27/09/2026
🌸 حوصلہ افزائی، اعترافِ خدمت اور تشکر 🌸 گورنمنٹ اسوسییٹ کالج کچا کھوہ کے لیے ایک اور اعزاز
گزشتہ روز ڈسٹرکٹ خانیوال کی جانب سے منعقدہ ایک پروقار الوداعی تقریب، جو ڈائریکٹر ایجوکیشن ملتان ڈویژن جناب طاہر سلطان خان کے اعزاز میں منعقد کی گئی، میں محکمہ ہائر ایجوکیشن کے معزز افسران اور مختلف اداروں کے سربراہان نے شرکت کی۔
اس باوقار تقریب میں DPI South Punjab ڈاکٹر فرید شریف صاحب، ڈائریکٹر کالجز ڈیرہ غازی خان جناب خادم حسین، ڈائریکٹر کالجز بہاولپور ڈویژن جناب شرافت صاحب، ڈپٹی سیکرٹری بورڈز اینڈ یونیورسٹیز ایجوکیشن ڈیپارٹمنٹ جناب احمر رؤف صاحب (جو سابقہ ڈائریکٹر کالجز ملتان بھی رہ چکے ہیں) سابقہ ڈپٹی ڈائریکٹر کالجز خانیوال جناب حافظ تاج الدین صاحب، ڈپٹی ڈائریکٹر کالجز وہاڑی، ڈپٹی ڈائریکٹر کالجز لودھراں، ڈپٹی ڈائریکٹر کالجز ملتان سمیت مختلف اداروں کے معزز پرنسپلز صاحبان موجود تھے۔
ایسی باوقار محفل میں، جہاں محکمہ ہائر ایجوکیشن کے اعلیٰ افسران اور مختلف اضلاع کے سربراہانِ ادارہ موجود ہوں، گورنمنٹ ایسوسی ایٹ کالج کچا کھوہ کی کاوشوں اور کارکردگی کا خصوصی طور پر سراہا جانا ہمارے لیے یقیناً ایک بڑا اعزاز اور باعثِ حوصلہ افزائی ہے۔
اس موقع پر جناب طاہر سلطان خان، ڈائریکٹر ایجوکیشن ملتان ڈویژن نے گورنمنٹ ایسوسی ایٹ کالج کچا کھوہ کی پرنسپل کی ادارے کے لیے خدمات، محنت اور مسلسل کاوشوں کو سراہتے ہوئے سندِ تحسین سے نوازا۔ انہوں نے کالج کی تعلیمی و انتظامی کارکردگی، ترقی، صفائی، خوبصورتی اور ادارے کی بہترین حالت کو خصوصی طور پر سراہا اور کہا کہ الحمدللہ کچا کھوہ کالج دن بہ دن ترقی کی جانب گامزن ہے۔
انہوں نے اس امر کا بھی اظہار کیا کہ ادارے کے لیے پرنسپل کی کاوشیں نمایاں ہیں اور جب بھی کالج کا دورہ کیا گیا، حتیٰ کہ اچانک دورے کے موقع پر بھی، ادارہ بہترین نظم و ضبط، صفائی، خوبصورتی اور مجموعی انتظامی حالت میں نظر آیا۔ ان کے یہ حوصلہ افزا الفاظ ہمارے لیے یقیناً ایک اعزاز بھی ہیں اور مزید محنت کے لیے ایک خوبصورت تحریک بھی۔
ہم اس محبت، اعتماد اور اعترافِ خدمت پر جناب طاہر سلطان خان کے تہہ دل سے شکر گزار ہیں۔ اسی طرح جناب ڈاکٹر عمران احمد اور تمام معزز افسران و پرنسپلز صاحبان کا بھی دلی شکریہ، جو ہمیشہ ادارے کی مثبت کاوشوں کو سراہتے، حوصلہ دیتے اور ہماری محنت کی قدر کرتے ہیں۔
یہ اعزاز کسی ایک فرد کی کامیابی نہیں بلکہ پوری ٹیم کی مشترکہ محنت، اساتذہ کی لگن، نان ٹیچنگ اسٹاف کی کاوشوں اور ادارے سے وابستہ ہر فرد کی ذمہ داری کا اعتراف ہے۔
اور سب سے بڑھ کر الحمدللہ ثم الحمدللہ! ہم اپنے ربِ کریم کے شکر گزار ہیں، جس نے ہمیں اس ادارے کی خدمت کا موقع دیا، عزت دی اور ہماری کاوشوں میں برکت عطا فرمائی۔
یہ حوصلہ افزائی ہمارے لیے مزید ذمہ داری، مزید محنت اور اپنی پیاری کچا کھوہ کی بیٹیوں کے لیے مزید بہتر تعلیمی ماحول فراہم کرنے کے عزم کی تجدید ہے۔
سرکاری کالج، معیاری کالج — اور ان شاء اللہ کچا کھوہ کی بیٹیوں کے روشن مستقبل کی ضمانت۔ 🌷
Rana Sikandar Hayat Maryam Nawaz Sharif
