16/01/2026
Sirni Dungoo Qabsiisuu Yuunivarsitii Dambi Dollootti Gaggeeffame
Mul’ata ijoo Yuunivarsiitii Dambii Dolloo gara qabatamaa isa dhugaatti kan jijjiiran, Dr Lataa Tasfaayee du'aan addunyaa kanarraa boqochuu isaanii sababeeffachuun sirni dungoo qabsiisuu mooraa Yuunivarsitii Dambi Dolloo keessatti gaggeeffame jira.
Akka lakkoofsa Itiyoophiyaatti bara 2011 irraa eegaluun hamma walakkeessa bara 2017tti pirezedaantii yuunivarsiitii Dambii Dolloo ta’uun tajaajila yeroo turanitti bulchiinsi gaariin akka hojiirra ooluuf nama kutannoon hojjechaa turan, qulqullina barnootaa mirkaneessuu keessatti nuffii tokko malee gumaacha hayyummaa bahachaa kan turan, buufatni Xiyyaaraa Dambii Dolloo taajila addaan kutee ture akka kennuuf gahee leencaa kan bahatan, haawaasni Godina Qellem Wallaggaa fi Godinaalee olla jiran yaala fayyaa gahaa fi si’ataa akka argatuuf sadarkaa hospitaalaa kan guddisan, yuunivarsitichi giddu gala kalaqaa akka ta’uuf nama adda duree turani dha. Dr. Lataan yuunivarsitichitti giddu gala qonna qindaa’aa hundaa’uun hawaasaaf tajaajilli akka kennamu karaa kan saaqani dha. Akkasuma, hanqina odeeffannoo gama miidiyaan jiru furuuf Raadiyoo Hawaasaa Yuunivarsitii Dambii Dolloo FM hundeessuuniiru. Itti dabalataanis, akka biyyaatti yuunivarsitoota raabsaa boba’aa qaban lamaan keessaa Yuunivarsitiin Dambii Dolloo isa tokko akka ta’u taasisaniiru.
Guyyaa har'a gamoowwan, biqiltuuwwan, fi haawaasni mooraa Yuunivarsiitii Dambii Dolloo gadda hamaa keessa seenaanii jiru.
Sadarkaa guddina Yuunivarsitii Dambii Dolloo har’aaf nama jabaa, nama mul’ataa, nama sabaa kan ta’an pirezedaantii Yuunivarsitii Dambii Dolloo duraanii Dr. Lataa Tasfaayeetu du’aan addunyaa kanarraa boqatan.
Hawaasni Yuunivarsitichaas Dr. Lataa du’aan of biraa dhabuusaaf gadi bahee gadda isaa ibsatus, madaa qoricha hin qabne itti ta’eera. Dr. Lataan, pirezedaantii qofaa utuu hin taane yaadaa fi ilaachaan, gochaa fi raawwiidhaan nama nama gargaaruuf uumamani dha.
