31/08/2026
Aziz yurtdoshlar, qadrli hamkasblar, professor-o‘qituvchilar va talabalar!
🇺🇿Barchangizni O‘zbekiston Respublikasi Mustaqilligining 35 yillik qutlug‘ ayyomi bilan chin qalbimdan samimiy muborakbod etaman!
Mustaqillik — bu, avvalo, o‘z taqdirimizni o‘zimiz belgilash, milliy taraqqiyot va bunyodkorlik yo‘lidan dadil borish imkoniyatidir. Bugun yurtimizning barcha jabhalarida, xususan, ta’lim va tibbiyot sohalarida erishilayotgan ulkan natijalar zamirida ana shu istiqlolning beqiyos imkoniyatlari mujassam.
Mustaqillik yillarida O‘zbekiston tibbiyot ta’limi tizimi izchil rivojlanib, zamonaviy bilim va innovatsiyalar uchun keng yo‘l ochildi. O’tgan yillarda Farg‘ona jamoat salomatligi tibbiyot institutida amalga oshirilgan ulkan o‘zgarishlar ham istiqlol bergan imkoniyatlarning amaliy ifodasidir.
2020-yilda institutimizda 2 ta fakultet, 19 ta kafedra va 3 ta bakalavriat yo‘nalishida qariyb 2 ming nafar talaba tahsil olgan bo‘lsa, bugungi k***a 5 ta fakultet, 29 ta kafedra, 9 ta bakalavriat, 11 ta magistratura va 37 ta ordinatura mutaxassisligi bo‘yicha 6 815 nafardan ortiq yoshlar ta’lim olmoqda.
Mustaqillik tufayli ilm-fanga berilayotgan e’tibor natijasida institutimizning ilmiy salohiyati ham yildan-yilga yuksalmoqda. 2020-yilda ilmiy darajaga ega professor-o‘qituvchilarimiz 32 nafar bo‘lgan bo‘lsa, bugunga kelib bu ko‘rsatkich 114 nafarga yetdi. So‘nggi besh yil davomida 15 ta DSc va 100 ga yaqin PhD ilmiy himoyalari amalga oshirildi.
Istiqlol bizga nafaqat bilim olish, balki dunyo ilm-fani bilan tengma-teng hamkorlik qilish imkonini ham berdi. Bugun institutimiz xalqaro reytinglarda munosib o‘rin egallab, xorijiy universitetlar bilan qo‘shma ta’lim dasturlarini amalga oshirmoqda. AQShning USMLE dasturi asosida 3 ming nafarga yaqin talaba tahsil olayotgani, xorijiy talabalar safining kengayib borayotgani — institutimizning xalqaro maydondagi nufuzi tobora ortib borayotganining yorqin dalilidir.
So‘nggi yillarda institutimizda ikki zamonaviy kampusi, ko’p tarmoqli klinikasi barpo etilib, yangi o‘quv binolari, simulyatsion markazlar, ilmiy laboratoriyalar, sport majmualari, anjuman zallari va boshqa zamonaviy infratuzilmalar foydalanishga topshirildi. Bu bunyodkorliklarning barchasi — mustaqil O‘zbekistonning ta’lim va yoshlar kelajagiga qaratayotgan yuksak e’tiborining natijasidir.
Bugun institutimizda tahsil olayotgan yoshlar xalqaro va respublika fan olimpiadalarida, nufuzli tanlovlarda, ilmiy loyihalarda munosib natijalarga erishmoqda. Demak, bizning eng katta yutug‘imiz — bilimli, vatanparvar va kelajakka ishonch bilan intilayotgan yoshlarimizdir.
Aziz yurtdoshlar!
🇺🇿35 yil — bu tariximizning sharafli bir davri, yurtimiz taraqqiyotining muhim bosqichidir. Ushbu qutlug‘ sana barchamizni Vatanimizga bo‘lgan mehrimizni yanada mustahkamlashga, uning ravnaqi va farovonligi yo‘lida fidoyilik bilan mehnat qilishga chorlaydi.
Fursatdan foydalanib, institutimizning barcha professor-o‘qituvchilari, xodimlari, talabalarini va ularning yaqinlarini ulug‘ bayram bilan muborakbod etaman.
Yurtimiz tinch, osmonimiz musaffo, xalqimiz farovon va Mustaqilligimiz abadiy bo‘lsin!
Akmal SIDIKOV
Farg‘ona jamoat salomatligi tibbiyot instituti rektori, professor.
©FJSTI Matbuot xizmati:
