05/15/2022
「连载，落雨天嘎讪湖」- 自噶立起来嗰棺材板，西宝兴路鬼弄堂
我么是80后，从小就住了南市区。小嗰晨光我就觉着，阿拉外公一直是一嗰蛮好客嗰人。伊奈，有事体么事体就欢喜叫叫关庞友到伊拉屋里厢去吃老酒。我么艾嗰晨光阿小，阿欢喜坐了伊拉旁边听，不过伊拉嘎讪湖嗰晨光老是欢喜讲鬼故事，所以我老小嗰晨光就受到迭种神啊鬼啊嗰么事嗰影响，虽然鬼故事是听了蛮多嗰，不过我自噶一直还是蛮吓搿种么事嗰。
第一只故事讲嗰是自噶立起来嗰棺材板，迭只故事是阿拉姆妈特自阿拉外婆一直讲卑我听嗰，就是了了45年前头，大约莫1965年汪里，艾嗰晨光嗰人，屋里厢有老人到了一定年纪，老人嗰子女侪要帮老年人准备好棺材特自寿衣嗰，就是阿拉外公嗰姆妈艾个晨光大概阿有毛78岁了，个么阿拉外公就特伊准备好了一口棺材，而且还摆了楼下头。迭个晨光阿拉姆妈大概阿只有8岁汪里。有一天夜到，隔壁邻叔突然之间来栲阿拉外公屋里厢嗰门，邻居讲，伊刚刚奚巧下班回来，看到阿拉外公楼下头摆嗰只棺材自噶立起来了伊讲，吓煞忒人了，叫阿拉外公熬稍去奈艾只棺材挪了跑，勿要再摆了下头。忒吓人了！
阿拉外公讲，好嗰，晓得了，过两天就奈伊挪了跑。结果，啥人晓得，到了第3天，阿拉外公嗰姆妈就没了。吓人伐？！
第二只故事讲嗰是西宝兴路鬼弄堂，搿只故事大约摸发生了90年代初，因为阿拉爸爸厂里要分房子，随后，经过多方努力，阿拉爸爸总算从厂里厢争取到了一套了了虹口嗰房子，侬晓得伐，想勿到迭套房子就登了西宝兴路高头（就是靠近公兴桥伊面得）当时嗰晨光伊面得艾有一条臭河浜。阿拉外公特自阿拉阿舅就讲了，伊面得嗰地方其实是一块福地啊，为啥奈？因为一般性来讲，只有有神仙住了伊面得，噶许多鬼侪能卑镇牢。正因为阿拉外公特自阿舅嗰支持，所以阿拉爸爸姆妈就搬过去了。
刚搬过去嗰晨光我只有11岁，不过，迭嗰晨光我阿已经开始懂事体了。反正，刚刚搬过去嗰晨光，一到夜里厢7点，就算打煞忒我，我阿勿会到楼下头去嗰。 因为阿拉屋里住了7楼，又么装啥嗰电梯，楼道里阿么装啥嗰灯，楼旁边就是火葬场，所以楼下头对小朋友嗰我来讲总归有眼吓丝丝。
再来讲阿拉爸爸，伊嗰胆子比起我来就大了叫关。伊从来是勿相信神啊鬼啊嗰么事嗰。而且，伊有只爱好。基本上，每天夜到侪要出去搓麻将，而且一搓就要搓到半夜里12点钟栲过侪回来。
有一天夜上，已经毛1点半，阿拉爷还是么回来，阿拉姆妈就开始急了，伊讲，到底是哪能一桩事体啦？人奈？因为艾嗰晨光阿么电话啥嗰。所以阿拉姆妈只好等。就迭能等啊等，一直等到了毛2点钟栲过。 总算，阿拉爸爸回来了。阿拉姆妈一看，伊头高头哪能侪是汗啦，搿又是哪能桩事体啦？现在好像只有4月份汪里呀，天阿勿算老热。阿拉姆妈就问阿拉爸爸，哪能噶晚侪回来啊，侬到啥地方去啦？阿拉爸爸讲，我真嗰碰着赤佬了！阿拉爸爸又讲，快点卑我吃一杯茶，随后伊就开始讲刚刚发生嗰事体了。
刚刚上半夜大约摸到11点50分汪里，伊麻将阿搓好了，嗰么伊就想要么今朝就抄近路回去算了，所以，伊就准备穿阿拉搿的嗰一条鬼弄堂回来（所谓嗰鬼弄堂阿就是火葬场里厢嗰一条弄堂，迭条弄堂一直就是七搞八绕嗰，人如果走到里厢就会觉着自噶一直了了兜圈子，反正就算是大白天，行人想一眼看到前面嗰路，阿是蛮难嗰。所以，一到夜里厢9点钟以后，基本上正常人是么人会得走迭条弄堂嗰。）
阿拉爸爸讲到迭的又吃了一口茶，再揩了把面，随后又就开始讲了，伊讲，伊刚刚进到鬼弄堂，只走到第2只转弯角子嗰晨光，伊好像看到前头有一嗰穿红衣裳嗰人，而且迭嗰人走得艾蛮快嗰，个么，伊阿没多想就跟了搿人屁股后头走，等过了第2只转弯角子嗰晨光，啥人晓得，伊一看，前头原来一嗰人阿么嗰。搿记，阿拉爸爸冷汗一记头裱出来了，伊熬稍往屋里厢方向走。怪了，搿嗰晨光更加妖，要晓得，搿只弄堂平常晨光是没啥岔路嗰，一踏括自就只有4只转弯角子，今朝走到搿的哪能就没路好走了聂？伊自噶问自噶。么办法，搿嗰晨光，阿拉爸爸阿只好又回过来走，啥人晓得，往回走嗰晨光又没路了，么办法，伊只好再往回走，伊就迭能样子走阿走，走了大概有半嗰多钟头，奈么伊搿记彻底獃特了，搿到底是哪能事桩体啊？搿嗰晨光，伊头皮阿已经开始发麻了，就像有一万只针登了伊嗰骷榔头高头戳一样嗰！
大概又过了有5分钟汪里，伊稍微歇了一口气，自噶阿冷静下来了搿晨光。伊想要么试试看慢慢叫走，说勿定迭能可以走出去？随后伊就迭能走，走了大概又有毛半个钟头。 搿晨光伊侪反应过来，会不会碰着赤佬啦？如果真嗰是，我迭能走是一生一世阿走勿出去嗰。要么我再吃根个香烟试试看奈？伊马上又点了一根香烟，随后再奈出嗰汗挥忒，继续走！就迭能走阿走，又走了有毛半嗰钟头，还是寻勿到出去嗰路！搿哪能办？
么办法了，伊搿晨光想到老里八早嗰晨光，好像听老人讲过，人如果碰着鬼打墙，出泡水就好了，伊想了想，对，出水！格手，伊就对着前头没路嗰地方开始出水，而且伊艾是边走边出水，搿还勿算，伊出好水又再点了根香烟，之后，伊又来回走了2圈，咦！！搿记走出来了伊讲！！
到底还是阿拉爸爸老卵，平常晨光伊嗰胆子就比一般性人要大。而且伊还有探索精神。伊想，搿到底是哪能桩事体啦，今朝我倒是勿相信了，一定要奈迭桩事体搞清爽。侬肯定猜勿到，侬晓得伐？伊又进去走了一圈，搿趟，伊邪气轻松就走了出来。搿嗰晨光伊侪肯定，今朝夜到伊是真嗰碰到了传说中嗰鬼打墙。要死快了，伊熬稍噼里啪啦往屋里厢奔了。
讲到迭的，阿拉姆妈一听，伊嗰头皮阿开始发麻，伊熬稍挪了一刀草纸就到楼梯口去烧去了。
搿是真嗰事体，而且关于搿只鬼弄堂嗰事体我阿一直听人家讲过。今朝夜到以后奈，阿拉爸爸讲，以后，就算打煞忒伊，伊阿勿会再走搿条鬼弄堂了。
![黎里古镇的缆船石[新民晚报.夜光杯.胡宝顺]https://wap.xinmin.cn/newspaper/xmwb/132146.html?tt=1650947052096](https://img3.glunis.com/327/592/5800746573275928.jpg)
![山阴路的光阴故事[新民晚报.夜光杯]https://wap.xinmin.cn/newspaper/xmwb/131649.html?tt=1650949915835](https://img3.glunis.com/327/771/5800728683277717.jpg)
