Jiemurat Mambetkarimov - PDP University

01/10/2026

Bayram muborak, aziz hamkasblar!

"O'qituvchi va murabbiylar kuni" munosabati bilan "Oliy ta'lim a'lochisi" ko'krak nishoni bilan taqdirlandim. Davlat tomonidan berilgan bunday yuksak baho men uchun katta sharafdir. Bu e'tirofni avvalam bor oldimda turgan ulkan vazifalar uchun berilgan ishonch va mas'uliyat deb qabul qildim.

Ta'limni davlat siyosatining eng ustuvor yo'nalishiga aylantirgan muhtaram Prezidentimizga va Oliy ta'lim, fan va innovatsiyalar vazirligi rahbariyati hamda mutasaddilariga ko'rsatilgan e'tibor va bildirilgan ishonch uchun chuqur minnatdorchilik bildiraman.

Bu nishon menga topshirilgani bilan, aslida u PDP Universitetining butun mehnat jamoasiga berilgan e'tirofdir. Talabalarimizning bugungi o'qishi va ertangi kelajagi uchun tinimsiz kuch va vaqtini ayamayotgan jamoamizning har bir a'zosi bu mukofotning haqiqiy egasidir. Ularning fidoyiligi, sabr-bardoshi va hamjihatligisiz bugungi natijalarimiz bo'lmas edi. Shuning uchun, bu quvonchni har bir hamkasbim bilan teng baham ko'raman va ularga chin dildan rahmat aytaman.

Fursatdan foydalanib, ta'limning barcha bo'g'inlarida mehnat qilayotgan ta'lim fidoyilarini, hamda soha faxriylarini kasb bayrami bilan chin qalbimdan muborakbod etaman.

Barcha ustozlarga mustahkam sog'lik, oilaviy baxt va farovonlik, ezgu faoliyatlarida yangi yutuqlar tilayman!

01/09/2026

🇺🇿 Aziz hamyurtlar, barchani O'zbekiston Respublikasi mustaqilligining 35 yilligi bilan chin dildan tabriklayman!

35 yil degani, tarix miqyosida qisqa muddat bo'lsada, bu davrda mamlakatimizda ta'lim tizimini tubdan isloh qilish borasida katta ishlar amalga oshirildi: maktabgacha ta'lim va oliy ta'lim qamrovi bir necha barobar ortdi, xorijiy universitetlar bilan hamkorlikda qo'shma dasturlar ko'paymoqda, raqamli va zamonaviy texnologiyalarni o'rgatish davlat siyosatining alohida yo'nalishiga aylandi va bu IT sohasi jadal rivojlanishiga asos bo'lmoqda.

Bu yutuqlarning har biri ortida katta g'oya yotadi: erkin va farovon jamiyatni faqat bilimli avlod quradi.

PDP EcoSystem jamoasi sifatida biz ushbu buyuk maqsadning bir qismi ekanligimizdan faxrlanamiz. Har bir darsimiz, har bir loyihamiz, har bir o'quvchi va talabamiz - mamlakatimiz kelajagiga qo'shgan hissamizdir.

Biz zamonaviy va mustaqil fikrlaydigan, hamda vatanini chin dildan sevadigan yoshlarni tarbiyalashga bugun ham, ertaga ham sadoqat bilan xizmat qilishda davom etamiz.

Barchangizni ushbu ulug' bayram bilan yana bir bor tabriklayman!

Sizga va barcha yaqinlaringizga mustahkam sog'lik, xonadoningizga fayz-baraka va xotirjamlik tilayman!

16/08/2026

PDP Universitetining dastlabki, tarixiy 4 yilini muvaffaqiyatli yakunladik!

Ilk bitiruvchilarimizga diplom topshirish marosimi katta quvonch va yuksak saviyada o'tdi.

To'rt yillik mehnat, sabr va ishonchning natijasi bo'lgan bu marosimda talabalarimizga Davlat ro'yxatidan o'tgan diplomlarini topshirdik. Zalda hukm surgan xursandchilik, faxr va hayajon, barchamiz uchun unutilmas lahzalar bo'ldi.

Bu butun PDP oilasining bayrami. Ustozlarimiz, hamkasblarimiz, hamkorlarimiz, tinimsiz mehnat qilgan talabalarimiz va ota-onalarining birlashgan kuchi natijasida bu marraga yetib keldik.

Biz bu kunni to'rt yil kutgan bo'lsak, aziz ota-onalarimiz 20 yildan ortiq kutdilar. Farzandlarining birinchi qadamidan tortib, bugungi diplomigacha bo'lgan yo'lda ularning har bir tashvishi, mehri va duosi bor. Shu kunni ular bilan birga nishonlayotganimizdan behad xursandmiz. Bu sizlarning g'alabangiz, qadrli ota-onalar!

Aziz bitiruvchilar! Bu diplom sizning yangi, katta hayotingizga ochilgan eshikdir. Sizlar bilan doim faxrlanamiz va yangi yutuqlaringizni kutib qolamiz!

Bugungi kun, birlashgan kuch va ezgu niyat bilan qilingan har qanday ishning natijasi mana shunday go'zal bo'lishini isbotladi.

Ushbu marraga yetib kelishimizga o'z hissasini qo'shgan barchaga chin ko'ngildan minnatdorchilik bildiraman!

28/07/2026

Biz uchun, PDP Universiteti uchun tarixiy kun!

Butun vujudim to'la hayajon bilan sizlarga ushbu xabarni yetkazmoqchiman.

To'rt yil oldin biz bir orzu bilan yo'lga chiqdik. Kuchli liderlar va mutaxassislar tayyorlaydigan universitet qurish orzusi bilan. O'sha paytda bu yo'l uzoq va qiyin ko'rinardi. Ammo, har bir duch kelgan qiyinchiliklarimiz bizni yanayam kuchaytirdi.

🎉 Va mana, bugun, birinchi bitiruvchilarimizning Davlat tomonidan tasdiqlangan diplomlarini oldik!

Bu diplomlar - kuchli va hamjihat jamoamizning va talabalarimizning to'rt yillik matonatli mehnatlari, sabr, ishonch va umidlarining natijasi.

Bu yo'lda birga bo'lgan jamoamizga, ustozlarimizga va boshqa xodimlarimizga cheksiz minnatdorchilik bildirmoqchiman. Sizlarning har biringiz qo'shgan hissangiz bir bo'lib, katta natijaga aylandi. Qiyin damlarda ham ishonchini yo'qotmagan, bir-biriga suyanchiq bo'lgan hamkasblarimga chin dildan minnatdorman.

Va eng muhimi bizning talabalarimizga, ayniqsa mana diplomini qo'lga olish arafasida turgan birinchi bitiruvchilarimizga va ularning ota-onalariga alohida rahmat aytmoqchiman. Sizlar bizga ishondingiz. Hali hech kim bosib o'tmagan yo'lni, birinchi bo'lib, jasorat bilan tanladingiz. Har bir darsda, imtihonda ko'rsatgan sabringiz, har bir loyihada ko'rsatgan mehnatingiz, qiyinchiliklar oldida taslim bo'lmagan matonatingiz, aynan shular bizni oldinga undab turdi.

Sizlar PDP tarixini yozgan birinchi qahramonlarsiz.

🏆🏆🏆 Bu g'alaba barchamizniki!

03/08/2025

🚀 Kelajak biz oʻylagandan ham yaqinroq!

Google oʻzining "Gemini 2.5 Deep Think" nomli yangi sunʼiy intellekt (AI) modelini ishga tushirdi. Bu shunchaki "aqlli" yordamchi emas. Bu — chuqur fikrlay oladigan, bir nechta gipotezalarni tahlil qilib, eng toʻgʻri yechimni t**a oladigan raqamli ong.

Videoda shuni koʻrishingiz mumkinki, matematik olim bu model yordamida yillar davomida hech kim yecha olmagan murakkab matematik gipotezani isbotlaydi. Tasavvur qilyapsizmi? AI endi shunchaki maʼlumot qidirmayapti, u fanda kashfiyotlar qilyapti!

Bu kabi texnologiyalarning shiddat bilan rivojlanishi bir savolni oʻrtaga tashlaydi: agar AI olimning ishini osonlashtirsa, dasturchining kodini takomillashtirsa va shifokorga diagnoz qoʻyishda yordam bersa, insonning roli qanday boʻladi?

Bu qoʻrqinchli esh*tilishi mumkin, lekin aslida bu — ulkan imkoniyatlar eshigi. Biz bu kelajakka tayyor boʻlishimiz uchun nima qilishimiz kerak?

1. AI bilan hamkorlik qilishni oʻrganing. Unga raqobatchi sifatida emas, balki oʻz qobiliyatlarimizni kuchaytiradigan yordamchi sifatida qarang. Undan toʻgʻri foydalanish — bu yangi davrning eng muhim koʻnikmasi.
2. Tanqidiy va kreativ fikrlang. AI javob bera oladi, lekin toʻgʻri savolni hamon inson beradi. Kreativlik, nostandart yondashuvlar va hissiy intellekt — bular bizning asosiy ustunligimiz boʻlib qoladi.
3. Doimiy oʻrganishga odatlaning (long-life learning). Bugungi bilimlar ertaga eskirishi mumkin. Shuning uchun oʻz sohangizda va unga yondosh sohalarda doimiy ravishda yangi bilimlarni oʻzlashtirishga odatlaning.

AI bizning ishimizni olib qoʻymaydi. U bizni oʻz ishimizni boshqacha, samaraliroq va qiziqarliroq qilishga undaydi. Bu poygada yutqazmaslik uchun shunchaki kuzatuvchi boʻlib qolmasdan, faol ishtirokchiga aylanish vaqti keldi!

Gemini 2.5 Deep Think is an enhanced reasoning mode called that uses new research techniques to consider multiple hypotheses before responding.We shared it w...

01/10/2024

Dunyoda minglab kasblar bor. Har birining o'z mas'uliyati va o'z vazifasi mavjud. Lekin mana shu insonlarning barchasi ustoz va murabbiyga muhtoj.

Qadr-qimmat bobida hattoki otaga tenglashtirilgan ushbu ulug' kasb egalarini "1-oktabr - O'qituvchi va murabbiylar kuni" munosabati bilan muborakbod etamiz.

PDP University doimo ustoz-murabbiylarning fidoyi mehnatlarini yuqori baholaydi va hamisha qo'llab quvvatlaydi. Barcha pedagoglarimizni bayram bilan tabriklaymiz hamda faoliyatlarida omad va zafarlar tilab qolamiz.

—

There are thousands of professions in the world, each with its own responsibilities and duties. However, all these individuals need a teacher and mentor.

On the occasion of "October 1 - Teacher and Mentor Day," we congratulate these esteemed professionals, whose value is even equated with that of a father.

PDP University always highly appreciates the dedicated work of teachers and mentors and continuously supports them. We congratulate all our educators on this holiday and wish them success and victories in their activities.

21/03/2024

Bugun Ilon Maskning Neuralink kompaniyasi ilk bor inson miyasiga o'rnatilgan chip yordamida kompyuterni xayol orqali boshqarayotgan videosini e'lon qildi.

Ushbu videoda yangi texnologiyalar dunyoni qanday o'zgartirib yuborayotganini va kundalik hayotimizga yangi imkoniyatlar olib kirayotganini ko'rishimiz mumkin.

O'zbekiston yoshlari ham bu kabi innovatsiyalarni yaratish salohiyatiga ega va bunday iqtidorli yoshlar soni mamlakatimizda yetarlicha. Bizning vazifamiz ularni qo'llab-quvvatlash, ularga zarur bilim va ko'nikmalarni berish hamda yaratuvchanliklarini rag'batlantirishdir.

Buning uchun ularni zamonaviy texnologiyalarga yo'naltirish va ularga texnologiya sohasida o'z kashfiyotlarini ro'yobga chiqarishlari uchun zarur bo'lgan sharoitlar yaratib berishimiz kerak.

01/10/2023

Hurmatli va aziz ustozlar!

Bugungi bayram sizlarni nafaqat tabriklash imkoniyati, balki ko'proq sizlarning yosh avlodni tarbiyalash orqali insoniyat kelajagini qurish kabi buyuk missiyangizni e'tirof etish va sizlarga bo'lgan hurmatimizni bildirish imkoniyatidir.

Ustoz va murabbiylik - bu san'at. Inson ongini va xarakterini shakllantirish san'ati, bilim olish va izlanishlarga o'rgatish san'ati. Siz beradigan boylik, shogirtlaringiz ongida va ko'nglida mangu qoladi, uni hech kim tortib ola olmaydi.

Ustozlik qilish oson ish emas albatta. Katta sabr, sadoqat va tinimsiz izlanish talab qiladi. Kundalik turmush tashvishlari bilan sizning qilayotgan mehnatingizning asl mohiyati sezilmay qolishi, ko'pchiligimiz uni oddiy majburiyatday qabul qilishimiz mumkin.

Lekin bilamizki, siz bunga qaramasdan jamiyatimiz kelajagini qurishda davom etasiz va sizning har bir harakatingiz, har bir darsingiz, har bir maslahatingiz muhim.

Bugun sizga chin ko'ngildan minnatdorchilik bildiramiz. Har bir kuningiz bugungiday hurmat-izzatga, iliq so'zlarga boy bo'lsin!

Qadrli ustozlar, bayramingiz muborak bo'lsin! Sizlarga mustahkam sog'lik, tugamas kuch-g'ayrat va ilhom, oilangizga baxt-saodat, ishlaringizga muvaffaqiyat tilaymiz!

08/09/2023

Katta xursandchilik bilan sizlarga bitta yangilikni bo'lishmoqchiman: ajoyib o'qituvchilarimizdan biri Zubayda Temirova PhD darajasi ilmiy ishlarini amalga oshirish uchun POSCO granti sohibi bo'ldilar!

Bu grant o'qituvchilarimiz mehnatlarining jahon miqyosida tan olinishi va universitetimizning akademik sohadagi o'rnini ko'rsatadi.

Zubayda Temirovani bu muhim yutuq bilan tabriklaymiz va kelajakda IT sohasiga katta-katta ilmiy hissalarini qo'shishlarini kutib qolamiz!

17/08/2023

Bugun talabalarimiz orasida dasturlash bo’yicha o’tkazilgan olimpiada g’oliblarini taqdirladik. Olimpiada qatnashuvchilarini va g’oliblarini chin ko’ngildan tabriklayman. O’ylaymanki bu olimpiada, talabalarimizning bilim olish jarayoniga yana bir bor kuchli impuls berdi.

⚡️ Meni alohida xursand qilgan jihati, 1-o’rinni qizlarimizdan biri qo’lga kiritganligi bo’ldi.

Ko’pchilikning fikrida, IT sohasi o’g’il bolalar bilan bog’lanadi. Lekin mana, bu stereotiplar ko’z o’ngimizda buzulmoqda.

Dasturlash - bu quruq kodlar emas, bu san’at, ijodiy va tahliliy fikrlash. Xilma-xil g’oyalar va yondashuvlar xilma-xil qarashlardan paydo bo’ladi. IT sohasini tanlagan har bir qizimiz jamiyatimizdagi masalalarning innovatsiyon yo’l bilan hal qilinishida o’z hissalarini qo’shishlariga ishonaman.

Bu g’alabani stereotiplar ustidan xilma-xillikning, o’ziga bo’lgan ishonchning g’alabasi desak ham bo’ladi.

Kelajak - cheklovlarni pisand qilmaydigan, o’ziga ishonadigan, maqsadlari yo’lida va bilim olishda to’xtamaydigan yoshlar qo’lida.