25/05/2026
WILLEMSTAD – Djabièrnè, 22 di mei 2026, ORV a organisá un “Afsluitingsceremonie” na Acoya Resort pa selebrá e finalisashon di e Basis Politie Opleiding (BPO) di e klas BPO-2024-I. E klas, ku tabata konsistí di 12 studiante, a kuminsá nan trayekto di estudio na aña 2024 i a kompletá nan formashon ku éksito e aña akí, i awor ta fungi ofisialmente komo agente polisial den nos komunidat.
E anochi spesial akí a reuní graduadonan, famia, amigunan, i personal di ORV pa rekonosé e dedikashon, perseveransia i kompromiso ku e studiantenan a demonstrá durante nan trayekto di formashon.
Durante e seremonia, diferente oradó a dirigí palabranan di felisitashon i motivashon na e graduadonan, entre nan Sèktor Mènedjer di ORV, Sr. Jowenny Troeman, Direktora di ORV, Sra. Alpha Falbru, i nos Promé Minister, Sr. Gilmar Pisas. Minister Pisas, a enfatisá den su diskurso, e importansia di integridat, disiplina, dedikashon i profeshonalismo den nan funshon komo miembro di kuerpo polisial, i pa nan kòrda semper ku nan a huramentá pa sirbi i protehá nos komunidat.
Tambe a duna rekonosementu spesial na e tres studiantenan ku a sobresalí den e klas pa nan prestashon ekselente. E studiantenan akí tabata: Sra. Samantha Nivillac, Sra. Angelique Felicia i Sr. Sudi Quirindongo.
E seremonia tabata bou di guia di gerente di rekurso humano, di ORV, Sra. Deborah Curiel kende a fungí komo maestra di seremonia durante e anochi.
Despues di e entrega ofisial di diploma, e graduadonan, invitadonan i personal di ORV a disfrutá huntu di un bufèt i músika den un ambiente festivo i alegre.
ORV ta orguyoso ku e finalisashon di e formashon di klas BPO-2024-1 i ta deseá nan hopi éksito den nan trayekto profeshonal komo polisnan den servisio di nos komunidat.
