20/10/2026
PANAWAGAN SA ATONG BARANGAY: PALIHOG, AKSYONI ATONG KANAL TABANGI KAMI.
Lawaan 1, Fidel bas street
Upper mohon
Diri sa among lugar, bisan walay ulan, nagbaha na tungod sa dakong kanal nga dugay na kaayong wala ma-maintain ug malimpyohan. Murag kada tuig na lang ni nga problema, pero hangtod karon, wala gihapoy klarong aksyon.
Nangayo na mi og tabang sa Aksyon Agad. Niadtong niari sila, wala usab kini matagad kay baha na daw. Apan unta, dili kinahanglan maghulat nga samot pang modako ang problema una pa kini aksyonan.
Nanghinaot mi sa atong mga opisyal sa barangay nga matagaan na kini og seryosong pagtagad. Naa pa gyud umaabot nga mga bagyo, ug kung dili kini masulbad daan, basin mas grabe pa ang pagbaha nga atong masinati.
Dili lang baha ang problema. Grabe na usab ang baho sa tubig ug sa karsada tungod sa hugaw ug posibleng polusyon sa kanal. Makapabalaka kini sa panglawas sa mga residente, labi na sa mga bata ug mga tigulang.
Mga opisyal sa atong gobyerno, palihog, gamita ug taronga ang pondo nga gikan sa atong mga buhis. Dili kinahanglan nga dako nga proyekto dayon aron makita ang kausaban. Usahay, ang yano nga paglimpyo ug pagmentinar sa kanal dako na kaayog tabang sa komunidad.
Dili mi nangayo og imposible. Nangayo lang mi og limpyo nga palibot, hapsay nga drainage, ug luwas nga komunidad.
Palihog, aksyonan na unta kini sa dili pa mahitabo ang mas grabe nga pagbaha.
🙏 Sa atong barangay officials ug sa mga ahensyang may katungdanan, hinaot madungog ninyo ang tingog sa mga residente.
Ang among buhis, angay nga makita usab sa serbisyo ug konkretong aksyon.
