جامعة روجآفا-Zanîngeha Rojava

14/05/2026

Komxebata Vejîna Zimanê Kurdî li Rojavayê Kurdistanê
Rêzeçalakiyên Roja Zimanê Kurdî di Roja Duyem de
Di nav atmosfereke tije serbilindî û rûmet de, îro çalakiyên roja duyemîn ên taybet bi Roja Zimanê Kurdî birêve çûn. Bernameya îro bi çalakiyên rengîn bal kişand ser girîngiya zimanê dayikê:
- Helbestvan Salihê Heydo helbesteke taybet bi vê boneyê xwend.
- Komek ji xwendekaran beşdarî çalakiyekê bûn; wan bi pênûsên xwe li ser girîngiya zimanê dayikê û parastina nasnameyê, bi zimanê kurdî hevokên watedar nivîsandin.
- Sê nivîskar û lêkolerên ku bi salan keda wan di warê ziman û wêjeya kurdî de heye hatin xelatkirin (Dr. Luqman Guldivê, Emîna Emer (Keça Kurd) û Munzir Şiyar).
- Di çarçoveya çalakiyan de, hat ragihandin ku amadekirina Asta Yekem a pirtûka hînkirina zimanê kurdî ya ku ji aliyê Beşa Zimanê Kurd û Enstîtuya Zimanan ve dihat meşandin, bi dawî bûye û amade ye.
Di dawiyê de, xwendekaran bi stranên kurdî reng û şahî dan vê rojê û atmosfereke germ ava kirin.

13/05/2026

Bi boneya Roja Zimanê Kurdî, zanîngehê daxuyaniyek da. Daxuyanî ji aliyê endamê rêveberiyê zanîngehê Aram Hesen ve hate xwendin:”Daxuyaniya Zanîngeha Rojava bi Boneya 15’ê Gulanê Roja Zimanê Kurdî
Ji raya giştî û gelê me re,
Îro em 94’emîn salvegera derketina hejmara yekemîn a kovara Hawarê (15’ê Gulana 1932’an) pîroz dikin, ku mîratê mîrê zimanê kurdî Celadet Alî Bedirxan e. Ev roj ji bo gelê kurd ne tenê bîranînek e, di heman demê de roja berxwedana çandî û vîna hebûnê ye.
Zimanê kurdî stûna sereke ya nasnameya me ye. Wekî Zanîngeha Rojava, em di wê baweriyê de ne ku parastin û pêşxistina zimanê kurdî erkekî neteweyî, mirovî û akademîk e. Di vê çarçoveyê de, em girîngiya van xalan ji raya giştî re radigihînin:
- Perwerdeya bi zimanê dayikê mafekî bingehîn û gerdûnî ye. Ji bo ku civakek bikaribe di warê zanistî, felsefî û çandî de pêş bikeve, divê zanistê bi zimanê xwe yê resen hîn bibe. Perwerdeya bi kurdî bingeha afirandina hişmendiyeke azad e û rê li ber asîmîlasyonê digire. Zanîngeha Rojava îro mînaka herî berçav a vê perwerdeyê ye ku zanist û zimanê kurdî gihandiye asteke akademîk.
- Ji bo ku li Sûriyeyeke demokratîk jiyaneke wekhev û hevpar pêkan be, divê mafên hemû pêkhateyan di bin sîwana qanûnî de werin parastin. Lewma em bang dikin ku:
Zimanê kurdî di destûra nû ya Sûriyeyê de wekî zimanekî fermi- niştîmanî were qebûlkirin.
Perwerdeya bi kurdî di her astê de bibe mafekî destûrî û ji aliyê dewletê ve were misogerkirin.
- Em bang li hemû xwendekar, mamoste û rewşenbîran dikin ku zimanê kurdî di her qada jiyanê de bi kar bînin. Divê em zimanê xwe tenê wekî amûreke axaftinê nebînin, lê belê wekî zimanê zanist, huner û dîplomasiyê bi pêş bixin.
Em her tîpa kovara Hawarê wekî ronahiyekê dibînin û di vê rêyê de soza xwe ya ji bo bilindkirina asta zimanê kurdî nû dikin.
Bijî Roja Zimanê Kurdî!
Bijî Berxwedana Çandî û Akademîk!

Zanîngeha Rojava
13 Gulana 2026’an”

13/05/2026

Axaftina Birêz Mezlûm Ebdê di komxebata Vejîna Zimanê Kurdî li Rojavayê Kurdistanê ya ku niha li Zanîngehê tê lidarxistin

13/05/2026

Hinek wêne ji komxebata 15’ê Gulanê ya bi navê "Vejîna Zimanê Kurdî li Rojavayê Kurdistanê" ku niha li zanîngehê bi rê ve diçe.
​Ev komxebat ji sê panelan pêk tê:
- ​Realîteya zimanê kurdî li Rojavayê Kurdistanê.
- ​Vegerandina qedir û rûmeta wêjeya devkî ya kurdan.
- ​Weşangeriya bi kurdî li Rojavayê Kurdistanê.

12/05/2026

12/05/2026

Meclisa Giştî ya Zanîngeha Rojava civîna xwe ya dawiya qonaxa yekem, li dar xist.
Di civînê de raporên fakulte û peymangehan hatin xwendin, kar û xebatên meclisê hate nirxandin.


عقدَ المجلس العام لجامعة روجآفا اجتماعه الختامي للفصل الاول.
وخلال الاجتماع، قرئت التقارير المقدَّمة من الكليات والمعاهد، إضافةً إلى تقييم أعمال ونشاطات المجلس.

12/05/2026

Hin wêne ji komxebata bi navê "Rola bingehîn a jinê di xurtkirina pergala çandiniya organîk de wekî bingeha ewlehiya xwarinê ya domdar" ku ji aliyê M. Celîla Mihemed ve hate pêşkêşkirin

11/05/2026

Di çarçoveya komxebatên heftane de; M Celîla Mihemed semînera bi serenavê: “​Rola bingehîn a jinê di xurtkirina pergala çandiniya organîk de wekî bingeha ewlehiya xwarinê ya domdar” pêşkêş d**e. Li Hola Yekem demjimêr 10:30ê sibehê

10/05/2026

Bi diruşmeya "Zimanê me, Hebûna me, Welatê me" Xwendekar, Mamoste, Rêveber û Karmendên Zanîngeha Rojava ji zanîngehê heta Çerxereya Apê Osman Sebrî meşiyan û li wir daxuyaniyek bi raya giştî re parve kirin, naveroka daxuyaniyê ev bû:
JI BO RAYA GIŞTÎ Û ALIYÊN PEYWENDÎDAR
Ziman ne tenê amûreke ragihandinê, lê belê bîra dîrokî, rûmeta neteweyî û stûna herî qayim a hebûna gelekî ye. Wek Zanîngeha Rojava, em tekez dikin ku perwerdeya bi zimanê dayikê mafekî gerdûnî û pîroz e ku nayê nîqaşkirin; lewma vîn û nasnameya civakê di nav tîp û peyvên zimanê wê de şîn dibe. Ji bo ku şoreşa me ber bi ronahiya zanistê ve gavên ewle biavêje, pêdivî bi perwerdeyekê heye ku bi rih û ramanê kurdî hatibe neqşandin. Di vê çarçoveyê de, divê zimanê kurdî di her destûreke nû ya Sûriyeyê de wekî zimanekî fermî cih bigire û bi parastineke qanûnî were misogerkirin. Paşguhkirina zimanê kurdî yan jî derketina her helwesteke neyînî li dijî wî, tê wateya înkarkirina hebûna gelê kurd û binpêkirina bingehên jiyana hevbeş. Dem hatiye ku ev ziman ji qadên jiyana rojane derbasî qadên fermî, destûrî û navneteweyî bibe û wekî stûna sereke ya perwerde, rêveberî û dadgehan di qanûnên bingehîn de cihê xwe yê mafdar bigire. Parastina zimanê kurdî û misogerkirina statuya wî ya fermî, bersiva herî bi bandor e li dijî polîtîkayên bişaftinê û garantiya herî mezin a jiyaneke demokratîk û hevbeş e. Em careke din radigihînin ku em ê bi dil û can xebatên xwe yên ji bo geşkirin û fermîkirina zimanê kurdî bidomînin da ku bibe zimanê zanyarî, huner û azadiya herdemî.
Bijî Zimanê Kurdî!
Bijî Perwerdeya bi Zimanê Dayikê!
“ZIMANÊ ME, HEBÛNA ME, WELATÊ ME”

Zanîngeha Rojava
10.05.2026

03/05/2026

Pêşkêşkirina Teza Masterê di Beşa Civaknasiyê de
Hin wêne ji pêşkêşkirina teza masterê ya xwendekar Behzad Ehmê, sernavê tezê "Nakokiyên civakî û rola komîtên lihevanînê di pêvajoya çarekirinawan de: Rojava wek mînak".