08/12/2024
Sa kabila ng patuloy na mga panawagan ng taong bayan, nananatili ang talamak na paglabag sa karapatang pantao at ang paglala ng iba’t ibang suliranin sa ating lipunan, kasabay ng kawalang aksyon ng estado.
Ang Pandaigdigang Araw ng Karapatang Pantao ay hindi lamang paalala sa kahalagahan ng dignidad at karapatan ng bawat isa. Isa rin itong pagkakataon upang suriin ang kalagayan ng ating lipunan—upang makita ang mga isyung nagpapaigting sa ating kamulatan.
Paulit-ulit ang panawagan para sa mas mataas na subsidyo para sa SUCs, pag-aalaga sa karapatan ng mga g**o at estudyante sa maayos na pasilidad. Habang ang mga kabataan ay sabik na bumuo ng mas maayos na kinabukasan, saksi tayo sa kawalang trabaho, kontraktwalisasyon, at mababang pasahod ng mga manggagawa. Hindi rin tayo bulag sa mga patuloy na banta sa kalayaan sa pamamahayag at demokrasya.
Ang lahat ng mga isyung ito ay nagpapatunay na ang karapatang pantao ay hindi lamang usapin ng pagkilala—na ang diwa ng karapatang pantao ay hindi natatapos sa teorya; ito ay nangangailangan ng pagkilos na batay sa prinsipyo ng pagkakaisa, pananagutan, at paninindigan.
Kinikilala ng Batch Mayari na ang aming responsibilidad bilang isang year-level organization ay hindi lamang nakasentro sa aming mga miyembro o limitado sa komunidad ng UP. Ang aming tungkulin ay sumasaklaw sa mas malawak na lipunan, lalong-lalo na sa harap ng hamon sa mga sistemang mapang-api at pasistang estado. Ang patuloy na budget cut sa UP ay hindi lamang usapin ng pondo; ito ay malinaw na paglabag sa karapatang pantao. Mula sa kakulangan ng maayos na study spaces at pasilidad hanggang sa mga serbisyong kinakailangan para sa dekalidad na edukasyon, ang kakulangan sa pondo ay nagsisilbing pagkitil sa karapatan ng mga estudyante sa isang epektibo at mataas na kalidad na edukasyon.
Sa paggunita ng Pandaigdigang Araw ng Karapatang Pantao, nakikiisa ang Batch Mayari sa sama-samang paglaban laban sa mga ganitong uri ng panunupil, hindi lamang para sa ating pamantasan kundi pati na rin sa mas malawak na panawagan ng hustisya para sa lahat ng biktima ng mapanupil na estado. Ang karapatang pantao, kabilang ang karapatan sa edukasyon, ay isang pakikibaka para sa isang tunay na malaya at mapagpalayang lipunan.
Ang laban para sa karapatang pantao ay laban para sa mas makatarungan at makataong mundo. Marami na tayong napagtagumpayan, ngunit marami pa rin ang kailangang gawin. Mahalaga ang pagkakaisa upang ang mga boses ng nasa laylayan ay pakinggan at matugunan ang kanilang mga pangangailangan. Huwag tayong mapagod sa pagpapatuloy ng laban na ito dahil ang tunay na tagumpay ay nasa pagkilos at pagpapahayag ng ating kolektibong panawagan at paninindigan.
