31/10/2024
رُکھ دی اُچی ٹہنی اُتے, بیٹھا بولے کَاں
سَجنوں بولی اوہو چنگی, جیڑی بولے ماں
اہ موقع پنجابیاں واسطے ڈھیر خوشیاں تے مبارکاں دا موقع ہے جو کئی صدیاں دے انتظار ٹٹیا ہے تے اس دھرتی اتے اس دی اپنڑی بولی نوں مانڑ دیون دی ابتدا کیتی گئی ہے۔ ساڈے ساریاں دے دلاں دی دیرینہ خواہش پوری ہوئ ہے کہ ساڈی ماں بولی نوں نصاب دا لازمی حصہ بنڑاون واسطے قرارداد منظور کیتی گئی ہے۔ امید کردے ہاں کہ اس قراداد نوں بل دی شکل اچ منظور کرایا جاسی، تے پنجابی نوں صحیح معنیاں اچ اس دا مانڑ ملسی۔ساڈے بچے تے وڈے سبھی اس مٹی دی بولی نوں نصاب اچ پڑھسن تے اس دی خوشبو تے لٹریچر نال اپنڑے اذہان و افکار نوں نویاں بلندیاں دیسن۔ بلھے شاہ، وارث شاہ تے ڈاکٹر سلام ہوراں دی فکری بلندی دا تعارف ممکن ہوسی۔ اہ ہک آفاقی حقیقت ہے جوں جس درخت دی بنیاداں کمزور ہو جاون اس نوں جکھڑ تے ہواواں مڈھوں پٹ دیندیاں نیں۔ تے افسوس کجھ انج ہی پنجابی قوم نال ہو چکیا اے۔پر زندہ قوماں اپنڑی روایتاں دا پاس رکھدیاں نیں۔اہ یقینا ہک وڈا تے خوش آئند عمل ہے مگر سانوں ہجے ہک لمبا سفر طے کرنا ہے۔ پنجاب دی بولی تے پنجاب دی تعمیر نو واسطے ہجے ڈھیر راہ باقی ہے جس اچ لکھ مشکلاں تے اسانیاں باقی نیں۔ اساں ساریاں دی اخلاقی تے قومی ذمہ داری ہے جو اس رستے اچ اپنڑا ہر ممکن حصہ پاویے۔جس دن اس قرارداد نوں اساں بل دی شکل اچ منظور کرا لیا ساڈے واسطے اوہ حقیقی فتح دا دن ہوسی۔
پنجاب کونسل جامعہ پنجاب اس موقع تے ساری پنجابی قوم نوں مبارک پیش کردی اے۔ تے انھاں نمائندیاں تے پنجابی پرچارک تنظیماں نوں لکھ واری شکریہ آکھدی ہے جنھاں دی بدولت اہ مبارک موقع آیا ہے۔
امبر دا میں بوہا کھول کے ویکھاں گا
رب دے نال میں پنجابی بول کے ویکھاں گا
وسےپنجاب #
#جیوےپنجاب
