27/06/2026
چین میں ایک 5 سالہ بچے نے کھیلتے ہوئے حادثاتی طور پر لاکھوں روپے مالیت کے موبائل فونز جلا دیے، تاہم اس کے والد کا ردعمل سوشل میڈیا پر صارفین کی توجہ کا مرکز بن گیا۔
شینزن سے تعلق رکھنے والے پینگ، جو موبائل فونز کا کاروبار کرتے ہیں، کے مطابق بچے نے گھر میں شارٹ سرکٹ سے اٹھنے والے شعلوں سے کھیلنے کی کوشش کی، جس کے نتیجے میں آگ ورکشاپ تک پھیل گئی اور تقریباً 30 موبائل فون تباہ ہو گئے۔ نقصان کی مالیت 2 لاکھ چینی یوآن (83 لاکھ پاکستانی روپے سے زائد) بتائی گئی ہے۔
خوش قسمتی سے کوئی جانی نقصان نہیں ہوا۔ پینگ نے بتایا کہ ان کا بیٹا آگ لگنے کے بعد خوفزدہ ہو گیا تھا اور نقصان کی تلافی کے لیے اپنا جیب خرچ دینے کی پیشکش بھی کی۔
والد نے بچے کو ڈانٹنے کے بجائے پیار سے سمجھایا کہ آگ سے کھیلنا خطرناک ہوتا ہے۔ ان کا کہنا تھا کہ وہ اپنے بچوں کے ساتھ ویسا سخت رویہ نہیں اپنانا چاہتے جیسا انہیں بچپن میں برداشت کرنا پڑا تھا۔
