20/09/2026
برنامج مقابلة من اللجنة الأكاديمية-رابطة الطب كلية البطانة
في الحلقة الرابعة من برنامج مقابلة واللي بنستضيف فيه طلاب وخريجين جامعتنا عشان نستفيد من تجاربهم وخبراتهم ليذللو لنا بعضاً من مطبات الطريق الطويل ،نستضيف إحدى بنات البطانة الدفعة الأم (الدفعة الخامسة) .
١. عرّفينا بنفسك وبالمشوار
أنا نشوى قسم الله يوسف
نائب أخصائي باطنية -كلية الطب جامعة البطانة
٢.ورينا عن تجربتك في فترة الكلارك والامتياز.. أكتر مواقف أثرت فيك وخلتك الطبيب/ة الانتِ عليه الليلة؟
فترة الكلاركشيب أحلى الفترات الزول بكون فيها قريب للعيان وبحس إنو دكتور خصوصا بعد م خلص الثيوري والسستمز ،مافي موقف بحد ذاته أتذكرو بس البتذكرو إنو الزول كان عندو رغبة يعرف ويتعلم خصوصا نحنا كنا محظوظين بأساتذتنا ودكاترتنا في رفاعة ،الحصاحيصا ،مدني وتفانيهم واخلاصهم وحبهم لعملهم ده العكس فينا الرغبة انو نعرف ونتعلم الاساسيات ونبنى شخصية الدكتور الآمن ،جزاهم الله عنا كل خير
كمان الشيء البفرق بين الناس الرغبة والعزم والإيمان بالشيء الإنت دايرو كل ما كانت عندك رغبة تتعلم كل مافتحت ليك أبواب .
٣.هل خضتِ أي تجارب في مجال البحث العلمي؟ لو عندك، احكي لينا عنها والدروس الاستفدتيها منها.
صراحة م عندي تجربة في مجال البحث العلمي بسبب إلانشغال الفترة الفاتت والحرب والنزوح ،لكن النية موجودة ،وبنصح أي طالب طب يمشي في الموضوع ده خصوصا الابحاث دي بتفتح آفاق كتيرة وبتورينا حاجات كتيرة ممكن نستفيد
منها،خصوصا السودان بجغرافيتو وتنوع الامراض فيه والثقافات ده بيفتح مواضيع للبحوث لاحصر لها.
٤. واجهتِ تمييز أو صعوبة عشان "خريج/ة جامعة البطانة"؟ ولا بالعكس الجامعة فادتك؟
بالرغم من انو كنا اول دفعة في الجامعة فيادوب الناس بدت تعرف انو في جامعة اسمها البطانة ،لكن دايما بجيني إحساس الفخر بإني بنتمي ليها خصوصا انو مؤخرا تم تخريج كم دفعة وأصبحت معروفة .
٥.كيف بتشوفي موضوع الزمالات عموماً؟ ولو رجع بيك الزمن واخترتِ تمتحني زمالة معينة، حتختاري ياتو واحدة وليه؟
الزمالات حاجة مهمة جداً وبتضيف للزول وبتطور معرفتو ،مفروض أي دكتور يكون عندو اقلاها زمالة في مجالو ،انا بحب الزمالات البريطانية شديد من ايام الجامعة كان نفسي امتحن الرويال كولج ،لانو البريطانين ناس متطورين والمعرفة عندهم متطورة ومتجددة
٦.في رأيك، متين أنسب زمن الطالب يبدأ يفكر في التخصص؟
التخصص ده بحس انو الزول ممكن يتجلى ليه من ايام الجامعة لو كان عندو رغبة معينة في راسو ،لكن ده مابيمنع انو الزول مرات بيتخرج وماعارف حيتخصص شنو ،خلال الفترة حقت الجامعة وبعد التخرج والهاوس مان .كل مالزول فكر بدري حيختصر على نفسه زمن وتردد وانتظار.
٧. بتنصحينا كيف نذاكر بطريقة ذكية وفعالة؟ عايزين نبني أساس أكاديمي قوي ما يضرنا قدام، وفي نفس الوقت ما نضيع مستقبلنا.
/م أي مذاكرة بتثمر فعلا المذاكرة الذكية والفعالة هي البتفيد ،ركزو على المحاضرات والكلام البقولو ليكم الدكتور لأنو نتاج خبرة ومرات م بتلقوهو في الكتب ،القروبات والدسكشن بتفيد ،والراوندات مهمة شديد .التطبيق التطبيق للهستوري والاكزامنيشن مهم وده البرسخو ليك.الاستعانة بالله في طلب العلم وإخلاص النية وحدو دي أكبر معين ،مع مغريات الزمن وإنو تختار اللاين ده عشان فيه قروش وده عشان لايف استايل خفيف م ننسى نجدد النية لله وحده .
٨.خلال سنين الدراسة، كيف كنتِ بتقدري توازني بين ضغط القراية وباقي التزاماتك؟ شنو السر في إدارة الزمن؟
الصراحة كنا مفرغين للدراسة م علينا التزامات شديدة ، لكن في نفس الوقت بنشارك الناس افراحهم واتراحهم ونروح عن أنفسنا ولمات الأصحاب خصوصا مفهوم عن ناس الطب انو وقتهم كله قراية وضغط لكن ده م بيمنع انو الإنسان يعيش حياته ومايحصر نفسه في جانب واحد وده بيتأتى بالإدارة الصح للوقت والتنسيق السليم.
٩. الـ OSCE والـ Clinical Exams مرعبة، كيف اتدربتِ عليها وعديتها بثقة؟
أنا واحدة من الناس الكنت بخاف من امتحانات الأورال 🤣لكن مع الممارسة والتطبيق كنا أنا وصحباتي يطراهم الله بالخير بنطبق الاكزامنيشن في بعض بنفس طريقة وزمن الامتحان ونعمل عليه براكتسينغ
كل م طبقتو كل م كسرتو الرهبة دي ،بنصحكم برضو تقرو كتاب bedside technique مفيد شديد بوريك المانوفر والتطبيق الصح للهستوري والاكزامنيشن وGeeky medics ,ماكلاود ,خصوصا الميديا والمصادر في أي مكان وبضغطة زر
١٠. رأيك شنو في نظام "الكيرف"؟ وهل فعلاً بيعمل إحباط للطلاب، ولا ممكن نتعامل معاه بطريقة إيجابية؟
نظام الكيرف فعلا نظام ماعادل وممكن يكون مصدر للإحباط ،بس في نفس الوقت ممكن يكون دافع عشان الزول يطلع أحسن م عندو ويصقل نفسه .بس برضو مايجلد زاتو لو م حصل ،يحاول مرة ومرتين وتلاتة ،العزيمة والإصرار والنية السليمة أساس كل عمل ناجح.
١١.شنو الأخطاء الشائعة البتشوفي الطلبة بقعوا فيها في الكلارك وبتنصحيهم يتجنبوها؟
من الأخطاء انو الزول يستهين بفترة الكلارك ومايجتهد فيها أو يحصر
نفسو بس عشان يطلع من الإمتحان ،بالعكس دي فترة انت بتبني شخصيتك كدكتور من خلال تعاملك المباشر مع العيان ،ماتعرفو المساكات بس عشان تباسو الامتحان ،اعرفو عشان تكونو دكاترة save يثق فيكم .
١٢. كيف قدرتِ توفقي بين الجانب العملي والسريري في الطب، وبين إنك تنمي شخصيتك وحياتك خارج إطار الطب؟
صراحة مع الطب والجري والروتين الزول شوية شوية بلقى نفسو بعد عن هواياتو ،اهتماماتو،بقول ليكم الطب م يأخد كل حياتكم ،لو عندكم أي هواية ،نشاطات بتمارسوها ،اعملوها ،انا كنت بحب النثر والرسم مرات بكتب بروح عن نفسي شوية 😙فلو عندكم أي شيء تاني نموه ماتهملوه.
١٣.هل تنصحي الطلبة يشتغلوا تطوع أو Medical Missions وهم لسه طلبة؟ ليه؟
ايوا كونك تكون فولنتيير ده بخلي عندك روح المشاركة والفريق وده جزء من شخصية الدكتور وكمان ي حبذا لو كنت قائد في فريق ده بقوي شخصيتك وبنمي روح القيادة اللي مفروض تكون عند كل طبيب ،فمالمدكل مششنز مهمة والتيم وورك مهمة .
١٤. لو رجعتِ سنة أولى طب تاني، شنو ٣ حاجات حتعمليها من البداية عشان تكوني أفضل؟
حأحافظ على زمني وأبعد من كل شيء بيسرق الزمن.
وحأعيش حياتي مع المجتمع والناس وأشاركهم
وماحأنسى هواياتي وأنمي نفسي واطورها أكتر.
١٥.في الختام.. رسالتك ونصيحتك الذهبية للدفعات الجاية من جامعتنا؟
نصيحتي انو الطب ده مشوار طويل حتمر بفترات ضغط ،ألم ،فرح ،حزن ،حتلقى ناس بقيفو معاك وحتلقى أهلك وراك ساندنك،م تخيب آمالهم وما تجلد نفسك ،أعمل العليك وشد حيلك ،وطور نفسك ،اخلص النية لله وحده في كل عمل،احترم معلمنك وسنايرك ،م تخجل تسأل وم تخجل لما تغلط حتتعلم .
أنا مؤمنة تماما انو جامعة البطانة ليها شأن عظيم وبكل الفخر انا مبسوطة إني قريت جامعة البطانة بالرغم من كنا اول دفعة ولاقينا من عراقيل لكن الحمد لله ،بتمنى ليكم كل التوفيق وتكونو إضافة لجامعة البطانة
