Govt. Boys Degree College Samahni

08/10/2026

گورنمنٹ بوائز ڈگری کالج سماہنی میں
8 اکتوبر 2005 کے قیامت خیز زلزلے کی اکیسویں برسی کے موقع پر ایک تقریب کا انعقاد کیا گیا ۔
جس میں زلزلے کی تباہ کاریوں ، جانی و مالی نقصانات اور مستقبل میں ایسی آفات سے بچاؤ کے لیے ضروری احتیاطی تدابیر پر گفتگو کی گئی۔
" یہ زلزلہ پاکستان کی تاریخ کا سب سے زیادہ ہولناک اور تباہ کن سانحہ تھا جس میں ایک لاکھ کے قریب لوگ لقمہ اجل ہوئے، ڈیڑھ لاکھ کے قریب لوگ زخمی ہوئے ، لاکھوں لوگ بے گھر ہوئے، کھربوں روپے کی سرکاری و نجی املاک اور عمارات تباہ ہوئی ۔"
آخر میں شہدائے زلزلہ کی مغفرت و بخشش اور درجات کی بلندی کیلئے خصوصی دعا کی گئی .

05/10/2026

🌸 یومِ اساتذہ — اُن عظیم ہستیوں کے نام 🌸

اساتذہ وہ عظیم معمار ہیں جو علم، کردار اور شعور کی روشنی سے قوموں کا مستقبل سنوارتے ہیں۔
علم انسان کو جہالت کے اندھیروں سے نکال کر شعور، کردار اور کامیابی کی روشنی عطا کرتا ہے؛ یہی علم ایک مضبوط اور مہذب معاشرے کی بنیاد ہے۔
راجا بڈھے خان گورنمنٹ بوائز ڈگری کالج سماہنی کے تمام قابلِ احترام اساتذہ کو عالمی یومِ اساتذہ کے موقع پر خراجِ تحسین پیش کرتے ہیں۔
آپ کی محنت، رہنمائی اور خلوص ہمارے طلبہ کی کامیابی کا روشن راستہ ہے۔
سلام اُن عظیم اساتذہ کو، جو نسلوں کو علم کے ساتھ کردار بھی عطا کرتے ہیں۔

03/10/2026

01/10/2026

میرپور یونیورسٹی آف سائنس اینڈ ٹیکنالوجی (مسٹ) کے پروفیسرز صاحبان پر مشتمل معائنہ کمیٹی نے گورنمنٹ بوائز ڈگری کالج سماہنی کا دورہ کیا-
ٹیم نے کالج کے تعلیمی، تدریسی، انتظامی سرگرمیوں اور کلاس رومز، سائنس وکمپیوٹر لیبارٹریز' لائبریری ،کھیل کے میدان کا معائنہ کیا۔
الحاق کمیٹی نے ادارہ کے تعلیمی، تدریسی اور تحقیقی ماحول کو تسلی بخش قرار دیتے ہوئے خوب سراہا ۔
اس موقعہ پر پرنسپل ادارہ ھذا پروفیسر محمد ہارون خان نے یونیورسٹی اور کالج کے درمیان معلومات کے تبادلے اور Coordination کو مزید بہتر بنانے پر ضرور دیا۔

25/09/2026

الحمد للہ
گورنمنٹ بوائز ڈگری کالج سماہنی کا ایک اور قابل فخر اعزاز

آزاد جموں و کشمیر بوائے اسکاؤٹس ایسوسی ایشن کے زیر انتظام اٹھارویں سالانہ سیرت سرور خاتم النبیین صلی اللّٰہ علیہ وآلہ وسلم کانفرنس گورنمنٹ بوائز پائلٹ سکول مظفرآباد میں منعقد ہوئی۔
جس میں کشمیر بھر کے سکولز، کالجز اور یونیورسٹیز کے طلباء و طالبات نے مقابلہ حسن قرات میں شرکت کی ۔
اس مقابلہ قرات میں بوائز ڈگری کالج سماہنی کے ہونہار طالب علم حافظ ریحان فاروق نے پورے کشمیر میں دوسری پوزیشن حاصل کر کے وادی سماہنی کا نام روشن کیا۔
اس شاندار کامیابی پر ادارہ کے پرنسپل واساتذہ اور طالب علم کے والدین اور خاندان کو دلی مبارکباد ۔

19/09/2026

الحمدللہ
راجا بڈھے خان گورنمنٹ بوائز ڈگری کالج سماہنی کا ایک اور اعزاز
اٹھارویں سالانہ سیرت سرور عالمین ﷺ سکاؤٹس کانفرنس کے ضلعی سطح کے مقابلہ جات میں گورنمنٹ بوائز ڈگری کالج سماہنی کی مقابلہ حسن قرات میں پہلی دونوں پوزیشنز
اول پوزیشن۔ حافظ توثیق احمد
دوم پوزیشن۔ حافظ ریحان فاروق
اس شاندار کامیابی پر پرنسپل ادارہ ھذا پروفیسر محمد ہارون خان اور اساتذہ نے طلباء اور انکے والدین کو مبارکباد پیش کی اور اگلے مرحلے آزاد کشمیر بھر کے مقابلہ جات میں مزید کامیابیوں کیلئے نیک خواہشات کا اظہار کیا۔

06/09/2026

راجا بڈھے خاں گورنمنٹ بوائز ڈگری کالج سماہنی ضلع بھمبر میں یومِ دفاع پاکستان، ریلی اور تقریب؛ شہداء کو خراجِ عقیدت

6 ستمبر یومِ دفاع پاکستان کے موقع پر سیز فائر لائن سماہنی جموں و کشمیر میں لاری اڈہ سماہنی سے ایک ریلی نکالی گئی۔ ریلی کی قیادت اسسٹنٹ کمشنر سماہنی سردار محمد پرویز خان، سابق صدر کشمیر پریس کلب سماہنی مظہر حسین جعفری اور تاجر رہنما صداقت حسین ،راجہ نثار خان کلاتھ ہاؤس، ہیڈ ماسٹر ریٹائرڈ راجہ فاروق خان نے کی۔ریلی میں سرکاری سکول و کالج کے طلبہ، بلدیاتی نمائندگان، تاجران، سرکاری محکموں کے افسران و اہلکاران سمیت سیاسی و سماجی شخصیات نے شرکت کی۔ شرکاء نے ہاتھوں میں قومی پرچم اور بینرز اٹھا رکھے تھے جبکہ پاک فوج کے شہداء اور وطنِ عزیز کے دفاع کے لیے جانوں کے نذرانے پیش کرنے والے قومی ہیروز کے حق میں بھرپور نعرے بلند کیے گئے۔
گورنمنٹ بوائز ڈگری کالج سماہنی کے پرنسپل محمد ہارون خان اور سٹاف نے ریلی کا استقبال کیا اور اس میں چاہی روڈ سے شامل ہوئے۔ ریلی کے شرکاء راجہ بڈھے خان گورنمنٹ بوائز ڈگری کالج کے احاطے میں پہنچے جہاں یومِ دفاع کے حوالے سے خصوصی تقریب کا انعقاد کیا گیا۔ تقریب کا آغاز تلاوت کلام پاک سے کیا گیا جس کی سعادت قاری نثار صاحب مینجر دربار بابا شادی شہید نے حاصل کی۔ اور نبی کریم صلی اللّٰہ علیہ وسلم کی بارگاہ میں گلہائے عقیدت شاھد مقصود ہیڈ کلرک گورنمنٹ بوائز ڈگری کالج سماہنی نے پیش کیے۔ تقریب سے اسسٹنٹ کمشنر سماہنی سردار محمد پرویز خان، ڈی ایس پی ریٹائرڈ منیر احمد، ممبر ضلع کونسل عکاس ندیم ایڈووکیٹ، چیئرمین چوھدری عبدالرحمن سدھو ،راجہ عتیق الرحمن بابر، صابر حسین، طاہر اقبال اور دیگر مقررین نے خطاب کیا۔اور پروفیسر محمد ہارون خان پرنسپل گورنمنٹ بوائز ڈگری کالج سماہنی نے پر جوش نعرے لگوائے ۔مقررین نے کہا کہ 1965ء میں دشمن پاکستان کے خلاف ناپاک عزائم لے کر آیا تھا، تاہم پاک فوج کے بہادر جوانوں نے جرأت، بہادری اور جذبۂ شہادت کا مظاہرہ کرتے ہوئے دشمن کے عزائم خاک میں ملا دیے۔ انہوں نے کہا کہ پاک فوج کے جوانوں نے اپنی جانوں کا نذرانہ پیش کرکے وطن کا دفاع کیا اور قوم کا سر فخر سے بلند کر دیا۔ 6 ستمبر ہمیں اپنے شہداء اور غازیوں کی لازوال قربانیوں کی یاد دلاتا ہے، تمام شہداء پوری قوم کے ماتھے کا جھومر ہیں۔مقررین نے کہا کہ پاکستان نے اپنی دفاعی صلاحیت اور قومی عزم کا لوہا پوری دنیا میں منوایا ہے۔ قوم کو اپنی مسلح افواج پر فخر ہے اور مشکل کی ہر گھڑی میں پوری قوم افواجِ پاکستان کے شانہ بشانہ کھڑی ہے۔ انہوں نے کہا کہ آج بھی وطن کے محافظ جذبۂ حب الوطنی، جرأت اور عزم کے ساتھ ملکی سرحدوں کی حفاظت کر رہے ہیں۔تقریب کے اختتام پر قاری نثار احمد نے شہداء کے بلندیٔ درجات، پاکستان کی سلامتی، استحکام، خوشحالی اور ریاست جموں و کشمیر کی آزادی کے لیے خصوصی اجتماعی دعا کی گئی۔کیک کاٹا گیا مٹھائی تقسیم کی گئی۔
تقریب کے اختتام پر پرنسپل آفس گورنمنٹ بوائز ڈگری کالج سماہنی میں پرنسپل صاحب کے ساتھ کامیاب ریلی /تقریب کے انعقاد پر اظہار تشکر کیا گیا ۔

14/05/2026

الوادعی پارٹی برائے سال دوم 2026

ادارہ ھذا میں آج مورخہ 14_5_2026 سال دوم کی الوداعی پارٹی کی تقریب زیر صدارت پرنسپل ادارہ پروفیسر محمد ہارون خان منعقد ہوئی۔
تقریب کا باقاعدہ آغاز تلاوت قرآن پاک سے حافظ توثیق احمد طالب علم سال اول نے کیا۔ نعت رسول مقبول صلی اللہ علیہ و آل وسلم کی سعادت طالب علم نعمان علی نے حاصل کی ۔
تقریب میں تمام ڈیپارٹمنٹ کے ہیڈز اساتذہ نے طلباء سے خطاب کیا اور طلباء نے ملی نغمے ،مزاحیہ خاکے اور تقاریر پیش کیں۔
پرنسپل ادارہ پروفیسر محمد ہارون خاں نے خطاب کرتے ہوئے طلباء کو تدریسی عمل کے ساتھ ساتھ تربیت اور مستقبل کے چیلنجز سے نبرد آزما ہونے کے لیے مسلسل کوشش اور محنت سے کام کرنے کی تلقین کی۔
انہوں نے کہا اب وقت ہے کہ آپ اعلیٰ تعلیم کی طرف قدم بڑھائیں۔ میں آپ سب کو ترغیب دیتا ہوں کہ ادارہ ھذا میں ADA یعنی ایسوسی ایٹ ڈگری پروگرام میں داخلہ لیں۔ یہ پروگرام کم وقت میں معیاری تعلیم اور عملی مہارت فراہم کرتا ہے، جو آپ کے کیرئیر کے لیے بہت مفید ثابت ہوگا۔
کالج سے جڑی یادیں کسی بھی طالب علم کا سرمایہ حیات ہوتی ہیں اور یہ یادیں عمر بھر ساتھ رہتی ہیں ۔
۔ پرنسپل ادارہ نے منتظمین پارٹی کو کامیاب پروگرام پر مبارکباد پیش کی ۔
تقریب کے اختتام پر طلباء کے مختلف گروپس اپنے اساتذہ کے ساتھ فوٹو سیشن کے بعد ان سے بہتر کل اور مستقبل کی دعائیں لیتے ہوئے رخصت ہوئے ۔۔۔


جدائی لمحہ بھر کی ہے، یہ رشتہ ٹوٹتا کب ہے
محبت دل میں باقی ہو تو فاصلہ بھی کچھ نہ کہتا ہے

یہ لمحے یاد رہیں گے، یہ باتیں یاد رہیں گی
ہماری دوستی کی یہ سوغاتیں یاد رہیں گی

نئے سفر کی نوید ہے، نیا راستہ ہے سامنے
کامیابیوں کی روشنی ہو، ہر موڑ پہ آپ کے ساتھ رہے

13/05/2026

08/05/2026

معرکہ حق " بنیان مرصوص " کی پہلی سالگرہ

آج مورخہ 8 مئی 2026 راجہ بڈھے خان گورنمنٹ بوائز ڈگری کالج سماہنی میں افواجِ پاکستان کو خراجِ تحسین پیش کرنے اور "آپریشن بنیان مرصوص" کی تاریخی کامیابی کی یاد میں ایک پروقار تقریب کا انعقاد کیا گیا۔
تقریب پرنسپل ادارہ ھذا پروفیسر محمد ہارون خان کی زیر نگرانی منعقد ہوئی ۔
تقریب کا آغاز تلاوتِ کلام پاک سے ہوا، نظامت کے فرائض پروفیسر نیاز احمد سبحانی نے ادا کیے ۔
تقریب میں اساتذہ کرام نے معرکہ حق اور آپریشن بنیان مرصوص کی تاریخی کامیابی پر تفصیلی روشنی ڈالی

پروفیسر عارف احمد سرسالوی نے خطاب کرتے ہوئے کہا کہ
ہماری افواج نے ثابت کیا کہ وطن کے دفاع کے لیے ہر سپاہی بنیان مرصوص بن جاتا ہے۔ ہمیں اپنے محافظوں پر فخر ہے۔"

پروفیسر ساجد محمود نے خطاب کرتے ہوئے کہا کہ
"بنیان مرصوص صرف ایک آپریشن نہیں، ہمارے اتحاد کی علامت ہے۔ دشمن جان لے، یہ قوم سیسہ پلائی دیوار ہے۔"

*پروفیسر انصر محمود نے کہا کہ
جنگیں صرف طاقت، اسلحے اور فوج کی بنیاد پر نہیں لڑی جاتی بلکہ جنگیں طاقت، قوت اور فوج کے ساتھ ساتھ جرت، غیرت، حمیت ، ایمان اور جذبہ شہادت کی بنیاد پر لڑی اور جیتی جاتی ہیں۔ آپریشن بنیان مرصوص میں پاک فوج نے اپنے سے کئی گنا بڑی اور طاقت ور بھارتی فوج کو شکست اور زلت سے دوچار کیا۔

آخر میں پرنسپل ادارہ ھذا پروفیسر محمد ہارون خان نے اپنے خطبہ صدارت میں فرمایا کہ آج کا دن صرف شکرگزاری کا نہیں بلکہ غیرت، جرت، اور قومی وحدت کی فتح کا دن ہے- پاک فوج نے دشمن کے طیارے گرا کر دنیا کو پیغام دیا کہ پاکستان کا دفاع ناقابلِ تسخیر ہے ۔ آپریشن "بنیان مرصوص” میں پاک فوج اور بالخصوص پاک فضائیہ کی شاندار عسکری کامیابیوں کو خراجِ تحسین پیش کرتے ہیں۔

توحید کی امانت سینوں میں ہے ہمارے۔
آساں نہیں مٹانا نام و نشاں ہمارا۔
دنیا کے بُت‌کدوں میں پہلا وہ گھر خدا کا
ہم اُس کے پاسباں ہیں، وہ پاسباں ہمارا۔
تیغوں کے سائے میں ہم پل کر جواں ہوئے ہیں
خنجر ہلال کا ہے قومی نشاں ہمارا۔
باطل سے دبنے والے اے آسماں نہیں ہم۔
سَو بار کر چکا ہے تُو امتحاں ہمارا۔

آخر میں ملک و قوم کی سلامتی اور شہداء کے درجات کی بلندی کے لیے خصوصی دعا کی گئی۔