29/03/2026
اليوم بدنا نحكي عن المسابقة البرمجية، أقوى حدث برمجي على مستوى سوريا و أحد اهم و أقوى التجارب اللي ممكن تعيشا بعالم البرمجة شو هي المسابقة وليش لازم تهتم فيها؟
المسابقة البرمجية (ICPC) هي مسابقة عالمية بحل مسائل خوارزميات ومنطق، وبتعتمد على التفكير السريع والعمل الجماعي.
نظامها عبارة عن فريق من 3 أشخاص، عندكم كمبيوتر واحد و عدد من المسائل (10 - 15) مسألة ووقت محدد (5 ساعات)
الهدف أنو تحلو أكبر عدد ممكن من المسائل خلال الوقت المحدد
مسائل المسابقة بتختلف تماما عن مسائل الجامعة، ما فيها حفظ و تبصيم… كل مسألة عبارة عن تحدي جديد بدها تفكير وتحليل منك لتوصل للحل
طيب كيف نظام التأهيل؟
الموضوع بيبدأ محلي وبعدين بتتدرج للمستويات الأعلى:
بداية المشاركة بتكون على مستوى الجامعة
بعدين الفرق المتأهلة من الجامعات بتتنافس على مستوى سوريا
الفرق المتأهلة بالمسابقة السورية بتشارك على مستوى الوطن العربي وأفريقيا
و بالأخير التأهل بكون للنهائيات العالمية على مستوى العالم
والحلو بالموضوع إنو في كتير فرق من جامعة اللاذقية قدرت تتأهل لمراحل متقدمة، و توصل للنهائيات العالمية وتحقق نتائج ممتازة
يعني الموضوع مو مستحيل أبداً… بالعكس، الطريق مفتوح لأي شخص حابب يتعلم
شو الفائدة من المشاركة؟
بتطوّر مهاراتك بحل المشاكل (Problem Solving) بشكل قوي جداً
بتتعلم خوارزميات وهياكل بيانات بشكل عملي
بتتحسن سرعة التفكير واتخاذ القرار تحت الضغط
بتتعلم الشغل ضمن فريق بطريقة احترافية
وبالنسبة لسوق العمل، المسابقة بتفتحلك أبواب لفرص عمل ممتازة مع أكبر الشركات البرمجية، لأنك من خلالها بتثبت إنك قوي بحل المشاكل والتفكير المنطقي—وهي بالضبط المهارات اللي الشركات بتدور عليها و بتميزك عن الشخص العادي المتعلم برمجة
شركات كتير بتعتمد أسئلة شبيهة بمسائل المسابقة بمقابلات العمل!
فالمسابقة فعلياً بتجهّزك للمقابلات التقنية، وبتعطيك نقطة قوة كبيرة على أي CV
في معسكر تدريبي خاص بالمسابقة رح ينعمل في كلية الهندسة المعلوماتية – جامعة اللاذقية
سواء كنت مبتدئ أو عندك خبرة، المعسكر فرصة ممتازة لتبدأ صح أو تطور مستواك.
لا تقول "لسا بكير" أو "مو مستواي"
كل حدا بلش من الصفر… والفرق الوحيد هو مين قرر يحاول
إذا عندك طموح تتطور فعلاً بالبرمجة، هاي فرصتك
لا تضيعها
المكان: مدرج العلوم التالت
الزمان: الثلاثاء 31/3/2026
الساعة10:30
