga paghimo sang baston, kag ang HIBONG nga amo ang paghimo sang tradisyunal nga ilimnon nga halin sa humay, nga nagpakilala sang mga lumad nga kahibalo nga ginatipigan hasta sa karon.
Bilang kabahin sang immersion, ginpangunahan ang mga bisita sa Farm Tour and Planting sa Berondo Integrated Farms and Learning Site Inc., kun sa diin ila mismo naeksperyensyahan ang simple pero matahum nga kabuhi sa uma kag ang importansya sang pag-atipan sang duta.
Pagkatapos sang mga aktibidad, nag-upod ang tanan sa isa ka panag-inutdanay nga panyaga nga nagpasangkad sang paghigugma, pagpasalamat, kag paghinugpongay sang relasyon sa tunga sang mga bisita kag sang komunidad.
Ang programa nagtapos sa tema nga Home Sweet Home, nga nagasimbolo sang pagpauli sang mga bisita nga may dalá nga bag-o nga kahibalo, malipayon nga mga handumanan, kag mas mahigadum nga paghangad sa kultura sang Panay Bukidnon.
Sa kabug-osan, ang Pagli-ali ka mga Dumarapon indi lamang isa ka programa kundi isa ka buhi nga eksperyensya sang kultura, tradisyon, kag pagkatawhanon, nga nagapakita sang mahigugmaon nga pagbaton kag pagkadaku sang kasingkasing sang mga pumuluyo sang Tapaz, Capiz.
Isa ka daku kag haladum nga pasalamat ang ginahatag kay Dr. Ronilo G. Berondo (HTAI President) tungod sa iya walay untat nga preparasyon, dedikasyon, kag dakô nga gugma sa pagtipig kag pagpanalipod sang kultura sang mga Tapaznon kag sang Panay Bukidnon. Sa iya mga pulong, ginpahayag niya nga handa siya itugyan ang iya kabuhi sa pagpreserba kag pagpasangkad sang sini nga manggaranon nga kultura, agud indi ini madula kundi magapadayon nga buhi para sa masunod nga mga henerasyon.
Nangin posible ini nga makahalamut-an nga kultural nga immersion pinaagi sa matalum kag mainalamon nga ideya sang Office of the Vice President for External Affairs and Linkages nga ginpamunuan ni Dr. Salvacion J. Legapsi, nga nagsugyot nga ang Capiz Cultural Tour itugyan sa madumduman kag masaligan nga kamut ni Dr. Berondo. Ang sini nga programa ginbatun kag ginhatagan sang bug-os nga pagsuporta sang CAPSU sa kabug-osan, nga nagapakita sang isa ka matib-ong panaghiusa sa pagpadayon kag pagpasidungog sang kultura sang Panay Bukidnon.
(3/3)
