Muxsin Tadjiyevich Xodjiyev

13/05/2026

Guliston davlat universitetida “Sog‘lom hayot uchun 5000 qadam!” yurish marafoni davom etmoqda

Chorshanba — sport va salomatlik kuni!
Yurtimizdagi oliy ta’lim muassasalarida haftaning har chorshanba kuni “Sport kuni” sifatida keng nishonlanib kelinmoqda. Shu munosabat bilan, 2026-yil 13-may kuni Guliston davlat universitetida professor-o‘qituvchilar hamda ishchi-xodimlar ishtirokida “Sog‘lom hayot uchun 5000 qadam!” shiori ostida navbatdagi tonggi yurish marafoni tashkil etildi.

Erta tongdan boshlangan tadbirda universitet jamoasi vakillari ochiq havoda faol harakat qilib, sog‘lom turmush tarzini targ‘ib etish, jismoniy faollikni oshirish hamda kunni yuqori kayfiyat bilan boshlash imkoniga ega bo‘lishdi.

Ishtirokchilar belgilangan masofa bo‘ylab 5000 qadam bosib o‘tib, badanlarini chiniqtirishdi. Shuningdek, universitet sport targ‘ibotchisi va murabbiylari boshchiligida sog‘lomlashtiruvchi badantarbiya mashqlari bajarildi. Tadbirning keyingi qismida futbol hamda stol tennisi bo‘yicha sport o‘yinlari tashkil etilib, jamoa a’zolari o‘zlarining jismoniy tayyorgarliklarini sinovdan o‘tkazishdi.

Barchani sog‘lom hayot sari faol qadam tashlashga chorlaymiz!

13/05/2026

Gulistonda akademik Said Shermuhammedov xotirasiga bag‘ishlangan shaxmat turniri o‘tkazildi

2026-yil 12-may kuni Sirdaryo viloyati “Nuroniy” jamg‘armasi hamda Guliston davlat universiteti Ijtimoiy fanlar kafedrasi tashabbusi bilan falsafa fanlari doktori, O‘zbekiston Respublikasi Fanlar akademiyasi akademigi, uzoq yillar Xalq ta’limi vaziri sifatida samarali faoliyat yuritgan Said Shermuhammedov tavalludining 96 yilligiga bag‘ishlangan shaxmat bo‘yicha xotira turniri tashkil etildi.

Mazkur turnirda faxriy professor-o‘qituvchilar, nuroniylar, ustozlar, ijodkorlar hamda yozuvchilar faol ishtirok etdilar. Musobaqa davomida qatnashchilar o‘zlarining mantiqiy fikrlashi, strategik yondashuvi va sport mahoratini namoyon etdilar.

Qizg‘in va murosasiz kechgan bahslar yakuniga ko‘ra 1-o‘rin — Alisher Nizomov, 2-o‘rin — Abduqayum Qalandarov va 3-o‘rin — Munavvar Pardayevga nasib etdi.

G‘oliblar va faol ishtirokchilar viloyat “Nuroniy” jamg‘armasining esdalik sovg‘alari bilan taqdirlandilar.

29/04/2026

SOG‘LOM HAYOT UCHUN 5000 QADAM!
Guliston davlat universitetida "Chorshanba-sport kuni!" deb e'lon qilingan. Mazkur kun doirasida sog‘lom turmush tarzini keng targ‘ib qilish va universitet jamoasini ommaviy sportga jalb etish maqsadida 29-aprel kuni erta tongda professor-o‘qituvchilar hamda ishchi-xodimlar ishtirokida “Sog‘lom hayot uchun 5000 qadam!” shiori ostida piyoda yurish marafoni, shuningdek "Badantarbiya" mashqlari o‘tkazildi.

Nega aynan 5000 qadam?
Jahon sog‘liqni saqlash tashkiloti (JSST) ma’lumotlariga ko‘ra, ortiqcha vazn va semizlik global muammoga aylanib bormoqda. Uning oldini olishning eng samarali yo‘li – faol harakat va sog‘lom ovqatlanish! Har kuni kamida 5000-10000 qadam yurish yurak-qon tomir kasalliklarining oldini olishga, immunitetni mustahkamlashga va umumiy hayot sifatini oshirishga xizmat qiladi.

Marafon ishtirokchilari nafaqat sport bilan shug‘ullanishdi, balki sog‘lom ovqatlanish, muntazam jismoniy mashqlar va stressni boshqarish bo‘yicha muhim tavsiyalar olishdi. Tadbirning ijobiy natijalari inobatga olinib, endilikda universitetda haftaning har chorshanba kuni “Sog‘lom hayot uchun 5000 qadam!” kuni etib belgilandi!

Sog‘lom tanada – sog‘lom tafakkur!
Universitet jamoasini muntazam harakat qilish va sog‘lom hayot tarzini shakllantirishga chorlaymiz!

16/04/2026

Xorijiy talabalar bilan ochiq muloqot: muammolar va takliflar yechim topmoqda
2026-yil 16-aprel kuni “Payshanba – yoshlar kuni” doirasida navbatdagi “Rahbar va yoshlar uchrashuvi” bo‘lib o‘tdi. Unda Guliston davlat universiteti rektori M.Xodjiev xorijiy talabalar bilan ochiq va samimiy muloqot o‘tkazdi.
“Rektor va xorijiy talabalar uchrashuvi” shiori ostida tashkil etilgan ushbu tadbirda universitetning turli yo‘nalishlarida tahsil olayotgan qo‘shni davlat fuqarolari bilan bir qatorda Tibbiyot fakultetida o‘qiyotgan Hindistonlik talabalar ham faol ishtirok etdi.
Ochiq muloqot davomida rektor tomonidan talabalar uchun yaratilgan sharoitlar, ta’lim sifati hamda k***alik hayotga oid masalalar muhokama qilindi. Talabalar o‘zlarini qiziqtirgan savollar, mavjud muammolar va takliflarini bevosita rahbariyatga yetkazish imkoniga ega bo‘ldilar. Bildirilgan murojaatlarning aksariyati joyida hal etilib, ayrim masalalar yuzasidan mas’ullarga aniq topshiriqlar berildi.
Uchrashuv yakunida xorijiy talabalar ularga yaratilayotgan e’tibor va g‘amxo‘rlik uchun universitet rahbariyatiga samimiy minnatdorlik bildirdilar. Mazkur uchrashuv ochiqlik, o‘zaro ishonch va hamkorlikni yanada mustahkamlashga xizmat qildi.

06/04/2026

“Yangi Oʻzbekiston talabalari olimpiadasi”ga tantanali start berildi

Bugun 6-aprel kuni musobaqaning ochilish marosimi Oliy taʼlim, fan va innovatsiyalar vazirligi hamda yurtimizdagi barcha oliy taʼlim muassasalarida bir vaqtning o‘zida jonli efir orqali amalga oshirildi.

Guliston davlat universitetida ham mazkur sport sinovlariga puxta tayyorgarlik ko‘rildi. Universitetda yangi barpo etilgan Markaziy o‘yingohda bo'lib o'tgan musobaqaning ochilishiga bag‘ishlangan tadbirda Sirdaryo viloyatidagi Oliy ta’lim muassasalari rahbarlari, sportchi talabalar hamda sport to‘garaklari yetakchilari ishtirok etishidi.

Guliston davlat universiteti rektori M.Xodjiyev Sirdaryo viloyatidagi Oliy ta’lim muassasalaridan 7 ta sport turlari bo‘yicha 8735 nafar ishtirokchi ro‘yxatdan o‘tganligini, viloyatidagi barcha Oliy ta’lim muassasalari mazkur bellashuvlarga tayyorligigni ma’lum qildi.

Ta’kidlanganidek, tadbir doirasida aprel-may oylari oliy taʼlim muassasalarida “Sogʻlomlashtirish va sport” oyligi etib belgilandi. “Yangi Oʻzbekiston talabalari olimpiadasi” sport musobaqalari doirasida 7 ta sport turlari: Basketbol, Voleybol, Gandbol, Yengil atletika, Stol tennis, Suzish hamda Futbol boʻyicha bellashuvlar oʻtkazilishi belgilab olindi.

Ayni paytda Guliston davlat universitetida ushbu sport turlari boʻyicha musobaqa jarayonlari boʻlib oʻtmoqda.

02/04/2026

“Karyera kuni”: bitiruvchilar uchun real imkoniyatlar maydoni

2026-yil 2-aprel kuni Guliston davlat universitetida an’anaga aylangan “Payshanba — yoshlar kuni” doirasida "Rahbar va yoshlar uchrashuvi" navbatdagi “Karyera kuni” mehnat yarmarkasi bo'yicha yuqori saviyada tashkil etildi.

Tadbir yoshlarning bandligini ta’minlash, ularni mehnat bozoriga samarali integratsiya qilish hamda real ish o‘rinlari bilan bog‘lashga qaratilgani bilan ahamiyatli bo‘ldi.

Mazkur uchrashuvda universitet rektori M.Xodjiyev shaxsan ishtirok etib, bitiruvchi talabalar bilan yuzma-yuz va individual suhbatlar o‘tkazdi. Har bir talabaning kelgusidagi aniq rejalari, tanlagan kasbiy yo‘nalishi, ishga joylashish imkoniyatlari atroflicha muhokama qilindi.

Muhim jihat suhbatlar faqat umumiy maslahat bilan cheklanib qolmadi. Har bir bitiruvchi bo‘yicha amaliy yechimlar ishlab chiqildi.

Tadbir davomida 3 tomonlama shartnomalarning real ijrosi chuqur tahlil qilinib, kimlar ishga joylashgani, qaysi yo‘nalishlarda muammo borligi hamda ish beruvchilar bilan aloqalardagi kamchiliklar aniq misollar asosida ko‘rib chiqildi.

Tadbirda viloyatdagi mavjud bo‘sh ish o‘rinlari bo‘yicha keng qamrovli ma’lumotlar taqdim etilib, bitiruvchilarga o‘z yo‘nalishida ish topish va mehnat bozorida raqobatbardosh bo‘lish bo‘yicha yo‘l-yo‘riqlar berildi.

Shuningdek, kelgusida davlat va nodavlat tashkilotlar bilan hamkorlikni kengaytirish, bitiruvchilarni ish bilan ta’minlashda manzilli ishlash va har bir talaba bilan individual yondashuvni kuchaytirish ustuvor vazifa sifatida belgilandi.

“Karyera kuni” nafaqat uchrashuv, balki bitiruvchilar uchun real ishga olib boruvchi amaliy platforma bo‘lib xizmat qilmoqda.

19/03/2026

“Karyera kuni”: bitiruvchilar uchun katta imkoniyatlar maydoni

Guliston davlat universitetida 19-mart kuni “Payshanba – yoshlar kuni” doirasida bitiruvchi talaba-yoshlarning bandligini ta’minlash, ularni munosib ish o‘rinlari bilan ta’minlash hamda mehnat bozoridagi real imkoniyatlar bilan yaqindan tanishtirish maqsadida “Karyera kuni” doirasida Mehnat yarmarkasi tashkil etildi.

Mazkur muhim tadbir universitet rektori M. Xodjiyevning kirish so‘zi bilan ochib berildi. U o‘z nutqida bugungi k***a bitiruvchilarni ish bilan ta’minlash, ularni zamonaviy kasb va amaliy ko‘nikmalarga yo‘naltirish, shuningdek, oliy ta’lim muassasasi, ish beruvchi tashkilotlar va talabalar o‘rtasidagi samarali hamkorlikni kuchaytirish dolzarb vazifa ekanini alohida ta’kidladi.

Tadbirda universitetning turli fakultetlaridan jami yuzlab bitiruvchi talabalar faol ishtirok etdi. Jumladan, Ishlab chiqarish fakultetidan 159 nafar, Raqamli iqtisodiyot fakultetidan 206 nafar hamda Tabiiy fanlar yo‘nalishidan 310 nafar bitiruvchilar qatnashib, o‘z kelajak kasbiy faoliyatlari yuzasidan muhim ma’lumotlarga ega bo‘lishdi.

Yarmarka davomida turli tashkilot va korxonalar vakillari tomonidan mavjud bo‘sh ish o‘rinlari, mehnat sharoitlari va talab etiladigan ko‘nikmalar haqida batafsil ma’lumotlar berildi. Bitiruvchilar o‘zlarini qiziqtirgan savollarga mutaxassislardan aniq va professional javoblar olishdi, bevosita muloqot orqali o‘z imkoniyatlarini baholashdi.

Shuningdek, tadbir jarayonida bitiruvchilarni kelgusida ish bilan ta’minlash maqsadida uch tomonlama shartnomalar (talaba – oliy ta’lim muassasasi – ish beruvchi tashkilot o‘rtasida) tuzish ishlari ham olib borildi. Bu esa yoshlarning bandligini ta’minlashda samarali va amaliy mexanizm sifatida xizmat qilmoqda.

Mazkur “Karyera kuni” va Mehnat yarmarkasi talaba-yoshlar uchun nafaqat bo‘sh ish o‘rinlari bilan tanishish, balki o‘z kasbiy yo‘nalishini aniq belgilash, ish beruvchilar bilan to‘g‘ridan-to‘g‘ri aloqa o‘rnatish va kelajak faoliyatini puxta rejalashtirishda muhim maydon bo‘lib xizmat qilmoqda.

12/03/2026

Rahbar va yoshlar uchrashuvi davom etmoqda

Haftaning har payshanba kuni “Yoshlar kuni” sifatida belgilangan. An'anaga muvofiq, bugun 12-mart kuni mazkur sana doirasida Guliston davlat universiteti rektori M.Xodjiyev bo'lg'usi shifokorlar-Tibbiyot fakulteti talaba-yoshlari bilan uchrashuv o'tkazdi.

Ochiq muloqot shaklida tashkil etilgan mazkur ucharshuvda talabalar o‘zlarini qiziqtirgan savollar bo‘yicha ishonchli va aniq ma’lumotlar olishdi. Uchrashuv yakunida yoshlarni har tomonlama qo‘llab-quvvatlash, ularning bilim va ko‘nikmalarini mustahkamlash hamda orzu-maqsadlarini ro‘yobga chiqarishda yordam berish davlat siyosatining ustuvor yo‘nalishlaridan biri ekani alohida ta’kidlandi.

10/03/2026

27/02/2026

Guliston davlat universiteti rektori M.Xodjiyevning Prezident Shavkat Mirziyoyevning yoshlar bilan ularning tashabbuslarini qo‘llab-quvvatlashga bag‘ishlangan muloqotida belgilangan vazifalalarni amalga oshirish bo‘yicha murojaati

Aziz yoshlar! Qadrli talabalar!
Bugun mamlakatimiz hayotida, ayniqsa, ta’lim va yoshlar siyosati sohasida yangi davr boshlandi. “Ko‘ksaroy” qarorgohida Davlatimiz rahbari Shavkat Miromonovich Mirziyoyevning 60 mingga yaqin yoshlar vakillari bilan o‘tkazgan ochiq va samimiy muloqoti biz – oliy ta’lim mutasaddilari zimmasiga naqadar yuksak mas’uliyat yuklanganini yana bir bor anglatdi.
Prezidentimizning “Yurtimizdagi 22 milliondan ziyod yoshlarimiz timsolida biz juda katta iqtisodiy, ijtimoiy va siyosiy kuchni ko‘ramiz”, degan so‘zlari har birimizning qalbimizda yangi O‘zbekiston bunyodkorlariga bo‘lgan ishonchni yanada mustahkamladi.
Muhtaram Prezidentimiz tomonidan belgilab berilgan tarixiy vazifalardan keyil chiqib, men Guliston davlat universiteti rektori sifatida quyidagilarni shaxsiy mas’uliyat bilan e’lon qilaman:
Birinchidan, bitiruvchilar bandligi – oliy maqsadimiz. Oliygohimizni tamomlayotgan har bir yigit-qizning hayotda o‘z o‘rnini topishi, munosib daromadli ish bilan ta’minlanishi uchun shaxsan mas’ulman. Endilikda biz faqat diplom bermaymiz, balki har bir bitiruvchini ish beruvchi bilan “qo‘lidan tutib” uchrashtiramiz. Sirdaryodagi yirik klaster va korxonalar universitetning doimiy hamkoriga aylanadi.
Ikkinchidan, startap va innovatsiyalarga yashil yo‘lak. Prezidentimiz tomonidan taqdimoti o‘tkazilgan “President Tech Award” loyihasi biz uchun katta dasturilamaldir. Universitetimizda 1 million dollarlik mukofot jamg‘armasiga ega bunday tanlovlarda g‘olib bo‘la oladigan loyihalarni tayyorlash uchun barcha sharoitlarni yaratamiz. Talabalarimizning har bir innovatsion g‘oyasi universitet tomonidan moliyaviy va tashkiliy jihatdan qo‘llab-quvvatlanadi.
Uchinchidan, fan olimpiadalari va xalqaro e’tirof. Yurtimiz yoshlarining jahon fan olimpiadalaridagi zafarlari bizni ruhlantiradi. Guliston davlat universitetida xalqaro olimpiadalarga tayyorlaydigan maxsus “Iqtidorlar akademiyasi” faoliyatini yo‘lga qo‘yamiz. Maqsadimiz – talabalarimizni dunyoning eng nufuzli oliygohlari talablariga mos kadrlar qilib tarbiyalashdir.
To‘rtinchidan, “Ikkinchi imkon” va ijtimoiy himoya. Prezidentimiz ilgari surgan insonparvarlik g‘oyalari asosida, ijtimoiy himoyaga muhtoj, "Yoshlar daftari"dagi har bir talaba bilan individual ishlaymiz. Birorta talabamiz e’tiborsiz qolmaydi.
Muhtaram professor-o‘qituvchilar va pedagoglar! Sizlarning zimmangizdagi mas’uliyat bugun har qachongidan ortdi. Prezidentimiz ta’kidlaganidek, har bir ustoz o‘z yo‘nalishida yoshlarni til va kasb-hunar o‘rganishi, g‘oya va loyihalarini ro‘yobga chiqarishi uchun asosiy yo‘l ko‘rsatuvchi bo‘lishi shart. Biz pedagoglarimizning mahoratini endi faqat berilgan dars bilan emas, balki shogirdlarining hayotda erishayotgan yutuqlari, ularning bandligi va kreativ g‘oyalari qanchalik amaliyotga joriy etilgani bilan baholaymiz. Sizlarni yoshlarimizning porloq kelajagi yo‘lida yanada tashabbuskor bo‘lishga chaqiraman.
Qadrli talabalarim! Sizlarning har bir tashabbusingiz, har bir orzungiz – men uchun muhim. Mening eshigim Sizlar uchun har doim ochiq. Biz birgalikda Sirdaryo zaminidan yangi O‘zbekistonning haqiqiy qahramonlarini yetishtirib chiqaramiz.
Ishontirib aytamanki, davlatimiz rahbari tomonidan yaratilgan bu keng imkoniyatlar besamar ketmaydi. Biz – rektorlar jamoasi bor kuch va salohiyatimizni Sizning porloq kelajagingiz uchun safarbar etamiz.

Muhsin XODJIYEV
Guliston davlat universiteti rektori,
texnika fanlari doktori, professor