جامعة البطانة - رابطة طلاب كلية الطب

جامعة البطانة - رابطة طلاب كلية الطب 🔥 رابطة طلاب كلية الطب
هنا الحماس… هنا النشاطات… وهنا صوت الطلاب!
كل فعالياتنا، أخبارنا وتغطياتنا في مكان واحد.
تابعنا وخليك في قلب الحدث!

برنامج مقابلة من اللجنة الأكاديمية-رابطة الطب كلية البطانة في الحلقة الثالثة من برنامج مقابلة واللي بنستضيف فيه طلاب وخر...
23/08/2026

برنامج مقابلة من اللجنة الأكاديمية-رابطة الطب كلية البطانة
في الحلقة الثالثة من برنامج مقابلة واللي بنستضيف فيه
طلاب وخريجين دفعتنا عشان نستفيد من تجاربهم وخبراتهم ليذللو لنا بعضاً من مطبات الطريق الطويل ،نستضيف احدي بناتها التي توجتها البطانة بزي التخريج في وقت ليس ببعيد،لتعود إليها مرة أخرى ليس من أجل الدراسة فيها ولكن من أجل التدريس هذة المرة لتروي لينا حكايتها منذ البداية وحتي هذة اللحظة .

1. عرفينا بيك
أنا براءة الأمين يوسف الماحي، خريجة كلية الطب جامعة البطانة بمعدل امتياز.
حالياً مساعد تدريس في الكلية، وفي آخر فترة الامتياز.

2. رايك في الزمالات؟ ولو ح تمتحن واحدة حتكون ياتو؟
الزمالات مهمة لمستقبل الطبيب.
جهزو ليها من بدري بس بدون ضغط. ركزو في الأساس والعلم، والباقي على ربنا.
أنصحكم ما تخلو الزمالة هدفكم الوحيد. ابدو من بدري بالأساسيات، القراءة والتدريب العملي واللغة.
وكل شي رزق وتوفيق، فاسعو واجتهدو وخلو نيتكم خدمة الناس، وربنا بيسهلها في وقتها.

أنا بفكر في الزمالة البريطانية للطب الباطني لأنو شايفة نفسي في المجال دا وحابة أتخصص فيهو ان شاء الله

3. كيف كانت فترة الكلارك؟
كانت فترة مهمة ربطنا فيها النظري بالعملي واتعلمنا التعامل مع المرضى.
المهم الزول يكون جريء ويسأل، ما تخافو من الغلط كلما تغلط بتتعلم.
امشو المستشفى كتير، ركزو في الراوندات وكلام الدكاترة.

4. كيف كانت فترة الامتياز؟
فترة فيها المسؤولية كبيرة شديد، وفيها تعب، بس استفدنا منها شديد.
اتعلمنا اتخاذ القرار والاعتماد على النفس.
الفترة دي هي البتبني فيها نفسك كطبيب،اخر فرصة تقول فيها ماعارف الحاجة الفلانية وتسأل من كل شي.
واهم حاجة التعامل مع الزملاء والدكاترة الاكبر منك
والتعامل مع المرضى والمرافقين.

5. كيف كنتِ بتنظمي وقتك؟
بجدول يومي بسيط وأهم شي الاستمرارية.
أذاكر كل يوم جزء وأراجع أول بأول. ما أضغط على روحي.
الصلاة بتدي بركة ف الزمن وبتجدد النشاط وبتنظم الزمن.
حرفيا مفروض تكون نمبر ون ف حياتك حافظو عليها جدا وادوها ف اوقاتها بتلقو زمنكم مرتب براهو من غير جدول.

6. كيف اذاكر بطريقة فعالة وابني بيزك قوي؟
افهم قبل تحفظ. اربط المعلومات بحالات عملية.
حل أسئلة كتير وراجع باستمرار.
أهم شي الدعاء وطلب التوفيق من ربنا والقراية في مجموعة وتحاول تشرح المعلومة لغيرك.
خت في بالك حاجة واحدة انو كل معلومة بتفرق في حياة انسان.

7. كيف توفق بين التحصيل العملي وحياتك؟
بالتوازن وتنظيم الوقت.
لازم يكون عندك وقت للأهل والراحة عشان ما يحصل إرهاق.
ممكن تعمل نظام المكافأة لعقلك، ودا نظام اتعملت عليهو أبحاث كتيرة ولقوه فعال جداً:
تخت تارجت معين بوقت معين وتخت عليهو مكافأة "طلعة، هدية لنفسك، تقرأ مجلة أو كتاب،..."

8. كيف تجربة التدريس كمعيدة؟
تجربة مفيدة. بتثبت المعلومات وبتعلمك كيف توصّلها للطلاب.

9. رايك في نظام الكيرف والاحباط؟
عندو إيجابيات في التنافس.
لكن الأفضل الزول يركز على نفسو وما يقارن بغيره.
كل زول عنده ظروفه الخاصة، قارن نفسك مع نفسك سابقاً، حاول طور منها كل مرة بتلقى روحك أحسن زول.
واتذكرو انو التوفيق والرزق بيد ربنا،انتو اجتهدو واعملو العليكم والباقي علي ربنا "وان ليس للإنسان الا ماسعى * وأن سعيه سوف يُرى"

10. نصائح للدفع الوراك ابدو من بدري وما تراكمو. حافظو على علاقتكم مع بعض ومع الدكاترة. وازنو بين القراية وحياتكم الشخصية. الترابط كدفعة أهم شي، الناس تقيف مع بعض في الأكاديميات والاجتماعيات.
وأخيرا أسأل الله أن ينفع بكم العباد والبلاد، ويرفع بكم الامة ويجعلكم أطباء رحمة وبركة، ويكتب لكم التوفيق والسداد في الدنيا والآخرة.



في مكانٍ ما... بدأت المباراة.لا ضجيج.لا جمهور.فقط رقعة، وملك، وخصم يراقب كل حركة.هنا، لا يكفي الحظ.كل حركة قرار.وكل قرار...
21/08/2026

في مكانٍ ما... بدأت المباراة.

لا ضجيج.
لا جمهور.
فقط رقعة، وملك، وخصم يراقب كل حركة.

هنا، لا يكفي الحظ.
كل حركة قرار.
وكل قرار يقرّبك من العرش.

دوري الشطرنج

لطلاب المجمع الطبي

جامعة البطانة

طلاب:
الطب | المختبرات الطبية | التمريض
من جميع الدفعات.

الطريق إلى العرش

خروج المغلوب | Best of 3
المباريات عبر Chess.com

المواعيد

التسجيل
20/8/2026 — 27/8/2026

الجولة الأولى
31/8/2026

المباريات
الاثنين والأربعاء من كل أسبوع

سيتم إعلان تفاصيل ومواعيد المباريات عبر قروب الدوري.

المكان
مرسى فاطمة — المجمع الطبي

للتسجيل والاستفسار
0907874541

قد تدخل البطولة لاعبًا...

لكن واحدًا فقط سيصل إلى النهاية.

والسؤال ليس: من سيلعب؟

بل... من سيبقى؟

رحلة طالب الطب من التسجيل وحتى التخرج.ولأنه المشوار طويل وتفاصيله كتيرة، وخطواته أكتر، كان لِزامًا علينا نشرح كل الخطوا...
19/08/2026

رحلة طالب الطب من التسجيل وحتى التخرج.

ولأنه المشوار طويل وتفاصيله كتيرة، وخطواته أكتر، كان لِزامًا علينا نشرح كل الخطوات لأخوانا الأصغر.

عن طريق فعاليتنا (رحلة طالب الطب) التي كانت من تقديم بعض خريجي جامعة البطانة.

في فعالية مميزة أُقيمت بـ قاعة المرضى، خضنا رحلة بين مراحل الطب المختلفة؛ من بداية البيزك، مرورًا بالـ Clinical والكلارك، وصولًا إلى سنة الامتياز وامتحان الـ Permanent.

ناقشنا تجارب واقعية، ونصائح عملية عن:
📚 كيف تذاكر وتفهم بدل ما تحفظ فقط؟
🏥 كيف تربط بين النظري والتطبيق؟
🧠 كيف تتعامل مع الضغط والارتباك؟
🤝 مهارات التواصل والعمل ضمن الفريق.
⚖️ كيف توازن بين الدراسة وحياتك وتحمي نفسك من الاحتراق؟
👨‍⚕️ وكيف تنتقل من طالب إلى طبيب مسؤول؟

وكانت الفعالية مليئة بالتجارب والقصص والنصائح التي يمكن أن تُحدث فرقًا حقيقيًا في رحلة أي طالب طب.

🎙️ وقدم الفعالية سنايرنا ودكاترتنا خريجي جامعة البطانة:

- د. موسى زين العابدين
- د. منيب صلاح
- د. براءة الأمين
فشكرا لهم على وقتهم وعلى ما قدموه لنا

وفي نهاية كل مرحلة… كانت هناك "الزيتونة" 🌿؛ خلاصة نصيحة وتجربة تستحق أن تُحفظ.

شكرًا لكل من شاركنا هذه الرحلة، ولكل من جعل من تجربته مصدر إلهام لغيره. ❤️

رحلة الطب مستمرة… وكل مرحلة فيها حكاية🩺🎓

🩺 رحلة طالب الطب… مشوار طويل وتفاصيله كتيرة! 🎓من أول خطوة في الجامعة… لحد ما تقف في المستشفى وتسمع كلمة "يا دكتور" لأول ...
16/08/2026

🩺 رحلة طالب الطب… مشوار طويل وتفاصيله كتيرة! 🎓

من أول خطوة في الجامعة… لحد ما تقف في المستشفى وتسمع كلمة "يا دكتور" لأول مرة.

لكن هل نحن فعلًا عارفين نمشي الرحلة دي كيف؟ 👀

📚 من الـBasic للـClinical، ومن الكلارك للامتياز…
حنقف معاكم في أهم محطات رحلة الطب ونتكلم عن:

🔹 كيف توازن بين الفهم والحفظ في سنوات الـBasic؟
🔹 في الـClinical… أركز على شنو؟ وأقرأ كيف؟ وأعتمد على أي مصادر؟
🔹 كيف تتعامل مع الفجوة بين النظري والتطبيق؟
🔹 الضغط، الارتباك، التواصل مع المرضى، والعمل ضمن الفريق.
🔹 كيف تنتقل من طالب → طبيب مسؤول في سنة الامتياز؟
🔹 وامتحان الـPermanent… متين تبدأ؟ وكيف تستعد؟ وماذا بعده؟

🌿 والأهم… "الزيتونة"
في نهاية كل مرحلة، حنطلع ليكم بخلاصة ونصيحة لو عرفتها بدري… ممكن تفرق معاك كتير!

🎙️ وبأسلوب مختلف… حنحكيها ليكم بالقصص والتجارب، حسب ما يسمح به سير الفعالية.

📅 الاثنين 17/8/2026
⏰ 1 ظهرا
📍 القاعة المرضي

✨ رحلة طالب الطب… تعال نعيشها سوا، قبل ما نكتشف الطريق بالطريقة الصعبة!

💙 الترحيب مفتوح بأي إضافة أو مقترح يساعدنا نخلي الرحلة أكثر فائدة.

برنامج مقابلة من اللجنة الأكاديمية.-رابطة كلية الطب جامعة البطانة في الحلقة الثانية من برنامج مقابلة واللي بنستضيف فيه...
14/08/2026

برنامج مقابلة من اللجنة الأكاديمية.-رابطة كلية الطب جامعة البطانة
في الحلقة الثانية من برنامج مقابلة واللي بنستضيف فيه طلاب وخريجين كليتنا عشان نستفيد من تجاربهم وخبراتهم للاستفادة وتقديم التوجيه والإرشاد في الحلقة الثانية نستضيف بت متميزة ولامعة من طلاب الطب جامعة البطانة

١.عرفنا بيك

أنا زينب أسامة النور الشريف طالبة طب في جامعة البطانة، وبجانب الطب مهتمة شديد بالبحث العلمي، الصحة العامة، التدريب وتطوير الشباب. خلال الفترة الفاتت دخلت في مجالات مختلفة، اشتغلت في جمع البيانات والبحوث الميدانية، واشتغلت كـ Research Supervisor وKII Researcher، وكمان عندي تجارب في التدريب والقيادة والعمل الطوعي.
اشتغلت في مبادرات طلابية ومنظمات مختلفة، وكنت في أدوار قيادية، منها رئيسة جمعية طلاب الطب في جامعة البطانة، وكمان اشتغلت في FAMSA وSMSF. الحاجة البحبها في كل التجارب دي إني ما بحب أكون موجودة بس، بحب أتعلم وأضيف حاجة وأخلي بعدي أثر حتى لو بسيط.
وطبعاً أنا لسه طالبة ولسه بتعلم، لكن بحاول أستغل الفترة دي إني أبني نفسي في أكتر من جانب، سواء أكاديمياً أو بحثياً أو في القيادة والتواصل.

٢.رايك شنو في الزمالات ولو داير تمتحن واحدة شنو رتحتكون؟
أنا شايفة الزمالات فرصة كويسة جداً، خصوصاً للطالب البكون داير يبني نفسه من بدري. لأنها بتديك exposure وتجربة مختلفة عن الدراسة العادية، وبتخليك تتعامل مع ناس عندهم خبرات مختلفة وتتعلم منهم.
لكن بالنسبة لي ما شايفة الزمالة مجرد شهادة أضيفها للـCV، الأهم عندي الحاجة البطلع بيها منها فعلياً.
ولو عندي فرصة أختار زمالة، غالباً حأختار زمالة مرتبطة بالبحث العلمي والصحة العامة، لأنو المجالين ديل أنا مهتمة بيهم وعندي فيهم تجارب سابقة، ودايرة أبني فيهم بشكل أقوى وأعمل أبحاث يكون عندها أثر حقيقي على المجتمع.

٣ كيف كنت بتنظم وقتك أثناء الدراسة؟
في البداية الموضوع كان صعب، خصوصاً لما بقيت داخلة في حاجات كتيرة جنب الدراسة. لكن مع الزمن اتعلمت إنو المشكلة ما في كمية الحاجات، المشكلة في تنظيم الأولويات.
كنت بحاول أحدد الحاجة العاجلة والحاجة المهمة، وأقسم وقتي حسب الأولوية. في فترة الامتحانات مثلاً الدراسة بتكون الأولوية الأولى، والحاجات التانية بحاول أقللها أو أوقفها مؤقتاً.
وبرضو ما كنت بعمل جدول مثالي شديد وما بقدر ألتزم بيهو، كنت بعمل خطة واقعية لليوم أو للأسبوع، وأحاول أكون ملتزمة بيها. واتعلمت كمان إني ما أقول "نعم" لكل فرصة، لأنه أحياناً رفض فرصة ما مناسبة في الوقت الحالي بكون أحسن من إنك تقبل كل حاجة وتقصّر في كل الحاجات.

٤..كيف اذاكر بطريقة فعالة بحيث ما اتضرر اكاديمياً أو مستقبلاً واقدر ابنى بيزك قوي لقدام؟
أنا بالنسبة لي المذاكرة الفعالة ما معناها أقعد ساعات طويلة قدام الكتاب، المهم أكون فاهمة أنا بذاكر لي شنو.
بحاول أفهم الـconcept الأول، وبعدها أراجع وأختبر نفسي بدل ما أعتمد على القراءة بس. وبشوف إنو الـactive recall والـspaced repetition مفيدين جداً، خصوصاً في المواد الطبية.
وبرضو ما بحاول أتعلم كل حاجة في نفس الوقت. في الأساسيات، بحاول أبني فهم كويس، لأنو الحاجات البسيطة البنبني عليها اليوم هي البتفرق معانا قدام في الكلينيكال وفي حياتنا كأطباء.
وأهم حاجة بالنسبة لي إني ما أخلي النشاطات والفرص الخارجية تأثر على دراستي. لو حسيت إنو في حاجة بدأت تاخد من وقت الدراسة بصورة كبيرة، برجع أرتب أولوياتي.

٥-هل عندك تجارب في البحث العلمي؟ لو عندك احكي لينا؟
أيوة، عندي تجارب مختلفة في البحث العلمي، ودي من المجالات البقت مهمة بالنسبة لي جداً.
اشتغلت كـ Research Supervisor في مشروع بحث نوعي مع DataQ Research بالتعاون مع Norwegian Refugee Council، وكان دوري الإشراف على فرق العمل الميداني ومتابعة الـKIIs والـFGDs والتأكد من جودة البيانات والالتزام بالـresearch protocols.
وبرضو اشتغلت KII Researcher وTranscriber في مشروع بالتعاون مع Economic Research Forum، واشتغلت Field Data Collector في مشروع مدعوم من UNICEF لتقييم خدمات التغذية في المراكز الصحية بولاية الجزيرة، واستخدمنا فيه KoBo لجمع البيانات.
كمان شاركت في بحث عن تأثير الحرب على التغير المناخي وجمعت أكتر من 100 عينة، وعندي مشاركات في أبحاث منشورة، منها بحث كـAuthor وبحث تاني كـCo-author.
فأنا ما بقول إني وصلت لمرحلة إني باحثة محترفة، لكن عندي exposure كويس جداً، ودايرة أواصل أبني نفسي أكتر في الـmethodology والـdata analysis والـscientific writing.

٦.كيف اوافق بين التحصيل العملي وتنمية حياتي في غير الطب ؟
أنا ما بشوف إنو حياتنا لازم تكون طب وبس. الطب مهم جداً، لكن في النهاية الطبيب بتعامل مع ناس، فمحتاج يكون عنده communication skills، leadership، يعرف يشتغل في فريق ويفهم المجتمع الحواليه.
عشان كدا بحاول أستفيد من الحاجات خارج الطب بطريقة تخدمني كطبيبة مستقبلاً. مثلاً التدريب والقيادة والبحث والعمل المجتمعي كلها حاجات مختلفة، لكن في النهاية لقيت إنها بتصب في الطب والصحة العامة.
المهم عندي التوازن، وما أخلي الحاجات الخارجية تكون على حساب دراستي. بحاول أختار الحاجات البضيف لي فعلاً وما أدخل في كل فرصة لمجرد إنها فرصة.

٧'رايك شنو في نظام الكيرف وأنه بسبب احباط للطلاب. ؟
أنا شايفة إنو الكيرف ممكن يكون عنده جوانب إيجابية لو اتطبق بطريقة عادلة وواضحة، لكن المشكلة بتحصل لما الطالب يحس إنو تقييمه مربوط بأداء الناس التانين أكتر من مجهوده هو.
وده ممكن فعلاً يعمل إحباط، خصوصاً لو الطالب اجتهد وعمل البقدر عليه وفي النهاية لقى نفسو متأثر بحاجة ما عنده سيطرة عليها.
أنا شخصياً شايفة الأفضل يكون في معايير واضحة من البداية، والطالب يعرف هو مطلوب منه شنو وكيف حيتقيم. ولو النظام فيه curve، المفروض يكون الهدف منه تحقيق العدالة بين الدفعات والظروف المختلفة، ما خلق منافسة سلبية بين الطلاب.
وفي النهاية مهم جداً نساعد الطلاب يفهموا إنو الدرجة ما مفروض تكون المقياس الوحيد لقيمتهم أو لقدرتهم كأطباء مستقبلاً.

٨-احكي لينا عن تجربتك في الرابطة والعمل الطوعي ؟
تجربتي في الرابطة والعمل الطوعي عموماً كانت من أكتر التجارب الأثرت في شخصيتي، لأنها كانت بالنسبة لي مساحة اتعلم وأجرب وأتعامل مع ناس مختلفين.
في الرابطة اشتغلت في مكتب العلاقات الخارجية والاجتماعية، وده خلاني أتعلم كيف أتعامل مع الطلاب والجهات المختلفة، وكيف أمثل الجهة البشتغل معاها بصورة كويسة، وأبني علاقات وأتواصل مع الناس حتى لو كانت وجهات نظرنا مختلفة. ومع الوقت دخلت في مجالات تانية زي التدريب، تنظيم الفعاليات، البحث العلمي والعمل مع الفرق.
وبرضو شاركت في تنظيم تدريبات وورش للطلاب، وفي فعاليات ومؤتمرات، واشتغلت مع فرق مختلفة. الحاجات دي علمتني المسؤولية، الالتزام، إدارة الوقت، وكيف أشتغل تحت ضغط، والأهم كيف أكون جزء من فريق وما أكون مركزة على نفسي بس.

أما العمل الطوعي خارج الجامعة، فكان عندي تجارب في القوافل الطبية، التوعية الصحية، وجمع البيانات والعمل الميداني. ودي من أكتر الحاجات خلتني أفهم المجتمع بصورة مختلفة، لأنه لما تمشي للناس في مناطقهم وتسمع منهم وتشوف احتياجاتهم بنفسك، بتفهم إنو أي حاجة بتعملها لازم تكون مرتبطة باحتياج حقيقي.
الأثر بالنسبة لي ما كان بس في الحاجات العملتها، لكن في الحاجات البقت جزء من شخصيتي. بقيت أقدر أتكلم مع ناس مختلفين، أتحمل المسؤولية، أتعامل مع المشاكل بهدوء، وأعرف كيف أحول الفكرة لحاجة عملية.
وبرضو التطوع خلاني أكتشف حاجات أنا ذاتي بحبها، زي التدريب والبحث والقيادة والعمل المجتمعي. ومن تجربة لتجربة بقيت أقدر أدي أكتر، وده خلاني بعد فترة أبدأ أنا ذاتي أخلق فرص وأدرب ناس تانين بدل ما أكون بس مستفيدة من الفرص.
فلو سألتوني شنو أكتر حاجة أخدتها من الرابطة والعمل الطوعي، بقول إنو التجربة دي غيرت نظرتي للـimpact. بقيت ما بس أسأل: "أنا حأستفيد شنو؟"، بقيت أسأل كمان: "أنا ممكن أضيف شنو؟ وممكن أخلي شنو أحسن بعد ما أمشي؟"
وده بالنسبة لي أكبر أثر ممكن يطلع بيهو الزول من العمل الطوعي.

٩-احكي لينا عن تجربتك في ابمسا وكيف قدرت تصنعي منك شخصية معروفة ؟
تجربتي في أبمسا كانت من أهم التجارب البصراحة غيرتني كشخص، وما كانت مجرد منصب أو اسم في الـCV. بدأت مع أبمسا من داخل الجامعة، واشتغلت في أدوار مختلفة، وبعد فترة وصلت لمرحلة إني بقيت President لجمعية طلاب الطب في جامعة البطانة، وكمان اشتغلت مع FAMSA على المستوى الإقليمي ومثلت طلاب السودان وشمال أفريقيا في فعاليات ومؤتمرات مختلفة.
أبمسا فتحت لي فرصة أتعامل مع ناس مختلفين، وأشتغل وسط فرق، وأقود مبادرات، وأنظم تدريبات ومؤتمرات، وأدخل في البحث والعمل المجتمعي. الحاجة دي ساعدتني جداً في بناء شخصيتي، خصوصاً في التواصل، القيادة، وتحمل المسؤولية.
وأعتقد إنو الناس ما عرفوني عشان المناصب ذاتها، لكن عشان كنت بحاول أكون موجودة وأشتغل وأضيف حاجة وين ما أكون. اشتغلت في التدريب، البحث، الصحة العامة، وتنمية الطلاب، وكنت دائماً بحاول أخلق فرص لغيري زي ما كنت دايرة ألقى فرص لنفسي.
وأكتر حاجة أبمسا علمتني ليها إنو القيادة ما معناها تكون إنت في الواجهة طول الوقت، القيادة الحقيقية إنك تخلي الناس الحواليك كمان يكبروا ويطلعوا أحسن منك
فلو سألتوني كيف التجربة صنعت مني شخصية معروفة، بقول إنو الشهرة ما كانت الهدف أصلاً؛ الاستمرارية، الشغل الحقيقي، والعلاقات الكويسة هي البتدي النتيجة دي. والتجربة خلتني أؤمن إنو حتى كطالبة طب من السودان، ممكن يكون عندي صوت وتأثير على مستوى أكبر من جامعتي وبلدي.

تجربتي في FAMSA كانت من التجارب البدت تخليني أطلع من نطاق الجامعة وأتعامل مع ناس من دول وثقافات مختلفة.
بدأت بأدوار مختلفة، ومع الوقت وصلت لمرحلة Regional Coordinator of Northern Africa، وكنت بساهم في تنظيم وتنفيذ مبادرات وورش ومؤتمرات مرتبطة بالصحة والقيادة والتغير المناخي والتطوير المهني.
أكتر حاجة اتعلمتها هناك إنو الظهور براهو ما بصنع شخصية معروفة. الناس بتعرفك لما تكون عندك حاجة بتقدمها باستمرار، وتكون ملتزم، وتتعامل كويس مع الناس.
أنا ما كنت هدفي أبقى معروفة، كنت مركزة إني أشتغل كويس وأكون مفيدة، وأعتقد إنو الاستمرارية والمسؤولية والناس البتشتغل معاهم هي البتخلي اسمك يتعرف.
وبرضو التجربة علمتني إنو حتى لو أنا طالبة من السودان، ممكن صوتي وتجربتي تكون موجودة في مساحة إقليمية ودولية، وده اداني ثقة كبيرة جداً.

١٠.نصائح للدفع الوراك؟
أول حاجة ما تستعجلوا. كل زول عنده وقته، وما تقارنوا بدايتكم بمنتصف مشوار زول تاني.
ركزوا على الأساس الأكاديمي، لأنه مهما عملنا حاجات برا الطب، الأساس الطبي لازم يكون قوي.
وفي نفس الوقت ما تخافوا تجربوا حاجات جديدة: بحث، تدريب، تطوع، مؤتمرات، leadership، أي حاجة بتحسوا إنها ممكن تطوركم.
وبرضو ما تجمعوا شهادات ساكت. اختاروا فرص تتعلموا منها حاجة حقيقية وتقدروا تستخدموها بعدين.
وأهم حاجة: لو جاتكم فرصة وما حاسين إنكم جاهزين 100%، ما تخلو الخوف يمنعكم. اتقدموا واتعلموا في الطريق. لكن برضو اعرفوا حدودكم، وما تحملوا نفسكم فوق طاقتكم.
وأخيراً، خلوكم ناس عندكم قيمة للناس الحواليكم. في النهاية الـCV ممكن يفتح ليك الباب، لكن شخصيتك، أخلاقك، وطريقة تعاملك مع الناس هي البتخلي الناس تفتكرَك.

برنامج مقابلة من اللجنة الأكاديمية-رابطة طلاب كلية الطب 🦆🔥في الحلقة الأولى من برنامج مقابلة واللي بنستضيف فيه طلاب وخريج...
07/08/2026

برنامج مقابلة من اللجنة الأكاديمية-رابطة طلاب كلية الطب 🦆🔥

في الحلقة الأولى من برنامج مقابلة واللي بنستضيف فيه طلاب وخريجين كليتنا عشان نستفيد من تجاربهم وخبراتهم للاستفادة وتقديم التوجيه والارشاد وفي الحلقة الأولى نستضيف إحدى ركائز اللجنة الأكاديمية في الرابطة🐌🔥🔥

١.عرفنا بيك:

أسماء محمدنور عباس الدفعة الحداشر (الدفعة المختفية)
٢.رايك شنو في الزمالات ولو داير تمتحن واحدة شنو حتكون

عموماً الزمالات بتيح ليك فرص كتيرة لقدام ،اما من وجهه نظري بعاين ليها كوسيلة لتعزيز جانبك الأكاديمي،وبتوسع مدي تفكيرك بحيث انك ح تعرف تشخيص حالات مهما كانت أعراضها ما واضحة وضبابية،اذا امتحنت واحدة ح اختار الأمريكية لأنها ح توصلني لهدفي القلت مسبقاً.

٣.كيف بتنظم وقتك أثناء الدراسة؟

علي حسب الكورس اذا مهم او لا .والزنقة في بعض الكورسات بتكون اسلوب حياة🤣 نجي للكورسات الكبيرة والمهمة كنت بقرأ اول بأول (أول بأول هنا ما ضروري شيتات) في بعض الكورسات تحتاج تكون بومة (نشط ليلياً) وبعضها عصفور (نشط صباحاً ) فإذا كان كورس ليلي محتاج تركيز وهدؤ وفهم يومي بنعكس بقسم المادة لتوبكات صغيرة ولكل توبك ساعتين او اكتر علي حسب مدي استيعابك ،وممكن يكون اكتر من توبك علي حسب الكورس قدر شنو ،الكورسات. الصباحية المحتاحة حفظ وعتاله نفس النمط بس بالصباح.

٤.كيف اذاكر بطريقة فعالة
بحيث ما اتضرر اكاديمياً أو مستقبلاً واقدر ابنى بيزك قوي لقدام؟

ما عندي طريقة بحيث اطلق عليها فعالة ،لكن في بعض الطرق حسيت مستواي زاد ،الفترة ديك كان اعتمدت علي الفيدوهات بحيث اقرا بعمق. واشوف التوبك من المرجع وبعدها ارجع للشيت والخص النقاط المهمة فيما بعد واحل امتحانات كتيرة ،ممكن تستغل فترة الاجازات في تقوية البيزك ،أو كل مرة تقرا توبك تراجع الفاتت أثناء الفترة الدراسية.

٥.كيف اوافق بين التحصيل العملي وتنمية حياتي في غير الطب؟

الموضوع صعب شوية،لكن أفضل حل اعامل الطب كجزء ما ككل من حياتي ، وبعدين الميديا إتاحت لأي علم انه يكون في متناول اليد اشوف الشي العايزة اطور نفسي فيه واحضر شيشناات سوا في التلغرام او اي موقع تواصل تاني واخصص ليه ساعة او اتنين في اليوم او الاسبوع علي حسب مدي احتياجك وقدرة توافقك.

٦.سر حبك للشرح للبرالمة شنو وما بضيع زمن قرايتك الشخصية؟

ما شرح للبرالمة خاصة ،بحب الشرح عموماً عندي مهارة في توصيل المعلومة بحس كدة ، بعدين من نفث كربة عن أخيه نفث الله عنه كربة من كرب يوم القيامة ،وطالما بتقدر تقدم فائدة لاي زول ما تبخل عليه بعلم فبحس دا أقل واجب ممكن اعمله تجاه اي شخص مستصعب عليه توبك وانا فاهمة بصورة كويسة ،ودي حاجة مفيدة لي انا برضو معلوماتي ح تثبت وح تزيد بإذن الله تعالي من تبادل المعلومات الح يحصل أثناء الشرح ، ما بضيع من قرايتي الشخصية لاني بقدر اوفق بين الأمرين بحيث ما اتضرر .

٧.كيف كانت تجربتك في الرابطة؟

الربطة هي واحدة من الاشياء البتصقل شخصيتك طوعاً او كرهاً،وبتكتشف حاجات جديدة فيك ،أو بتنمي حاجات انت عندك،اكتر حاجة فخورة بيها اني شاركت في كتابة القليل من صفحات كتاب المايكرو وكتابة بعض البوستات التعرفية التي اتمني ان تفيد بعض الاشخاص ،واتعرفت علي شخصياتها كويسة وذات تأثير 🌸

٨.رايك شنو في نظام الكيرف وأنه بسبب احباط للطلاب؟

نظام الكيرف ظالم شديد في كلتا حالته اذا كنت شغال ممكن تقديرك يقل وتتدخل في حالة دبرس ،واذا ما اشتغل بتتفاجا بتقدير اعلي وممكن يدخل الزول انو المادة دي ما محتاجة يرجع ليها تاني عشان تقديرها حلو وكدة حالة تضليل ذاتي كدة .

٩.نصائح للدفع الوراك

-ما تقروا قراية تجارية للامتحان بس ، فتشوا مراجع احضروا فيديوهات عشان تثبتوا المعلومة لقدام لأنها مبنية عليها حياة او موت بني آدم،ودي ذنوب علي اكتافك وممكن تدخل بيها النار لتقصيرك دا .
-ناقشوا اي توبك مع بعض، في مجموعات عشان تستفيدوا اكتر .
-استمتعوا وانتو بتقروا ،استمتعوا وانتو بتقروا ،وحلو امتحانات كتيرة ✨️.

بيئة آمنة.. لطالبة متميزة
04/08/2026

بيئة آمنة.. لطالبة متميزة

28/07/2026

"لو أعيش زول ليهُ قيمة..
أسعد الناس بي وجودي.."

إيماناً مِنا بأهمية صحة المجتمع وضرورة تضافر الجهود الأهلية مع جهود مُقدمي الخدمات الصحية، وفاءً وعرفاناً لأهالي مدينة رُفاعة، وتحقيقاً لواحدٍ من أهم أركان كلية الطب جامعة البطانة -ألا وهو خدمة مُجتمع هذا الصرح العظيم-..
كان إستهداف الحي (20) في برنامج التدريب الميداني للدفعة الثانية عشر، حيث كانت أياماً مليئة بالعطاء، والتعلم، والعمل بروح الفريق.
نسأل الله أن يجعل ما بُذل من جهدٍ وعمل خيراً لأُمتنا وأن يُبارك في علمنا وعملنا، ويجعل أثرنا طيبًا أينما حللنا.
إليكم جانباً من هذا العمل العظيم..

#رفاعة
#البطانة


بقلوبٍ مؤمنة بقضاء الله وقدره، تنعى رابطة طلاب كلية الطب – جامعة البطانة المغفور له بإذن الله تعالى الأستاذ المشارك الدك...
25/07/2026

بقلوبٍ مؤمنة بقضاء الله وقدره، تنعى رابطة طلاب كلية الطب – جامعة البطانة المغفور له بإذن الله تعالى الأستاذ المشارك الدكتور عبدالمنعم محمد المقبول، رئيس قسم الطفيليات بكلية علوم المختبرات الطبية – جامعة البطانة، الذي انتقل إلى جوار ربه.
نسأل الله العلي القدير أن يتغمده بواسع رحمته، وأن يغفر له، ويكرم نزله، ويوسع مدخله، ويجعل الفردوس الأعلى مثواه، وأن يلهم أهله وذويه وزملاءه وطلابه الصبر والسلوان.
إنا لله وإنا إليه راجعون.
رابطة طلاب كلية الطب – جامعة البطانة

وعلى سبيل السعادة... ولأن الجمال دائماً يبدأ من عيونكم. 🌧️🤍من تحت سماء المجمع – جامعة البطانة، ورونا أجمل لقطة وثقتوا بي...
23/07/2026

وعلى سبيل السعادة... ولأن الجمال دائماً يبدأ من عيونكم. 🌧️🤍

من تحت سماء المجمع – جامعة البطانة، ورونا أجمل لقطة وثقتوا بيها جمال اليوم والمطر. 📸
شاركونا صوركم في التعليقات، وخلو جمال الكلية يتشاف بعيون أصحابها♥️.

Address

Wad Madani

Website

Alerts

Be the first to know and let us send you an email when جامعة البطانة - رابطة طلاب كلية الطب posts news and promotions. Your email address will not be used for any other purpose, and you can unsubscribe at any time.

Shortcuts

Share

Category