20/01/2026
پاکستان میں ڈگری ویریفکیشن کا عمل برسوں سے گریجویٹس کے لیے ایک اذیت ناک تجربہ بنا ہوا ہے۔ جہاں ہر ادارے کے سامنے اپنی ہی ڈگری کو بار بار ثابت کرنا پڑتا ہے۔ یہ صورتحال بالکل ایسی ہے جیسے ایک شہری سے ہر چند کلومیٹر بعد یہ ثابت کروایا جائے کہ وہ اسی ملک کا شہری ہے۔ سوال یہ ہے کہ جب ڈگری باقاعدہ تسلیم شدہ جامعات جاری کرتی ہیں تو گریجویٹس کو مسلسل شک کی نگاہ سے کیوں دیکھا جاتا ہے؟
یونیورسٹی ڈگری جاری کرتی ہے، جس پر کنٹرولر امتحانات اور وائس چانسلر کے دستخط اور مہر ہوتی ہے، مگر اس کے باوجود طالب علم کو دوبارہ فیس دے کر وہی ڈگری اسی یونیورسٹی سے ویریفائی کروانی پڑتی ہے۔ اس کے بعد فائل ہائر ایجوکیشن کمیشن (HEC) کے پاس جاتی ہے، جہاں نئی فیس، نئے فارم اور طویل انتظار معمول بن چکا ہے، صرف اس بات کے لیے کہ HEC مان لے کہ اس کی اپنی affiliated یونیورسٹی نے واقعی ڈگری جاری کی ہے۔
حقیقت یہ ہے کہ ہم سب جانتے ہیں کہ یہ ویریفکیشن اکثر حقیقی تصدیق کے بجائے محض ایک رسمی کارروائی ہوتی ہے۔ گزشتہ سال میں نے وزارتِ خارجہ (MOFA) کی جانب سے لگائے گئے QR کوڈ کو خود اسکین کرنے کی کوشش کی تو وہ کام ہی نہیں کر رہا تھا۔ جب دفتر سے رابطہ کیا گیا تو جواب ملا کہ پرانا QR کوڈ صرف تین مہینے کے لیے ہوتا ہے اور دوبارہ نیا QR لگوانا پڑے گا، یعنی دوبارہ فیس اور دوبارہ انتظار۔ اگر QR کوڈ ہی عارضی ہے اور ڈیٹا مستقل نہیں، تو پھر اس ویریفکیشن کا مقصد کیا رہ جاتا ہے؟
اس کے باوجود ڈگری MOFA بھیجی جاتی ہے تاکہ HEC کے اسٹیمپ کو بھی ویریفائی کیا جا سکے، جو اس بات کا واضح ثبوت ہے کہ ہمارے ادارے ایک دوسرے پر اعتماد کرنے کے بجائے پورا بوجھ شہری پر ڈال دیتے ہیں۔ اس پورے عمل میں نہ صرف ہزاروں روپے ضائع ہوتے ہیں بلکہ مہینوں کا قیمتی وقت بھی برباد ہوتا ہے، خاص طور پر ان طلبہ کے لیے جو چھوٹے شہروں یا دور دراز علاقوں سے تعلق رکھتے ہیں۔
اب وقت آ گیا ہے کہ HEC اور MOFA اس مسئلے کو سنجیدگی سے لیں اور ڈگری ویریفکیشن کو ایک جدید، شفاف اور قابلِ اعتماد نظام میں تبدیل کریں۔
۔Blockchain-based ڈیجیٹل ریکارڈ، One-Window سسٹم، فیسوں میں کمی اور ویریفکیشن مراکز کا مزید شہروں تک پھیلاؤ فوری اصلاحات کی شکل میں نافذ کیا جانا چاہیے۔ یہ سہولت کا نہیں بلکہ اعتماد، عزتِ نفس اور تعلیمی نظام کی ساکھ کا سوال ہے۔
اگر آپ بھی اس نظام سے متاثر ہیں تو براہِ کرم اس پوسٹ کو Repost / Share کریں، HEC اور MOFA کو ٹیگ کریں اور اس آواز کو اتنا بلند کریں کہ یہ مسئلہ اعلیٰ حکام تک پہنچے۔ خاموشی مسئلے کا حل نہیں، اجتماعی آواز ہی تبدیلی لا سکتی ہے۔
