03/02/2026
ٹریفک قوانین، منشیات اور سوشل میڈیا کے حوالے سے تقریب کا انعقاد
۔۔۔۔۔۔۔۔۔۔۔۔۔۔۔۔۔۔۔۔۔۔۔
گورنمنٹ بوائز پوسٹ گریجویٹ کالج باغ میں ٹریفک قوانین ، منشیات اور سوشل میڈیا کے حوالے سے تقریب کا انعقاد کیا گیا۔ اس تقریب کی صدارت پرنسپل ادارہ جناب پروفیسر کرم داد کیانی نے کی جبکہ مہمان خصوصی ایس ایس پی ضلع باغ سردار ریاض مغل تھے۔ نظامت کے فرائض پروفیسر دلشاد ارِیب نے ادا کیے۔ مہمان خصوصی ایس ایس پی ضلع باغ سردار ریاض مغل نے اپنے خطاب میں طلبہ کو ٹریفک قوانین کے حوالے سے آگاہی فراہم کی۔ ون ویلنگ کے نقصانات، ٹریفک قوانین کی خلاف ورزی کے نقصانات منشیات اور سوشل میڈیا کے منفی استعمال کے حوالے سے نوجوانوں میں پیدا ہونے والے مسائل اور اس کے تدارک کے لیے تفصیل سے روشنی ڈالی۔
موجودہ دور میں بڑھتے ہوئے ان مسائل میں نوجوان جس تیزی سے الجھ رہے ہیں اس سے بچنے کی صورت صرف اور صرف قوانین پر عملدرآمد میں ہے۔
پرنسپل ادارہ جناب پروفیسر کرم داد کیانی نے اپنے خطاب میں ضلعی پولیس انتظامیہ کا شکریہ ادا کیا کہ اس اہم موضوع پر گفتگو اور آگاہی کے حوالے سے ایس ایس پی اور ڈی ایس پی باغ ذاتی طور پر یہاں تشریف لائے ۔ نوجوانوں کو آگاہی فراہم کی اور قوانین پر عملدرآمد کی تلقین کی۔ پرنسپل ادارہ نے طلبہ پر زور دیا کہ وہ تعلیم کے ساتھ ساتھ قوانین پر بہر صورت عمل کریں۔ تبھی ہم باوقار قوم کے طور پر سرخرو ہو سکتے ہیں۔
اس تقریب میں پروفیسر سید احسن علی گردیزی ، پروفیسر محمد شوکت خان، پروفیسر راجا محمد اشفاق، پروفیسر مدثر سعید، پروفیسرعدنان خورشید، پروفیسرمظہر حسین، پروفیسرشہزاد خان اور دیگر نے بھی شرکت کی۔ تقریب کے اختتام پر مفتی سید فرحان گردیزی نے نے صدر ریاست بیرسٹر سلطان محمود چودھری کے انتقال پر دعائے مغفرت کی اور اختتامی دعا سے تقریب کا اختتام کیا گیا۔
03-02-2026
