12/10/2025
"CALANKAYAGOW CAWAALE"
12kii Oktootobar 1954 waa maalintii ugu horreysay ee calanka Soomaaliyeed ifka lagu arkay...waa taariikh lama illaawaan...waa sumadda qaranimada dadkeenna iyo dalkeenna.
Gobanimada iyo madaxbannaanida aan haysanno muwaadiniin rag iyo dumar ah ayaa dhaliyey oo naf iyo maal u huray. Ilaahayow jannadaada firdowsa ka waraabi. Sidoo kale madaxdii soo daadihisay dowladnimada ilaa kuwa maanta u taagan waxaan u baryeynaa adduunyo iyo aakhiro taam ah iyo ciso iyo sharaf. Calanka, xuduudaha dhulka, cirka iyo badda dalkeenna hooyo iyo khayraadkiisa kala duwan, dadkeenna iyo Diinta Islaamku waxay ilaalin iyo difaac ka rabaan jiilasha maanta jooga iyo kuwa mustaqbalka gaar ahaan dhallinyarada.
Maanta waxaan xusaynaa sannadguurada 71aad ee ka soo wareegatay maalinta calankeenna buluugga ah oo xiddigta cad ee shanta geesood leh ay dhexda uga taal. Qiimaha iyo karaamada qaraninada waxaa lagu ilaalin karaa midnimo, isku duubni, waddaninimo iyo walaaltinimo daacad ah.
Soomaaliyeey toos...Axyaa Waddanii. Munaasabaddatan awgeed, waxaan hambalyo iyo bogaadin u dirayaa dhammaan muwaadiniinta Soomaaliyeed meel kasta oo ay joogaan.
