الجمعية الهندسية - الجامعة التكنولوجية

  • Home
  • Sudan
  • Khartoum
  • الجمعية الهندسية - الجامعة التكنولوجية
Directions

الجمعية الهندسية - الجامعة التكنولوجية Contact information, map and directions, contact form, opening hours, services, ratings, photos, videos and announcements from الجمعية الهندسية - الجامعة التكنولوجية, College & University, Khartoum.

​هي نقابة طلاب كلية الهندسة و العمارة و مثلهم الشرعي ، تتمثل أهميتها في الدفاع عن حقوقهم وتعريفهم بواجباتهم والعمل على تهيئة جو صالح لإكمال العملية الأكاديمية من ناحية و تنمية وتطوير الجوانب الأخرى لطالب كلية الهندسة

من الماضي… إلى الحاضر، نحو المستقبل 🤝1/أكتوبر/2026مصنع الميمون للخرسانة الجاهزة في خطوة جديدة نحو بناء جسور أقوى بين الج...
01/10/2026

من الماضي… إلى الحاضر، نحو المستقبل 🤝

1/أكتوبر/2026

مصنع الميمون للخرسانة الجاهزة

في خطوة جديدة نحو بناء جسور أقوى بين الجامعة وسوق العمل، أجرى وفد من الجمعية الهندسية – الجامعة التكنولوجية اليوم 1 أكتوبر 2026م، زيارة إلى مصنع الميمون للخرسانة الجاهزة – بحري(الحلفايا) ، وذلك في إطار العمل على إعادة تفعيل الشراكة والتعاون بين الجانبين.

وضم وفد الجمعية: م. محمد النور فضل المولى – دفعة مدنية 21 – الأمين الإعلامي.
م. مصطفى عبد الله أحمد – دفعة مدنية 22 – نائب أمين العلاقات الخارجية.

وخلال الزيارة، جرى بحث أوجه التعاون المشترك، والتخطيط للمرحلة القادمة، بما يتيح لطلاب الهندسة المدنية فرصًا أكبر للاطلاع على بيئة العمل الهندسية والتطبيق العملي ومتطلبات سوق العمل، وربط ما يتعلمونه أكاديميًا بالواقع المهني.

ولعل أجمل ما حملته الزيارة أن مدير مصنع الميمون للخرسانة الجاهزة الباش مهندس/ وليد السيد، هو خريج كلية الخرطوم التقنية، دفعة مدنية 2009؛ المؤسسة التي أصبحت اليوم الجامعة التكنولوجية.💛

فكان المشهد أشبه بالماضي وهو يلتقي بالحاضر، ليفتحا معًا طريقًا نحو المستقبل.⛓️

وقد اتفق الطرفان على العمل خلال الفترة القادمة على التخطيط والتجهيز لزيارات ميدانية وبرامج تعاون مشتركة، تُمكّن الطلاب من الاقتراب من واقع المهنة، والتعرف على الجوانب العملية في قطاع الخرسانة والإنشاءات، والاستعداد بصورة أفضل للانتقال من مقاعد الدراسة إلى سوق العمل، مع بحث المزيد من فرص التعاون خلال الفترة القادمة.

وتتقدم الجمعية الهندسية – الجامعة التكنولوجية بخالص الشكر والتقدير لإدارة مصنع الميمون للخرسانة الجاهزة على حسن الاستقبال، وروح التعاون، ودعمهم لطلاب الهندسة، ودورهم في خدمة المجتمع والمساهمة في تأهيل الكوادر الهندسية في السودان.

نؤمن أن بناء المهندس لا يحدث داخل القاعات وحدها؛ فبعض الدروس تبدأ عندما نخرج منها إلى الميدان.

وكل التوفيق والسداد والنماء لإدارة مصنع الميمون للخرسانة الجاهزة، على أمل أن تكون هذه الخطوة بدايةً لشراكة أوسع، وتجارب أكثر، وفرصٍ أكبر لطلابنا. 🤍💙






خطوة جديدة من داخل الجامعة.. نحو مرحلة أقوىيوم الخميس، 24 سبتمبر 2026، عُقد أول اجتماع رسمي للمكتب التسييري لـ الجمعية ا...
26/09/2026

خطوة جديدة من داخل الجامعة.. نحو مرحلة أقوى

يوم الخميس، 24 سبتمبر 2026، عُقد أول اجتماع رسمي للمكتب التسييري لـ الجمعية الهندسية – الجامعة التكنولوجية من داخل حرم الجامعة التكنولوجية، منذ اندلاع الحرب.

وجاء الاجتماع للوقوف على ما أُنجز داخليا خلال الفترة الماضية، وتقييم التجربة، ومراجعة المسار بما يمهّد لبداية مرحلة جديدة أكثر تنظيمًا وفاعلية.

كما ناقش الاجتماع سبل تطوير عمل الجمعية وتعزيز حضورها في الحياة الجامعية، بما يساهم في تحسين تجربة الطلاب، وخدمة مصالحهم، وفتح مساحات أوسع لسماع صوتهم وتمثيل قضاياهم.

العودة إلى الحرم ليست مجرد عودة للمكان؛ بل بداية لمرحلة جديدة من العمل.

والقادم.. بإذن الله، أقوى وأفضل... و نحن مستمرون




إنا لله وإنا إليه راجعونقال تعالى:﴿كُلُّ نَفْسٍ ذَائِقَةُ الْمَوْتِ ۖ وَإِنَّمَا تُوَفَّوْنَ أُجُورَكُمْ يَوْمَ الْقِيَا...
23/09/2026

إنا لله وإنا إليه راجعون

قال تعالى:
﴿كُلُّ نَفْسٍ ذَائِقَةُ الْمَوْتِ ۖ وَإِنَّمَا تُوَفَّوْنَ أُجُورَكُمْ يَوْمَ الْقِيَامَةِ﴾

ببالغ الحزن والأسى، وبقلوب مؤمنة بقضاء الله وقدره، تنعى الجمعية الهندسية – الجامعة التكنولوجية الزميلة المغفور لها بإذن الله:

منى شرف الدين
كلية الهندسة – قسم الهندسة الكهربائية
تخصص الاتصالات – الدفعة 2020

والتي انتقلت إلى رحمة الله تعالى إثر وعكة صحية لم تمهلها طويلًا.

نسأل الله العلي القدير أن يغفر لها ويرحمها، وأن يكرم نزلها، ويوسّع مدخلها، ويفسح لها في قبرها، وأن يجعل الجنة دارها ومستقرها، وأن يلهم أهلها وذويها وزملاءها الصبر والسلوان.

نسأل الله أن يتقبلها بواسع رحمته، وأن يجعل ما أصابها كفارةً ورفعةً لدرجاتها.

إنا لله وإنا إليه راجعون.



في لفتة تعبّر عن روح الأخوة والترابط بين طلاب الدفعات، كرّم طلاب مدنية 22 وعمارة 22 قادتهم "ليدرات" في آخر يوم، عقب آخر ...
22/09/2026

في لفتة تعبّر عن روح الأخوة والترابط بين طلاب الدفعات، كرّم طلاب مدنية 22 وعمارة 22 قادتهم "ليدرات" في آخر يوم، عقب آخر امتحان 19/9/2026 في دورة امتحانات سبتمبر 2026.

نثمّن هذه اللفتة الجميلة، ونشجّع على مثل هذا الترابط الذي يتجاوز حدود الدراسة، ويصنع بين الطلاب روحًا من التعاون والوفاء والانتماء.

كل الشكر لكم على هذه اللفتة التي تعكس جمال ما بينكم من مودة وتقدير. نتمنى لكم مستقبلًا حافلًا بالنجاحات والإنجازات، وأن تحمل لكم الأيام القادمة من الخير بقدر ما تحمل هذه الذكريات من جمال.

وفقكم الله في خطواتكم القادمة، ودامت بينكم المحبة والأخوّة. وإلى لقاءات أجمل، يا مهندسي المستقبل. 🤍



#مدنية22 #معمار22

🏗️ اعرف مستقبلك (3) | الهندسة المدنيةبتشوف مبنى واقف، شارع ماشي، كبري فوق النيل، أو مشروع إنشائي كبير... وبتفتكر إن المو...
21/09/2026

🏗️ اعرف مستقبلك (3) | الهندسة المدنية

بتشوف مبنى واقف، شارع ماشي، كبري فوق النيل، أو مشروع إنشائي كبير... وبتفتكر إن الموضوع كله خرسانة وحديد؟

الحقيقة إن ورا كل منشأ من الحاجات دي في علم، حسابات، تصميم، تربة، مواد، تخطيط وتنفيذ و إدارة.

وهنا بيجي عالم الهندسة المدنية.

لكن لو فاكر إن المدنية معناها مباني وأسمنت وحديد وبس...
فأنت لسه ما عرفت التخصص. 👀

طيب... الهندسة المدنية دي شنو؟

ببساطة، هي المجال البتعلمك كيف تفهم وتخطط وتصمم وتنفذ وتدير المنشآت والبنية التحتية البنشوفها حولنا.

المبنى البتسكن فيهو؟
الطريق البتمشي فيهو؟
الكبري البتعبر فوقو؟
شبكات المياه والصرف؟
المشروعات الإنشائية؟

كل واحدة من دي فيها مشكلة هندسية محتاجة فهم وحساب وحل.

يعني المهندس المدني ما بس بيسأل:

> «المبنى ده شكله كيف؟»

لكن بيسأل:

هل آمن؟
كيف الأحمال ماشّة؟
الأساسات مناسبة للتربة؟
المواد المستخدمة مناسبة؟
كيف ننفذ التصميم على أرض الواقع؟
وكم الزمن والتكلفة المطلوبة؟

وهنا بتبدأ تكتشف إن المدنية أكبر من صورة خوذة وحديد وأسمنت.

---

🏗️ طيب... حتدرس شنو؟

خلال رحلة دراسة الهندسة المدنية، حتتعامل مع مجموعة كبيرة من المعارف الهندسية المرتبطة بالمنشآت والتشييد والبنية التحتية.

حتقابل الرياضيات والفيزياء، الاستاتيكا، مقاومة المواد، التحليل الإنشائي، الخرسانة، التربة، الموائع، المساحة وغيرها من المجالات المرتبطة بالهندسة المدنية.

وفي كل مرحلة، الفكرة ما إنك تحفظ القانون وتمشي.

السؤال الحقيقي هو:

> القانون ده بفسر شنو في العالم الحقيقي؟

لأنك في النهاية ما بتتعلم عشان تحل مسألة في ورقة بس.

بتتعلم عشان تفهم حاجة ممكن تتبني على الأرض ،و تطبق كل معلومة على ارض الواقع و تحول كل فكرة معمارية الى حقيقة.

---

🌍 والمدنية ما طريق واحد...

يمكن دي من أهم الحاجات المفروض تعرفها قبل تختار التخصص.

الهندسة المدنية فيها عوالم مختلفة:

🏢 الإنشاءات والهندسة الإنشائية

هنا بتدخل في عالم المباني والمنشآت والأحمال والقوى، وكيف نحلل ونصمم المنشأ بحيث يكون آمناً وقابلاً للتنفيذ.

🛣️ الطرق والنقل

لو الشوارع والكباري وحركة الناس والمركبات بتشد اهتمامك، هنا بتدخل في عالم الطرق والنقل والبنية التحتية المرتبطة بيها.

🌊 المياه والموارد المائية

من المياه والإمداد إلى الصرف والموارد المائية، هنا بتتعامل مع واحدة من أهم الحاجات في أي مجتمع:

كيف ندير المياه ونوصلها ونصرفها بصورة صحيحة؟

🧱 مواد التشييد والتنفيذ

لأن التصميم الممتاز ما بكفي لو ما اتنفذ بصورة صحيحة.
هنا بتتعرف على مواد البناء وخصائصها واستخدامها وجودة التنفيذ و إدارة التنفيذ.

📐 المساحة

قبل ما تبني، لازم تعرف وين حتبني، والموقع مناسباتو شنو، والمناسيب والإحداثيات كيف.
والمساحة جزء أساسي من العمل الهندسي في كثير من المشروعات.

👷‍♂️ إدارة التشييد والمشروعات

المشروع ما تصميم بس.
في زمن، تكلفة، مواد، معدات، عمالة، جودة وسلامة.
وهنا بتتعلم كيف تتحول الرسومات والخطط إلى مشروع حقيقي على الأرض.

---

😅 طيب... هل المدنية سهلة؟

في الحقيقة و بصراحة كدا. ...لا.

حتلقى رياضيات، فيزياء، تحليل، تصميم، تقارير ومشروعات ،تكاليف و حسابات، إدارة و إشراف....الخ.

وممكن تمر عليك مسألة تقعد معاها ساعتين وفي النهاية تقول:

> «أنا كنت مبسوط في حياتي الدخلني هندسة مدنية شنو؟» 😂

لكن الصعوبة ذاتها ما المفروض تكون سبب إنك تخاف من التخصص.

السؤال الأهم:

هل بتحب تفهم كيف قامت الهياكل العملاقة ؟
هل بتستمتع بحل المشاكل؟
هل عندك صبر على الحساب والتحليل؟
هل بتستمتع بفكرة إن الحاجة البتتعلمها ممكن تتحول لمشروع حقيقي؟

لأن المدنية في النهاية ما حفظ قوانين وبس.
هي طريقة تفكير.
و النرجسية عند المهندس المدني ما جاية من فراغ😎👑

---

طيب... هل الهندسة المدنية مناسبة ليك؟

ما تختارها عشان اسم «هندسة».
وما تختارها عشان صاحبك داخلها.
وما تختارها لأن الناس قالت ليك:
«المدنية مستقبلها مضمون.»

اعرف الأول شنو بتدرس، وشنو طبيعة المجال، وشنو نوع التفكير البحتاجو.

وبعدها اسأل نفسك:

> هل أنا شايف نفسي في عالم المباني والمنشآت والمشروعات والبنية التحتية؟

إذا الإجابة لسه ما واضحة...
ما مشكلة.

أنت أصلاً بتقرأ عشان تعرف.
---

🧭 قبل ما تختار... اعرف.

في حنواصل نقرّب ليك الصورة عن تخصصات كلية الهندسة والعمارة بالجامعة التكنولوجية، بعيداً عن الكلام العام والمعلومات المعلبة.

اعرف التخصص، افهم طريقو، وبعدها اختار الطريق البناسبك.





⚡ اعرف مستقبلك | الهندسة الكهربائيةالموبايل الفي يدك، الشبكة البتستخدمها، الأنوار في الشارع، المصنع، المستشفى، محطة الكه...
20/09/2026

⚡ اعرف مستقبلك | الهندسة الكهربائية

الموبايل الفي يدك، الشبكة البتستخدمها، الأنوار في الشارع، المصنع، المستشفى، محطة الكهرباء...
وراء كل واحدة من الحاجات دي عالم كامل من الأنظمة الكهربائية والإلكترونية.

وهنا بتجي الهندسة الكهربائية.

لكن لو فاكر إن الكهرباء معناها أسلاك، فيوزات ولمبات وبس...
فأنت لسه ما عرفت التخصص. 👀

طيب... الهندسة الكهربائية دي شنو؟

ببساطة، هي المجال البتعلمك كيف تفهم وتستخدم وتطوّر الأنظمة الكهربائية والإلكترونية وأنظمة التحكم والاتصالات البتشغّل جزء كبير من العالم حولنا.

يعني بدل ما تشوف جهاز وتقول:

> «الجهاز ده شغال.»

المهندس الكهربائي بيسأل:

كيف اشتغل؟
كيف اتصمم؟
كيف نتحكم فيه؟
كيف ننقل الطاقة ليه؟
وكيف نخليه أكثر كفاءة وأماناً؟

والجميل هنا إن الهندسة الكهربائية ما تخصص واحد بس.

فيها أربعة مسارات رئيسية، وكل واحد منها بيدخلك عالم مختلف:

---

⚡ 1. هندسة القدرة Power

لو الكهرباء بالنسبة ليك معناها توليد، نقل، توزيع وتشغيل الطاقة، فأنت داخل عالم القدرة.

هنا بتتعامل مع أنظمة ومحطات توليد الكهرباء، شبكات النقل والتوزيع، المحولات، والأنظمة الكهربائية في المنشآت والمصانع، وغيرها من التطبيقات المرتبطة بالطاقة.

يعني السؤال هنا:

> كيف نولّد الكهرباء؟ وكيف ننقلها ونوزعها بأمان وكفاءة لحد ما تصل للمستخدم؟

والطاقة المتجددة، زي الطاقة الشمسية، برضو بتفتح مجال مهم داخل عالم الطاقة.

---

🤖 2. هندسة التحكم Control

هنا الموضوع بيتغير شوية.

بدل ما تسأل فقط «كيف أشغّل الآلة؟»
بتبدأ تسأل:

> «كيف أخلي الآلة تعرف وتتحكم في نفسها بالطريقة المطلوبة؟»

هندسة التحكم مرتبطة بالأنظمة الآلية، أجهزة القياس، العمليات الصناعية، والأنظمة التي تحتاج إلى مراقبة وضبط مستمر.

ولو عندك اهتمام بالبرمجة، الأنظمة الذكية والروبوتات، ممكن تلقى في التحكم جانباً قريباً من اهتماماتك.

لكن مهم تعرف:

التحكم ما هو «برمجة وبس».
هو خليط من رياضيات، أنظمة، كهرباء، قياس وتحليل وتحكم.

---

📡 3. هندسة الاتصالات Telecommunication

كيف صوتك بيوصل لزول في مدينة تانية؟

كيف رسالة بتطلع من موبايلك وتصل في ثواني؟

كيف البيانات بتتحرك عبر الشبكات؟

هنا بنخش عالم الاتصالات.

بتتعامل مع نقل المعلومات والإشارات عبر أنظمة وشبكات مختلفة، والموضوع يمتد لشبكات الاتصالات، الإشارات، الاتصالات اللاسلكية وغيرها.

يعني لو دايماً كنت مستغرب:

> «المعلومة دي مشت كيف من هنا لحد هناك؟»

فأنت بدأت تسأل السؤال الصح. 📡

---

💻 4. هندسة الإلكترونيات والحاسوب

وهنا بنقرب أكتر للأجهزة والأنظمة الإلكترونية البتتعامل معاها كل يوم.

المكونات الإلكترونية، الدوائر، الأنظمة الرقمية، الأجهزة الذكية والأنظمة المضمنة... كلها بتدخل في هذا العالم.

والحاسوب كمان بيفتح مساحة كبيرة للتقاطع بين الهندسة والإلكترونيات والبرمجة.

لكن برضو:

ما لازم تكون مبرمج محترف عشان تدخل الإلكترونيات.

الأهم إنك تكون مستعد تفهم كيف النظام مبني من جوّا وكيف مكوناته بتتفاعل مع بعض.

---

طيب... هل الهندسة الكهربائية كلها رياضيات وفيزياء؟ 😅

خلينا نكون واضحين:

أيوة، حتلقى رياضيات وفيزياء.

وحتواجه مسائل وحسابات وتحليل، وممكن في البداية تقول:

> «ياخ أنا داخل كهرباء عشان شنو؟» 😂

لكن التخصص ما عبارة عن حفظ قوانين ساي.

الفكرة إنك تستخدم الرياضيات والفيزياء عشان تفهم نظام حقيقي وتحل مشكلة حقيقية.

وكل ما تقدمت، بتبدأ تربط الحاجات البتدرسها بالحاجات الموجودة حولك.

---

طيب... هل لازم أعرف أنا داير أي فرع من البداية؟

ما بالضرورة.

أنت أصلاً داخل عشان تتعرف على المجال، ومع الدراسة بتبدأ تكتشف الفرق بين العوالم دي، وميولك ممكن تتضح أكتر.

المهم قبل ما تختار، ما تسأل:

«الكهرباء دي مستقبلها شنو؟» وبس.

اسأل نفسك:

هل بستمتع بفهم كيف الأنظمة بتشتغل؟
هل عندي استعداد للرياضيات والتحليل؟
هل بحب الأجهزة والتكنولوجيا؟
هل بتشدني الطاقة والشبكات؟ ولا الأنظمة والتحكم؟ ولا الاتصالات؟ ولا الإلكترونيات؟

لأن الهندسة الكهربائية ما طريق واحد.

هي عدة طرق... وإنت محتاج تعرف كل طريق قبل ما تختار تمشي فيهو. 🧭⚡

🧭 قبل ما تختار... اعرف.

في حنواصل نعرّفك بتخصصات كلية الهندسة والعمارة بالجامعة التكنولوجية، ونقرب ليك الصورة بعيداً عن الكلام العام والمعلومات المعلبة.

تابع الحملة، لأن اختيار التخصص ما مفروض يكون «أمشي مع الجماعة»...
أعرف الطريق أول، وبعدها قرر وين عايز تمشي.





🏛️ اعرف مستقبلك | هندسة العمارةبتحب الرسم والتصميم؟ بتحب تتخيل المكان قبل ما يتبني؟ ودايمًا بتسأل نفسك: «المبنى ده كان م...
19/09/2026

🏛️ اعرف مستقبلك | هندسة العمارة

بتحب الرسم والتصميم؟ بتحب تتخيل المكان قبل ما يتبني؟ ودايمًا بتسأل نفسك: «المبنى ده كان ممكن يكون أجمل لو اتصمم بطريقة مختلفة؟»

طيب... خلينا نعرفك على هندسة العمارة بصورة مختلفة.

أولاً: هندسة العمارة دي شنو؟

ببساطة، هي المجال البجمع بين التصميم، الإبداع، الجانب الهندسي، واحتياجات الإنسان عشان يحوّل الفكرة لمساحة حقيقية ممكن الناس تستخدمها وتعيش فيها.

يعني المعماري ما بس برسم مبنى شكله جميل.

هو بفكر:

المكان ده معمول لمنو؟
كيف الناس حتتحرك جواه؟
كيف نستغل المساحات بصورة أفضل؟
كيف يدخل الضوء والهواء؟
كيف يكون المبنى مناسب لوظيفتو؟
وكيف نخلي التصميم جميل وعملي في نفس الوقت؟

طيب... بدرس شنو في العمارة؟

الدراسة في هندسة العمارة ما عبارة عن رسم بس 😂.

حنكون قريبين من عالم التصميم والتخطيط، ونتعامل مع المساحات، المباني، البيئة المحيطة، المواد، وطريقة استخدام الإنسان للمكان، بجانب الجوانب الهندسية والتقنية المرتبطة بالمبنى.

يعني حتتعلم كيف تنتقل من:

فكرة في راسك
اسكتش
تصميم
مخططات
مشروع قابل للتنفيذ.

وهل العمارة محتاجة تكون رسّام محترف؟

لا.

الرسم بيساعدك طبعاً، لكن الأهم هو إنك تكون عندك قدرة على الملاحظة، الخيال، التفكير المكاني، وحب للتصميم وحل المشكلات.

لأن العمارة ما سؤالها:
«أرسم شنو؟» بس.

السؤال الأهم:
«أصمم المكان ده كيف عشان يخدم الناس بصورة أفضل؟»

وبعد التخرج... بشتغل شنو؟

العمارة ما بتنتهي عند شهادة التخرج.
المجال ممكن يفتح ليك أبواب مرتبطة بـ التصميم المعماري، التخطيط، تطوير المشاريع، والتعامل مع مختلف مراحل تصميم المباني والمشروعات، حسب مسارك وخبرتك.

طيب... خلينا نتكلم عن العمارة بواقعية.

العمارة ما كلها إلهام ورسم ومباني جميلة.

ممكن يكون عندك تصميم عاجبك جداً، لكن تلقى المساحة محدودة، أو الميزانية ما بتسمح، أو الموقع عندو مشاكل، أو متطلبات المشروع بتجبرك تغيّر فكرتك.

وممكن ترسم الفكرة الليلة ، وترجع تعدّلها بكرة، وبعد بكرة تلقى نفسك شلت جزء كبير منها وبدأت من جديد. 😅

لأن المعماري في النهاية ما بصمم لنفسه.
هو بيحاول يوازن بين الجمال، الوظيفة، المساحة، البيئة، التكلفة، واحتياجات الناس، ويطلع بحل ممكن يتحول من رسمة على الورق إلى مبنى حقيقي.

وهنا بالضبط بتعرف إن العمارة ما مجرد:
«أنا عندي فكرة حلوة.»
بل:
«كيف أخلي الفكرة دي تشتغل في الواقع؟»

العمارة أكتر من مجرد تخصص.

هي الطريقة البتحول الخيال لإبداع.

اذا عندك اي سؤال عن هندسة العمارة اسأل في التعليقات و معماري التكنولوجية ح يدوك الإجابة❤️

في 🧭 حنواصل تعريفك بتخصصات كلية الهندسة والعمارة بالجامعة التكنولوجية، ونحاول نجاوب على الأسئلة البتدور في بالك قبل اختيار تخصصك.

تابع الحملة... لأن اختيارك لمستقبلك ما مفروض يبدأ من كلام الناس، مفروض يبدأ من إنك تعرف الطريق.





🧭 اعرف مستقبلك | الجامعة التكنولوجيةبعد الثانوي، واحد من أصعب الأسئلة الممكن تواجهك هو:«أدخل شنو؟ وأختار التخصص كيف؟»وعش...
19/09/2026

🧭 اعرف مستقبلك | الجامعة التكنولوجية

بعد الثانوي، واحد من أصعب الأسئلة الممكن تواجهك هو:

«أدخل شنو؟ وأختار التخصص كيف؟»

وعشان القرار ده ما يكون مجرد تخمين، أو اختيار عشان صاحبك داخل نفس التخصص، أو عشان الناس قالت ليك «ده تخصص كويس»… أطلقنا في الجمعية الهندسية – الجامعة التكنولوجية حملة:



الحملة دي جاية عشان نقرّب ليك الصورة، ونعرّفك بصورة بسيطة وواضحة بتخصصات كلية الهندسة والعمارة بالجامعة التكنولوجية، وتساعدك تفهم كل تخصص قبل ما تختار طريقك.

حنمشي معاك في التخصصات الثلاثة:

🏛️ هندسة العمارة
🏗️ الهندسة المدنية
⚡ الهندسة الكهربائية بفروعها: القدرة، التحكم، الاتصالات، والإلكترونيات.

حنحاول نجاوب على الأسئلة البتدور في راسك:

بدرس شنو؟
طبيعة التخصص شنو؟
مجالاتو شنو؟
شنو الفرق بينو وبين التخصصات القريبة منو؟
ومنو البناسبو التخصص ده؟

ما جايين نقول ليك «اختار التخصص الفلاني»، لأن القرار في النهاية قرارك إنت.

لكن قبل ما تختار مستقبلك…

أعرفو أول.
شوف الطرق القدامك، افهمهم، وبعدها اختار الطريق البشبهك.

اذا عندك صحبك او قريبك او حتى ابنك و بنتك و محتار يختار ياتو تخصص؟؟
اعمل ليه #تاق او شارك المنشور دا معاه و تابعو المنشورات الجاية😉
من هنا بتبدأ رحلتك. 🧭





الجامعة التكنولوجية.. حكاية 35 سنة من كلية خيرية لحد ما بقت جامعة حكومية ⚙️ناس كتير بتسمع بـ "الجامعة التكنولوجية" وبتفت...
18/09/2026

الجامعة التكنولوجية.. حكاية 35 سنة من كلية خيرية لحد ما بقت جامعة حكومية ⚙️

ناس كتير بتسمع بـ "الجامعة التكنولوجية" وبتفتكرها جامعة جديدة، لكن الحقيقة جذورها عريقة وبادئة من سنة 1991م 🌱

يعني ليها *35 سنة* من العطاء!

1- البداية: كلية الخرطوم للعلوم والتقانة (1991) 🏛️
اتأسست سنة 1991 في الخرطوم - امتداد الدرجة الثالثة، كـ كلية أهلية خيرية.
رؤيتها كانت واضحة من أول يوم: نركز على *الشغل العملي والتطبيقي* ما النظري ساي. بدت بقسمين بس: دراسات تجارية وعلوم حاسوب 💻

2- التوسع والتحول إلى كلية الخرطوم التقنية 📈
مع النجاح الكبير، الكلية كبرت وفتحت برامج الهندسة: مدني، عمارة، وطبعاً الكهرباء بكل فروعها (قدرة، تحكم، اتصالات، إلكترونيات) ⚡️.
في الفترة دي بنت سمعتها بمعامل وورش تقيلة وكادر تدريس مميز، وبقت منارة للتعليم التقني في السودان كلو 🔧

3- لحظة التحول التاريخي: الترفيع إلى جامعة (2018) 🎓
في عام *2018*، يعني قبل *8 سنين* من هسه، المجلس القومي للتعليم العالي أصدر القرار التاريخي بترفيعها من كلية عمرها 27 سنة إلى *جامعة حكومية* رسمية باسم *الجامعة التكنولوجية*.

طيب، ليه رقوها؟ ودا أهم سؤال 🤔

الترقية ما كانت تغيير يافطة ساي، كانت لثلاثة أسباب قوية:

أولاً: استوفت كل الشروط 📚
على مدى 27 سنة قدرت تثبت انها عندها بنية تحتية متكاملة، ولوائح أكاديمية رصينة (آخرها لائحة 2024 المكونة من 8 فصول)، وكادر مؤهل يشيل اسم جامعة.

ثانياً: البلد كانت محتاجة ليها 🇸🇩
السودان كان محتاج جامعة تركز على الجانب *التطبيقي والتقني* عشان تسد الفجوة بين الخريج النظري واحتياجات المصانع وسوق العمل. ودا كان دورنا.

ثالثاً: توطين التعليم التقني 🤝
مع الترفيع، كل الأساتذة والموظفين والعمال بتاعين الكلية اتثبتوا في الخدمة المدنية، عشان الخبرة تستمر والتعليم التقني يبقى حق عام ومجاني.

4- التتويج الجديد: اعتماد مرتبة الشرف (20 أغسطس 2026) 👑
وتتويجاً للمسيرة دي كلها، في يوم *20 أغسطس 2026* المجلس القومي اعتمد لينا *مرتبة الشرف للبكالوريوس التكنولوجي (5 سنوات)*.

يعني شنو؟ 📜
يعني شهادتك بقت *بكالوريوس شرف* معترف بيها جوا وبرا السودان، وتقدر تقدم للماجستير طوالي بدون سنة تأهيلية، وقيمتك في سوق العمل بقت أعلى بكتير.

واليوم، بعد *35 سنة* من البداية و *8 سنين* كجامعة حكومية، بتضم الجامعة:
- كلية الهندسة والعمارة 🏗️
- كلية علوم الحاسوب وتقانة المعلومات 💻
- كلية الدراسات التجارية 💰
- كلية علوم التمريض 🩺
- كلية القانون ⚖️
- كلية الدراسات العليا 🎓
- كلية المختبرات الطبية 🧑‍🔬

من كلية خيرية بدت بقاعتين في امتداد الدرجة الثالثة سنة 91، لي جامعة حكومية بتمنح بكالوريوس تكنولوحي بمرتبة الشرف وبتخرج كمية من المهندسين الخبراء داخل السودان وخارجه ✨





Address

Khartoum

Website

Alerts

Be the first to know and let us send you an email when الجمعية الهندسية - الجامعة التكنولوجية posts news and promotions. Your email address will not be used for any other purpose, and you can unsubscribe at any time.

Shortcuts

Share

Category