11/08/2026
🚨 اسسٹنٹ پروفیسرز بھرتی: مبینہ جعلی تجربہ سرٹیفکیٹس کا معاملہ، BPSC کی جانچ پڑتال پر سوالات
اسسٹنٹ پروفیسرز کی حالیہ بھرتی کے لیے منعقدہ امتحان میں بعض امیدواروں کی جانب سے مبینہ طور پر اہلیت کے معیار پر پورا اترنے کے لیے جعلی یا غیر مستند تجربہ سرٹیفکیٹس جمع کرانے کا معاملہ تشویش کا باعث بن گیا ہے۔
ذرائع کے مطابق بعض امیدوار ایسے بھی تھے جو مبینہ طور پر بطور لیکچرار خدمات انجام نہیں دے رہے تھے، تاہم انہوں نے نجی تعلیمی اداروں سے مبینہ طور پر جعلی تجربہ سرٹیفکیٹس حاصل کرکے مطلوبہ تجربہ ظاہر کیا اور اس بنیاد پر اسسٹنٹ پروفیسرز کی آسامیوں کے لیے اہل قرار پانے کی کوشش کی۔
تشویشناک امر یہ ہے کہ ایسے مبینہ معاملات کی موجودگی کے باوجود بلوچستان پبلک سروس کمیشن (BPSC) کی جانب سے تاحال صرف ایک امیدوار کی نشاندہی کرکے اس کے خلاف کارروائی کی اطلاعات سامنے آئی ہیں۔
یہ صورتحال امیدواروں کے تجربہ سرٹیفکیٹس کی جانچ پڑتال، دستاویزات کی تصدیق اور بھرتی کے مجموعی شفافیت کے عمل پر اہم سوالات اٹھاتی ہے۔
ضرورت اس امر کی ہے کہ صرف ایک امیدوار تک کارروائی محدود رکھنے کے بجائے تمام کامیاب اور شارٹ لسٹ امیدواروں کے تجربہ سرٹیفکیٹس کی مکمل، غیر جانب دار اور جامع طور پر تصدیق کی جائے۔ متعلقہ نجی اداروں سے ریکارڈ کی باقاعدہ تصدیق کی جائے اور اگر کسی امیدوار کی جانب سے جعلی یا غلط معلومات فراہم کرنے کا ثبوت ملے تو قانون اور قواعد کے مطابق بلاامتیاز کارروائی عمل میں لائی جائے۔
اہلیت، میرٹ اور شفافیت پر کوئی سمجھوتہ نہیں ہونا چاہیے، کیونکہ سرکاری تعلیمی عہدوں پر تقرری صرف حقیقی قابلیت اور مستند تجربے کی بنیاد پر ہونی چاہیے۔
